MARK 6

Nazareth Me Jesu Yeyahpu

(Mt 13.53-58; Lk 4.16-30)

1 # Mt 13.53-58; Lk 4.16-30. Jesuwe tüopa kahtok tüoh hüyange imching te leih ye hüyange I pinlan-o I pheite woi. 2#Mk 1.21; Mt 7.28.Sabbath nyih synagogue me Iye konnyüone wang. Tüome kahta maawe ngoh, hüyange aope iman-e I ngao jai iman üshei yashan, iman-e hüke tong; “Hatüoyin khongkümpu Iye ü-mepu tüopu shi? Iye hangke hükihpu konngao tüopu shi? Hüyange Iye tüolan yashan toi hangke linge okpu shi? 3#Mt 11.6.Hatüowa Mary üha yaktoi lingpa, hüyange Jeams, Joseph, Judas, hei Simonlan üjei yeje a? Hatüo me Inao shekolan yengoh a?” Hüyange iman-e I yeyah. 4Hüwante Jesuwe imante i, “Hipa ja I nyupuh chingshao, hüyange Ipheipu hüyange I yoi noksa kaiye kenphe me wangshüm yehüope yengoh.” 5#Mk 5.23; 7.32; 8.23.Tüoye me dakpa ütamte yakke jonne hüyange meiye tampu tokte kaiye Iye yashan toi hango lingpu ye-ok. 6#Mt 9.35.Iman me ütinglakpu yenangpu te I yeonge yashan.

Tüophei me Jesuwe kahtalan te konnyüowe chingshao lante ngoiye kem.

Jesuwe Pinlan Penme Ni Shontei

(Mt 10.5-15; Lk 9.1-6)

7 # Mt 10.1,5,7-11; Lk 9.1-5. #Lk 10.1.Tüophei me Iye pinlan penme ni jamshe nyik hüyange nini shonne tei. Ünu yaha tangme Iye imante wong pha; 8hüyange imante ngaokeng pha. “Taiwante shengshaoh kaiye numan phei hango tahyah—an yeyahlak, nyekhok yeyahlak, ngin shienghit nyekhok me ngin yeyahlak. 9Yashom ja hüpoi phakshao ni yeyahlak;” 10Iye imante i, “Aope numan chingshao ja te ngoilakei, hüyange aoyin ne numan yahlakei numan mantai mantai iman nok me ngohtüoh. 11#Mt 10.14.Hüyange nyoijing ütamme numan yeyahpu yejema-a numante yejaihupu nyoite ngoiyahma-a, aope numan tailakei numan ya mepu tüpla kong angtüoh. Hatüo iman jingne deingao ne menglak.” 12#Mt 11.1; Lk 9.6.Tüophei me iman tai hüyange kahta lili ünu mepu monglüptüoh she konnyüo. 13#Jas 5.14.Iman-e laalan maawe jangtei, hüyange dakpalante minnga pho hüyange iman mei.

Baptipa John Lipu

(Mt 14.1-12; Lk 9.7-9)

14 # Mt 14.1-2; Lk 9.7-9; 9.19; Mt 21.11. Sha-a Herod ahngpawe tüopa jeng jai, hangjingne Jesu min kenphe me ngai. Kahtalan-e i, “Baptipa John yange yeteki. Tüokhei, tüopa wonge Iye toi lingnang.” 15Ülao lan-e hüke i, “Iya Elijah.” Ülao lan-e i, “Iya üshong wante ngohyangpu yo mepu Hipa üyong ja.”

16Hüpoi aope Herod-e tüopa jai, Iye i, “I ya baptipa John. Taowe I üngphün yangki, hüpoi I yange ye nang!” 17#Mt 14.3-4; Lk 3.19-20.John pholak jingne Herod-e ngaokeng pha, hüyange phowe sha hüyange küpnok me ang. Hangjingne Herodias-a Inao Philip sheko ne ngoh, tüojingne Herod-e tüopa ling. 18Hangjingne baptipa John-e Herod te i; “Nang nao sheko nange yahpu ye-oklak.” 19#Mt 14.5-12.Tüokhei Herodiawe John te nu hüyange I toihuwe teih, hüpoi Herod ngohpu jingne Iye yetoi ok. 20#Mt 21.26.John te Herod nyam hangjingne John khakshupu kahta hüyange üjao kahta, tüokhei Iye I yinne ang. I jeng jaipu lep iye Ite yemeipe pokyapoi, Iye I ngao mongmei me jai.

21Üküm ne Herodiawe hipak ümei tüo. Hatüowa Herod puhpu nyih, I phang mepu woipalan, kengphet woipalan, hüyange Galilee üjenglan nyikyange mo üyong uh. 22Herodia üha sheko naha peiye polok, hüyange Herod hei I pinlan mongmei tam. Tüokhei ahngpawe sheko nahate i, “Nange hanghe yahhu nangki? Nange hanghe leng taowe phalak.” 23#Est 5.3,6.Hüyange Iye yhate jienge i, “Nange hanghe lenge yulakei, ü-ahngching ni ne tangpu shinne jeyapoi phalakei.” 24Tüokhei sheko naha phette yuwe Inyute tong, “Taowe hanghe yu hah?” Yhawe jan, “Baptipa John üshang.” 25Ahngpa tangte sheko naha mamshe phette ye, hüyange hüke yu. “Baptipa John üshang shengja me heyange sha-a üte yahkei she nangte yupuwei.” 26Ahngpa yeonge mongmeng; hüpoi I tangte peipu yinpalan üshei sheshao me jiengyangpu ngaone menge Iye yha te yelan hu. 27Tüokhei John üshang peilak jingne yompa te mamshe ngaokeng phawe shonne tei. Yompa küpnok te wen, hüyange John shang phün; 28tüophei me Iye sheng ja me yah pei hüyange sheko nahate pha, aowe Inyute pha. 29Aope John pinlan-e tüopa ngaolan jai, iman pei hüyange I mang yah hüyange mangjong ja me mu.

