MARK 8

Jesuwe Haja Peli Uh

(Mt 15.32-39)

1 # Mt 15.32-39; Mk 6.32-44; Mt 14.13-21; Lk 9.11-17; Jn 6.5-13. Tüo ün memuh, üne-o ükhong üngang jem; hüyange iman me hahlak hango yenangpe ngoh. Jesuwe I pinlan I tangte nyik hüyange i; 2“Tüolan kahta jingne Tao yayenge teihnangki, hangjingne hatüo me iman ü-phei nyih lüm ngoiye ngohnang, hüyange sha-a hahlak hango yenang. 3Taowe iman ye-uhpe teima-a iman kemwante seanyaowe nyai mahlak, hangjingne iman ütam üjai mepu peiyangki.” 4Pinlan-e Ite janne i, “Hatüo wanwüng jengme aowe teshinpu kahta lan jingne wangpu shinne hahlak tüolak shi?” 5Hüwante Jesuwe imante tong, “Numan me an hangshin ngoh nangki?” Iman-e jan, “Ankhüo nyit.”

6Kahtok me shotlak jingne Iye ükhong te ngaopha. Tüophei me Iye ankhüo nyit yah, Kahwang te minyong pha, tüolan khoih, hüyange ükhong te tamlak jingne yoi pinlan te pha; hüyange pinlan-e ükhongte tamme pha. 7Iman me üne-o nyahha ütam ngoh. Tüopa jingne Jesuwe minyong pha hüyange pinlante tüopa-o tamlak jingne i. 8Hüyange iman kahta liliye hah hüyange iman moh hüyange iman-e topu ükhoih ünyai shaijemwante muhto nyit maawe ngoh. 9Hüyange kahtalan haja peli nanjing ngoh, hüyange Iye iman taine tam. 10Hüyange mamshe yoi pinlan phei lisheng te ong hüyange Dalmanutha kahmük te tai.

Kahnyingwüngha Jingne Tong

(Mt 16.1-4)

11 # Mt 16.1-4; 12.38-39; Lk 11.29. Phariseelan ütam pei hüyange Jesu phei teingaone wang. Iman-e Ite tok hu, tüokhei Kahwange mongpu ngaiye hüolak jingne, kahnyingwüngha ja lingkei she iman-e Ite tong. 12Jesu yeonge luwe mongmeng hüyange i: “Hangne hatüo jinne kahnyingwüngha yampu shi? Ütingme Taowe numante inang. Tüopa jinte kahnyingwüngha hango yehüolak!” 13#Mt 16.4-12.Tüopa ngao phei iman angyange I lisheng te ong, hüyange jaye jant te tai.

Phariseelan Do Hüyange Herod

(Mt 16.5-12)

14Pinlan-e an yahlak yeteih tüo, hüyange iman lisheng me ongwante ankhüo ja shaha ngoh. 15#Lk 12.1; Mk 6.14; 12.13.Hüyange Iye imante kentinglak ngao phawe i, “Leiyah hüyange Phariseelan mepu do hei Herod mepu do jingne numan kentingyah.” 16Iman yo me hüke teingaowe i, “Teman me hang an-o yenangpuwe Iye tüopa ngao inangki.” 17#Mk 6.52; Jer 5.21; Isa 6.9-10; Mt 13.10-15.Iman-e hang ngao i, Jesuwe shing; tüokhei Iye imante tong: “An yenangpu jeng numan-e hangne ngao nangki? Numan-e üpongo yetüo yejema-a shingo yeshing pu a? Numan mongme hango yenang yahpu a? 18Numan me mük ngoh nang, numan-e ye nge a? Numan me na ngoh nang, numan-e yejai a? Numan-e yeteih a? 19#Mk 6.41-44.Aope Taowe haja nga jingne ankhüo nga khoih? Topu ükhoih muhto hangshin numan-e shaijem?” “Pen me ni,” she iman-e jan. 20#Mk 8.1-10.Jesuwe tong, aope Taowe an nyit kahta haja peli jingne khoih, “Topu ükhoih muhto hangshin numan-e shaijem?” Iman-e Ite jan, “Nyit.” 21Hüyange Iye imante i, “Numan-e sha-ate ngoiye yeshing okpu a?”

