मर्कुस 9
9
1ओःले येशुइ ताःरुङ लाःसी, “तेःन्दामरा, ङाः ख्याक्याला लाःके, कोन्ज्योइ क्याःल्खाप छ्योम्बो ल्हेला ओःङ्क्योक माःथोङ्थुप तेला लाःङ्दी तेःकेनक्या नाःङ्ला मेःन्दा काःजेदी मीसीगेन एः।”
येशुइ जुबु राःङ्सारा काःल्क्योक
(मत्ती १७:१-१३; लुका ९:२८-३६)
2दी ताम लाःक्योक ङीःमा टुःक तीङ्ला पत्रुस, याकुब ओःले युहन्नाला खेर्ती येशु थोम्बो काःङ चीगला काःल्सी ओःले ओःला खुङक्या चीग्रा एःके। ओःले योबाक्याइ तासुना तासुनारा येशुइ छेन्दा राःङ्सा काःल्सी। 3खुङगीइ केःला कार्मु ओःले माःङ्बुरा छ्य्वामे काःल्सी, एःन्डुबा की जाम्बुलीङला सुइयाङ ठुदी ओःजेबा कार्मु ज्योमीःखुए।
4ओःला खुङक्याइ एलीया ओःले मोशा येशु ङीमु ताम लाःतेरा पेःक्योक थोङ्सी। 5दीखो थोङ्दी पत्रुसकीइ येशुला लाःसी, “ए लोबेन, दीला ङीः एःक्योक नी याःबु काःल्दु। दीला सुमथाल चाङ्मा पाल जोगा, चीग ख्याला, चीग मोशाला ओःले चीग एलीयाला।” 6खुङ ओःले राःङ्सा योबाक्या माःङ्बुरा जीक्योक सोङ्गारा खुङगीइ ची लाःका ची काःल्दी एःके। 7ओःले मुक्पा ओःङ्सी ओःले ओःखोइ टीःप्सुककीइ खुङक्याला उप्सी। ओःले मुक्पालाःम्ले एःन्डुबा के ओःङ्सी, “दीखो ङाःइ राःङगीइ माःङ्बुरा च्याःम्बु पेःक्योक पुः इःङे, खुङगीइ लाःक्योक कोःदो ओःले ङीःन्दो।” 8एःन्डुबा लाःक्योक कोःदी योबाक्याइ छुरफारला तासी इःनाङ येशु बाहेक राःङ्सा सुलाङ माःथोङ।
9खुङक्या काःङलाःम्ले थुलला पाःप्तेरा एःकासुना येशुइ योबाक्याला लाःसी, “ङाः मीःइ पुः सीक्योकलाःम्ले सोम्बो माःकाःल्थुप तीःरीङ थोङ्क्योक ताम ख्योक्याइ सुलाङ माःलाःप।”
10ओः सोङ्गारा, खुङक्याइ येशुइ लाःक्योक ताम ङीःन्सी इःनाङ सीक्योकलाःम्ले सेन्जे लाःक्योकदी ची इःम्बा लाःती खुङक्या नाःङ्ला टेः पेःगाला स्युःसी। 11ओःले खुङक्याइ येशुला एःन्डु लाःती टीःसी, “छ्येइ ठीमगीइ लोबेनक्याइ चीले एलीयारा तोःङ्ला ओःङ्कोःउए लाःती लाःक्योक?”