Jesuwe Haja Nga Uh

(Mt 14.13-21; Lk 9.10-17; Jn 6.1-14)

30 # Lk 9.10; Mk 3.20. Lampulan leihye hüyange Jesu phei hüo, hüyange iman-e lingpu hei nyüopu khongkümpu Jesute i. 31Kahtalan maawe peipu hei taipu ngoh, tüone menge Jesu hei I pinlan hahlak hipak nehoi yetüo. Tüokhei Iye imante i, “Hipak ütenja toloi meilak jingne nyoijing ja te teman hüng taihah.” 32#Mt 14.13-21; Lk 9.11-17; Jn 6.5-13; Mk 8.1-10; Mt 15.32-39.Tüokhei lisheng ja me ongyange wanwüng jeng yamme iman yayong.

33Kahtalan-e iman taipu nge, hüyange iman aoyin tai mamshe shing; tüokhei iman üshei chingshao tüohyange yalam me phet hüyange Jesu hei I pinlan manngoipe nyoijing me iman me shonge ngoi. 34#Mt 9.36.Aope lisheng mepu Jesu yu, Iye kahta üngang nge, hüyange iman jingne I mongjang me yayenge teih, hangjingne nyee yompa yenangpu nyeelanke iman nge. Tüokhei Iye ülam maawe imante nyüowe wang. 35Aope shonne yao, I pinlan I tangte pei hüyange i, “Shaaji yeonge shonteki, hüyange hatüowa wanwüng jeng. 36Kahtalan yanne tamtüoh, hüyange chingyo yupi kahhampalan mepu iman-e hahlak ütam minshak yah.” 37#2 Ahng 4.42-44.Jesuwe janne i, “Numan-e imante hahlak ütam phatüoh.” Iman-e tong, “Toman taiye ngin gho ni phawe an shakke imante uh ne tamhu shihpu a?” 38Jesuwe imante i, “Numan me an hangshin ngohnangki? Taitüoh hüyange leihu.” Aope iman-e tüoyapeih iman-e Ite i, “Ankhüo nga hüyange nyah ni.”

39Hüwante kahtalan üshei hüng tangme ükhong ükhong shotne tamtüoh she Jesuwe I pinlante ngao pha. 40Tüophei me kahtalan üleng üleng gho ja ükhong hüyange denga ükhong shot. 41#Mk 14.22; Lk 24.30-31.Tüophei me Jesuwe ankhüo nga, nyah ni jon, wangte lei, hüyange Kahwang te minyong pha. Iye an khoih hüyange kahtalan te tamtüoh she Iye pinlante pha. Iye nyah ni-o iman üsheite tamme pha. 42Kahta liliye hah hüyange moh. 43Tüophei me pinlan-e muhto penme ni maawe an hei nyah topu shaijem. 44Hüyange an hahpu kahtalan netan haja nga ngoiye ngoh.

Jesu Yengme Kem

(Mt 14.22,23; Jn 6.15-21)

45 # Mt 14.22-33; Jn 6.15-21. Hüwante muh Iye kahtalan yanne teiyang phei me yoi pinlan lisheng ja te ongne tam hüyange I sheshao me jaye yengjan Bethsaida te tei. 46Pinlante yan ngao iye teiyang phei me, kahtang ja te yoplak jingne I ong. 47Aope ün ngoi lishenga yengching üwo me hüyange Jesu I shaha kahtok me ngoh. 48#Mk 13.35.I pinlan yengme lisheng popu jingne pongpu Iye nge, hangjingne iman phei hokke wangyang lei. Tüokhei napning awkaju me yengtang me kemme I pei. Iman linne I tai. 49Hüyangpoi aope iman-e I yengme kem nge. “Hatüowa miengja!” she iman-e teih, hüyange üngwün. 50#Mt 9.2.Hangjingne aope iman üsheiye I nge iman nyam. Hüwante muh Jesuwe imante ngao, “Mongyong yah!” “Hatüowa Tao, tahnyam!” 51Tüophei me iman phei jamme I lisheng te ong, hüyange wangyang lak. Pinlan yeonge yashan hüyange lanshe üpong yetüo. 52#Mk 8.17.Iman-e haja nga te uhyingpu te leppu hanghe yeshing; iman mong kentinge üye.

Gennesaret Me Dakpalan Meitam

(Mt 14.34-36)

53 # Mt 14.34-36. Hüyange aope iman-e yengching kai, Gennesaret kahtok ngoi; iman-e tüome lisheng shinyange ang. 54Iman-e lisheng angpu phei jamshe, kahtalan-e Jesu shing. 55Tüokhei tüopa kahtok me ngohpu kahta liliye dakpalan iman lengme paiyange ümeken me I ngohnang she jai, I tangte pei. 56#Mk 3.10; Mt 9.20.Hüyange ümeken me I chingshao me, bangching me, yejema-a kahme peilakeih, kahta lan-e dakpalan paiye peiye pheeileihpu nyoiyin me angyange iman-e I nyejeng te nehoi jonne tampha she yoppe khümpu ngoh; hüyange aoyinne jon üshei meitam.

Currently Selected:

MARK 6: KONYBSI

Highlight

Copy