MARK 2

Yimtin Dakpu Kahta Ja Meitampu

(Mt 9.1-8; Lk 5.17-26)

1Aope nyih üjingha yanyange Kapernaum te Jesu leih ye, hüyange I nokme ngohnangki she ngaolan jai. 2Tüophei me noksa me hüyange tafün shong me lünne nyoi yenangpe kahta üngang jem. Hüwante Jesuwe imante konnyüo; 3#Mt 9.2-8; Lk 5.18-26.aope kahta ütam peipu nge, hüke kahta peliye yimtin dakpu kahta ja paiye pei. 4Jamloi kahta maapu nanjingne iman-e Jesu tangte I yepei ok. Tüokhei Jesu shotte ngohpu nyoi phei shuwe iman-e noktok lüo. Aope iman-e noktok lüowe sho, iman-e yimtin dakpu kahta lengme yeitai. 5Aope iman ütinglakpu Jesuwe nge, hüyange yimtin dakpate i, “Üha, nang ünu winyangki.” 6Hüwante ngaokeng nyüopalan ütam shotte ngoh hüyange iman nying nyingke hüke teih: 7“Tüopa kahtawe hangne hüke phoiwüm-e ngaopu shi? Kahwang tokte aowe-o ümeng winpu ye-ok!” 8Iman-e hanghe teihyange teingao Jesuwe I yaha me mamshe shing, hüyange Iye imante i; “Numan mongjang me hüke hangne teihpu shi? 9Yimtin dakpate, ‘Nang ünulan winyangki’, she ipu she o lak heiya, yejema-a ‘Lüotüoh, nang leng paiyah, hüyange kemtüoh’ she ipu shemeilak shi? 10Hüpoi kahtoknyu me ünulan ümeng winpu oklak Kahta Üha me wong ngoh nang she numan-e shinglak nanjingne”—Iye yimtin dakpate i, 11“Taowe nangte inang, lüotüoh, nang leng#Aam she-o ngelak paiyah, hüyange nokte yetüoh;” 12#Mt 9.33.Iman üsheiye leiye ngohwante, tüopa kahta lüo. I leng pai hüyange mamme nokte ye. Iman üshei lanshe yashan hüyange Kahwang minyonge hüke i, “Toman-e hükihpu toi aope-o jeman nge!”

Jesuwe Levi Nyikpu

(Mt 9.9-13; Lk 5.27-32)

13Jesu üne-o Galilee yengnah yete leihye. I tangte bangha pei hüyange Iye imante konnyüo ne ükong wang. 14#Mt 9.9-13; Lk 5.27-32.I kemjang kemme ngohwante, Alphaeus üha Levi kahngin shaipa ja, I nyoijing me shotyange Iye nge. Jesuwe Ite ngaowe i, “Ü-pheite woikei.” Levi yayong hüyange I phei te woi.

15Tüophei me Levi nok me Jesuwe nük hah. Kahngin shaipalan hüyange ünulan Jesu pheite woipu maawe ngoh, hüyange iman yo me ütam hüyange I pinlan-o omme shot. 16#Lam 23.9.Aope ngaokeng nyüopalan ütam aoyin Pharisee ne ngoh, iman-e ünulan hüyange kahngin shaipalan phei Jesu hahpu nge; tüokhei iman-e pinlante tong, “Hangne Iye kahngin shaipalan hüyange ünulan phei hahpu shi?” 17Aope Jesuwe iman ngao jai hüyange imante janne i; “Meiye ngohpu kahta lanne soihüngpa wongpong ne yeje: hüpoi aoyin dakyapeih tüolan jingne hei wongpong. Khakshuwe ngohpalan nyiklak jingne yeje, hüpoi ünulan jingne tao pei.”

Nyaolepu Jeng Tongpu

(Mt 9.14-17; Lk 5.33-39)

18 # Mt 9.14-17; Lk 5.33-38. Sha-a baptipa John pinlan hüyange Pharisee lan nyaolepu ngoh. Kahta ütam Jesu tangte pei hüyange Ite tong, “Hangne baptipa John pinlan hei Phariseelan nyaole, hüpoi nang pinlan-e hangne nyaolepu üya?” 19Jesuwe imante janne i: “Nokyam mo te peipu shümpalan nyemthepa phei ngohyange nyaolelak a?” Nyemthepa iman phei jamme ngohphei ma-a aope-o nyaolelak yeje. 20#Lk 17.22.Hüpoi hipak ja peilak aope nyemthepa iman mepu yahteilakei, aope tüonyih peilakeih, iman nyaolelak.

21“Phakshao ülang me nye üla aowe-o yeshing. Hüpoi ütamme shingma-a, üla shingpulan ülango omme hitte phünkülak. 22Yejema-a ütamme wuwüngti üla meishotük ülang me hinma-a, wuwüngti ülawe meisho phüplak, hüyange wuwüngti üla hei meisho khok moini menglak. Yeje! Meishotük üla-a wuwüngti üla jingne!”

Sabbath Jeng Tongpu

(Mt 12.1-8; Lk 6.1-5)

23 # Mt 12.1-8; Lk 6.1-5. #Hin 23.25.Sabbath ja me Jesu kah ütam linne kemmetai. I phei te woipu I pinlanne tahlick yütte yah. 24Tüokhei Phariseelan-e Jesute hüke i, “Leitüoh, Sabbath ngaokhüm phei yeshupe hangne iman-e lingpu?” 25Jesuwe jan; “Iye hahlak ütam ja wongpong ne mengwante David-e hanghe ling numan-e iya shi? I hüyange I pheipulan seanyao, 26#1 Sam 21.1-6; 2 Sam 8.17.tüokhei Kahwang nokte I pei hüyange Kahwang jingne phapu an Iye hah. Tüopa-a Abiathar ütahpa ngengpa ne mengwante ngaiyangki. Toman wanglam me ütahpa ngengpalan-e hei tüopa an hahlak, hüpoi David-e tüopa hah, hüyange I pheipu lante nehoi pha.”

27 # Woi 23.12; Hin 5.14. Hüyange Iye imante i, “Sabbath kahta jingne lingyangki; Sabbath jingne kahta lingpu ne yeje. 28Tüokhei Kahta Üha-a Sabbath jingne-o Youngwanpa.”

Currently Selected:

MARK 2: KONYBSI

Highlight

Copy