12येशुइ लाःसी, “तेःन्दामरा इःङे, एलीया ओःङ्दी थाम्जेर तामक्या जोकोःउए। इःनाङ चीले ङाः मीःइ पुःइ माःङ्बुरा तुःक्पु खुर्कोःउए ओःले खुङला इन्कार पेःकोःउए लाःती कोन्ज्योइ छ्येला प्रुःक्योक इःङे? 13ङाः ख्योक्याला लाःके, एलीया नी ओःङ्सीःङ्दी एः ओःले खुङगीइ बारेला पेज्याला प्रुःक्योक च्योःङ्रारा मीःक्याइ खुङला ची सेम थेपा ओःखोरा पेःसी।”
येशुइ हेन्डी क्याःप्क्योक स्याराला टाःच्युक्योक
(मत्ती १७:१४-२१; लुका ९:३७-४३)
14खुङक्या राःङ्सा योबाक्या एःक्योक ठाउँला लेप्कासुना खुङक्याइ छुरफारले मीःइ पोर्चोम ओःले छ्येइ ठीमगीइ लोबेनक्या योबाक्या ङीमु टाःटे पेःदेरा पेःक्योक थोङ्सी। 15मीःक्याइ येशुला थोङ्लुङम्याःपा याःमाछाक नेसी, ओःले खुङ साःला छ्योङ्देरा काःल्दी खुङला तोःङ्ज्याङ पेःसी। 16ओःले येशुइ राःङगीइ योबाक्याला टीःसी, “ख्योक्या खुङक्या ङीमु ची तामगीइ बारेला टाःटे पेःदेरा एःपा?” 17ओःले मीःक्याइ पोर्चोमलाःम्ले मेःराङ चीगकीइ येशुला लेःन लोदी लाःसी, “ए लोबेन, ङाःइ पुः ख्या साःला ख्योङ्दी एः चीलेलाःना खुङला हेन्डी क्याःप्क्योक सोङ्गारा तामरा लाःमीःखुए। 18खुङला हेन्डीइ उप्मीःजीक खुङला साला क्युर्कुए। खुङगीइ खालाःम्ले प्वाः तेङ्गुए, सो मुःर्कुए ओःले दह्रो ओःङ्गुए। ङाःइ ख्याइ योबाक्याला ओः हेन्डी तेङ्तेर लाःती वासी पेःसी, इःनाङ खुङक्याइ तेङ्माःखु।” 19ओःले येशुइ लेःन लोदी लाःसी, “ए सेमल्हुक मीलुगेनक्या! ख्याक्या ङीमु ङाः ङीःमा काःजेथुप तेःका ओःले नागा? ख्याइ पुःला दीला खेर्च्यो।” 20खुङक्याइ ओः स्याराला येशु साःला ख्योङ्सी। ओः हेन्डीइ येशुला थोङ्लुङम्याःपा ओः स्याराला साला रील्सी ओःले खाला प्वाः तेङ्देरा छुरफार बोल्गाला स्युःसी। 21ओःले येशुइ आबादीला टीःसी, “दीखोला एःन्डुबा काःल्क्योक काःजे काःल्बा?” आबाइ लाःसी, “खुङ पीःजा एःकासुना मीःजीकरा एःन्डुबा काःल्क्योक इःङे। 22हेन्डीइ खोला इःक्पु इःक्पुलारा की मेःला की छ्युला लुदी सेचे छोल्गुए। ख्याइ खुउए लाःना ङीःखाला नीङ च्योःदी रोः पेःतेर।” 23येशुइ खुङला लाःसी, “ख्योइ चीले ‘ख्याइ खुउए लाःना’ लाःती लाःकुबा? सेमल्हुक लुगेन्दीइ नी थाम्जेर ताम पेःखुउए।” 24दीखो ताम कोःलुङ्म्याःपा आबादीइ केताङ्देरा लाःसी, “ङाः सेमल्हुक लुगे। इःनाङ ङाःइ सेमला एःक्योक पाःकेन माःयोङ्ज्युक लाःती रोः पेःतेर।”
25मीःक्या राःङछ्योले जोम्देरा ओःङ्क्योक थोङ्दी येशुइ हेन्डीला हाप्स्याल तेङ्दी लाःसी, “ए लेम्बा ओःले नाम्ज्यो मेःकोगेन हेन्डी, दी स्यारालाःम्ले थेङ्दी स्यो ओःले फीर्च्या खो नाःङ्ला नाःमाङ माःस्यु!” 26ओःले ओः हेन्डी के तेङ्देरा ओः स्याराला माःङ्बुरा बोल्च्युदी थेङ्दी काःल्सी। ओः स्यारा सीक्योक रोः च्योःङ्रारा काःल्सी ओःले थाम्जेरकीइ “ला स्यारा नी सीसी!” लाःकाला स्युःसी। 27इःनाङ येशुइ ओःखोइ लाःक्पा जुम्दी क्यासी ओःले स्यारा जुरुक्का लाःङ्सी।
