LUK 8
8
Nza Jisu nie ketenthu
1Matsü pahan seng wi Jisu na Anyiza Kadiyyi Jühkemehaiwa sen nu anyu nu anyutithu wi wala nyu sansi. Sansikeyathu Taghakeni na ma gweghe wa, 2#Mat 27.55-56; Mrk 15.40-41; Luk 23.49 nu nza pahan kheni nkemehai ghamu ssi keten nu kesakinaa wi sa pi mehai kecüthu la wa: Maria (Magdalen le ci ketenwa), ma miwi atsaghang tagü jügüshi kesawa; 3Herod kadipen wi kedi kesü Khuza wubvü Joanna; nu Susanna, nu nza kepa wi kejon, mathu ketanla mukeya keben sen nu Jisu nu ma sansikeyathu kiqa.
Amacükivvüwa pi Ajühkaghape
(Mat 13.1-9; Mrk 4.1-9)
4Anyithu na anyuti tsüdi wi Jisu wi gho; nu anyitenti na saghu keben wi Jisu na ajühkaghape ha khi: 5“Kuti tsüwi anyi kesü na amacü vvü wa. Ma amacü pi ma lli wi vvükechi wi pahan na alen wi qancadu nu nyu na cüten, nu awathu na gho mcüa. 6Pahan na alon miwi qancadu, nu shigü shagha jüwa, kepaghenanye ciwi ayyitsen na nmi. 7Pahan na aghazüthu jawi qancadu nu shigü keshagha wi aghazüthu na tsüthu khwensha. 8Nu pahan na ayyi kemehai wi qancadu shigü shagha ma bi mezaza bünya.”
Jisu na khi, “Keujüla nthu akhuna ben lethu, ha kinayalo!”
Ajühkaghape Jjügi
(Mat 13.10-17; Mrk 4.10-12)
9Ma sansikeyathu na Jisu wi ha ma jjügi mangwa khe keü, 10#Isa 6.9 nu ma luneng, “Kekuthi wina Anyiza Kadiyyi cüki chüya kemehai pi nthu cüdha, isala kepathu wi ajühkaghape pi khiben, isanu mathu na ghang lela muya nben, kina lela chüshiya nben.
Jisu Na Amacükivvü Pi Ajühkaghape Khimethakechi
(Mat 13.18-23; Mrk 4.13-20)
11“Ajühkaghape jjügi tsüna hati le: amacü tsüna Anyiza jüh. 12Amacü alen wi qancadu kesathu tsüna anyi Anyiza jüh zaya kesathu; isala mathu na nondi nu hangsha meya thsüle kesalina atsaghang na ghola mathu leben wi ajühwa tsü sen bvüa. 13Amacü alon miwi keqancathu tsüna anyi Anyiza jüh tsü zakeya wi anonkeghe sala ya keyathu; isala tsüna mathu wi dhugü du meya; mathu na keujü ketan nondi benla nu kemechu na kegho wi khuli wa. 14Amacü aghazüthu jawi keqancathu tsüna anyi Anyiza jüh tsü za keyathu; isala mathu kahang wi ahathakina, keben, nu ayyi nonkeghe na mathu khwensha nu mathu bi bün meyala. 15Amacü ayyi kemehai wi keqancathu tsüna anyi Anyiza jüh tsü zaya nu pi mathu leben wi chiya nu noncca sen wa ma bi bünya nu wwiyale.
Ahula pi Palakhang Cakhu wi Kechi
(Mrk 4.21-25)
16“Thola ahula canki nu palakhang pi shanbhon, nyelela pi awe cakhu wi chi nten. Isala anyi ciwi kedughothu yala kewegü muya thsüle kesalina ma tsü pi ahula kedonpen wi chiden.
17 #
Mat 10.26; Luk 12.2 “Kepaghenanye kuthi ketheng tsüdila pi nyu chüya thsüaben, nu shanbhon kethengthu pi nyu muya thsü nu sen nu kewegü wi ghoaben.
