MARK 10

Toiyanpu Jeng Jesuwe Nyüonang

(Mt 19.1-12; Lk 16.18)

1 # Mt 19.1-9. #Lk 9.51; Jn 10.40; 11.7.Tüophei me Jesu tüopa nyoi mepu yayong, hüyange Jordan Yengyin kaiye Judea kahtok te lai. Üne-o ükhong üngang I tangte jem hüyange I wanglam kih-e üne-o Iye imante nyüo.

2I tang te Phariseelan ütam pei hüyange Ite tokke i, “Tomante itehu, kahta jawe yoi shekonyu toiyanlak teman ngaokeng me ngohnang kü a?” 3Jesuwe imante tongpu phei janne i, “Mosa ngaokenge numante hanghe pha ei?” 4#Hin 24.1-4.Iman-e hüke jan, “Toiyanlak ngaolan lai nyanyange sheko nyu phei yantüoh she, Mosa ngaome ngohnang.” 5Hüpoi Jesuwe imante i: “Numante nyüolak jingne yeonge wanpu jingne Mosawe tüopa ngaokeng nyan. 6#Kaht 1.27; 5.2.Hüpoi üwangne kahtoknyu lingwante muh. Kahwange iman netan hei sheko ling. 7#Kaht 2.24.Tüokhei kahta jawe Ipa hei Inyu tüohyange I sheko phei ja ne menglak; 8hüyange imni ja ne menglak. Tüokhei iman shaaji ni yeje hüpoi ja. 9Hüma-a. hanghepa Kahwange sheine tam, tüopa-a kahtawe yanne tahtam.”

10Aope iman nokte leihye, pinlan-e Jesu te tüopa jeng muh tong. 11#Mt 5.32; Lk 16.18; 1 Kor 7.10-11; Rom 7.2-3.Tüokhei Iye imante i: “Kahta ao yoi sheko phei toiyan; hüyange ülao sheko yahlakei, Iye yoi sheko phei tüi-e phwngngampu jonnang; 12tüokih-e muh, shekonyu aowe I netanpa phei yanyange hüyange ülao netan phei ngoh phwngngampu lingnang.”

Jesuwe Hashih Nahalan Moiman

(Mt 19.13-15; Lk 18.15-17)

13 # Mt 19.13-15; 18.3; Lk 18.15-17. Kahta ütam-e Jesu tangte Iye jonne tamlak jingne nahalan woipei, hüpoi pinlan-e tüolan kahta te tee. 14Hüpoi aope Jesuwe tüo nge, I mongshih ngai hüyange yoi pinlante i, “Nahalan ü-tangte peine tamtüoh! Imante tahkhüm, hangjingne Kahwang ahngchinga tüolan jing kihpu ne mengnang. 15Taowe numante ütingme inang, aowe naha kih-e mengyange Kahwang ahngching yeyahlakei, tüote ongpu ye-oklak.” 16#Mk 9.36.Tüophei me Iye nahalan noonne yah, iman tangme I yak ang hüyange imante moimantam.

Hakpa Kahta

(Mt 19.16-30; Lk 18.18-30)

17 # Mt 19.16-30; Lk 18.18-30. #Lk 10.25; Mk 1.40.Hüyange Jesu yintaine lamme kemme ngaiwante, kahta ja phette ngoi, I sheshao me yatuh shinge khüm, hüyange Ite tong, “Konnyüopa ümei, jintepu üyin tüolak jingne taowe hanghe linglakshi?” 18Jesuwe Ite i, “Nange hangne üte ümei she nyiknangki?” Kahwang tokte ao-o ümei yenang; 19#Woi 20.12-16; Hin 5.16-20.Nange ngaokenglan shingnang; “Tahtoi, phwngngampu tahling, tahkuh, ngaoleih tah i, tah lo, hüyange nangpa hei nangnyu te iyeshe yah.” 20Iye Ite i, “Konnyüopa, Tao naha me muh tüopa ngaokeng jonyangki.” 21#Mt 6.20; Lk 12.33; Lam 2.45; 4.34-35.Yayengpu phei Jesuwe Ite tingkhakke lei, hüyange i; “Nang jawe yewang. Taitüoh hüyange nangme ngohpu üshei yüotüoh hüyange toihalan te ngin phatüoh, hüyange wangdang me nang haklak; tüophei me taikei hüyange ü-pheite woikei.” 22Aope Iye tüopa ngao jai, sheta nyak hüyange mongmenge tai, hangjingne I meiyangpu hakpa ne ngoh.

23Jesuwe yoi pinlante leiye pong hüyange imante i, “Hakpalan Kahwang ahngching te onglak jingne hangshin wanlak shi!” 24Tüopa ngao jaiyange pinlan mokh, hüpoi Jesuwe imante yelakpe i: “Ühalan, Kahwang ahngching te onglak hangshin wanpu shi! 25Hakpa ja Kahwang ahngching te onglak phei-a veemei sha me udh helak she-o.” 26Tüopa ngao jaiyange iman üshei yashan hüyange iman yo me tei tong; “Hüma-a ao yinpu oklak shi?” 27Jesuwe imante lei hüyange i; “Hatüowa kahtalan jingne ye-oklak, hüpoi Kahwang jingne yeje; Kahwang jingne lamphe li oklak.”