28येशु खीम नाःङ्ला स्युःमीःजीक ओःला राःङ्सा सुङ म्याःक्योक तीःजीला योबाक्याइ येशुला टीःसी, “ङीःक्याइदी ओः हेन्डीला चीले तेङ्माःखुबा?” 29येशुइ लाःसी, “ओःन्डुबा हेन्डीदी प्रार्थना पेःदी चीग्रा तेङ्खुउए।”
येशुइ फीर्च्या राःङ सीगेन ङीःमाइ बारेला लाःक्योक
(मत्ती १७:२२-२३; लुका ९:४३-४५)
30येशु ओःले खुङगीइ योबाक्या ओः ठाउँ पोःर्ती गालीलगीइ लाःम पेःदेरा काःल्सी। खुङ ओःला एः लाःकेन ताम सुइयाङ माःछोर्च्युक लाःकेन्दी खुङगीइ सेम एःके, 31चीलेलाःना खुङ राःङगीइ योबाक्याला लोप्तेरा एःके। येशुइ खुङक्याला लाःसी, “ङाः मीःइ पुःला जुम्दीमाराङ मीःक्याइ लाःक्पाला तेर्केन्दी एः। खुङक्याइ ङाःला सेकेन एः, इःनाङ सीक्योककीइ ङीःमा सुम तीङ्ला सोम्बो काःल्दी लाःङेन एः।” 32इःनाङ योबाक्याइ दी तामगीइ लेःन सेमाःखु ओःले खुङला टीःजेलाङ जीबा पेःसी।
थाम्जेर भन्दा छ्योम्बो सु इःङे?
(मत्ती १८:१-५; १०:४२; लुका ९:४६-५०)
33खुङक्या कफर्नहुम युःलला लेप्सी ओःले खीम नाःङ्ला स्युःमीःजीक येशुइ योबाक्याला टीःसी, “लाःमला ओःङ्गासुना ख्योक्याइ ची तामला टाःटे पेःदेरा एःके?” 34इःनाङ खुङक्याइ चीङ माःलाःप चीलेलाःना खुङक्या नाःङ्ला सुदी छ्योम्बो इःङे लाःती टाःटे पेःदी एःके। 35ओःले येशु साला तेःसी ओःले चीङ्ङीरा योबाक्याला केक्याःप्ती लाःसी, “थाम्जेर भन्दा छ्योम्बो ओःङ्जे छोल्गेन्दीइ थाम्जेर भन्दा छीमी काःल्दी थाम्जेरकीइ मेःबा पेःकोःउए।” 36ओः तीङ्ला खुङगीइ पीःजा चीगला लेःङ्सी ओःले खुङक्याइ तोःङ्ला ज्यासी। खुङगीइ ओः पीःजाला राःङगीइ फाङ्बाला लेःङ्दी योबाक्याला लाःसी, 37“सुइ ङाःइ मीःनला पीःजाला तोःङ्ज्याङ पेःउबा, ओःखोइ ङाःलाङ तोःङ्ज्याङ पेःउए, ओःले सुइ ङाःला तोःङ्ज्याङ पेःउबा ओःखोइ ङाःला चीग्रा मीःङे इःनाङ ङाःला ताङेन ङाःइ आबालाङ तोःङ्ज्याङ पेःउए।”
38युहन्नाइ खुङला लाःसी, “लोबेन, मेःन्दा चीग मीःइ ख्याइ मीःनला हेन्डीक्या तेङ्देरा पेःक्योक ङीःइ थोङ्सी ओःले ङीःइ खुङला ओःन्डुबा माःबे लाःती लाःसी, चीलेलाःना खुङ उःइ छोबाइ मीः म्याःके।” 39येशुइ लेःन लोदी लाःसी, “खुङला माका। चीलेलाःना ङाःइ मीःनला यामाछाककीइ लेःगा पेःगेन्दीइ तुरुन्त ङाःइ वीरुद्धला माःरीक्पा ताम लाःमीःखुए। 40चीलेलाःना उःला वीरोध मेःबेगेन्दी उःइदीरा इःङे। 41तेःन्दामरा ङाः ख्याक्याला लाःके, सुइयाङ ख्योक्या थार्च्युगेन ख्रीष्टकीइदी इःङे लाःती ख्योक्याला ङाःइ मीःनला मेःन्ज्या काःङ छ्यु चीग्रा थुङ्जे तेर्सी लाःनाङ ओःखोइ इनाम ज्योर्केन एः।”
लाःयोलाःम्ले काःन्डुले थार्केन्दी?
