मर्कुस 12
12
माःताक्पा कीसानक्याइ पेदाम
(मत्ती २१:३३-४६; लुका २०:९-१९)
1ओः तीङ्ला येशुइ यहुदीक्याइ छेस्यो मीःक्याला दीखो पेदाम लाःसी, “मेःन्दा चीग मीःइ राःङगीइ सीःङ्ला अङ्गुर चुदी ओः अङ्गुर सीःङगीइ छुरफारले वाःरा क्याःप्सी, ओःले अङ्गुर चीर्चेला होप चीग कोसी ओःले थोम्बो पालीप चीग जोसी। ओःले खुङगीइ ओः अङ्गुर सीःङ कीसानक्याला पीमाला तेर्सी, ओःले खुङदी राःङ्सा देशला काःल्सी। 2अङ्गुर छेमीःजीक खुङगीइ मेःन्दा चीग लाबुला राःङगीइ बो लेःङ्गाला ओः कीसानक्यासाःला ताङ्सी। 3इःनाङ ओः कीसानक्याइ ओःखोला रोप्ती चीङ मातेर्पा लोताङ्सी। 4खुङगीइ राःङ्सा लाबुला ताङ्सी। इःनाङ कीसानक्याइ खुङलाङ गोला रोप्सी ओःले ङोःछाबु जोसी। 5ओः तीङ्ला खुङगीइ राःङ्सा मेःन्दा चीग लाबुला ताङ्सी इःनाङ ओःखोला नी खुङक्याइ सेतेर्सी। खुङक्याइ राःङ्सा माःङ्बुरा लाबुक्यालाङ ओःन्डुलेरा रोप्सी ओःले काःजेलादी सेसी। 6ताः ताङ्जेला खुङगीइ च्याःम्बु पेःक्योक राःङगीइ पुः चीग्रा एःके। थाम्जेर भन्दा तीङ्ला खुङगीइ ‘ङाःइ पुःला नी खुङक्याइ सेःसा पेःडो।’ लाःती राःङगीइ पुःला खुङक्यासाःला ताङ्सी।
7इःनाङ ओः कीसानक्याइ खुङला थोङ्दी एःन्डु लाःकाला स्युःसी, ‘दीखो नी सीःङगीइ तोःप्ताइ पुः इःङे। उः दीखोला सेका ओःले खुङगीइ ज्योर्केन दी अंश उःइदीरा ओःङेन एः।’ 8ओः सोङ्गारा, खुङक्याइ ओः तोःप्ताइ पुःला जुम्दी सेसी ओःले अङ्गुर सीःङगीइ फीला खेर्ती क्युर्तेर्सी।”
9येशुइ खुङक्याला टीःसी, “ताः ओःखो सीङगीइ तोःप्ताइ ची पेःडो ले? खुङ राःङरा ओःङ्दी ओः माःताक्पा कीसानक्याला सेकेन एः ओःले राःङगीइ सीःङ राःङ्सा कीसानक्याला पीमा तेर्केन एः। 10ची ख्याक्याइ छ्येइ पेज्याला प्रुःक्योक दी तामक्या टोःदी म्याःपा?
‘खीम जोगेन्दीइ लेःगा म्याः लाःती क्युर्क्योक तोःरा
ओःखो तोःरा खीमगीइ चारकीइ मुल तोः काःल्सी।
11दीखो प्रभुइ पेःक्योक इःङे,
ओःले तागासुना दीखो काःजे यामाछाककीइदी एः।’#भजन ११८:२२-२३”
12यहुदीक्याइ छेस्यो मीःक्याइ येशुइ दी ताम खुङक्याइ वीरुद्धला लाःक्योक इःङे लाःती छोर्ती एःके। ओः सोङ्गारा, खुङक्याइ येशुला जुम्जे छोल्सी, इःनाङ मीःइ पोर्चोमगीइ जीबाइ पेःगासुना खुङक्याइ येशुला जुम्जे माःखु। ओः सोङ्गारा, खुङक्याइ येशुला पोःर्ती काःल्सी।
च्याल्गो च्याल्गेन्दी की मेच्याल्गेन्दी?
