Lucas 15
15
Aju techal ti'j ju ẍne'l kyaj tzpet
Mateo 18.10-14
1Kykyaqil qe peyil pwaq kyuk'ix qe aj il e pon laq'e' ttxlaj Jesús tu'n kyb'inte tyol, 2atzun kye fariseo ex qe xnaq'tzal ti'j ley in che wululun ti'j Jesús, ex kyma:
—Ate xjal lu in che tk'mo'n qe aj il ex in wa'n kyuk'il.
3Atzunte Jesús xi tma'n ju techal lu kye:
4—¿Alkye jun xinaq kyxole qa at jun syent t-ẍne'l, ex qa ma kyaj naj jun kyxol, mlaypelo che kyaj tq'o'n qeju 99 tuj kojb'il, ex kxe'l jyolte aju otoq kyaj tzpet okxi tknet tu'n? 5Oktzun tknet tu'n, kjawix tq'o'n twi t-semil in tzalaj ti'j; 6oktzun tul tja, che tzajel tchmo'n qe tamiw ex qe tvesin, ex kxel tma'n kye: Che tzalajxe wuk'ile porke ma knet ju tal nẍne'le aju otoq kyaj tzpet, chilo xjal. 7Kyja'tzun, kxel nma'ne kyeye: Mas che tzalajel qeju ate' tuj kya'j ti'j jun aj il qa ma tz'ajtz ti'j tanmi, kywitz qeju 99 xjal tuj kywitz qa tz'aqlxix qe ex mya il ti'j tu'n tajtz ti'j kyanmi.
Aju techal ti'j ju pwaq xi naj
8Ex alkye jun xu'j qa at laj saq pwaq tuk'il, ex qa ma txi naj jun saq pwaq, ¿mlaypelo tz'ok ttxaqo'n jun kandil, ex kb'ajel ttz'iso'n tuj ja, ex cheb'a kb'ajel tjyo'n tu'n tknet tu'n? 9Oktzun tknet pwaq tu'n, che okel tchmo'n qe tuk'il ex qe tvesin, ex kxel tma'n kye: Che tzalajxe wuk'ile porke ma knet aju saq pwaq otoq txi naj wu'ne, chilo xu'j. 10Kyja'tzun in xi nma'ne kyeye: Ax ikx at tzalajb'il kyxol qe t-anjel Dios ti'j jun aj il qa ma tz'ajtz ti'j tanmi.
Aju techal ti'j jun k'wa'lb'aj b'aj tnajsa'n tkyaqilju tpwaq
11Ax ikx xi tma'ntl Jesús:
—At jun xjal attoq kab'e tky'ajal; 12atzunte tz'inb'aj xi tma'n te tman: Tat, q'ontza wetzb'ile aju at woklene ti'j. Xitzun tq'o'n mamb'aj kyetzb'il. 13Ex yajxi ch'intl, ok tchmo'n tz'inb'aj tkyaqilju tetzb'il ex xi' tuj juntl tnam najchaq; ex atzun b'aj tnajsa'n tkyaqilju tpwaq ti'j achb'il te twitz tx'otx'. 14Tej tb'aj tnajsa'n tkyaqilju tpwaq, tzaj jun we'yaj nimxix tuj tnam lu, ex ya minti' kanun aju in ajb'en te. 15Xi'tzun jyol taq'un ex pon tuk'il jun xjal aj tnam, ex xi lajo'n tuj kojb'il tu'n kyok tkwentin qe b'och. 16Ex o tajb'exix tu'n tnoj tk'u'j tu'n kylo' b'och, ex mi jun xjal tzaj q'onte te. 17Ex ultzun ti'j tk'u'j ex tma: Nimku majen ate' tja nmane at nimxix kywa, atzun weye tzalu ch'ix nkyime tu'n we'yaj. 18Chin ajel meltz'aje tuk'il nmane, ex kxel nma'ne te: Tat, ma chin b'inchane il twitz Dios ax ikx twitza. 19Mya b'a'n qintle tu'n tok nb'iye tk'wa'la, chin tq'o'nka ik tza'n jun tmajena, nchiye kxel nma'ne. 20Kub'tzun b'e tu'n, ajtz meltz'aj tu'n tul tuk'il tman.
Na'nxtoq tkanun, o ilwaj tu'n tman, tzaj q'aq'an tk'u'j tman ti'j, ex xi' qelan kanul ti'j, tzaj tchle'n, ex el ttz'ub'an twitz. 21Xitzun tma'n k'wa'l te tman: Tat, ma chin b'inchane il twitz Dios, ax ikx twitza; mya b'a'n qintle tu'n tok nb'iye tk'wa'la. 22Atzunte mamb'aj xi tma'n kye tmajen: Juratx kyi'ntze aju tb'anil xb'alun ex kyq'o'nke ti'j; ex kyq'o'nke jun xmulq'ab' ti'j tal tq'ab', ex kyq'o'nke t-xajab'. 23Kyi'ntze jun tb'anil tal wakẍ ex kyb'yonkuye tu'n qik'san ninq'ij ex tu'n qwa'n. 24Porke aju nk'wa'le lu kyimnitoq, ex ma jaw anq'in, tzpetnitoq ex ma knet, chi mamb'aj. E oktzun ten ik'sal ninq'ij.
25Atzunte tzikb'aj attoq tuj kojb'il, tej tul laq'e' niqayin ttxlaj ja o tb'i tq'ajq'ajel twi chnab' ex b'ixb'il. 26Tzajtzun ttxko'n jun majen ex xi tqanin te ti in b'aj. 27Atzunte majen tma: Ma tzul titz'ina ex ma tzaj tma'n tmana tu'n tkub' b'yet jun tal wakẍ tb'anilxix tu'nju b'a'n ma tzul. 28Atzunte tzikb'aj tzaj nimxix tq'oj, ex minti' tajb'e tu'n tokx tuja. Etztzun tman ex o kub'san twitz tu'n tokx. 29Atzunte tzikb'aj xi tma'n te tman: Ela'xi ab'q'i in chin ajb'ene teya ex minti' in chin ik'e tib'aj tleya, ex b'ajx tzaj tq'o'na jun tal chip weye tu'n tkub' wik'sane jun ninq'ij kyuk'il wamiwoye. 30Tejtzun sul tk'wa'la lu, aju ma b'aj najsa'n tpwaqa tu'n kyuk'il qe xu'j jawni kywitz kyuk'il xinaq, ma kub' tb'yo'na jun tal wakẍ tb'anilxix, chi tzikb'aj. 31Atzunte mamb'aj xi tma'n te: Nk'wa'l, bay teya ax ta'ya wuk'ile, ex tkyaqilju at weye, teya. 32Ex tuj tumelxix jlu tu'n qik'san ninq'ij ex tu'n qtzalaj; porke aju titz'ina lu kyimnitoq, ex ma jaw anq'in; tzpetnitoq, ex ma knet, chi mamb'aj.
Právě zvoleno:
Lucas 15: MAMNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
