LUK 10
10
Jisu Na Achentagü Nu Keni Kesunshikechi
1Haseng wi Apvüwa na anyi achentagü nu keni kessiya nu meshu kenini kesun pi ma tuwi na ma wale keben anyutithu nu apen tsüdi wi chi. 2#Mat 9.37-38 Ma mathu wi khi, “Ciwi alli kewwi-u na keti la ben, isala kekuli nyi na kezeng-u ketan. Tsalina alli pvüwa wi kekhie sa nu ma ya kekuli nyi ji kayi kesun pi ma lli wwi thsülo. 3#Mat 10.16 Walo! Hi nthu pi khaghaneni zzathu na adennithu jawi keten ti kesun chiben. 4#Mat 10.7-14; Mrk 6.8-11; Luk 9.3-5 Apisa hikhu, ajula, accüguwenthu mangla npvüla; nu alenca wi thola ccüneng deja nben lalo. 5Nthu na wa ajjen khiewa du khe hati khilo, ‘Kecca ya ajjen ha wi ben keyawa salo.’ 6Keujüla ciwi kecca kenen nyi na ben lethu, nthu kecca khukechiwa tsüna ma miwi ben wa ben, nyelethu nthu kecca shalom tsü khuneng yalo. 7#1 Kor 9.14; 1 Ti 5.1 Ajjen tsüwa wi ben nu mathu na mangwa pi nthu cü khe dsa nu jjülo, kepaghenanye kekuliwa na ma kutimen muya qole. Nthu na ajjen kahe wi kegoe nben la. 8Nthu na anyuti kesü wi wa nu nyu na nthu ssiya lethu, mangwa pi nthu cü khe dsalo, 9anyuti ciwi kesakinaa sa pi mehai cü, nu anyithu wi hati kizalo, ‘Anyiza Kadiyyi na nthu tetsaki ghodhale.’ 10#Kek 13.51 Isala anyuti kesü wi wa nu nyu na nthu ssi meya mvu lethu, alentonti wi shhu nu hati khilo, 11‘Nthu nyutiwa wi ayyinikhu na ikhang ccü wi kekaki lela kekhasha pi nthu shun ben. Isala Anyiza Kadiyyi na nthu tetsaki ghodhale kesa chüyalo!’ 12#Ade 19.24-28; Mat 10.15; 11.24 Hi nthu kizaden, Ajühkekaghaten tsathang wi Anyiza na anyuti hawa miwi Sodom nantizenchi cüaben!
Nkenondi Nyutithu
(Mat 11.20-24)
13 #
Isa 23.1-18; Ezk 26.1—28.26; Jol 3.4-8; Amo 1.9-10; Zek 9.2-4 “Khorazin, nghena khatila qhethiketen saten nu! Bethsaida, nghena la khatila qhethiketen saten nu! Keujüla nshinyi miwi amankesa kulikechi tsü pi Tur nu Sidon miwi kulichi lethu, ciwi anyithu na kheni na mathu kesami wi khapeghe yadhale kesa alishithsü mphi nu donki nu amihi pi mathu miwi chipvü kesa nan! 14Ajühkekaghaten tsathang wi Anyiza na nshinyi miwi Tur nu Sidon nyi keniwa nantizenchi cüaben. 15#Isa 14.13-15 No, Kapernaum! No ketanla no pieki pi tang wi chiya mvuben kwe? No zansha pi annighajü wi cüchi cüben!” 16#Mat 10.40; Mrk 9.37; Luk 9.48; Jhn 13.20 Jisu na ma sansikeyathu wi khi, “Thowa na nthu jühkina ten khe ijüh la kinaden; thowa na nthu meya mvula khe hi la meya mvula saden; nu thowa na hi meya mvu la sa khe hi kesun kechiwa la meya mvula saden.”
Achentagü Nu Keni Na Kheneng kegho
17Anyi achentagü nu keni na anonkeghe sala gho neng nu hati khi, “Apvüwa, ikhang na n-nyan wina khichi nan atsaghangthu lela ikhang jühkina le!”
18Jisu na mathu luneng, “Hi Satan na tang wina atsancwe ti qancadu keten mule. 19#Zak 91.13 Kinayalo! Hi kekhang pi nthu cüdha, tsalina nthu na amaghang nu ajjüssithu miwi kegoeya nu ghinyiwa kekhang miwi khang yaden, nu mangla nthu patenaya nben. 20Isala nkemehai ghamuthu na nthu jüh kekina ghena nthu nonghe nben la; isala nthu nyan pi tang wi zhüya kesa ghena anonghe yalo.”