(मत्ती २२:१५-२२; लुका २०:२०-२६)
13ओः तीङ्ला खुङक्याइ येशुला तामला फसाइतीदो लाःती चीङ फारीसीक्या ओःले हेरोद क्याःल्बुइ चीङ मीःक्याला ताङ्सी। 14खुङक्या येशुसाःला ओःङ्दी लाःसी, “लोबेन, ख्याला मीःक्याइ ची लाःटो लाःती वास्तारा माःबेबा तेःन्दामगीइ ताम लाःकुए लाःती ङीःइ छोर्ती एः। ख्याइ सुइदीङ खा तादी लेःगा मेःबेए इःनाङ ख्याइ कोन्ज्योइ तेःन्दामगीइ लाःम लोप्कुए। ताः ङीःला लोःप, उःइ रोमी क्याःल्बु कैसरला च्याल्गो च्याल्जे डीक्पु एःपा की म्याःपा? 15उःइ च्याल्गो च्याल्गा की माच्याल्गा?”
इःनाङ खुङक्या च्याङ्बु चाक्योक छोर्ती येशुइ खुङक्याला लाःसी, “ख्योक्या ङाःला चीले फासाइतीजे छोल्गुबा? रोमी टाङ्गा डेबा चीग खेर्च्यो ओःले ताजे ना।”
16खुङक्याइ येशुला टाङ्गा चीग डेबा ख्योङ्दी तेर्सी। ओःले येशुइ खुङक्याला टीःसी, “दीला सुइदी छेन्दा ओःले मीःन एःपा?” खुङक्याइ लाःसी, “दीखो नी क्याःल्बु कैसरकीइदी इःङे।”
17ओःले येशुइ लाःसी, “ओःन्डु एःना ची क्याःल्बु कैसरकीइदी इःङे ओःखो क्याःल्बु कैसरलारा तेर ओःले ची कोन्ज्योइदी इःङे ओःखो कोन्ज्योलारा तेर।” येशुइ एःन्डुबा लेःन कोःदी खुङक्याला याःमाछाक नेसी।
सीक्योकलाःम्ले सेन्गेन्दीइ बारेला टीःक्योक
(मत्ती २२:२३-३३; लुका २०:२७-४०)
18ओः तीङ्ला चीङ सदुकीक्या येशुसाःला ओःङ्सी। खुङक्याइदी मीःक्या सीमीःजीक फीर्च्या मेसेन एः लाःती सेमल्हुक लुउके। ओःले खुङक्याइ येशुला टीःसी, 19“ए लोबेन, मोशाइ उःला प्रुःतेर्क्योक ठीम च्योःङ्राले, ‘सुइदीङ आताइदी पुःपोःमोरा माःकाःल्बा सीसी लाःना, आताइ लागी पुःपोःमो काःल्ज्युक लाःती नोःइ नामाला याःर्का क्याःप्कोःउए।’#व्यवस्था २५:५
20तीःनाम चीगला मेःन्दा तीःन आतानोःक्या एःके। छेस्योइ याःर्का क्याःप्सी ओःले खुङ पीःजा माकेबारा सीसी। 21ओः सोङ्गारा, पाःर्पा नोःइ नामाला याःर्का क्याःप्सी, ओःले खुङाङ पीःजारा माकेबा सीसी। ओःले पाःर्केबा नोःङ ओःन्डुरा पेःदी सीसी। 22थाम्जेर मेःन्दा तीःनगीइरा ओः नामाला याःर्का क्याःप्सी ओःलेङ पीःजारा माकेबा सीसी। थाम्जेर भन्दा तीङ्ला ओः पेःन्पीःजाङ सीसी। 23ओः सोङ्गारा, मीःक्या सीक्योकलाःम्ले सेन्गासुना ओः पेःन्पीःजा सुइ पेःमे ओःङ्गुबा? खुङला नी मेःन्दा तीःनगीइरा याःर्का क्याःप्ती एःके।”
