मर्कुस 10
10
ख्योबो छ्युङ्मा खाफ्यागेन बारेला येशुइ ताम
(मत्ती १९:१-१२; लुका १६:१८)
1ओःले येशु ओःखो ठाउँ पोःर्ती यहुदीयाइ क्षेत्र ओःले यर्दन लुःङ्बाइ फार्केनछ्योले काःल्सी। माःङ्बुरा मीःक्याइ पोर्चोम फीर्च्याङ जोम्सी ओःले येशुइ तेन्दु च्योःङ्रारा खुङक्याला लोप्सी।
2चीङ फारीसीक्या ओःङ्दी येशुला फसाइतीजे छोल्सी। खुङक्याइ येशुला टीःसी, “ची काःन्दीङ ख्य्वापीःजाइ राःङगीइ पेःमेला पोःर्चे उःइ ठीमला डीक्पु एःपा की म्याःपा?” 3येशुइ खुङक्याला टीःसी, “मोशाइ ची आज्ञा तेर्ती एःपा?” 4खुङक्याइ लाःसी, “मोशाइ नी ख्य्वापीःजाइ पोःर्केन इःगी प्रुःदी राःङगीइ पेःमेला पोःर्ना ओःङे लाःती एः।”#व्यवस्था २४:१-४ 5इःनाङ येशुइ खुङक्याला लाःसी, “ख्याक्याइ सेम ताःम्बु एःक्योक सोङ्गारा खुङगीइ दीखो आज्ञा तेर्क्योक इःङे। 6इःनाङ सृष्टी छुगासुना मीःजीकरा कोन्ज्योइ मीःइ क्युःपाला ख्य्वापीःजा रा पेःन्पीःजा पेःदी जोसी।#उत्पत्ती १:२७; ५:२ 7‘ओः सोङ्गारा, मीःइ राःङगीइ आबा आमाला पोःर्ती राःङगीइ पेःमे ङीमु डीक्कुए, 8ओःले खुङक्या जुबु चीगकीइदी ओःङ्गुए।’#उत्पत्ती २:२४ ओः सोङ्गारा, खुङक्या जुबु ङीइदी मीःङे, इःनाङ जुबु चीगकीइदी इःङे। 9ओः सोङ्गारा, कोन्ज्योइ थीक्योक मीःक्याला सुइयाङ खामाःफ्याज्युक।”
10खुङक्या खीमला लोःमीःजीक योबाक्याइ येशुला दीखो तामगीइ बारेला फीर्च्या टीःसी। 11येशुइ खुङक्याला लाःसी, “काःन्दीङ ख्य्वापीःजाइ राःङगीइ पेःमेला पोःर्ती राःङ्सा पेःन्पीःजाला याःर्का क्याःप्सी लाःना ओःखोइ राःङगीइ पेःमेइ वीरुद्धला व्यभीचार पेःउए। 12ओःन्डुलेरा राःङगीइ ख्योबोला पोःर्ती राःङ्सा ख्य्वापीःजा ङीमु याःर्का क्याःप्केन पेःन्पीःजाइयाङ व्यभीचार पेःउए।”
येशुइ पीःजाक्याला मोलाम तेर्क्योक
(मत्ती १९:१३-१५; लुका १८:१५-१७)
13येशुइ राःङगीइ लाःक्पा ज्यादी मोलाम तेर्च्युक लाःती मीःक्याइ राःङगीइ छ्यामे पीःजाक्याला खुङसाःला ख्योङ्सी। इःनाङ योबाक्याइ ओः मीःक्याला केतेङ्सी। 14येशुइ ओःन्डु लाःक्योक थोङ्दी राःङगीइ योबाक्याला केताङ्दी लाःसी, “पीःजाक्याला ङाःसाःला ओःङ्जे तेर, खुङक्याला माका, चीलेलाःना कोन्ज्योइ क्याःल्खाप दीखोक्या च्योःङ्राइ लागीरा इःङे। 15तेःन्दामरा ख्योक्याला ङाः लाःके, कोन्ज्योइ क्याःल्खापला पीःजाक्याइ च्योःङ्रा पेःदी माःलेःङथुप सुङ ओः नाःङ्ला स्युःजे मेःज्योर एः।” 16ओःले खुङगीइ पीःजाक्याला राःङगीइ फाङ्बाला लेःङ्सी ओःले खुङक्याखाला लाःक्पा ज्यादी मोलाम तेर्सी।
