LUK 9
9
Jisu Na Sansikeyathu Taghakeni Kesunshikechi
(Mat 10.5-15; Mrk 6.7-13)
1Jisu na sansikeyathu Taghakeni cighu chi nu atsaghangthu jügüshiya nu kesakinaathu tsüdi sa pi mehaiya kemehai kekhang pi mathu cü. 2Tsaseng wi ma mathu ya Anyiza Kadiyyi cüki khi pi nyu sansi nu kesakinaathu sa pi mehai cülo kesa kesunshi chi. 3#Luk 10.4-11 Ma hati mathu wi kiza, “Nthu kijünyi kewa ghena mangla npvüla; akhhatssü, ajula, kedsakejjü, apisa, nu agwomejuwa gilli lela npvü la. 4Thowa na nthu ssiya khe anyu tsü npi keteshi chu ajjen ciwi benlo; 5#Kek 13.51 khie wi anyithu na nthu ssi meyala khe mathu na kemessi benle kesa zensu wina nthu na anyu tsü teshi wa keten wi nthu ccü wi ayyinikhu tsü kekhashalo.”
6Sansikeyathu na anyu tsüdi wi wala Ajühkemehaiwa pi nyu sansi nu anyithu kesakinaa sa pi mehai cü.
Herod Na Chükivvü kesa
(Mat 14.1-12; Mrk 6.14-29)
7 #
Mat 16.14; Mrk 8.28; Luk 9.19 Galilee wi kekhang kesenwa Herod na pala hathu cüki tsüdi zakeya wi ma chükivvü wa, kepaghenanye anyi pahan na Johan Baptizwa na hangneng-shaghadha le khiben. 8Kepathu na Elijah na ghodha, nu kepathu na kheni atusenjüh-kechüthu kesü na hangneng-shaghadha le khiben. 9Herod na khi, “Hi Johan li wieya; isala hi hathu zaya keben ha anyi thowa sabenla ben nu?” Isanu ma Jisu metuya le sa wa.
Jisu na Anyi Hazar Manga Ghanja kecü
(Mat 14.13-21; Mrk 6.30-44; Jhn 6.1-14)
10Apostelthu na gho neng nu mathu kekuli cüki tsüdi khi pi Jisu kiza. Ma mathu ssiya nu mathu gweghe anyuti kesü Bethsaida wi wa. 11Anyitenti na tsü zaya nu ma nie wa. Ma mathu ssiya nu Anyiza Kadiyyi cüki khi pi mathu kiza, nu kesakinaa sa pi mehai ncüthu yishü kebenthu sa pi mehai cü.
12Aghani na du keten pang wi sansikeyathu Taghakeni na ma wi gho nu khi, “Anyithu kesun pi bvü thsü nu mathu yala wa ha kevü anyu nu allithu wi mathu kedsakejjü nu kejenpen bhaya thsülo, kepaghenanye he wi ha thola nkemi pen kesü.”
13Isala Jisu na mathu wi kiza, “Nthu pala pahan pi mathu dsa thsülo.” Mathu na luneng, “Ikhang na amesa be manga nu anga ben keni ketan ben le. No ikhang ya wala anyi hathu maben ghena pala pahan sheiya thsü mvuben kwe?” 14(Ciwi anyi na hazar manga-u na ben.) Jisu na ma sansikeyathu wi kiza, “Anyithu sa pi denini khang sala donki thsülo.”
15Sansikeyathu na pi tsüti kesa thsü seng wi 16Jisu na amesa manga nu anga keni tsü khuya nu tang wi ghang nu Anyiza wi keseng kekhie sachi, nu tsüthu pakhhiya, nu pi sansikeyathu cü nu pi anyithu wi gishüya thsü. 17Mathu tsüdila dsa pi anonkwenya, nu sansikeyathu na kedsatu ashijü taghakeni saghuya.
Pitor na Jisu Cüki Kekhishi
(Mat 16.13-19; Mrk 8.27-29)
18Ghanan kesü Jisu na ma ketan kekhie saben nan sansikeyathu na ma wi gho, nu ma mathu wi keü, “Anyithu na hi pi thowa le khiten nu?”
19Mathu luneng, “Pahan na no Johan Baptizwa le khiden. Kepathu na no Elijah le khi, nu pahan na no kheni atusenjüh-kechüthu kesü na hangneng-shaghadha le khiden.
20 #
Jhn 6.68-69
Ma mathu wi keü, “Isathu nthu tsü hi pi thowa le khiten nu?”
Pitor na khineng, “No Anyiza Tsawa Messiya.”
