मर्कुस 11
11
यरुशलेमला येशुला तोःङ्ज्याङ पेःक्योक
(मत्ती २१:१-११; लुका १९:२८-४०; युहन्ना १२:१२-१९)
1खुङक्या यरुशलेमगीइ थामाला जैतुन काःङगीइ बेथफागे ओःले बेथानीया युःलगीइ थामाला लेप्कासुना येशुइ ङीथाल योबाक्याला एःन्डु लाःती तोःङ्लारा ताङ्सी, 2“ओः फार्च्यो युःलला सुङ। ख्योक्या ओः युःलला स्युःगासुना ख्योक्याइ नाःमाङ सुङ माःजाक्योक पुःङ्गुइ पीःब्रुला तादी ज्याक्योक फ्रेकेन एः। ओःखोला ताङ्दी तेला खेर्च्यो। 3सुइयाङ ‘दीखोला ची पेःक्योक?’ लाःती टीःसी लाःना, एःन्डु लोःप, ‘दीखो प्रभुला कोःती एः, खुङगीइ गेबुरा लोतेर्केन एः।’”
4खुङक्या काःल्सी ओःले खुङक्याइ ओः पुःङ्गुइ पीःब्रुला फीला लाःमला खीम चीगकीइ कोःइ फीला तादी ज्याक्योक फ्रेसी। खुङक्याइ ओःखोला ताङ्देरा पेःगासुना, 5ओःला लाःङ्दी तेःक्योक मीःक्याइ खुङक्याला टीःसी, “ओःखो पीःब्रुला चीले ताङ्जे छोल्क्योक?” 6येशुइ लाःक्योक च्योःङ्रा योबाक्याइ लेःन लोदी लाःसी, ओःले ओःला एःक्योक मीःक्याइ पुःङ्गुइ पीःब्रुला खेर्चे तेर्सी।
7खुङक्याइ ओः पुःङ्गुइ पीःब्रुला येशुसाःला ख्योङ्सी ओःले राःङगीइ चीङ केःलाक्या पीःब्रुखाला ज्यादी येशु ओःखाला जासी। 8माःङ्बुरा मीःक्याइ राःङगीइ केःलाक्या पीती लाःमला तीङ्तेर्सी ओःले राःङ्सा काःजेइदी सीःङलाःम्ले तोःङ्बोइ याःल्गाक्या ख्योङ्दी लाःमला तीङ्तेर्सी।#११:८ यहुदीक्याइ खुङक्याइ क्याःसाला छ्योम्बो मीःला तोःङ्ज्याङ पेःगासुना एःन्डु पेःउके। 9येशुइ तोःङ्ला ओःले तीङ्ला एःक्योक माःङ्बुरा मीःक्या केताङ्देरा एःन्डु लाःसी, “कोन्ज्योइदी प्रशंसा काःल्ज्युक! प्रभुइ मीःनला ओःङेन्दीला कोन्ज्योइ मोलाम तेर्च्युक!#भजन ११८:२५-२६ 10कोन्ज्योइ उःइ फामा दाऊद क्याःल्बुइ ओःङ्देरा पेःक्योक क्याःल्खापला मोलाम तेर्च्युक! नाःम्खालीङला तेःकेन कोन्ज्योइदी महीमा काःल्ज्युक!”