छ्युक्पु मीः
(मत्ती १९:१६-३०; लुका १८:१८-३०)
17येशु ओःलाःम्ले डोजे छोल्सुना मेःराङ चीग मीः छ्योङ्देरा ओःङ्सी ओःले खुङगीइ तोःङ्ला पीमु चुदी टीःसी, “ए याःबु लोबेन, ङाःइ नाःमाङ मीसीगेन मीःजी ज्योःर्चेला ङाःइ ची पेःकोउबा?” 18येशुइ खुङला लाःसी, “ख्योइ ङाःला चीले याःबु लाःकुबा? कोन्ज्यो चीग्रा याःबु एः राःङ्सा सुङ म्याः। 19कोन्ज्योइ छ्येइ ठीमगीइ आज्ञाक्या ख्योइ सेदीरा एः, ‘मीः मासे, व्यभीचार माःबे, माकु, राःङ्साक्याला स्योप क्युःर्ती माःताक्पा माःच्याङ, ठाग्माती ओःले आःबा आःमाला सेःसा पेःदो।’#प्रस्थान २०:१२-१६; व्यवस्था ५:१६-२०” 20ओः मीःइ लेःन लोदी लाःसी, “लोबेन, दी थाम्जेर आज्ञा नी ङाःइ छ्यामेमीःजीकरा ङीःन्दी एः।” 21येशुइ खुङला च्याःम्बु पेःदी तासी ओःले लाःसी, “ख्योइ ताःरुङ लेःगा चीग पेःजे लीःती एः। ख्यो ङीमु एःक्योक थाम्जेर स्याःक्या चोङ्दी प्राङ्नाक्याला केःतेर ओःले ख्याइ नाःम्खालीङला नोःर ज्योर्केन एः, ओः तीङ्ला स्यो ओःले ङाःला ब्य्राङ्दो।” 22दीखो ताम कोःदी खुङला तुःक्पु नेसी ओःले खुङ काःल्सी, चीलेलाःना खुङ माःङ्बुरा छ्युक्पु मीः एःके।
23येशुइ छुरफारला तादी योबाक्याला लाःसी, “छ्युक्पु मीःला कोन्ज्योइ क्याःल्खापला स्युःजेला माःङ्बुरा काःबु एः।” 24येशुइ ताम कोःदी योबाक्याला याःमाछाक नेसी। इःनाङ येशुइ फीर्च्या खुङक्याला लाःसी, “ङाःइ नोःक्या, कोन्ज्योइ क्याःल्खापला स्युःजेला माःङ्बुरा काःबु एः। 25छ्युक्पु मीः कोन्ज्योइ क्याःल्खापला स्युःजे भन्दा ऊँट खापकीइ सुपलाःम्ले स्युःजे तेःमु एः।” 26दीखो ताम कोःदी योबाक्या ताःरुङ याःमाछाक नेती चीगकीइ राःङ्साला टीःसी, “ओःन्डु एःना सुइदी थार्चे ज्योर्खुउबाले?” 27येशुइ खुङक्याला तादी लाःसी, “मीःक्याइ लागी नी दीखो पेःरामीःखुगेन लेःगा इःङे, इःनाङ कोन्ज्योइ लागी मीःङे, चीलेलाःना कोन्ज्योइ नी थाम्जेर लेःगा पेःखुउए।”
28ओःले पत्रुसकीइ लाःसी, “तादो, ङीःक्याइ नी थाम्जेर तामक्या पोःर्ती ख्याला ब्य्राङ्दी एः।” 29येशुइ लाःसी, “तेःन्दामरा ङाः ख्याक्याला लाःके, ङाःइ लागी ओःले याःबु लेःङ्गोइ लागी राःङगीइ आबा आमा, आतानोःक्या, आजीनोःमोक्या, पुःपोःमोक्या, खीम, सीःङ्क्या पोःर्केन्दीइ 30सतावट रा तुःक्पु ङीमु ङीमुरा दीखो भन्दा क्याः चीग गुणा माःङ्बु आबा आमा, आतानोःक्या, आजीनोःमोक्या, पुःपोःमोक्या, खीमक्या ओःले सीःङक्या ज्योर्केन एः ओःले तीङ्ला ओःङेन तीःनामला नाःमाङ मीसीगेन मीःजी ज्योर्केन एः। 31इःनाङ ताःसे तोःङ्ला एःकेनक्यादी तीङ्ला ओःङेन एः ओःले ताःसे तीङ्ला एःकेनक्यादी तोःङ्ला ओःङेन एः।”
