Lucas 16
16
Aju techal ti'j ju mayordom mya b'a'n
1Ax ikx xi tma'ntl Jesús kye t-xnaq'tzb'en:
—Attoq jun xinaq q'inun at jun tmayordom, ex e pon xjal q'malte te kyja': Aju tmayordoma noq in b'aj tnajsa'n tpwaqa, che chi. 2Atzunte patrón txket mayordom tu'n ex xi tma'n te: ¿Ti tten jlu in nb'i'ne ti'ja? Yek'untz taq'unb'ena, ex mlay tentla te nmayordome. 3Atzunte mayordom ok ten ximal ti'j: ¿Ti ok nb'incha'ye? Porke k'elel ti'n npatrone waq'une tu'n mi'n ntentle te tmayordom. Minti' wipune tu'n waq'nane ti'j tx'otx', ex kye chin ch'ixwiye tu'n nxi'ye mo'l. 4B'a'n wu'ne ti ok nb'incha'ye tu'ntzun nk'mete kyu'n xjal tuj kyja ok welq'i'ne ti'j waq'une. 5E tzajtzun ttxko'n teyle junjun qeju at kyk'as tuk'il tpatrón, ex xi tma'n teju tnejel: ¿Jte' tk'asa at tuk'il npatrone? 6Atzunte xjal tzaj tma'n: Jun syent barril aseyt nk'ase. Xitzun tma'n mayordom te: Lu u'j lu jatum tz'ib'an tk'asa; juratx qekuya ex tz'ib'an ku'xa o'kx 50. 7Ex xi tma'n te juntl: ¿Yajtzun teya, jte' tk'asa? Atzunte xjal tzaj tma'n: Jun syent caja triw. Xitzun tma'n mayordom te: Lu u'j lu jatum tz'ib'an tk'asa; tz'ib'an ku'xa o'kx 80, chi mayordom. 8Kyja'tzun xi tma'n patrón; Aju mayordom lu mya b'a'n ex list, tu'nju at tnab'l tu'n tb'inchante jlu, chi patrón. Porke qe xjal mya okslal ate' tuj tq'ijlalil ja'lo mas at kynab'l kyxolx kywitz qe okslal ate' tuj spik'un.
9Kyja'tzun kxel nma'ne kyeye, tz'ok tililx kyu'ne tu'n kychmet kyamiwoye tu'nju q'inumab'l at twitz tx'otx', tu'ntzun kyk'monjtze tuj najb'il te jumajx ok tkub' b'aj aju at kyeye.
10Alkye in japunxix tu'n tuj ch'in, ax ikx tuj nimxix in japun tu'n; ex alkye minti' in japunxix tu'n tuj ch'in, ax ikx tuj nim mlay japun tu'n. 11Qatzun minti' xjapunxix kyu'ne ti'j ju q'inumab'l mya b'a'n, ¿alkyetzun tzul q'onte kyeye jun q'inumab'l axix tok? 12Ex qa minti' ma japun kyu'ne aju ma tzaj oqxenan kyeye tu'n juntl, ¿alkyetzun tzul q'onte kyeye aju kyexe?
13Mi jun majen jaku b'ant tajb'en te kab'e patrón; ok k'elel tik'un xjal jun patrón, atzun juntl ok tk'ujla'; ex qa o'kx ok tq'a' tib' te jun patrón, atzun te juntl minti' taj ti'j. Mlayx b'ant tu'n kyajb'ene te Dios ex te q'inumab'l.
14Ax ikx in che b'in qe fariseo ti'j ju yol lu, ex e ok ten xmayil ti'j Jesús, tu'nju atzun tokxix kyk'u'j ti'j q'inumab'l. 15Xitzun tma'n Jesús kye:
—Aqeye in kyyek'un kyib'e kywitz xjal ik tza'n tz'aqlxix qeye, ex ojtzqi'n tu'n Dios aju at tuj kyanmiye; ex alkye qeju ma' kyoklen tuj kywitz xjal, ik'un qe tu'n Dios.