18 #
Mat 25.29; Luk 19.26 “Tsalina nthu na zakeya tsüti kiden-kesha yalo; kepaghenanye thowa na pala ben khe pi wwa neng cüden, isala thowa na mangla nmi khe ma keu benle meshen kebenwa tsü lela sen bvüaden.”
Jisu Jja Nu Ma cünyuthu
(Mat 12.46-50; Mrk 3.31-35)
19Jisu jja nu ma cünyuthu na ma wi gho, isala anyitenti ghena mathu na ma wi du meyala. 20Nyu na Jisu wi kiza, “Njja nu ncünyuthu na no ccüneng chi mvu nu akhemi wi ngan benle.”
21Jisu na mathu tsüdi wi kiza, “Anyiza jüh kina nu tsü nie ketenthu tsüna ijja nu icünyuthu le!”
Jisu na Caghamo Khasha kesa
(Mat 8.23-27; Mrk 4.35-41)
22Ghanan kesü Jisu na ma sansikeyathu ssinu ahun kesü wi duya nu mathu wi khi, “Ikhang na aghajü khhakawa pvüdhi ki na.” Tsalina mathu na wa. 23Mathu na wa keten wi Jisu na jen wa. Aghajü wi tsü zuli ameghü na khang ntsa sho, nu atssü na ahun pongkeya wi mathu na kemessi wi ben. 24Sansikeyathu na wala Jisu pamechü nu khi, “Kesansiwa, kesansiwa, ikhang shüa tendha le!” Jisu na shagha nu ameghü nu atssüketi kha chinan, caghamo nsala nu ciwi ccen sa. 25Tsaseng wi ma sansikeyathu wi kiza, “Nthu kenondi khie nu?” Isala mathu na amansa nu messi, nu khokho wi khi, “Anyi ha thowa nu? Ma ahza pi ameghü nu atssüketi la cüthu tsüthu na ma jühkina keten hana!”
Jisu na Anyi Kesü Atsaghang Ssiketen sa pi Mehaikecü
(Mat 8.28-34; Mrk 5.1-20)
26Jisu nu ma sansikeyathu na Galilee Ghajü pvüdhi sen nu khhakawa Gerasa wi wa. 27Jisu na wala aghüsa cukeya wi anyi kesü atsaghang ssi keten anyuti wina gho ma metu. Anyi tsüna matsü kesiela athsümeni npvü ladha; ma ajjen wi nbenla matsü tsüdila ashüjjen jawi benden. 28Ma Jisu muya meyi maghachi nu ma ccü wi khulidu hati jisha, “Jisu Kemisintsa Anyiza Tsawa! No hi pi mangwa sa mvu ben nu? Hi no wi keshikene ben hi nmetenmesha lalo!” 29Jisu na nkemehai ghamu wi ma wina shhugholo kekhi ghena ma hati khi. Matsü kejon wi la atsaghang tsüna ma ghanten yathu amighe ssüli pi ma bhen nu pi atssüzüjjen wi chi lela ma kebhen tsü pvüdhi nu atsaghang na ma ssisen nu ayyikeshü wi waden.
30Jisu na ma wi keü, “N-nyan thowa nu?
Ma luneng, “Inyan na ‘Atenti’ ” — kepaghenanye atsaghang kejonla ma gwo wi dudha.
31Atsaghangthu na Jisu mathu kesun pi ayyiku kedhu abiss wi tsü nchi lalo khie.
32Ciwi avü akhang keti kesü na tsü kete ayikha wi atsse yaden. Tsalina atsaghangthu na Jisu wi mathu ya avüthu gwo wi du thsülo khie nu ma mathu ya tsüti sa thsüa. 33Atsaghangthu na anyi tsüwa wina bvü shhugho wala avüthu gwo wi dua. Avü mabenla kejügüli bvü wa alonshi pang wina aghajü wi dula meyanthi shan.