येशुइ फीर्च्या राःङ सीगेन ङीःमाइ बारेला लाःक्योक
(मत्ती २०:१७-१९; लुका १८:३१-३४)
32खुङक्या यरुशलेमछ्योले डोदेरा एःके, ओःले येशु खुङक्याइ तोःङ तोःङ्ला डोदेरा एःके। योबाक्या याःमाछाक नेती एःके, ओःले राःङ्सा तीङ तीङ्ला ओःङेनक्यादी जीबा पेःदी एःके। ओःले खुङगीइ योबाक्याला फीर्च्या छ्योचीगछ्योले खेर्ती राःङखाला ओःङेन तुःक्पुइ बारेला लाःसी। 33खुङगीइ लाःसी, “कोःदो, उः यरुशलेमला डोदेरा एः। ओःला लेप्मीःजीक ङाः मीःइ पुःला छेस्यो पुजाहारीक्या ओःले छ्येइ ठीमगीइ लोबेनक्याइ लाःक्पाला तेर्केन एः, मृत्युदण्ड तेर्केन एः ओःले खुङला राःङ्सा रोमी छेस्यो मीःक्याइ लाःक्पाला तेर्केन एः। 34खुङक्याइ ङाः मीःइ पुःला ङ्याप्च्युक पेःगेन एः, छेमाक क्याःप्केन एः, कोर्राइ क्याःप्केन एः ओःले सेकेन एः। इःनाङ ङीःमा सुम तीङ्ला ङाः सीक्योकलाःम्ले सोम्बो ओःङेन एः।”
याकुब रा युहन्नाइ वासी
(मत्ती २०:२०-२८)
35ओः तीङ्ला जब्दीयाइ पुः याकुब रा युहन्ना येशुसाःला ओःङ्दी खुङला लाःसी, “लोबेन, ङीःइ सेम थेक्योक ताम ख्याइ पेःतेर लाःती ङीः वासी पेःगाला ओःङ्क्योक इःङे।” 36येशुइ टीःसी, “ख्योक्याइ लागी ङाःइ ची पेःतेर्का?” 37खुङक्याइ लेःन लोदी लाःसी, “ख्या महीमाइ छेसाला तेःकासुना ङीः आतानोःला ख्याइ च्याबु रा योमा लाःक्पाछ्योले तेःचे सेम थेती एः।”#१०:३७ क्याःल्बुइ च्याबु रा योमाछ्योलेदी ओः क्याःल्खापकीइ थाम्जेर भन्दा छ्योम्बो ल्हे एःक्योक मीःक्या तेःचे ज्योर्कुके। 38येशुइ लाःसी, “ख्योक्याइ ची लाङ्देरा एःपा, ओःखो ख्योक्याइ छोर्तीरा म्याः। ची ङाःइ थुङ्कोःन तुःक्पुइ मेःन्ज्यालाःम्ले ख्योक्याङ थुङ्खु? ची ङाःइ लेःङ्कोःन बप्तीस्मा ख्योक्याङ लेःङ्खु?” 39खुङक्याइ येशुला लाःसी, “ङीः खुगे।” येशुइ खुङक्याला लाःसी, “ङाःइ थुङ्कोःन तुःक्पुइ मेःन्ज्यालाःम्ले ख्याक्याइयाङ थुङेन एः ओःले ङाःइ लेःङ्कोःन बप्तीस्मा ख्याक्याइयाङ लेःङेन एः। 40इःनाङ ङाःइ च्याःबु ओःले ङाःइ योमा लाःक्पाछ्योले तेःचे तेर्केन तामदी ङाःइ लाःक्पाला म्याः। कोन्ज्योइ दी ठाउँक्या नी सुइ लागी तयार जोदी एःपा, खुङगीइ ओःखोक्यालारा तेर्केन एः।”