11येशु यरुशलेमला ओःङ्दी कोन्ज्योइ मन्दीर नाःङ्ला स्युःसी ओःले खुङगीइ छुरफारकीइ थाम्जेर स्याःक्याला तासी। इःनाङ खुङक्याला कुःल्बु काःल्सीःङ्क्योक सोङ्गारा मेःन्दा चीङ्ङी योबाक्या ङीमु येशु बेथानीयाला काःल्सी।
येशुइ नेभाराइ तोःङ्बोला खाम्सी क्याःप्क्योक
(मत्ती २१:१८-१९)
12ङार्तो च्योःङ्रा ङामु खुङक्या बेथानीयालाःम्ले यरुशलेम डोदेरा एःकासुना येशुला तोःपा तोसी। 13येशुइ तीबी चीग फार्च्योला लाःप्तीइ काःङ्क्योक नेभाराइ तोःङ्बो चीग थोङ्सी। इःनाङ खुङ ब्रुम्दो दुबा की लाःती तागाला डोगासुना ओःखो तोःङ्बोला लाःप्ती बाहेक राःङ्सा चीङ माःज्योर, चीलेलाःना ओः तीःजी नेभाराइ ब्रुम्दो कोःङेन तीःजी काःल्दी म्याःके। 14येशुइ ओः तोःङ्बोला लाःसी, “ताःमीःजीक ख्योलाःम्ले सुइयाङ ब्रुम्दो साःजे माःज्योर्च्युक!” ओःले दीखो ताम खुङगीइ योबाक्याइ कोःसी।
येशु मन्दीरला काःल्क्योक
(मत्ती २१:१२-१७; लुका १९:४५-४८; युहन्ना २:१३-२२)
15येशु यरुशलेम लेप्मीःजीक खुङ कोन्ज्योइ मन्दीरला काःल्सी ओःले खुङगीइ ओःला छोङ पेःगेनक्याला ओःलाःम्ले त्याःगाला स्युःसी। खुङगीइ डेबा चेःगेन मीःक्याइ#११:१५ डेबा चेःगेन मीःक्याइ दी डेबा चेःगेन मीःक्याइदी रोमी टाङ्गा डेबा ङीमु कोन्ज्योइ मन्दीरला चलाइतीगेन टाङ्गा डेबा चेःतेर्कुके, चीलेलाःना यहुदीक्याइ छेस्यो मीःक्याइ ओः टाङ्गा डेबाक्याइ बाहेक राःङ्सा डेबाक्याइ कोन्ज्योइ मन्दीरला च्याल्गो च्याल्जे ओःले बली तेर्केन पशुक्या ङ्योःजे मेतेर्के। च्योर्तेनक्या रील्तेर्सी ओःले पुःर्कालीङ चोङेनक्याइ तेःसाक्या रोम्तेर्सी। 16खुङगीइ कोन्ज्योइ मन्दीरकीइ लाःम पेःदी सुलाङ छोङ पेःगेन क्युःक्या खेर्केन्दी ख्योङेन्दी पेःजे मातेर। 17ओः तीङ्ला खुङगीइ मीःक्याला लोप्तेरा लाःसी, “छ्येइ पेज्याला एःन्डु प्रुःदी एः, ‘ङाःइ खीम थाम्जेर क्युःपाइ मीःक्याइ लागी प्रार्थनाइ खीम ओःङेन एः।’#यशैया ५६:७ इःनाङ ख्योक्याइ नी दीखोला च्याःक्पाक्याइ फुक जोदी एः।”#यर्मीया ७:११ 18दीखो ताम छेस्यो पुजाहारीक्या ओःले छ्येइ ठीमगीइ लोबेनक्याइ कोःसी ओःले येशुला सेकेन लाःम छोल्गाला स्युःसी। इःनाङ खुङक्या येशुला थोङ्दी जीउके, चीलेलाःना येशुइ लोप्क्योक थोङ्दी थाम्जेर मीःक्या याःमाछाक नेकुके। 19नाःम छेमीःजीक येशु राःङगीइ योबाक्या ङीमु यरुशलेम क्याःसालाःम्ले थेङ्दी काःल्सी।
नेभाराइ तोःङ्बोलाःम्ले लोप्क्योक
(मत्ती २१:२०-२२)