24येशुइ खुङक्याला लेःन लोदी लाःसी, “ख्याक्या छ्योम्बो भुलला एः चीलेलाःना ख्याक्याइ नाः छ्येइ पेज्याइ बारेला सेदी एःपा नाः कोन्ज्योइ ल्हेइ बारेला सेदी एःपा। 25चीलेलाःना सीक्योकलाःम्ले सेन्गासुना मीःक्याइ याःर्का मेःक्याःपए, इःनाङ खुङक्या नी नाःम्खालीङला तेःकेन स्वर्गदुतक्या च्योःङ्रा ओःङ्गुए। 26सीक्योकक्या सेन्गुए लाःकेन तामगीइ बारेला ख्योक्याइ मोशाइ प्रुःक्योक छ्येइ पेज्याला टोःदी म्याःपा? बार्ती तेःक्योक पुःङ्माइ पेदामलाःम्ले कोन्ज्योइ मोशाला लाःसी, ‘ङाः अब्राहामगीइ कोन्ज्यो, इसहाककीइ कोन्ज्यो ओःले याकुबकीइ कोन्ज्यो इःङे।’#प्रस्थान ३:६ 27खुङ नी सीक्योकक्याइ कोन्ज्यो मीःङे, इःनाङ सोम्बोक्याइ कोन्ज्यो इःङे। ख्याक्या छ्योम्बो भुलला एः।”#१२:२७ येशुइ एःन्डु लाःती टाःटे पेःदेरा एःके, माःङ्बुरा तोःङ्ला जाम्बुलीङला तेःकेन दी मेःन्दा सुम मीःक्याइ कोन्ज्योला आराधना पेःउए लाःना, खुङक्या ताःरुङ सोम्बोरा ओःङ्कोः, चीलेलाःना खुङ सीक्योकक्याइ कोन्ज्यो मीःङे इःनाङ सोम्बोक्याइ कोन्ज्यो इःङे।
थाम्जेर भन्दा छ्योम्बो आज्ञा
(मत्ती २२:३४-४०; लुका १०:२५-२८)
28मेःन्दा चीग छ्येइ ठीमगीइ लोबेनगीइ ओःला लाःक्योक थाम्जेर ताम कोःदी तेःती एःके। येशुइ सदुकीक्याला याःबु लेःन लाःक्योक थोङ्दी खुङगीइयाङ येशुला टीःसी, “थाम्जेर आज्ञाक्या नाःङ्ला थाम्जेर भन्दा छ्योम्बोदी काःखो इःङे?”
29येशुइ लाःसी, “थाम्जेर भन्दा छ्योम्बो आज्ञादी दीखोरा इःङे ‘ए इस्राएलीक्या, कोःदो! उःइ प्रभु कोन्ज्यो चीग्रा प्रभु इःङे। 30ख्योइ राःङगीइ प्रभु कोन्ज्योला राःङगीइ थाम्जेर सेमगीइ, थाम्जेर मीःलीइ, थाम्जेर नावाइ, थाम्जेर ल्हेइ च्याःम्बु पेःदो।’#व्यवस्था ६:४-५ 31ओःले राःङ्सा छ्योम्बो आज्ञादी दीखोरा इःङे, ‘राःङगीइ टोःङ्रीला राःङला च्योःङ्रारा च्याःम्बु पेःदो।’#लेबी १९:१८ दी ङीथाल भन्दा राःङ्सा छ्योम्बो आज्ञा म्याः।”
32दी ताम कोःदी छ्येइ ठीमगीइ लोबेनगीइ येशुला लाःसी, “लोबेन, तेःन्दामरा ख्याइ डीक्पु लाःसी, ख्याइ लाःक्योक च्योःङ्रारा कोन्ज्यो नी चीग्रा चीग एः, खुङ बाहेक राःङ्सा सुङ म्याः। 33ओः सोङ्गारा, कोन्ज्योला राःङगीइ थाम्जेर सेमगीइ, राःङगीइ थाम्जेर नावाइ ओःले राःङगीइ थाम्जेर ल्हेइ च्याःम्बु पेःजे ओःले राःङगीइ टोःङ्रीला राःङला च्योःङ्रारा च्याःम्बु पेःजेदी तेःन्दामरा याःबु इःङे। दी ङीथाल आज्ञाक्यादी थाम्जेर होमबलीक्या ओःले बलीक्या भन्दाङ छ्योम्बो इःङे।”#होशे ६:६ 34खुङगीइ नावासाल्बुइ लेःन लोक्योक कोःदी येशुइ लाःसी, “ख्या कोन्ज्योइ क्याःल्खापलाःम्ले थारीःङ्बु म्याः।” ओः तीङ्ला सुइयाङ येशुला चीङ टीःजेला आ क्याःप्चे माःखु।
