MARK 4

Ülideipu Ngaolep

(Mt 13.1-9; Lk 8.4-8)

1 # Mt 13.1-9; Lk 8.4-8. Üne-o Jesuwe Galilee yengnah me konnyüowe wang. I neikonne jempu kahta meiyange loipu nanjingne I lisheng ja me ong hüyange yengme yong. Jempu kahta üshei phanko me ngoh. 2Imante konnyüowante Iye ngaolep maawe jon hüyange hüke i: 3“Jaiyah! Ülideipa ja üli deine tai. 4Hüke Iye kahme üli deiwante, üli ütam lamko me yei, hüyange awhalan peiye toonne küm. 5Üli ütam kahtok ümei yenangpu longpieng tangme yei. Kahtok ümei yeje tüoh-e üli mamshe phao. 6Tüophei me aope wanghe kat, üphao kuiye mah, hangjingne üya meiyange yelupu nanjingne üphao wanne mah. 7Üli ütam huh-hüng yo me yei, hüng jongpuwe iman shümme mah hüyange iman me ülick yengai. 8Hüpoi üli ütam kahtok ümei me yei, hüyange üphao meiye ngai, jong, hüyange ülick lick.” Ütamme delüm ngoiye, ütamme dewok ngoiye, hüyange ütamme gho ngoiye ülick lick; 9hüyange Jesuwe i, “Jailak jingne aoyin me na ngoh iman-e jaiyah.”

Ngaolep Wongpongne Ngaipu

(Mt 13.10-17; Lk 8.9,10)

10 # Mt 13.10-15; Lk 8.9-10. Aope Jesu I shaha ngoh, Iye nyüopu jaiyangpulan pin penme ni phei I tangte pei hüyange ngaolep khoih ilak jingne tong. 11#1 Kor 5.12-13; Kol 4.5; 1 Thes 4.12; 1 Tim 3.7.Jesuwe imante janne i, “Kahwang Ahngching me hanghe ngaolo ngoh numante pha yangki; hüpoi ü-at me ngohpu ülaolan-e, ngaolep kaiye jaine tamnang. 12#Isa 6.9-10.Hümme nakshih,

“ ‘Iman-e lei shaha leilak,

hüpoi ye-ngepe,

iman-e jaimuh jai,

hüpoi yeshingpe.

Tüone yejeshihma-a iman Kahwang tangte mong lüphah shepu,

hüyange Iye imante ümeng winhah shepu!’ ”

Ülideipu Ngaolep Khoih Inang

(Mt 13.18-23; Lk 8.11-15)

13 # Mt 13.18-23; Lk 8.11-15. Tüophei me Jesuwe imante i, “Numan-e tüopa ngaoleppu yeshingpu a? Hüma-a ngaoleppu lili numan-e hangke shinglak? 14Üli deipawe Kahwangpa pungao ümei deipu hüonang. 15Hipak ja ja me tüopa ngao lamko me yeinang; tüolan kahtawe jaipupa jainang, hüpoi jaipu phei jamshe satan pei hüyange iman mepu pungao ümei yahtei. 16Kahta ütam-a kahtok ümei yenangpu longpieng tang me yeipu üli lenang. Kahwang pungao jaipu phei jamshe iman-e mongmei me yahnang. 17Hüpoi iman ümong ngoiye luwe yehin hüyange hipak laowe yengoh. Tüokhei aope pungao ümei jingne shangpu yejema-a shaoshi yalipu peilakeih, iman-e nünne ye-okpe tüohnang. 18Ülao kahtalan-a hüng yo me deipu üli lenang. Tüolan-a aoyinne pungao ümei jai, 19hüpoi tüopa üyin jingne mongshang, hakpute lengpu, hüyange lengpu üshei teihne tam hüyange pungao ümei shümne tam hüyange iman üli yelick. 20Hüpoi kahtok ümei me yeipu üli te leppuwa, aoyin kahtawe pungao ümei jai, hüyange yah, hüyange ütamme delüm, ütamme dewok, hüyange ütamme gho ja, ngoiye ülick lick.”