Aju tley Moisés ex aju tkawb'il Dios
16Na'nxtoq tul Juan, o'kx tley Moisés at kyuk'ile ex kyyol t-sanjel Dios. Atzun ja'lo tzajni ti'j Juan, in pakb'anjtz tqanil b'a'n ti'j tkawb'il Dios, ex kykyaqil xjal in kyipuman kyib' tu'n kyokx tuj.
17Mas jurat jaku naj kya'j ex tx'otx' twitz tu'n tnaj jun tal letr te ley qa minti' ma japun.
In tq'o'n Jesús xnaq'tzb'il tu'n mi'n tkub' tpa'n tib' xjal tuk'il t-xu'jil
Mateo 19.1-12; Marcos 10.1-12
18Qa at jun xinaq ma kub' tpa'n tib' tuk'il t-xu'jil, ex qa ma moje' tuk'il juntl xu'j, in tb'incha'n aj pajil; ex alkye jun xinaq ma moje' tuk'il ju xu'j otoq kub' tpa'n tib' tuk'il tchmil, ax ikx in tb'incha'n aj pajil.
Aju xjal q'inun ex Lázaro
19Attoq jun xjal q'inun nno'k t-xb'alumin tib' tu'n xb'alun tb'anilxix ex wi'yilxix, ex tkyaqil q'ij in ik'san ninq'ij ex nintz wa'n. 20Ax ikx at jun xjal meb'axix, Lázaro tb'i, nim tx'a'k ti'j, ex tx'ayl twitz tx'otx' ttzi tja q'inun. 21Ex o tajb'e Lázaro tu'n tnoj tk'u'j tu'n tb'uchil wab'j nne'l tz'aq ttxa'n tmes q'inun; ex in che ul qe tx'yan leq'al twitz tx'a'k tok ti'j. 22Kyimtzun te Lázaro ex xi q'i'n kyu'n anjel tu'n tpon ttxlaj Abraham. Ax ikx o kyim te q'inun ex ku'x maqu'n. 23Ex tej tyajlanjtz q'inun tuj kynajb'il kyimni, jaw tke'yin twitz ex o til q'inun, lu Abraham najchaq ta' tuk'ix Lázaro tok ttxlaj. 24Tzajtzun sch'in q'inun chi kyja': Nman Abraham, q'aq'antz tk'u'ja wi'je, samantza Lázaro ex mu'ntz twi' tal tq'ab' tu'n a' tu'n tchewix waq'e, ex nimxix in chin k'ixb'isanjtze tuj q'aq' tzalu, chi q'inun. 25Xitzun tma'n Abraham te: Nk'wa'l, na'ntza, tej na'nxtoq tkyima tuj tzalajb'il o tena; atzunte Lázaro tuj b'is o ten. Atzun ja'lo in q'uqb'anjtz tk'u'j Lázaro tzalu, atzun teya in yajlanjtza ma chixin. 26Ex mya o'kx jlu, ax ikx at juntl, at jun matij tqan xaq ma' t-xe' tkub' qxol; alkye taj tu'n t-xi' tzalu tu'n tpon kyuk'ile, mlay tzik'x; ex mlay tzaj jun xjal kyuk'ile tu'n tul quk'ile, chi Abraham. 27Atzunte q'inun tzaj tma'n: Nman Abraham, chin kub'sale twitza tu'n t-xi t-sama'na Lázaro ma tja nmane, 28porke ate' jwe' wermaniye; b'a'n tu'n tyolin Lázaro kyuk'il, tu'ntzun mi'n kyul tuj lugar tzalu te k'ixb'isab'l, chi q'inun. 29Ex xi tma'n Abraham te q'inun: At tley Moisés kyuk'il tuk'ix kyu'jil t-sanjel Dios; b'a'n tu'n t-xi kyb'i'n. 30Atzunte q'inun tzaj tma'n: Mlay nman Abraham; ex qa at jun kyxol kyimni ma txi' yolil kyuk'il, k'ajetz ti'j kyanmi. 31Atzunte Abraham xi tma'n te: Qa minti' in kub' kyb'i'n aju in tma'n tuj tley Moisés ex tuj kyu'jil t-sanjel Dios, ax ikx mlay txi kyoksla'n tyol jun xjal qa ma jaw anq'in kyxol kyimni, chi Abraham.
Právě zvoleno:
Lucas 16: MAMNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
