मर्कुस 13
13
अन्तीम ङीःमाइ चुःन्डुल
(मत्ती २४:१-१४; लुका २१:५-१९)
1येशु कोन्ज्योइ मन्दीरलाःम्ले थेङ्देरा पेःगासुना मेःराङ चीग योबाइ लाःसी, “तादो ले लोबेन, काःजे छ्योम्बो छ्योम्बो तोःक्या! काःजे याःबु खीमक्या!” 2ओःले येशुइ लाःसी, “ख्योक्याइ दी खीमक्या थोङ्देरा एः, मीःङे? दी खीमक्याइदी तोः चीगखाला राःङ्सा तोःङ माःपोःर्पा थाम्जेर रोःम्ङेन एः।”
3येशु कोन्ज्योइ मन्दीरकीइ फार्केनछ्योले जैतुन काःङला तेःतीरहीतीदी एःके। ओः तेःकासु पत्रुस, याकुब, युहन्ना ओःले अन्द्रीयास राःङ्सा सुङ म्याःक्योक तीःजीला खुङसाःला ओःङ्दी टीःसी, 4“ङीःला लोःप, दी थाम्जेर तामक्या नाःम ओःङेन एःपा? ओःले दी थाम्जेर तामक्या छाङ्जेरा चाल्दी एः लाःती छोर्चेला ची चुःन्डुल थोङ्गुबा?” 5येशुइ खुङक्याला लाःसी, “च्यागाताःक्पु पेःदी तेः! सुइयाङ ख्योक्याला स्योप क्युःर्चे मातेर। 6माःङ्बुरा मीःक्या ङाःइ मीःनला ‘थार्च्युगेन ख्रीष्ट ङाःरा इःङे।’ लाःतेरा ओःङेन एः ओःले खुङक्याइ माःङ्बुरा मीःक्याला स्योप क्युःर्केन एः। 7ख्योक्याइ माकक्या क्याःप्क्योक ओःले माकक्याइ बारेला हल्लाक्या कोःगेन एः, इःनाङ ओः तेःकासु माःजी। ओः थाम्जेर तामक्या ओःङ्रा कोःउए, इःनाङ ओः तेःकासुरादी अन्त्य मेःयोःङेन एः। 8देश देशकीइ कील्ला माक क्याःप्केन एः। क्याःल्खाप चीगकीइ राःङ्सा क्याःल्खापला माक क्याःप्केन एः। थाम्जेरछ्योले सायुक्या डोगेन एः ओःले माःङ्बुरा ठाउँक्याला मुःगी क्याःप्केन एः। दी तामक्या नी पीःजामा नाःजाइ तोःङगीइ तुःक्पु चीग्रा इःङे।
9ख्योक्यादी च्यागाताःक्पु पेःदी तेःराकोःउए। चीलेलाःना मीःक्याइ ख्योक्याला जुम्ङेन एः ओःले अदालतला खेर्केन एः। ख्योक्याला यहुदीक्याइ जोम्साखीमक्याला खेर्ती रोप्केन एः। ङाःइ मीःनगीइ पेःगारा ख्योक्याला क्याःल्बु ओःले हाकीमक्याइ तोःङ्ला ङाःइ पाङ्बु तेर्चेला लाःङ्च्युगेन एः।
10अन्त्य ओःङ्जे तोःङ्ला थाम्जेर क्युःपाइ मीःक्याला याःबु लेःङ्गो कोःच्युकोःन एः। 11खुङक्याइ ख्योक्याला जुम्दी खेर्सुना ची लाःकेन्दी लाःती तोःङ्लारा तुःङाल माःबे। इःनाङ ओः तेःकासु ख्योक्याला ची तेर्पा, ओःखोरा लोःप, चीलेलाःना लाःकेन्दी ख्योक्या मीःङे, इःनाङ चाङ्मा ला इःङे।