Muhto Phangme Vüntük

(Lk 8.16-18)

21 # Mt 5.15; Lk 8.16; 11.33. Hüyange Jesuwe yelakpe i; “Kahta ütamme vüntük pahyange muhto ümongme yejema-a lengphang me angnang kü a? Vüntük yongjing ken me Iye ye-anglak a? 22#Mt 10.26; Lk 8.17; 12.2.Hangjingne hangyin lowe ang, ütokte ngaiye kümlak, hüyange hangyin jüowe ang ütahte ngailak. 23#Mt 11.15; Mk 4.9.Numan me jailak jingne na nyimme ngohpu ne mengma-a jaiyah!”

24 # Mt 7.2; Lk 6.38. Iye imante hüke i; “Numan-e hanghe jai, tüote mong phatüoh! Numan-e eiha ngaophünlak jingne hanghepa wanglam jon numante ngaophünlak jingne Kahwange tüomuh jonlak, hüyange numante shemengpu püolak. 25#Mt 13.12; 25.29; Lk 8.18; 19.26.Ao kahta me üjingha ngoh, Ite paowe phalak; ao me üjingha nehoi yenang Imepu khongküm hüyange üjingha ngohpu nehoi yah teilak.”

Üli Jongpume Ngaolep

26 # Mt 13.24-30. Jesuwe yelakpe hüke i: “Kahwang ahngchinga kahta jawe I kahte üli shaipu lenang. 27I wangnyak wangngai shi hüyange laoyapoi, üli üshei phao hüyange jong. Tüopa hangke ngai Iye yeshing. 28Kahtok kaiye üphao jonge tamnang hüyange ülick lickne tam nang; üwangne ünyim ngai, tüophei me üshang, hüyange ükümne wange ngoipu tah lick. 29Hüpoi aope ülick yimlakei, shaaji tahyahlak ju ngoipu khei kahtawe yangkuih phei toikong wangnang.”

Yanhoili Me Ngaolep

(Mt 13.31,32,34; Lk 13.18,19)

30 # Mt 13.31-32; Lk 13.18-19. Jesuwe tong, “Kahwang ahngching hüke ngohlak she teman-e hanghe phei ilak? Shinglak jingne hanghepa ngaolep phei teman-e ilak? 31Hatüowa kahtoknyu üli yo me sheshoipupa yanhoi li lenang. Kahta jawe yah hüyange kahtok me dei; 32hipak ütenjapu mongme hatüo phao hüyange üphao yo me sheyongpupa ne meng. I me üqui üyong ngai; tüokaiye wang awhalan pei hüyange üyak shümphang me ülüp ling.”

33Hatüo kihpu ngaolep maapu phei kahtalan-e shinglak jingne Jesuwe konnyüo. 34#Mt 13.34; Jn 16.25.Ngaoleppu ye-ompe Iye iman phei yengao, hüyangpoi iman shaha ngohwante yoi pinlan phei tüopa jeng khoih i.

Jesuwe Waishihwangkhah Laktam

(Mt 8.23-27; Lk 8.22-25)

35 # Mt 8.18,23-27; Lk 8.22-25. Tüonyih aope ün ngoi, Jesuwe yoi pinlante hüke i, “Teman jaye jant te wenhah.” 36Iman-e ükhong tüohyange I shotte ngohpu lisheng te ong; hüyange ülao lishenglano tüome ngoh. 37Ye-onge wong nangpu phei waishihwangkhah hüyange yengmokh po, tüokaiye lishenga yenge maane wang. 38Jesu lisheng ükong yeme yeonge meiye shiteiye ngoh. Pinlan-e Ite loi, hüyange i, “Konnyüopa, teman mahne o nangki, nange hangko yeteih pu a?” 39Jesu lao hüyange wangyangte tee-ngao: “Laktüoh!” Hüyange yengmokh te i: “Jünge ngohtüoh!” Wangyang lakke mah, hüyange wüngmahpu üyong ngoh. 40Tüophei me Jesuwe imante i, “Hangne numan teshinne nyampu shi? Numan me ütinglakpu yenangpu a?” 41Hüpoi iman yeonge nyam, hüyange hüke tei ngaowe i, “Waishihwangkhah hei yengching yengmokh lanne nehoi ngao jai! Tüowa aoshi?”

Currently Selected:

MARK 4: KONYBSI

Highlight

Copy