MARK 1

Baptipa John Konnyüopu

(Mt 3.1-12; Lk 3.1-18; Jn 1.19-28)

1Hatüowa Kahwang üha Jesu Khrista pungao ümei ükong wangpu. 2#Mt 3.1-12; Lk 3.2-16; Jn 1.6,15,19-28. #Mal 3.1; Mt 11.10; Lk 7.27.Isaia hipawe nyanpukih, hüke ükong wang:

“Kahwange i, ‘Taowe nang sheshao me ü-shongmokpa shon nang.’

Iye nang jingne lam tümlak.

3 # Isa 40.3. Wanwüng jengme jawe üngwünpu ngaowüng,

‘I jingne Youngwanpa lam tümtüoh,

I kemlak lamnyu tingkhakke tümtüoh!’ ”

4 # Lam 13.24. Wanwüng jengme John ngai, kahtalan te bapti, hüyange I konnyüo. Iye kahtalan te hüke i, “Numan monglüp tüoh hüyange baptitüoh;” “Hüyange Kahwange numan ünu winpha lak.” 5Judea hüyange Jerusalem chingnyu me ngohpu kahta lili John-e nyüopu ngao jai ne pei. Iman-e iman ünu jan hüyange Iye Jordan yengyin me iman baptitam.

6John-e udh min pheipu inkhek in, hüyange shiengme meisho hit; hüyange Iye dukh hei zahtai jelo hah. 7Iye kahta lante hüke konnyüowe üngwün; “Tao ümme tayange I yashom wu nehoi lan ne yewangpu ü-phei wong sheyongpupa ü-pheite peiküki. 8Taowe numan yengme bapti nang, hüpoi Iye numan Yaha Üjao me baptilak.”

Baptipu Hüyange Jesute Tokpu

(Mt 3.13—4.11; Lk 3.21,22; 4.1-13)

9 # Mt 3.13-17; Lk 3.21-22; Jn 1.29-34. Tüopa nyih hipak me Galilee kahtok me ngohpu Nazareth mepu Jesu pei, hüyange Jordan yengme John ne I baptitam. 10Yeng mepu Jesu ngaipu phei jamshe wangdang epyange Iye nge hüyange I tang me awshu kih-e Yaha peipu nge. 11#Tüo 2.7; Isa 42.1.Hüyange wangmepu ngao ja Iye jai; “Nang ümong kenpu Ha, Taowe nangte monghah nang.”

12 # Mt 4.1-11; Lk 4.1-13. Mamshe wanwüng jeng te yahawe I woitei; 13hüyange I wanwüng jeng me nyih deli ngoiye satanne tokne tamme ngoh. Tüome phao yinmok lan-o ngoh, hüpoi wangdang shongmokpalan pei hüyange Ite pao.

Jesuwe Nyah-ompalan Peli Nyik

(Mt 4.12-22; Lk 4.14-15; 5.1-11)

14 # Mt 4.12-17; Lk 4.14-15. Sha-a küpnok me John angyang phei me, Galilee te Jesu tai hüyange Kahwang mepu Pungao ümei konnyüo. 15Iye hüke i, “Itte angpu hipak peiteki,” “Hüyange Kahwang ahngching ngoiteki. Numan ünu mepu monglüptüoh hüyange pungao ümeite üting laktüoh.”

16 # Mt 4.18-22; Lk 5.1-11; Jn 1.40-42. Sha-a Galilee yengching phin me Jesu linwante, Iye nyah ompa ni, Simon hei Inao Andrew yengme shaan phei nyah omme nge. 17Jesuwe imante ngaowe i, “Ü-pheite woikei hüyange taowe numan te kahta omlak nyüopha ning.” 18Mamshe iman shaan ang, hüyange I pheite woi.

19Hüyange I shejai she taiwante, Zebedee üha Jeams hei lnao John Ijei Inao ni nge, iman lisheng me shotyange iman shaan tümme ngoh. 20Iye iman ngepu phei jamshe Jesuwe imante nyik; tüokhei iman üpa Zebedee nyah omne nanshakpalan phei lisheng me tüoh hüyange Jesu phei te tai.

Ünu Yaha Pheipu Kahta Ja

(Lk 4.31-37)

21 # Mt 7.28-29; Lk 4.31-32. Hüyange iman Kapernaum te pei, hüyange ünepu Sabbath me Jesu synagogue te ong hüyange konnyüone ükong wang. 22Aoyin kahtalan-e I ngao jai, Iye nyüopu wanglam ngeyange yashan. Hangjingne Iye ngaokhüm nyüopalan kih yeje; hüleima-a Iye wong ngohpu phei nyüo.

