MARK 7

Lwngmeilan Mepu Wanglam Ülang

(Mt 15.1-9)

1 # Mt 15.1-11; Lk 11.38. Aope Phariseelan hüyange Ngaokeng nyüopalan aoyin Jerusalem mepu pei Jesu neikonne jem. 2I pinlan ütamme “Yejaopu” yak phei nük hahpu leiye ok: hatüowa, Phariseelan hei ülaolan wanglam phei yeshupe ngoh.

3Hangjingne Phariseelan hei ülao Jehudilan-e iman puyimlan-e nyüowe angpu wanglam jon; tüokhei wanglam khakshuwe yak yetuhma-a nük yehah pe ngoh, 4#Mt 23.25; Lk 11.39.yejema-a hatleih nyoi mepu aope peilakeih üwangne yeng yeyaope yehah. Hüyange wan, tük, sheakphan sheng, hüyange shinleng hanghepa wanglam me hangke jaolak wanglam maawe ngoh.

5 # Gal 1.14. Tüokhei Pharisee hei Ngaokeng nyüopalan-e Jesute tong, “Toman puyimlan mepu peipu wanglam hangne nang pinlan-e yejon, hüpoi tüo nanleiye yejaopu yakphei hahpu shi?” 6#Isa 29.13.Hüwante Jesuwe imante jan; Isaia hipawe numan jingne iye angpu hangke shupu shi! Numan jutok meipalan, Iye hüke nyan:

“Hatüo kahtalan-e jutok me üte wangshüm hüo,

hüpoi iman mongjang ü-phei yeonge jai.

7Iman-e üte jajang jawe yop khümnang,

hangjingne Kahwang lamjong ngoh yang pheite kahtawe lingpu lamjong iman-e nyüo!”

8Hüyange Jesuwe i, “Numan-e Kahwang ngaokeng yejonpe angyange kahtawe nyüopu puwanglam te mong phanang.”

9Hüyange Jesuwe yelakpe i, “Yeonge deiye numan-e Kahwang ngaokeng angne tamyange numan-e nyüopu puwanglam jon nang! 10#Woi 20.12; Hin 5.16; Woi 21.17; Lev 20.9.Hangjingne Mosawe hüke nyüo. ‘Nangnyu nangpa te iyesheyah,’ hüyange ‘Aowe Ipa yejema-a Inyu te ngao meng ilakei, I li ne tamlak.’ 11Hüyangpoi numan-e hüke nyüo, ‘Ütamme Inyu Ipa te jamme oklak ne ngoh, hüpoi hatüowa Corban’ (Leppu-hatüowa Kahwang jing she ima-a), 12Ite shaaji Inyu hei Ipa jingne hango lingne yetam. 13Tüokih-e numan-e nyüopu kahtalante pha ne tamyange Kahwang ngao ye-i-yeshe. Hüyange tüokihpu numan-e lingpu ülao toi maanang.”

Kahta Ja Nuwe tampu

(Mt 15.10-20)

14Hüyange Jesuwe I shongte ükhong ni she nyik hüyange imante i: “Numan üsheiye üte jaiyah hüyange shingyah. 15Kahta ja nuwe tamlak jingne ütok mepu I tangme peipu hango yenangja. Tüoleima-a, kahta ja mepu ngaipuwe I nuwe tamnang.” 16(Kahta ütam ja me jai yahlak jingne na nyimme ngohma-a Iye jaiyah).

17 # Mt 15.15-20; Mk 4.10. Aope ükhong angyange I tai hüyange nokte ong, pinlan-e tüopa ngaoleppu jeng Ite tong. 18#1 Kor 10.25-27; Rom 14.14; Tit 1.15; Lam 10.15.Hüyange Jesuwe imante i, “Hüma-a numane-o shinge okpu yenangpu a?” “Numan-e tüo yeshing a? Ütah mepu hanghepalam kahta ja te onglakeih, tüowe nuwe yetam ok; 19hangjingne hatüowa I mongjang te ye-ong hüpoi seanyu te onge ü-at te tai mahnang.” (Jesuwe hatüo ipu kaiye hahying üshei üjao she hüonang.) 20#Rom 1.28-31; Gal 5.19-21.Hüyange Iye yelakpe i: “Kahta I mepu hanghe ngai tüowe kahta ja nuwe tamnang. 21Hangjingne kahta mongjang ümong mepu ünu juteih, yejao yeshapu hüyange ünu toi linglak, kuhlak, toilak, 22#Mt 6.23; 20.15.phwngngamlak, hahnyakpu, hüyange ünu toi üshei ling; nyoi ngoh ümeng, eangpu, aohüngpu, Kahwang te phoipu, otapu, hüyange ngayounpu, 23tüolan khongkümpu ünu toi kahta ja ümong mepu ngainang hüyange I nune tamnang.”

Ütinglakpu Sheko Ja

(Mt 15.21-28)

24 # Mt 15.21-28. Hüyange tüophei me tüopa mepu Jesu yayong hüyange Tyre hei Sidon kahtok yete tai. I noksa ja te ong hüyange I tüome ngoh nang she aote-o shingne yetamhu, tüopoi I lowe yengoh ok. 25Hüpoi sheko ja, ao yoiha sheko nyu me ünu yaha ngoh, Jesu jeng jai hüyange mamshe I tangte pei hüyange I yashong me lam. 26Tüopa sheko-a Phoenicia mepu Syria me puhpu Greek ja ne ngoh, I ha mepu ünu yaha jang yangpha she Iye Jesu te tong. 27Hüpoi Jesuwe yha te janne i, “Üwangne nahalan moh ne tamhah, hangjingne nahalan mepu nük yahpuwe kuihalante shüppu yemei.” 28“Üyongpa,” she yhawe jan, “Kuihalane-o khao phang me ongyange nahalan-e yeipu hah nangja!” 29Tüokhei Jesuwe i, “Nange hüke ipu kaiye nokte yepu oklak; nangha yhamei mepu laa taitepu!” 30Tüokhei yha nokte ye hüyange yha mepu laa tai teiye yhalaha-a lengme lamyange nge.

Jesuwe Napan-ngao Ükpa Meitam

31 # Mt 15.29-31. Tüophei me Tyre kahtok angyange Jesu leihye hüyange Sidon lamke Galilee yengching kaiye Dekapolis kahtok üwo kaiye ye. 32#Mk 5.23.Kahta ütamme napan hüyange ngao-o ye-i-okpu kahta ja I tangte yah pei, hüyange Ite yakke jonne tampha she Jesute tong. 33#Mk 8.23.Jesuwe I shaha ükhong yo mepu woitei, kahtapa na me I yaklan ang, iyphao phao, hüyange I yi te jon. 34Tüophei me Jesuwe wangyete lei, lüo ülu yo, hüyange kahta te i, “Ephphatha,” leppu “Eptüoh!” 35Mamshe I na ep, I yee popu ok hüyange yeshangpe ngao. 36#Mk 1.44; 5.43.Tüophei me Jesuwe aote-o ye-ilak jingne iman üshei te ngaopha; hüyangpoi Iye hangshinne ye ilak jingne ngaopha teshinne kahtalan-e tüopa jeng i. 37Hüyange aoyinne tüolan jai iman üshei yeonge yashan. “Iye khongkümpu meiye linge oknangki; Iye napanpa jaine tam hüyange ngao ükpa ngao ngaine tam.”

Currently Selected:

MARK 7: KONYBSI

Highlight

Copy