34Avükehiethu na tsü muya nu bvü wa anyuti nu alli tsüdi wi ajüh tsü pi anyithu kizachia. 35Anyithu na mangwa saben nu kesa ghangle gho. Mathu na Jisu wi gho nu anyi ma wina atsaghang bvü kesawa tsüna athsü mphi nu ma leben metsashhu Jisu ccü wi donki keben muya nu mathu tsüdi messi. 36Ha mu keyathu na khati nu anyi atsaghang ssi ketenwa tsü sa pi mehaicü khe khi pi anyithu wi kiza. 37Tsaseng wi anyi Gerasa yyi kevü wina keghothu tsüdila Jisu na mathu wina bvülo khi, kepaghenanye mathu na messi ntsa sa. Tsalina Jisu na ahun kesü wi duya nu apen tsü teshia. 38Tsaseng wi anyi ma gwo wina atsaghang bvü kesawa tsüna Jisu wi khie, “Hi la no gweghe wa thsülo,” isala Jisu na hati khi nu ma kesun pi bvü thsüa, 39“Njjen wi whala Anyiza na nghena mangwa kuli chicü khe pi nyu kizalo.”
Anyi tsüwa na anyuti pvüdhi sen wa Jisu na ma ghena mangwa sa chicü khe tsü cüki khi pi nyu kiza wa.
Jaira nga nu Nza Kesü Jisu Thsü Pakechi
(Mat 9.18-26; Mrk 5.21-43)
40Jisu na aghajü khhakawa kegho anyitenti na anonkeghe sa nu ma ssiya, kepaghenanye mathu na ma hie keben ghena. 41Tsaseng wi Sinagog wi kedi kesü ma nyan Jaira tsü la gho. Ma Jisu ccü wi nkhwendu nu ma jjen wi gholo khie. 42Kepaghenanye ma nga kesütan kesawa ma kahang mapi taghakeni tsüna naa pi keshü pang saben. Jisu na ciwi wa keten wi anyitenti na ma khecha ntsa sa. 43Ciwi nza kesü amapi taghakeni ma gwo wi ajjü keji nu ma keben tsüdi dedi pi dawakechüthu yala ma noncca thsü lela thola ma sa pi mehai meya kesa na ben. 44Ma anyitenti jawi asengwa na gho Jisu thsü katen kidhen chinan wan ma jjü kekiji tsü khen. 45Jisu na keü, “Thowa na hi kidhen chi nu?” Tsüdila ma nyele khi, nu Pitor na khi, “Kesansiwa, anyithu na tsüdila no vü nu no khephon benle.”
46Isala Jisu na khineng, “Thowa khe hi kidhen chile, kepaghenanye hi wina kekhang shhu kesa hi chüben.” 47Nzawa na ma kuthi meyala kesa tsü chüya nu gho kedheggü sen nu Jisu ccü wi nkhwendu. Ciwi anyi tsüdi tuwi na ma mangkesa na Jisu thsü kidhen chi nu khati nu wan mehaiya khe khi pi ma kiza. 48Jisu na ma wi kiza, “Ingawa, no kenondi na no sa pi mehaiyadha. Nleben cca whalo.”
49Jisu na ajüh ha khitu keben wi nyilo kesü na kediwa jjen wina gho Jaira kiza, “N-nga na shüdhale, no kesansiwa likesaghang nsa layilo.”
50Isala Jisu na tsü zaya nu Jaira wi kiza, “Nmessila, nondi benlo, ma sa pi mehaiya ben na.”
51Jisu na whala ajjen cukeya wi thola ma nie ndu thsü, isala Pitor, Johan, nu James nu ghanyiwa bajjathu ketan ssinu du. 52Anyi tsüdila ghanyiwa tsü ghena ahathana nu qaiben. Jisu na khi, “Nqai lalo, ma nshü, isala jenben le!”
53Mathu tsüdila ma nankeqhe, kepaghenanye mathu na ma shüdha kesa chüben. 54Isala Jisu na wa nzawa kwen zanya nu khi, “Anga, shaghalo!” 55Isa nan ma ghamu na gho neng nu ma wan shaghaya, nu Jisu na pala pahan pi ma dsa thsülo mathu kiza. 56Ma bajja na amansa, isala Jisu na mathu ha pi thola nkiza lalo kesa kiza ntsa sachi.
S'ha seleccionat:
LUK 8: RENGNBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.