(मत्ती १८:६-९; लुका १७:१-२)
42येशुइ फीर्च्या लाःसी, “सुइयाङ ङाःला सेमल्हुक लुगेन छ्यामेक्याला लाःयो पेःच्युसी लाःना, ओःखोइ जीङ्बाला छ्योम्बो लाःगोर प्याङ्दी चाङ्बुला क्युर्तेर्ना याःबु ओःङेन एः। 43ख्योइ लाःक्पाइ ख्योला लाःयो पेःच्युए लाःना ओःखोला तुप्तेर। ङीक्कार लाःक्पा एःती ङ्याल्वाला नाःमाङ मीसीगेन मेःला लेप्चे भन्दा नी लाःक्पा चीग एःती नाःमाङ मीसीगेन मीःजीला स्युःजे ख्योइ लागी याःबु इःङे। 44[ओः ङ्याल्वाला खुर्कोःन तुःक्पु नाःमाङ मीःसीःङ एः ओःले ओःलाइ मेः नाःमाङ मीसीए।]#९:४४ काःजे ग्रीक तामगीइ तोःङ्गीइ कोन्ज्योइ छेला ४४ ओःले ४६ पदक्या म्याः। 45ओःले ख्योइ काङ्बाइ ख्योला लाःयो पेःच्युए लाःना, ओःखोला तुप्तेर। ङीक्कार काङ्बा एःती ङ्याल्वाला स्युःजे भन्दा नी काङ्बा चीग एःती नाःमाङ मीसीगेन मीःजीला स्युःजे ख्योइ लागी याःबु इःङे। 46[ओः ङ्याल्वाला खुर्कोःन तुःक्पु नाःमाङ मीःसीःङ एः ओःले ओःलाइ मेः नाःमाङ मीसीए।] 47ओःन्डुलेरा ख्योइ मीइ ख्योला लाःयो पेःच्युए लाःना ओःखोला तेङ्तेर। ङीक्कार मी एःती ङ्याल्वाला स्युःजे भन्दा मी चीग एःती कोन्ज्योइ क्याःल्खापला स्युःजे ख्योइ लागी याःबु इःङे। 48ओः ङ्याल्वाला खुर्कोःन तुःक्पु नाःमाङ मीःसीःङ एः ओःले ओःलाइ मेः नाःमाङ मीसीए।
49 छाइ बलीदानला चाङ्मा जोक्योक च्योःङ्रारा थाम्जेर मीःला मेःइ चाङ्मा जोगेन एः। 50छा याःबु इःङे इःनाङ छाइ प्व्राः तोर्सी लाःना ओःखोला ख्योक्याइ फीर्च्या काःन्डुले छालोक जोगेन्दी? ख्योक्या छा च्योःङ्रा काःल्ज्युक ओःले खाम्साङ्बुले डीक्ती तेः।”
S'ha seleccionat:
मर्कुस 9: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2025 by Nepal Bible Society and Wycliffe Bible Translators, Inc.