MARK 5

Ünuyaha Pheipa Kahta Ja Jesuwe Meitam

(Mt 8.28-34; Lk 8.26-39)

1 # Mt 8.28-34; Lk 8.26-39. Iman Galilee jaye yengjan Gerasalan kahmük te pei. 2Jesu lisheng mepu yupu phei jamshe mangkoksa mepu ünu yaha pheipu kahtaja I phei hüo. Tüopa kahta me ünu yahalan ngoh. 3I mangjong yo me nyoi. Shaaji aowe-o Ite yanne shayange ye-ang ok; 4hipak lep iye I ya hei yak me shayange ang, hüpoi shapu lep iye phün hüyange yan üshei yaphei kawin. Kahta aowe-o phowe ye-oklak ne I wanne ngoh yangki: 5Wangnyak wangngai I mangjong yo me hüyange phao me üngwünne hüyange yoi nying nyingke tangtate ünah pheipu longe wette waa-kemme ngoh.

6I shejai she ngohwante Iye Jesu nge; tüokhei I phet, yatuh shünge I sheshao me lam; 7#Lam 16.17; Heb 7.1; Mk 1.24.hüyange ngao üyong ngaiye üngwün, “Jesu Ütahpa Kahwang Üha! Nange ü-mepu hang yah hupu? Kahwang min me taowe khümme inang, üte shangne tahtam kei!” 8Hangjingne Jesuwe Ite i, “Ünu yaha, tüopa kahta mepu yutüoh.” 9Jesuwe Ite tong. “Nangte hangke minpu?” Kahtawe janne i, “Ü-min-a ‘Mob,’ hangjingne toman maawe ngoh nang!” 10Tüopa kahtok mepu ünu yahalan jange yeteilak jingne Iye Jesute yelakpe tong.

11Sha-a tampu ak ükhong, ü-o mepu kahshong me heei hahwe ngoh. 12Yahalan-e Jesute tonge i, “Toman aklan tangte teipha, hüyange toman iman tangte taining.” 13Iye iman taine tam. Ünu yahalan kahta mepu yu hüyange aklan tangte ong. Haja ni nanjing ngohpu aklan üshei yeonge po hüyange yengching nah wakte phet moilan yengme hüng.

14Ak yomme ngohpu kahta phette tai hüyange kahhampalan hei chingshao kahtalan te ngaoyan. Hanghe ngai tüote leilak jingne kahtalan jem. 15Iman Jesu tangte pei hüyange ünu yaha maawe ngohyangpu kahta nge; inkhek inyange kahta ümei ne shotte nge, hüyange iman üshei nyam. 16Aoyinne ütingme ngeyangki iman-e, ünu yaha hei kahta hüyange aklan jeng kahtalante i. 17Tüokhei iman kahtok mepu taitepha she Jesute iman-e yoppe tong.

18Hüyange aope Jesu lisheng te ong, ünu yaha ngoh yangpu kahtawe Ite tong, “Tao nang phei taiküning!” 19Hüpoi Jesuwe I yewoi; hüyange hüke i, “Nenok tangte leih yetüoh hüyange Youngwanpawe nangjingne hangshin toiling hüyange nangte hangshin ken imante itüoh!” 20#Mk 7.31.Tüophei me tüopa kahta leihye hüyange Dekapolis#Ching Pen she-o ngelak lante Jesuwe I jingne hanghe ling iye pong, hüyange aoyinne tüopa ngao jai iman üshei yashan.

Jairus Üha Hüyange Jesu Inkhekte Jonpu Sheko

(Mt 9.18-26; Lk 8.40-56)

21 # Mt 9.18-26; Lk 8.40-56. Hüyange aope jaye yengjan yete Jesu nishe lisheng me leihye; ükhong üyong I neikonne jem; tüokhei I yengching nah me ngoh. 22#Lk 13.14; Lam 13.15; 18.8,17.Tüome Jairus she minpu, synagogue woipa üyong ja pei, hüyange aope Iye Jesu nge, I yashong me I nying nyingke lamme ta; 23#Mk 6.5; 7.32; 8.23; Lam 9.17; 28.8.hüyange Iye okpu shinne inne nyaiye i: “Üha üjoinyu pali she daknang. Chingmei linge peikei hüyange I tangme nang yak moipha, tüome I meilak hüyange üyin ngohlak!” 24Tüokhei Jesu I phei yayong. Ükhong üngang Iphei woi hüyange kenphe me kahta maa.

25Hüyange sheko ja wangpeng penme ni ngoiye yelakpe iy taipu ngoh, 26yhate soihüng shingpalan maawe paoyapoi hüyange yha me ngohpu ngin wenne kümyapoi, meihah shepu nanleiye shemeng she ta; 27Jesu jeng yhawe jai, tüokhei ükhong pa me tokphei yeme yha pei. 28Yoi nying nyingke yhawe hüke i, “Taowe I inkhek te jonma-a, Tao meilak.”

29(Yhawe Ijing inkhek te jon) Mokhshe yha iy yünpu lak; hüyange yha shangpu mepu meiteki she yhawe shinge pei. 30#Lk 5.17.Hüwante muh I mepu üngan taipu Jesuwe shing, hüyange ükhong yete leppe ye leiyange Iye i, “Ü-inkhekte aowe jon ei?” 31I pinlan-e hüke janne i, “Nang neikonne kahtalan üngang ngohnang; nangte aowe jon ei she hangne tongki?” 32Hüpoi aowe lingyangki shinglak jingne Jesuwe neikonne lei. 33Ite hanghe ngai shekonyuwe shingpei; hüyange nyampu phei nin nin she yha pei hüyange I yashong me lammeta, hüyange ütingme nangpu üshei Ite i. 34#Lk 7.50; Mk 10.52.Jesuwe yha te i, “Üha, nang ütinglakpuwe nang meiteki. Chingmei me taitüoh, hüyange nang shangpu mepu meitüoh.”

35Aope Jesuwe ngaowe ngoh, Jairus nok mepu shongshonpa pei hüyange Ite i, “Nang ha liteki. Hangne numan-e konnyüopa shangne tamme shomme kempu shi?”

36Hüpoi iman-e ipu ngao te Jesuwe mong yepha, hüpoi synagogue woipate i, “Tahnyam, üting hei lakyah.” 37#Mk 9.2; 13.3.Tüophei me Jesuwe Peter hei Jeams hüyange Inao John kaiye ao-o I phei yewoi. 38Aope iman-e üyongpa nok ngoiyapeih, kahtalan shappu, üngwünpu ülam maawe Jesuwe nge. 39I noksa te ong hüyange imante i, “Hangne teshinne moppu shi? Tüopa naha lipu yeje, I shipu hei ngoh nang!” 40Iman üsheiye Ite nyi, tüokhei Iye iman üshei jange yan, naha Inyu Ipa ni hüyange I pinlan lüm yahyange naha lamme ngohpu tüp te ong. 41#Lk 7.14; Lam 9.40.I yak me Iye sheko naha pai hüyange hüke i, “Talitha koum,” leppu “Sheko naha! Taowe nangte inang, lüotüoh!”

42Sheko naha nünge lüo hüyange kemme hüo. Yha wangpeng pen me ni ne ngoh. Aope tüo ngai iman üshei yashan! 43#Mk 1.43-44; 7.36.Hüpoi ao te-o tüopa jeng ye-ilak jingne Jesuwe ngaokeng pha, hüyange Iye i, “Yha te hahlak ütam phatüoh.”

Currently Selected:

MARK 5: KONYBSI

Highlight

Copy