MARK 9

1 # Mk 13.30; Mt 10.23; Lk 22.18. Hüyange Iye imante i, “Ütingme Taowe numante inang, Kahwang Ahngching ünganwong phei peipu mannge mannge tüo me yonge ngohpu ütamme lipu yeshinglak.”

Üshe Leijeipu

(Mt 17.1-13; Lk 9.28-36)

2 # Mt 17.1-8; Lk 9.28-36. #Mk 5.37; 13.3.Hüyange nyih wok ngohyange Jesuwe Peter, Jeams hei John I phei woi, hüyange shedaopu kahtang te iman shaha ong. Hüyange tüoken me iman sheshao me I üshe leijei, 3#Mt 28.3.hüyange I inkhek yeonge phihlang hüyange heng; kahtoknyu me aowe-o teshinne henge yejao ok. 4Tüophei me pinlan lümme Elijah hei Mosa peiye Jesu phei ngaopu nge. 5Hüwante Peterwe ngao ngai hüyange Jesute i; “Konnyüopa, teman tüome ngohpu meiteki; toman-e tüome panha lüm wehah, nang jingne ja, Mosa jingne ja, hüyange Elijah jingne ja.” 6Hangjingne I hüyange ülaolan yeonge nyam, hüyange Iye hang ilak yeshing. 7#2 Pet 1.17-18; Mt 3.17; Jn 12.28-29.Hüwante wangphom yu hüyange imante küp, hüyange wangphom mepu ngao ja hüke ngai; “Hatüowa ü-mongkenpu Ha: Ite jai yah!” 8Hüwante muh iman-e neikonne lei hüpoi aohi-o ye-nge; Jesu shaha iman phei ngoh.

9 # Mt 17.9-13; Lk 9.36. #Mk 8.30; 5.43; 7.36.Iman kahtang mepu ye ngohwante Jesuwe imante hüke ngao phawe i: “Kahta Üha lipu mepu yange manye manye, numan-e hanghe nge, ao te-o tah i.” 10Iman-e I ngao jaiye ngoh, hüpoi iman yo me tüopa jeng ine ükong wang: “Lipu mepu yange yelak she hangte leppu?” 11#Mt 11.14.Hüyange iman-e Jesu te tong: “Hangne ngaokeng nyüopalan-e Elijah üwangne yukülak she ipu shi?” 12#Mk 8.31; 9.31; 10.33.Iye imante i, “Eihyang lamphe li tümlak jingne Elijah üwangne yukülak. Tüoyangpoi, Kahta Üha shanglak hüyange yeyahlak she hangne lai ngaowe ipu shi? 13Hüyangpoi Taowe numante inang, Elijah peiteki, hüyange Laingaowe I jingne hangke i, tüokih-e kahtalan-e iman-e hangke linghuyapeih tüokih-e Ite lingyangki.”

Ünu Yaha Pheipu Nahaja Jesuwe Meitam

(Mt 17.14-21; Lk 9.37-43)

14 # Mt 17.14-18; Lk 9.37-43. Aope ülao pinlan tangte iman pei ngoi, kahta üngang jempu iman-e nge. Ngaokeng nyüopalan ütamme pinlan phei tei ngao. 15Aope kahtalan-e Jesu nge, yeonge yashan hüyange I tangte mamshe phet hüyange Ite salam pha. 16Jesuwe yoi pinlante tong, “Iman phei numan-e hanghe jeng teingao pu shi?” 17Ükhong yo mepu kahta jawe jan; “Konnyüopa, taowe nang tangte üha woi peinangki, hangjingne Ime ünu yaha ngohnang hüyange yengao ok. 18Aope ünu yahawe Ite jonlakei, I kahtok te toita nang, hüyange ju me mopphop ngainang, fa ngao nang, hüyange jint nang. Taowe nang pinlante ünu yaha janglak jingne tong, hüpoi iman-e ye-ok!” 19Hüwante Jesuwe imante i, “Ütinglakpu yenangpu jin! Tao numan phei hangshin ngohlak shi! Tao numan phei hangshin nünne ngohlak shi? Naha ü-tangte wenkei.” 20Hüyange iman-e Jesu tangte naha yah wen. Ünu yahawe Jesu ngepu phei jamshe, naha ya me tük I kahtok te lam, hüyange ju me mopphop ngaiyange toiloita. 21Jesuwe Ipa te tong, “Hükih-e ngaipu I hangshin me ngoiteki?” “I naha mepu üja she,” Iye jan. 22“Hipak phe me I toilak jingne hüke vün hei yeng me shepyang küja. Hüpoi nange mongma-a yayeng pha hüyange jampha.” 23#Mt 17.20; Lk 17.6; Mk 11.22-24.Jesuwe Ite i, “Oklak,” “Nange mongma-a! Ao me ütinglakpu ngoh, lampheli oklak.” 24Naha üpawe mamshe üngwünne i, “Taowe ütinglak nangki, üting yelak okpu üte jampha.”

25Ükhong üngang iman shongte owe peipu Jesuwe shing, tüokhei Iye ünu yahate teeye i: “Napanpa hei ngao ükpu yaha” she Iye i, “Tüopa naha mepu taitüoh hüyange I tangte aope-o leih tahye she Taowe inang!” 26Yeonge shange naha lengme shüppe tüohyange ünu yaha ngai. Naha liye ta, tüokhei kahta üsheiye I lipuyang she i.