Jisu na Ma Ketizenkesa nu Keshü Cüki Kekhi
(Mat 16.20-28; Mrk 8.30—9.1)
21Jisu na mathu ajüh ha pi thola nkiza lalo kesa mathu kiza ntsa sachi, 22nu hati la khineng, “Anyi Tsawa na ketizen sa ntsa sa, nu keshenpfüthu, keqhaikedi ntsathu, nu Ayenkesansithu na ma meya mvula saben. Ma pi shü thsüaben, isala ghanan kecheng seng wi ma hangneng-shagha ben.”
23 #
Mat 10.38; Luk 14.27 Ma mathu tsüdi wi kiza, “Anyi thowa na hi nie gha mvu khe ma ketanla ma mali nu atsathangla ma kross pienu hi nie n-ghathu yishü. 24#Mat 10.39; Luk 17.33; Jhn 12.25 Kepaghenanye anyi thowa na ma kahangli hangshaya mvu khe dediaben, isala thowa na ighena ma kahangli khuchi khe tsü mu nengya shaben. 25Keujüla anyi kesü na ayyi keben maben pi ma ji saya lela ma pvüwa bhatagha nyelela dedi lethu mangwa kekiyi ben nu? Mangla nmi! 26Keujüla anyi kesü na ighena nu hi kesansijüh ghena nyu tujüghe lethu, Anyi Tsawa na ma nyankethang nu Abawa nu tangnyilo kemethathu nyankethang sa kegho wi anyi tsüwa cüki khi jügheaben. 27Hi atsentsa nthu kizaden, anyi he wi kebenthu pahan na Anyiza Kadiyyi npi kemu chu shü nben.”
Jisu Ma Tsikepa Sa kesa
(Mat 17.1-8; Mrk 9.2-8)
28 #
2 Pi 1.17-18
Jisu na hathu ha khi nu ghanan tazen seng wi ma Pitor, Johan nu James ssisen ayikha kesü wi kekhie sale wa. 29Ma kekhie sa keben wi ma tsikepa sa nu ma thsümeni na cwencwe mikithi sa. 30Ciwi meshu keni na wan gho ma ccüneng ben. Tsüna Mosa nu Elijah manyi, 31tang kewegü wina ghola Jisu na ma Jerusalem wi wan Anyiza kekuli sacen nu bvüa keten cüki khi pi ma ccüneng. 32Pitor nu ma pvüshangthu na jenben, isala mathu na shagha nan Jisu kewegü nu meshu keni na ma gweghe ngan keben muya. 33Mosa nu Elijah manyi na Jisu teshi nu kebvü seng wi Pitor na Jisu wi kiza, “Kesansiwa, ikhang na he wi keben ha khatila mehai nu! Ikhang na anithsüjjen kecheng sa na; kesü nghena, kesü Mosa ghena, nu kesü Elijah ghena.” (Ma ajjügi mangwa khiben khe nchüla khi.)
34Ma ajühkhitu keben wi akulukeshü na ghola mathu kejiya; sansikeyathu na akulukeshü na mathu miwi gho kesalina messi wa. 35#Isa 42.1; Mat 3.17; 12.18; Mrk 1.11; Luk 3.22 Akulukeshü wi ahhai kesü na khi, “Hawa ha itsa, hi ma kessiyadha — ma jühkinalo!” 36Ahhai nzala kesa seng wi Jisu na ma ketan benla. Sansikeyathu na ccen ben wa nu tsü tsüwi mathu na mu keyathu cüki mangla pi thola nkizala.
Jisu Na Pvüzanyi kesü Nkemehai Ghamu Ssiketen sa pi Mehaikecü
(Mat 17.14-18; Mrk 9.14-27)
37Dhitsüwa wi Jisu nu sansikeyathu kecheng na ayikha wina cü nu anyitenti kesü na gho Jisu metu. 38Anyitenti jawi anyi kesü na magha nu jisha, “Kesansiwa, hi no wi khieben, itsa ma ketanwa ha ghangchi cülo! 39Nkemehai ghamu kesü na ma ghantenyathu ma pashü pi ayyi wi khulidu kedheggü nu ma meceng n-nugha saben waden; isanu ma metenmesha ntsa sacüla ma bvü thsüden. 40Hi no sansikeyathu na tsü jügü pi bvü thsülo mathu wi khie lela mathu na sa meyale.”
41Jisu na luneng, “Nthu khatila nkenondi nu kesazzi nyithu nu! Hi matsü khathu nthu gweghe nbenthu yishü nu? Hi khathu nthu gweghe ben nu?” Tsaseng wi ma anyi tsüwa wi khi, “Ntsawa tsü ssinu he wi gholo.”
