MARK 3

Yimdak Yak Pheipu Kahta

(Mt 12.9-14; Lk 6.6-11)

1 # Mt 12.9-14; Lk 6.6-11. Tüophei me üne-o Jesu synagogue te leih ye, hüyange tüome yimdak yak pheipu kahta ja ngoh. 2#Lk 11.54.Sabbath me kahta ütam meitam yashi she, Jesu ümeng pholak jingne tüome kahta ütam yeonge kentinge leiye ngoh yangki. 3Yak mangteiye ngohpu kahta te Jesuwe i, “Sheshao ye me tüome yongtüoh.” 4Tüophei me Iye kahtalante tong, “Teman ngaokhüm me Sabbath me hang lingtüoh she ipu shi? Ümeng heiya ümei: Kahta üyinja yinlak heiya toilak?” Hüpoi iman-e ngaopha ja nehoi yengai. 5Imante leiye pongyange Jesu yeonge mongshih ngai, hüpoi hüwante muh iman juteih yenangpu hei yeshupu ngeyange I yayenge teih. Tüophei me kahtate Jesuwe i, “Nang yak lantüoh.” Iye yoi yak lan hüyange mei. 6#Mk 12.13.Phariseelan synagogue mepu mamshe yayonge tai hüyange mamshe Herod pinlan phei hüo; hüyange Jesu toilak jingne iman-e kon yam.

Yengchingnah Me Bangha

7 # Mt 4.24-25; 12.15-16; Lk 6.17-19. Jesu hüyange I pinlan Galilee yengnah yete tai, hüyange kahta üngang I phei te woi. Iman Galilee mepu, Judea mepu, 8#Mt 11.21.Jerusalem mepu, Idumea yikeng mepu, jayekao Jordan yikeng mepu, Sidon hei Tyre chingnyu chingyo yupi mepu pei. Iye lingpu toishao iman-e jaiyange kahta üngang Jesu tangte pei. 9Ükhong jamloi yong hüyange kahtalan-e Ite shunglak shing; tüokhei I pinlante lisheng ja tümtüoh she Jesuwe i. 10#Mk 5.29,34; 6.56.Hangjingne Iye kahtalan maawe meitam, hüyange dakpalan üshei imante jonne tamlak jingne tei shunge pei. 11Hüyange aope iman me ünu yaha ngohpalan-e I nge, I sheshao me lamme ta hüyange üngwün, “Nanga Kahwang üha!” 12#Mk 1.45.Hüpoi I aoweih yengailak jingne ünu yahate Jesuwe meimei-e i.

Jesuwe Pinlan Penme Ni Le

(Mt 10.1-4; Lk 6.12-16)

13 # Mt 5.1; Lk 6.12. Tüophei me Jesu kahtang te ong hüyange Iye mongpu kahtalan I tangte nyik, hüyange I tangte iman pei; 14#Mt 10.1.hüyange Iye penme ni ngoiye le, imante Iye lampulan she min. Iye imante i, “Numan ü-phei ngohlak jingne Taowe numan leyangki.” “Konnyüolak jingne-o Taowe numan shonne teilak.” 15Hüyange laalan jange teilak wong numan me ngohlak. 16#Mt 10.2-4; Lk 6.14-16; Lam 1.13.Iye lepu penme ni tüolan ngohnang; Simon (Jesuwe Ite Peter she min); 17Zebedee üha Jeams hei Jeams ünao John (Jesuwe imnite Boanerges she min pha, leppu “Wangkhong halan”). 18Andrew, Philip, Bartholomeo, Mattheu, Thomas, Alphaeus üha Jeams, Thaddaeus, Kana mepu Simon, 19#Mk 2.1; 7.17.hüyange Judas Iskariot, aowe I lopa ne meng.

Jesu Hüyange Beelzebul

(Mt 12.22-32; Lk 11.14-23; 12.10)

20 # Mk 6.31. Tüophei me Jesu nokte ye. Üne-o kahta üngang jem; Jesu hüyange I pinlan hahlak hipak nehoi yetüo. 21#Mk 3.31-35; Jn 10.20.Aope I noksalan-e tüopa ngaolan jai, I tükke anglak jingne iman yong, hangjingne “I mong pomteki” she kahtalan-e i.

22 # Mt 12.24-29; Lk 11.15-22. #Mt 9.34; 10.25.Hüyange Jerusalem mepu laipu ngaokeng nyüopalan ütam-e hüke i, “I me Beelzebul ngoh nangja!” Ülaolan-e i, “Hatüowa laa ahngpa aowe Ite iman janglak wong pha.” 23Tüokhei Jesuwe I tangte kahtalan nyik hüyange imante ngaoleppu ütam i: “Satanne hangke satan jangpu oklak shi? 24Ahngching ja teitam yange tei hokma-a, tüopa ahngching yonge yengoh oklak. 25Hüyange noksa ja (ükhong ükhongne) teitam yange tei hokma-a, tüopa noksa yonge yengoh lak. 26Tüokhei satanlan ahngching teitampune mengma-a, yonge yengoh oklak, hüpoi leamlak hüyange üküm ngoilak.

27 # Isa 49.24-25. “Aowe-o Iye üwangne wongnangpu kahta phowe shayange ye-angpute, wongnangpu kahta nok mepu toinan nyieyahlak jingne ye-ong oklak.”

28 # Mt 12.31-32; Lk 12.10. Ütingme Taowe numante inang: kahta ühalan-e ünu üshei hüyange ngaomeng üshei hüyange iman-e hangshin me phoiwümyangki khongkümpu jingne ümeng winpu oklak. 29Hüpoi aowe Yaha Üjao phei tüi-e ngaomeng ngaoyangki, aope-o ümeng yewinlak, hangjingne Iye üküm yenangpu ünu omnang. 30Hangjingne, iman ütam-e Ime ünu yaha ngohnangki she ngao, tüokhei Jesuwe hüke ngao.

Jesu Inyu Hei Inaolan

(Mt 12.46-50; Lk 8.19-21)

31 # Mt 12.46-50; Lk 8.19-21. Tüophei me Jesu Inyu hei Inaolan pei ngoi. Iman nokshao me yong hüyange kahta ütam shonne Ite i, 32hangjingne I neikonne ükhong üyong shotte ngoh, hüyange iman-e Ite i, “Leihuyah, nangnyu hei nangnaolan nokshao me, hüyange iman-e nang yamnangki.” 33Jesuwe janne i, “Ünyu aoshi? Yejema-a ünaolan aoyin shi?” 34I neikonne shotte ngohpu kahtalante leiye pong hüyange i, “Leihu ünyu hei ünaolan tüome ngoh nang. 35Hang-jingne aoyinne Kahwange lengpu toi ling, I ünaolipa, ünaolinyu, hüyange ünyu.”

Currently Selected:

MARK 3: KONYBSI

Highlight

Copy