27Hüpoi Jesuwe naha yakme nowe yah hüyange lüone tam, hüyange I yong.

28Aope Jesu noksate ong, I pinlan-e lowe tong, “Hangne toman-e ünu yaha yejang okpu shi?” 29Jesuwe imante i: “Ülao hanghe-o ye-oklak. Yoppu kaiye nakshih tüokihpu jange oklak.”

Jesuwe I Lilak Jeng Nishe Ngao

(Mt 17.22,23; Lk 9.43-45)

30 # Mt 17.22-23; Lk 9.43-45. Iman-e tüopa nyoi ang hüyange Galilee linne tai. Jesuwe I ngohpu nyoi ao te-o shingne yetam hu, 31#Mk 8.31; 10.33.hangjingne Iye pinlante konnyüopu ngoh. “Iman-e I toilak jingne kahtalan yak me phünne phalak; hüyangpoi nyih lüm phei me I yange yelak.” 32#Jn 12.16.Hüpoi tüopa konnyüopu iman-e yeshing, hüyange Ite tonglak jingne-o iman nyam.

Üyongpa Ao Shi?

(Mt 18.1-5; Lk 9.46-48)

33 # Mt 18.1-5; Lk 9.46-48. Hüyange iman Kapernaum ngoi, hüyange nok ngoi phei me Jesuwe I pinlante tong: “Numan lamme ngohwante hanghe jeng ngao ei?” 34#Lk 22.24.Hüyangpoi iman-e ngao yengai, hangjingne iman lamme ngohwante üyongpa ne ao menglak shi? she iman teingaopu ngoh. 35#Mk 10.43-44; Mt 20.26-27; 23.11; Lk 22.26.Jesu shot, hüyange pinlan penme ni te nyik, hüyange imante i: “Ao üwangpa ne menghu yapeih I ükümpa ne menglak yang hüyange üshei shaoshanpa ne mengtüoh.” 36#Mk 10.16.Hüyange Iye naha ja woipei hüyange iman sheshao me yongne tam. Naha I yak me paiyange imante hüke i: 37#Mt 10.40; Lk 10.16; Jn 12.44; 13.20.“Aowe ü-min me hükihpu naha yahnang Iye Tao yahnang; hüyange aoyinne Tao yah, ü-shaha yahpu yeje hüpoi aowe Tao shon I-o yahnang.”

Aoyin Teman Phei Tüi-e Yeyong Teman Pheipu

(Lk 9.49,50)

38 # Lk 9.49-50; 11.23; Mt 12.30; Lung 11.27-29. John ne Ite i, “Konnyüopa, nang min me laa jangpu kahta ja toman-e ngeki, hüyange toman-e Ite laktüoh she iyangki; hangjingne I teman ükhong ne yeje.” 39Hüpoi Jesuwe janne i, “Ite lakne tahtam.” “Hangjingne ümin me yashan toiling yange mamshe Tao ümeng ne ilak ao-o yenang. 40Hangjingne aoyin teman phei tüi-e yeyong teman pheipu. 41#Mt 10.42.Tüopa teihtüoyah! Ütamme numan Khrista jing she teiyange yengwüng wan ja nehoi phama-a, ütingme Iye hünghao tüolak.”

Ünu Omne Tokpu

(Mt 18.6-9; Lk 17.1,2)

42 # Mt 18.6-9; 5.29-30; Lk 17.1-2. “Üte ütinglakpu tüolan üjoihapu yo me ja nehoi aowe tüppe ye-e ünu omne tamlakei, I jingne shamshu longkhao üyong ja üngme yükyange yengching te hüngpu shemei. 43Tüokhei nang yak kaiye lüppe yene tamma-a, tüopa teh wintüoh! Yak ni nangyange jinte yemahpu molovün te taileima-a, yak shohpa ne mengyange üyin chingte taipu shemei: 44(Tüoken me iman hahpu yong aope-o yelilak, hüyange imante sheampu vün aope-o yemei). 45Hüyange nang yawe nang lüppe yene tamma-a tehwin tüoh; hangjingne ya ni phei nang molovünte yeileima-a, yafaipa ne üyin chingte ongpu shemei. 46(Tüoken me iman hahpu yong aope-o yelilak, hüyange imante sheampu vün aope-o yemei.) 47Hüyange nang mükke nang lüppe yene tamma-a, yokke wintüoh! Mük ni phei molovünte yeileima-a, mük ja yenangpe Kahwang ahngching te nang ongpu shemei. 48#Isa 66.24.Tüoken me iman hahpu yong aope-o yeli, hüyange vün aope-o yemei.

49 # Mt 5.13; Lk 14.34-35. “Hangjingne hüm kaiye toidopu jaowe tampu kih-e kahta lili vün kaiye jaowe tamlak. 50#Kol 4.6; 1 Thes 5.13.Hüm meinang. Hüpoi Iye I mepu wüngpu mahküma-a, nange hangke, nishe wünge linge tamlak? Numan me hüm ngohtüoh, hüyange numan hei numan pa me chingmei ngohyah.”

Currently Selected:

MARK 9: KONYBSI

Highlight

Copy