12ओः तेःकासु मीःक्याइ राःङगीइ आतानोःक्याला सेचेइ लागी जुम्दी तेर्केन एः। आबाइ पुःपोःमोला ओःले पुःपोःमोइ आबा आमाला वीरोद पेःदी सेच्युगेन एः। 13ख्योक्याइ ङाःला सेमल्हुक लुक्योक सोङ्गारा ख्योक्याला थाम्जेरकीइ ङ्याप्च्युक पेःगेन एः। इःनाङ तीङथुपरा ङाःला सेमल्हुक लुदी तेःकेनक्यालादी सेन्च्युगेन एः।
जीबा लाङ्जे च्योःङ्रा तीःनामगीइ बारेला
(मत्ती २४:१५-२८; लुका २१:२०-२४)
14ओःङ्रा मेःयोःङेन ठाउँला#१३:१४ ठाउँला मीःक्याइ दी ठाउँला कोन्ज्योइ मन्दीरला असुद्ध जोगेन क्युक टोःजे च्योःङ्रा ताम थोङेन एः, ओः सोङ्गारा, ओः तीङ्ला मीःक्या ओःला कोन्ज्योला आराधना पेःगाला डोमीःखुगेन एः। ख्योक्याइ क्युक टोःजे च्योःङ्रा ताम थोङेन एः। (दीखोइ लेःन टोःगेन्दीइरा सेज्युक!) ओः तेःकासु यहुदीयाला एःकेनक्या काःङ्क्याला छ्योङ्ज्युक। 15खीम पाङ्ला एःकेनक्या खीम नाःङ्ला एःक्योक छेगाक्या नेःङ्गाला माःस्युबारा छोङ्ज्युक। 16सीःङला एःकेनक्या केःङेन फोँस्योक लेःङ्गाला खीम नाःङ्ला माःन्डोज्युक। 17ओः ङीःमाक्याला जुबु ङीःपाक काःल्क्योक पेःन्पीःजाक्या ओःले पीःजाक्याला ओःमा थुङ्च्युगेन पेःन्पीःजाक्याला छ्योम्बो काःबु ओःङेन एः। 18दी तामक्या सेर्काइ दावाक्याला माःयोङ्ज्युक लाःती कोन्ज्योला प्रार्थना पेःदो। 19चीलेलाःना ओः ङीःमाक्याला ओःङेन च्योःङ्रा तुःक्पु नी कोन्ज्योइ जाम्बुलीङ जोमीःजीक ताःसेथुप नाःमाङ काःल्दी म्याः ओःले तीङ्लाङ नाःमाङ मेःयोङेन एः। 20इःनाङ कोन्ज्योइ ओः ङीःमाक्या घटाइतेर्ती एः, मीःङे लाःना नी सुङ मेसेन्गेन एः। राःङगीइ दाम्क्योक मीःक्याइ पेःगासुना खुङगीइ ओः ङीःमाक्या घटाइतेर्ती एः।
21ओः तेःकासु ख्योक्याला सुइयाङ ‘तदो, थार्च्युगेन ख्रीष्ट नी दीला एः!’ की ‘खुङ ओःला एः!’ लाःसी लाःना ओः तामला सेमल्हुक मालु। 22चीलेलाःना स्योप क्युःर्केन ख्रीष्ट ओःले स्योप क्युःर्केन कोन्ज्योइ लेःङ्गो तेर्केन मीःक्या थोङेन एः। ओःले खुङक्याइ छ्योम्बो छ्योम्बो चुःन्डुलक्या ओःले याःमाछाककीइ लेःगाक्या पेःगेन एः ओःले खुङक्याइ कोन्ज्योइ दाम्क्योकक्यालाङ खुउए लाःना स्योप क्युःर्चे छोल्गेन एः। 23ओः सोङ्गारा, च्यागाताःक्पु पेःदी तेः! ङाःइ ख्योक्याला थाम्जेर ताम तोःङ्मीःजीकरा लाःतेर्ती एः।
मीःइ पुः ओःङेन ङीःमाक्या
(मत्ती २४:२९-३१; लुका २१:२५-२८)