42Isanu pvüzanyiwa tsüna gho keten wi atsaghang na ma whengshi pi ayyi wi chi nu ma kedheggü wa. Jisu na ajüh kekhang khi pi nkemehai ghamu satekü, nu pvüzanyiwa sa pi mehai cü nu pi ma ba cü neng. 43Anyi tsüdila Anyiza kekhang ghena amansa.
Jisu Na Kheneng Ma Keshü Cüki Kekhi
(Mat 17.22-23; Mrk 9.30-32)
Anyi tsüdila ma kekuli tsü ghena amansa keben wi Jisu na ma sansikeyathu wi kiza, 44“Hi mangwa pi nthu kizale ben khe ha nmali lalo! Anyi Tsawa tsü ghan pi anyithu kekhang kekhu wi chia tendha.” 45Isala sansikeyathu na ha jjügi nchüla. Tsü pi mathu tuwi kuthi kesalina mathu na tsü jjügi chüshi meyala, nu mathu na ma wi tsü jjügi keü messi.
Thowa na Kedi Ntsawa Nu?
(Mat 18.1-5; Mrk 9.33-37)
46 #
Luk 22.24 Sansikeyathu jawi thowa na kedi ntsawa saten nu kesa ajüh keccücanli shagha. 47Jisu na mathu kemeshen tsü chüya kesalina ma ghanyi kesü pi ma kete wi ngan thsü, 48#Mat 10.40; Luk 10.16; Jhn 13.20 nu mathu wi khi, “Thowa na inyan wina ghanyi ha ssiya khe hi la ssiyaden; nu thowa na hi ssiya khe hi kesun kechiwa la ssiyaden. Kepaghenanye nthu tsüdi jawi kizza ntsawa tsüna kedi ntsawa saben.
Thowa Nthu Shun Nten Khe Tsüna Nthu Ghena
(Mrk 9.38-40)
49Johan na khi, “Kesansiwa, ikhang anyi kesü n-nyan wina atsaghangthu jügüshi keben mule, nu ikhang na ma khenle, kepaghenanye ma ithu gweghe nten.” 50Jisu na ma nu sansikeya kepathu wi kiza, “Ma nkhen lalo, kepaghenanye thowa na nthu shun nten khe tsüna nthu ghena le.”
Samaria Nyu Kesü Na Jisu Ssi Meya Mvulakesa
51Jisu zanki pi tang wi chiya keten pang wi ma Jerusalem wi wale meshen nu waden. 52Ma nyilothu kesun pi ma tuwi na wala Samaria nyu kesü wi ma ghena kidenya thsüa. 53Isala ciwi anyithu na Jisu ssi meya mvu, kepaghenanye ma Jerusalem wi waden. 54#2 Kad 1.9-16 Sansikeya Johan nu James manyi na ha mukeya wi manyi na khi, “Apvüwa, no ishinyi yala tang wi anni khie chi nu dugho#9.54: zhükechi pahan wi, Elijah na kesa ti, pi wwatheng mathu yasa thsü mvu benla nu?”
55Jisu na khapeghe wa manyi kha.#9.55: zhükechi pahan wi hati pi wwatheng: nu khi, “Nshinyi na Aghamu khati kesa ben khe nshinyi na nchü; kepaghenanye Anyi Tsawa na anyi kahang yasale kesa ghena ngho isala mathu hangshayale kesa ghena. 56Tsaseng wi Jisu nu ma sansikeyathu na anyu kepa wi wa.
Jisu Keniethu Sa keten
(Mat 8.19-22)
57Mathu na alen wi wa keten wi anyi kesü na Jisu wi khi, “No khiewa waten khe hi no nie gha tenle.”
58Jisu na ma wi khi, “Whewhethu na mathu ku ben, nu awathu la mathu ghacen ben, isala Anyi Tsawa tsü ma li pi keli nu mnankeya ben la nmi.”
59Ma anyi kepawa wi kiza, “Hi nie ghalo.” Isala anyi tsüwa na khi, “Kesansiwa, hi yala atuwa wala iba pi chhüvhüya thsülo.”
60Jisu na luneng, “Keshüthu ya mathu ketanla mathu chhüvhüya thsülo. No wala Anyiza Kadiyyi jüh pi nyu kizalo.”
61 #
1 Kad 19.20
Anyi kepawa na khi, “Kesansiwa, hi no nie ghaten; isala hi ya atuwa wala kemehai sabenlo itheghi kizaya thsülo.” 62Jisu na ma wi khi, “Anyi kesü le kesü lela alli ca wa kesa seng wi asengwa ghang ben lethu ma Anyiza Kadiyyi nyi nsa qole.”
S'ha seleccionat:
LUK 9: RENGNBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.