20ङार्तो च्योःङ्रा ङामुरा लाःमला डोगासुना डोगासुरा खुङक्याइ ओः नेभाराइ तोःङ्बोला थोङ्सी। ओःखो नी चार्ङेथुपरा काम्क्योक थोङ्सी। 21येशुइ ओः तोःङ्बोला लाःक्योक ताम पत्रुसकीइ टेःम्बा साल्सी ओःले खुङगीइ येशुला लाःसी, “तादो लोबेन, ख्याइ खाम्सी तेर्क्योक तोःङ्बो नी सीदु!” 22ओःले येशुइ योबाक्याला लाःसी, “कोन्ज्योला सेमल्हुक लुदो। 23तेःन्दामरा ङाः ख्याला लाःके, सुइयाङ सेमला तीबी चीगकाङ पाःकेन माःबे लाःना इःनाङ राःङगीइ लाःक्योक ताम पुरा ओःङ्गुए लाःती सेमल्हुक लुसी लाःना, दीखो काःङला ‘दीलाःम्ले थेङ्दी चाङ्बुला ताःप्तो’ लाःसी लाःना खुङगीइ लाःक्योक ओःङेन एः। 24ओः सोङ्गारा, ङाः ख्योक्याला लाःके, ख्योक्याइ प्रार्थना पेःदी ची लाङ्बा, ओःखो ख्योक्याइ ज्योर्सीःङ्दी एः लाःती सेमल्हुक लुदो ओःले ख्याक्याइ लाङ्क्योक ताम ज्योर्केन एः। 25ओःले ख्योक्या प्रार्थना पेःगासुना ख्योक्याइदी सुलाङ सीःताङ एः लाःना खुङला क्षमा तेर। ओःले नाःम्खालीङला तेःकेन ख्योक्याइ आबा कोन्ज्योइयाङ ख्योक्याइ लाःयो क्षमा पेःतेर्केन एः। 26[इःनाङ राःङ्साला क्षमा मातेर लाःना नाःम्खालीङला तेःकेन ख्योक्याइ आबा कोन्ज्योइयाङ ख्योक्याइ लाःयो क्षमा मेःबेगेन एः।]#११:२६ काःजे ग्रीक तामगीइ तोःङ्गीइ कोन्ज्योइ छ्येक्याला दीखो पद म्याः।”
येशुइ आङ्ज्याइ बारेला टीःक्योक
(मत्ती २१:२३-२७; लुका २०:१-८)
27येशु राःङगीइ योबाक्या ङीमु फीर्च्या यरुशलेमला ओःङ्सी। कोन्ज्योइ मन्दीरला डोदेरा पेःगासुना छेस्यो पुजाहारीक्या, छ्येइ ठीमगीइ लोबेनक्या ओःले राःङ्सा छेस्यो मीःक्या येशुसाःला ओःङ्सी 28ओःले खुङला टीःसी, “ख्योइ काःलाःम्ले आङ्ज्या ज्योर्ती दी लेःगाक्या पेःदेरा एःपा? दीखो आङ्ज्या ख्योला सुइ तेर्पा?” 29येशुइ खुङक्याला लाःसी, “ङाःङ ख्याक्याला ताम चीग टीःगे। ख्याक्याइ ङाःला लेःन लोसी लाःना ङाःइ काःलाःम्ले आङ्ज्या ज्योर्ती दी लेःगा पेःदेरा एःपा, ओःखो ख्याक्याला लाःके। 30युहन्नाइ बप्तीस्मा तेर्केन्दी आङ्ज्या काःलाःम्ले ज्योर्पा? कोन्ज्योलाःम्ले की मीःलाःम्ले?” 31खुङक्या नाःङ्लारा एःन्डुले ताम लाःकाला स्युःसी, “कोन्ज्योलाःम्ले लाःका लाःना ‘ख्याक्याइ चीले युहन्नाला सेमल्हुक मालुक्योक ले?’ लाःती खुङगीइ टीःउए। 32ओःले मीःलाःम्ले लाःका लाःना काःन्डुले लाःकेन्दी?” खुङक्या एःन्डु लाःचेला जीसी चीलेलाःना मीःक्याइ युहन्ना कोन्ज्योइ लेःङ्गो तेर्केन्दी मीः इःङे लाःती सेमल्हुक लुउके। 33ओः सोङ्गारा, खुङक्याइ येशुला लाःसी, “ङीःइ छोर्ती म्याः।”
येशुइ खुङक्याला लाःसी, “ओःन्डु एःना ङाःइ काःलाःम्ले आङ्ज्या ज्योर्ती दी थाम्जेर लेःगा पेदेरा एःपा, ङाङ ख्याक्याला मेःलाःप।”
S'ha seleccionat:
मर्कुस 11: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.