Jisu Nonkeghe
(Mat 11.25-27; 13.16-17)
21Tsü tsüwi Jisu na Kemetha Ghamu wi anonkeghe pi ma pong pvüya nu khi, “IBa, atssan nu ayyi wi Apvüwa, hi no sengle; kepaghenanye no pala hathu pi kemetsa nu kechüthu tuwi kuthi theng nu pi nkechüthu ccücachi kesalina. Anle, iBa, hawa ha no kenen ghena sachi le!
22 #
Jhn 3.35; 10; 15 “IBa na pala tsüdi pi hi cüdha. Anyi kesütan la Abawa nkenye tsü Atsawa tsüna thowa khe chüya nten, nu anyi kesütan la Atsawa nkenye nu Atsawa na pi ma ccüca nkechi tsü Abawa tsüna thowa khe chüya nten.”
23Tsaseng wi Jisu na khapeghe wa ma sansikeyathu ketan kiza, “Nthu na mu kebenthu ha kemuthu na khatila mihhidha nu! 24Hi nthu kizaden, atusenjüh-kechüthu nu kadimithu kejon na nthu mu keben ha muya mvu sa lela mu meya, nu nthu za keben ha zaya mvu sa lela za meya le!”
Samaria Nyi Kemehaiwa Pi Ajühkaghape
25 #
Mat 22.35-40; Mrk 12.28-34 Tsaseng wi Ayenkesansi kesü na Jisu ghan-nan le gho nu khi, “Kesansiwa, hi anuphan kahang muyale kesalina khati nsathu yishü nu?”
26Jisu na ma luneng, “Ntsawajüh na khatile khiben nu? No tsüthu pi khatile khimethaten nu?”
27 #
Aye 6.5; Lev 19.18 Ma khineng, “ ‘No nleben tsüdi, no kahang tsüdi, no kezü tsüdi, nu no kemeshen tsüdi sen nu Apvüwa n-Nyiza ntizenthu yishü’; nu ‘No ketanla no ketizen ti njenphon tizenyalo.’
28 #
Lev 18.5
Jisu na khineng, “No khiti yadha, no wala tsüti satenlo, isathu no hangyaben.”
29Isala Ayenkesansiwa na ma ketanla ma pi meshon benle sa mvu kesalina ma Jisu wi keü, “Thowa na ijenphonwa nu?”
30Jisu na khineng, “Ciwi anyi kesü Jerusalem wina Jerikho wi cü keten nyu ji tengdsa ketenthu na gho ma ghantenya nu ma tsanqaithu khuya nu ma kiccü pi shütu-hangtu teshi nu bvüa. 31Tsü tsü wi keqhaikedi kesü na alen ciwi wa, isala ma anyi tsü muya nan alen kepawa wina tsü ghü sen nu bvüa. 32Tsüti Levi nyi kesü la alen ciwi gho nu wa anyi tsüwa ghang chinan theng nu kepawa wina ghü sen nu bvüa. 33#2 Kc 28.15 Isala Samaria nyi kesü na ciwi kijünyi wa keten gho anyi tsü muya, nu ma anyi tsü mu pi ma lebengüccü. 34Ma anyi tsüwa wi whala adeli nu kisengtssü pi ma yisü wi chicü nu athsü pi qhan cü. Isanu ma anyi tsü pi ma gada miwi chipvü wala kijünyi jjen kesü wi ma noncca cü. 35Dhitsüwa wi ma rükatssü akutimen keni khushi pi ajjen tsü kehiewa cü nu ma kiza, ‘Ma noncca benlalo, nu no ma ghena mangwa khaju dedi khe hi kegho neng wi pi no ccü neng shaben na.’ ”
36Jisu na keü, “No kemeshen tsü, ha ma kecheng jawi thowa na anyi nyu ji ketengdsathu na kiccü kecüwa tsü jenphon ti kuli chicü nu?”
37Ayenkesansiwa na luneng, “Anyi ma nantizenchi kecüwa tsü le!”
Jisu na luneng, “Isathu no la whanu tsüti satenlo.”
Jisu Na Martha Nu Maria Manyi Hhainankewa
38 #
Jhn 11.1
Jisu nu ma sansikeyathu na kijünyi wa keten anyu kesü wi ghoya nu ciwi nza kesü ma nyan Martha tsüna mathu ssiya. 39Ma pvünonwa ma nyan Maria kesa na ben, ma Apvüwa ccü wi donki nu ma kesansijüh kinaben. 40Martha na kekuli tsüdi sa pi ma lidhamang ben, tsalina ma gho nu khi, “Apvüwa, ipvünonwa na kekuli maben dhasha pi hi ketan kuli thsü keben ha no meshenchi nben kwe?”
41Apvüwa na ma luneng, “Martha, Martha! No pala kejon ghena ketizen sa nu lebengüccü ben, 42isala kesütan nsenthu yishü. Maria na kemeshonwa kessiyadha, nu ma wina tsü khusen bvüya nbendha.”
S'ha seleccionat:
LUK 10: RENGNBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.