Bethsaida Me Mükmüopa Ja Jesuwe Meitam

22 # Mk 10.46-52; Jn 9.1-7. #Mk 6.45; Lk 9.10.Hüyange iman Bethsaida te pei, mükmüopu kahta ja Jesu tangte woipei hüyange kahta ütamme Ite jonpha she yoppe khüm. 23#Mk 7.33; 5.23.Jesuwe mükmüopa yakme jon hüyange chingshao mepu I woitei. Hüyange aope kahta mük te iyphao phao, Jesu yakke Ite jon hüyange tong, “Nange hango je ngeya?” 24Kahtawe mük wemme lei hüyange i, “Taowe kahtalan ngenangki, hüpoi iman pee kih ngeyange kemnangki.” 25Jesuwe nishe kahta mükte I yakke jon. Sha-a tüopa kahtawe tünge lei, I mük me wong pei, hüyange Iye lamphe li meiye nge. 26Tüophei me Jesuwe inokte yenetam, hüpoi chingte tah pei she ngao pha.

Jesu She Peterwe Janpu

(Mt 16.13-20; Lk 9.18-21)

27 # Mt 16.13-20; Lk 9.18-21; Jn 6.66-69. Tüophei me Jesu hüyange I pinlan Kaisarea Philippi ching ja te tai. Lamme Iye pinlante tong, “Üte itehu, kahtalan-e Tao ao she inangki?” 28#Mk 6.14.Iman-e jan, “Ütamme nanga Baptipa John she inangki,” “Ütamme nanga hipa yo me ja she iwante, ütamme nanga Elijah she inangki.” 29Iye imante tong, “Hüpoi numan-e hangke teihpu? Tao ao she numan-e inangki?” Peterwe jan, “Nanga Messiah.” 30#Mk 9.9; 1.34.Tüophei me Jesuwe imante ngao phawe i, “Hatüo jeng ao te-o tah i she i.”

Jesuwe I Shanglak Hei Lilak Jeng Inang

(Mt 16.21-28; Lk 9.22-27)

31 # Mt 16.21-28; Lk 9.22-27. Tüophei me Jesuwe yoi pinlante nyüone ükong wang: “Kahta Üha yeonge shanglak, hüyange jeiyong lan-e, ütahpa ngengpalan-e, hüyange ngaokeng nyüopalan-e yeyahlak. I li ne tamlak, hüyange nyihlüm ngohyang phei me üyin me yange yelak.” 32Iye imante ngaiye i. Tüokhei Peterwe I woitei hüyange tee ne wang. 33#Mt 4.10.Hüpoi Jesu lüppe ye, yoi pinlante leiyange hüyange Peterte tee. Iye i, “Satan ü-mepu yan tepha.” “Nange teihpuwa kahtalan juteih, Kahwang juteih yeje!”

34 # Mt 10.38; Lk 14.27. Tüophei me Jesuwe kahta üngang hüyange yoi pinlan I tangte nyik. Hüyange Iye imante i, “Ütamme ü-phei te woihuma-a, Iye yoi peyangyah, hüyange nang tangpem paiyah, hüyange ü-pheite woikei. 35#Mt 10.39; Lk 17.33; Jn 12.25.Hangjingne aowe yoi üyin yinhu yapeih I mahlak; hüpoi aowe üjingne hüyange pungao ümei jingne I üyin mah, yinlak. 36Hangjing ne kahtawe kahtoknyu üshei okyange yoi üyin mahma-a hanghe tüopu? Ütingme yetüolak! 37Hangjingne I üyin shaklak ümee nanleine kahtawe hanghe phalak shi? 38#Mt 10.33; Lk 12.9.Hangjingne kahta ütamme üjingne, hüyange tüopa nushakpu jinme ü-ngao jingne, wüoma-a, aope üjaopa wangdang shongmokpa lanphei Ipa müktishiwa me I yulakei Kahta Ühawe I wüotüo tamlak.”

Currently Selected:

MARK 8: KONYBSI

Highlight

Copy