23 # Lk 4.33-37. Hüwante muh Ime ünu yaha pheipu kahta ja synagogue mepu ngai hüyange üngwün. 24#Jn 6.69.“Nazareth mepu Jesu, toman mepu nange hanghe yah hu nangki? Toman mahtamlak jingne nang tüome pei a? Nang ao shi taowe shingnang. Nang Üjaopa Kahwang shongshonpa.”

25Hüpoi Jesuwe yahate teeye i, “Tahlangman, hüyange kahta mepu ngaitüoh.” 26Ünu yahawe Ite yeonge po, hüyange üngwünne ngao. Tüophei me Imepu ngai. 27Kahtalan üshei yashan, hüyange iman yo me hüke ngaowe i, “Hatüowa hanghe shi? Nyüopu üla jayang! Hatüo kahta me ünu yahate ngaokeng phalak wong ngoh nangki; hüyange iman-e I ngao jainangki;” 28Tüone menge Galilee kahtok üshei yete Jesu ngaolan mamshe ponge yan.

Jesuwe Kahtalan Maawe Meitam

(Mt 8.14-17; Lk 4.38-41)

29 # Mt 8.14-15; Lk 4.38-39. Jesu hüyange I pinlan synagogue mepu yan hüyange Jeams hei John iman phei nang yange Simon hei Andrew nokte ong. 30Simon ünyei tinye dak-e ngoh, hüyange Jesu ngoipu phei jamshe tüopa ngaolan Ite i. 31Yha shongte I wen, yak me yha pai hüyange yha laone tam. Tinye dak-e yha ang, hüyange yhawe imante namnowe pha.

32 # Mt 8.16-17; Lk 4.40-41. Aope ün ngoi, hüyange wanghe nyip phei me kahtalan-e Jesu tangte dakpalan maawe hüyange laawe woipulan woipei. 33Hüyange chingnyu me ngohpu kahta üshei tafün shong ngoiye jem. 34Dak ümeng lamme lamme ngohpu maawe Jesuwe meitam hüyange laalan maawe jangtei. Laalan te Iye hango ngaone yetam, hangjingne I ao shi iman-e shing.

Jesuwe Galilee Me Konnyüo

(Lk 4.42-44)

35 # Lk 4.42-43. Üne nap, napning wangngai shaome Jesu lüo hüyange nok mepu tai; hüyange ching mepu yanne taiye wanwüng jeng me Iye yop. 36Hüyangpoi Simon hei I shümpalan I yamne tai; 37hüyange aope iman-e I nge iman-e Ite i, “Kahta liliye nang yamnangki.” 38Hüpoi Jesuwe janne i, “Neikon-e ngohpu ülao chingshao lante teman tailak yang. Taowe imante-o nyüolak, hangjingne tüopa jingne hei Tao peiyangki.” 39#Mt 4.23-25; Lk 4.44.Tüophei me Galilee kahtok üshei yeme synagogue te peiye konnyüo hüyange laalan jange I kem.

Jesuwe Ngondak Jaowe Tam

(Mt 8.1-4; Lk 5.12-16)

40 # Mt 8.2-4; Lk 5.12-16. Ngonpa ja Jesu tangte pei, hüyange ümme tawe khümme Ite jampha she i. Iye hüke i, “Nange mongma-a tao jaowe tampu ok.” 41Jesuwe Ite yeonge shüpsheye lei, hüyange I shongte wen hüyange Ite jon. Iye hüke jan, “Taowe jaowe tamhu nangki, jaotüoh!” 42Hüwante muh kahta mepu ngondak yan hüyange I jao; 43Tüophei me Jesuwe Ite yeonge wongnange deingao pha, hüyange hüwante muh I taine tam. 44#Lev 13.49; 14.2-32.Ite hüke i, “Jaiyah, ülao aote-o tüopa jeng tah i. Hüpoi tingkhakke ngengpa tangte taitüoh hüyange Iye nang te tokke leine tamtüoh, tüophei me nang jaoteki she shinglak jingne Mosa ngaokeng me hangke ngoh dotüoh.” 45Hüyangpoi kahta yanne tai hüyange kenphe me tüopa ngaolan yan. Iye jamloi ngaolan yanyangpu jingne, chingshao te Jesu yepei ok. Taihah shepu nanleiye wanwüng jeng me I ngoh; hüyange kenphe mepu kahtalan I tangte pei.

Currently Selected:

MARK 1: KONYBSI

Highlight

Copy