24ओः तुःक्पुइ ङीःमाक्या सीःङ्मीःजीक आमा ङीःमा नाक्जुक ओःङेन एः ओःले दागार्मु मेस्यार्केन एः, 25कार्माक्या नाम्सार्गालाःम्ले ताःप्केन एः ओःले नाम्सार्गाला एःक्योक ल्हेक्याङ योःङेन एः। 26ओः तीङ्ला ङाः मीःइ पुःला मुक्पाला छ्योम्बो ल्हे ओःले महीमाला ओःङ्देरा पेःक्योक मीःक्याइ थोङेन एः। 27ओःले ङाः ङाःइ स्वर्गदुतक्याला जाम्बुलीङ ओःले नाम्सार्गाइ थाम्जेरछ्योले कोन्ज्योइ दाम्क्योक मीःक्याला रुःप चीःजेला ताङेन एः।”
नेभाराइ तोःङ्बोलाःम्ले सेकोःन ताम
(मत्ती २४:३२-३५; लुका २१:२९-३३)
28येशुइ ताःरुङ लाःसी, “नेभाराइ तोःङ्बोलाःम्ले चीङ ताम लोप्तो। दीखोइ याःल्गाक्याइ टुसा बुगाला स्युःमीःजीक ओःले लाःप्ती लुगाला स्युःमीःजीक, छेपाइ दावाक्या ओःङ्जे छोल्दु लाःती ख्योक्याइ छोर्कुए। 29एःन्डुलेरा ङाःइ लाःक्योकदी तामक्या ओःङ्देरा पेःक्योक थोङ्सुना ख्योक्याइ ङाः ओःङेन तीःनाम ओःङ्जे छोल्दु लाःती सेगेन एः। 30तेःन्दामरा ङाः ख्योक्याला लाःके, दी थाम्जेर ताम माःछाङ्थुप दी तीःनामगीइ मीःक्या मीसीगेन एः। 31नाम्सार्गा ओःले जाम्बुलीङ तोर्ती डोगेन एः, इःनाङ ङाःइ लाःक्योक ताम नाःमाङ मेतोर्केन एः।
च्यागाताःक्पु पेःदी तेः
(मत्ती २४:३६-४४; लुका १२:३८,४०)
32ओः ङीःमा रा तीःजी नाःम ओःङेन इःम्बा, ओःखो याःबु पेःदी सुइयाङ छोर्ती म्याः। नाःम्खालीङगीइ स्वर्गदुतक्याइयाङ ओःले कोन्ज्योइ पुःइयाङ छोर्ती म्याः। दीखो तामदी आबा कोन्ज्योला चीग्रा टेःम्बा एः। 33ओः सोङ्गारा, च्यागाताःक्पु पेःदी तेः चीलेलाःना ओः तीःनाम नाःम ओःङेन इःम्बा, ख्योक्याइ छोर्ती म्याः।
34दीखो नी खीमगीइ तोःप्ताइ राःङगीइ लाबुक्या थाम्जेरला राःङ राःङगीइ लेःगा तेर्ती ओःले खीम ह्रुङेन मीःला याःबुले खीम तादो लाःती कोर्काला काःल्क्योक तोःप्ता च्योःङ्रा ओःङेन एः। 35ओः सोङ्गारा, च्यागाताःक्पु पेःदी तेः चीलेलाःना तोःप्ता काःखो तीःजीला लोःदी ओःङेन इःम्बा, ख्योक्याइ मेःछोर्केन एः। खुङ नी कुःङ्सेला की नुःप फेला की नुःपला की ङामुरा काःन्दीङ तीःजीला ओःङ्खुउए। 36खुङ एक्कासी ओःङ्सी लाःना ख्योक्या ङ्याःल्दी तेःक्योक माःफ्रेच्युक। 37ङाःइ ची ख्योक्याला लाःपा ओःखो थाम्जेरला लाःके, ‘च्यागाताःक्पु पेःदी तेः!’”
S'ha seleccionat:
मर्कुस 13: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.