थार्च्युगेन ख्रीष्टकीइ बारेला टीःक्योक
(मत्ती २२:४१-४६; २३:१-३६; लुका २०:४१-४७)
35ओःले कोन्ज्योइ मन्दीरला लोप्तेरा एःकासुना येशुइ लाःसी, “थार्च्युगेन ख्रीष्ट काःन्डुले दाऊदकीइ छार्क्युफुर्क्यु इःङे लाःती छ्येइ ठीमगीइ लोबेनक्याइ लाःकुबा? 36कोन्ज्योइ चाङ्मा लालाःम्ले दाऊद राःङगीइरा नी एःन्डु लाःती एःके,
‘प्रभुइ ङाःइ प्रभुला लाःसी,
ङाःइ ख्याइ टाःलाङक्याला ख्याइ स्याःप्टावाला मानेमथुप
ख्या ङाःइ च्याःबु लाःक्पाछ्योले तेः।’#भजन ११०:१
37दाऊद राःङगीइरा ख्रीष्टला ‘प्रभु’ लाःमीःजीक काःन्डुले ख्रीष्टला दाऊदकीइ छार्क्युफुर्क्यु लाःकेन्दी?” मीःक्याइ पोर्चोमगीइ येशुइ लोप्क्योक तामला केःदाङ पेःदेरा कोःसी।
38फीर्च्या लोप्तेरा येशुइ लाःसी, “छ्येइ ठीमगीइ लोबेनक्या थोङ्दी च्यागाताःक्पु पेःदो। खुङक्या रीःङ्बु फोँस्योक केःङ्दी छुरफारला कोर्चेला सेम थेकुए, छोङ्साक्याला मीःक्याइ राःङला सेःसा पेःज्युक लाःती सेम पेःउए, 39ओःले जोम्साखीमक्याला ओःले डेनक्याला छ्योम्बो ठाउँक्या सेम थेकुए। 40खुङक्याइ मोःराङ्मुक्याइ खीमक्या फ्रोउए ओःले मीःक्याइ राःङला ताःक्पा लाःच्युक लाःती रीःङ्बु प्रार्थना पेःउए। एःन्डुबा मीःक्याइ नी ताःरुङ छ्योम्बो सजाय ज्योर्केन एः।”
मोःराङ्मुइ फुल्क्योक भेटी
(लुका २१:१-४)
41येशु कोन्ज्योइ मन्दीरला एःन लुगेन काःमगीइ सुःरला तेःती मीःक्याइ डेबा लुदेरा पेःक्योक तासी। माःङ्बुरा छ्युक्पु मीःक्याइ माःङ्बु डेबा लुसी। 42ओःले मेःन्दा चीग प्राङ्ना मोःराङ्मुइयाङ ओःङ्दी साःङ्गीइ छ्यामे टाङ्गा ङी डेबा लुसी। 43ओःले येशुइ राःङगीइ योबाक्याला केक्याःप्ती लाःसी, “तेःन्दामरा ङाः ख्याक्याला लाःके, दी प्राङ्ना मोःराङ्मुइ राःङ्सा थाम्जेरकीइ भन्दा छ्योम्बो भेटी ओः काःमला लुदी एः। 44चीलेलाःना राःङ्साक्याइ नी राःङगीइ ल्हाक्योक नोःरलाःम्ले तीबी चीग लुदी एः, इःनाङ दी मोःराङ्मुइ नी प्राङ्ना एःनाङ राःङगीइ साःदी सेन्कोःन नोःर थाम्जेर लुदी एः।”
S'ha seleccionat:
मर्कुस 12: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.