41दीखो ताम कोःदी राःङ्सा मेःन्दा च्यु योबाक्यादी याकुब रा युहन्ना ङीमु सीःताङ पेःसी। 42ओःले येशुइ खुङक्या थाम्जेरला ठाउँ चीगला केक्याःप्ती लाःसी, “ख्योक्याइ छोर्तीरा एः, जाम्बुलीङगीइ क्याःल्बुक्याइ मीःक्याखाला राःङला सेम थेक्योक लेःगा पेःउए, ओःले छ्योम्बो मीःक्याइदी राःङ्सा मीःक्याखाला आङ्ज्या पेःउए। 43इःनाङ ख्योक्यादी ओःन्डुबा ओःङ्जे मेःयोःङे। ख्योक्या नाःङ्ला छ्योम्बो ओःङ्जे छोल्गेन्दीइ राःङ्सा थाम्जेरकीइ मेःबा पेःकोःउए। 44ओःले थाम्जेर भन्दा तोःङ्ला ओःङ्जे छोल्गेन्दीइ थाम्जेरकीइ लाबु पेःकोःउए। 45चीलेलाःना ङाः मीःइ पुःङ राःङ्सालाःम्ले मेःबा ज्योर्चेला मीःङे, इःनाङ राःङ्साइ मेःबा पेःजेला ओःले माःङ्बुरा मीःक्याला थार्च्युजेइ लागी राःङगीइ मीःली तेर्चेला ओःङ्क्योक इःङे।”
येशुइ मी मेःथोङेन बारतीमैला टाःच्युक्योक
(मत्ती २०:२९-३४; लुका १८:३५-४३)
46येशु योबाक्या ङीमु यरीहो क्याःसाला ओःङ्सी, ओःले खुङक्या ओःखो क्याःसा पोःर्ती डोदेरा एःकासुना माःङ्बुरा मीःक्या खुङक्याला ब्य्राङ्देरा ओःङ्सी। लाःमगीइ सुःरला तीमैगीइ पुः बारतीमै लाःकेन मेःराङ चीग मी मेःथोङेन मीः लाङ्देरा तेःती एःके। 47नासरतकीइ येशु ओःङ्देरा पेःक्योक छोर्काराङ खुङगीइ छ्योम्बो के तेङ्दी लाःसी, “ए दाऊदकीइ पुः#१०:४७ दाऊदकीइ पुः यहुदीक्याइ थार्च्युगेन क्याःल्बु दाऊदकीइ छार्क्युफुर्क्युलाःम्ले ओःङेन एः लाःती ठीवा चेकुके। ओः सोङ्गारा, थार्च्युगेन ख्रीष्टलादी “दाऊदकीइ पुः” लाःतीङ लाःकुके। येशु, ङाःखाला नीङ च्योःदो!”
48माःङ्बुरा मीःक्याइ ओःखोला खाजुम तेः लाःती केतेङ्सी। इःनाङ खुङगीइ ताःरुङ छ्योम्बो के तेङ्दी लाःसी, “ए दाऊदकी पुः, ङाःखाला नीङ च्योःदो!” 49येशु ठीङे लाःङ्दी लाःसी, “खुङला एला केक्योःप।” खुङक्याइ ओः मी मेःथोङेन्दीला केक्याःप्ती लाःसी, “ख्यो केःदाङ पेःदो, येशुइ ख्योला केक्याःप्तेरा एः, गेबु स्यो!” 50ओःले ओः मीःइ राःङगीइ फोँस्योक क्युर्सी ओःले लाङ्दी येशुसाःला ओःङ्सी। 51येशुइ खुङला टीःसी, “ख्योइ लागी ङाःइ ची पेःगा?” खुङगीइ लाःसी, “लोबेन, ङाःइ मी थोङ्खुज्युक।” 52येशुइ लाःसी, “सुङ, ख्योइ सेमल्हुक लुक्योक सोङ्गारा ख्यो टाःदी एः।” ओः तेःकासुरा खुङ मी थोङेन्दी काःल्सी ओःले लाःमला येशुइ तीङ्ला ब्य्राङ्सी।
S'ha seleccionat:
मर्कुस 10: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.