28 # Mk 1.16-20. Tüophei me Peterwe hüke ngaiye i: “Leihu, toman-e üshei angyange hüyange nang pheite woinang.” 29Jesuwe imante i, “Üting, Taowe numante inang: aoyinne üjingne hüyange pungao ümei jingne nok, yejema-a yoijei yoinao yejema-a yoinya yoinao yejema-a Inyu hei Ipa yejema-a hayim yejema-a kah tüohlakei, 30#Mt 6.33.tüopa jin me yeonge tüolak. Iye gho phei nyeiye yoi jeihei naolan, nyahei naolan, nyuyonglan, hayim hüyange kah tüolak, hüyange shangne tampu-o tüolak; hüyange ngoikülak jin jingne Iye üküm yenangpu üyin tüolak. 31#Mt 20.16; Lk 13.30.Hüyangpoi sha-a aoyin maawe üwangne ngoh üküm ne menglak, hüyange sha-a üküm ne ngohpalan üwangne menglak.”

Jesuwe I Lilak Jeng Lümshe Inang

(Mt 20.17-19; Lk 18.31-34)

32 # Mt 20.17-19; Lk 18.31-34. Iman Jerusalem te ongpu lam me ngoh, hüyange pinlan sheshaote Jesu tai, iman mongpong; hüyange iman phei te woipu kahtalan nyam. Jesuwe nishe pinlan penme ni woitei hüyange Ite hanghe ngailak tüopa jeng i. 33#Mk 8.31; 9.12; 9.33.Jesuwe imante i, “Leihu, teman Jerusalem te ongnang; ümeken me ngengpa üjenglan hüyange ngaokeng nyüopalan te Kahta Üha phünne phalak. Iman-e I li ne phünne phalak hüyange tüophei me yinhulante I phünne phalak. 34#Mk 14.65; 15.19,26-32.Iman-e Ite yaolak, Ite iyphao phaolak, Ite shetlak, hüyange I toilak. Hüyange nyih lüm ngohyange I yange yelak.”

Jeams Hei John Niye Tongpu

(Mt 20.20-28)

35 # Mt 20.20-28. Tüophei me Zebedee hayim Jeams hei John ni Jesu tangte pei. Imniye i, “Konnyüopa,” “Nang kaiye tomni jingne ülamja lingne tamhu nangki!” 36Jesuwe imnite tong, “Nangni jingne Taowe hanghe lingne tamhu nangki?” 37#Mt 19.28; Lk 22.30.Imniye jan: “Aope nang müktishiwapu ahngching me shotlakei, nang yakjah yeme ja, yaknya yeme ja she tomni-o shot ne tampha.” 38#Lk 12.50; Jn 18.11.Hüpoi Jesuwe jan: “Hanghe jingne tong, nangniye yeshing. Taowe yingpu wan nang niye yingpu oklak a? Hüyange taowe baptipuke, ü-baptipu me nang ni-o baptipu oklak a?” 39#Lam 12.2; Ütah 1.9.Imniye jan, “Oklakei.” Jesuwe i: “Nang niye Taowe yinglak wan yingpu ok hüyange Taowe baptipu kih-e baptipu oklak yang. 40Hüpoi, ü yakjah yeme hüyange yaknya yeme shotne lelak üme wong yenang. Hatüo nyoijing yinna aoyin jingne tüm Kahwange hei phakülak.”

41Aope ülao pinlan penne tüopa ngao jai, Jeams hei John nite iman mongmeng. 42#Lk 22.25-27.Tüokhei Jesuwe iman üshei jamme nyik hüyange hüke i, “Numan-e shingnang, aoyin wanglam lampalan-e le, kahtalan tangme iman wong ngohnang, hüyange iman woipalan-e imante wanglam lamnang. 43#Mk 9.35.Hüke ngohyapoi numan yo me hatüo ne yeje. Numan yo me ütam üyong ne menghuma-a, I ülaolan shaoshanpa ne menglak yang; 44hüyange numan yo me ütam üwangpa ne menghuma-a, I rhapa ne menglak yang. 45#1 Tim 2.5-6.Hangjingne Kahta Üha nehoi shaoshanne tamlak jingne peipu yeje; hüpoi shaoshanlak jingne I pei hüyange I üyin phawe kahta maawe yinlak jingne pei.”

Jesuwe Mükmüopa Bartimas Mei

(Mt 20.29-34; Lk 18.35-43)

46 # Mt 20.29-34; Lk 18.35-43; Mk 8.22-26. Hüyange iman Jerikho te pei. Jesu I pinlan phei hüyange kahta üngang phei Jerikho mepu taiwante, Timaeas üha Bartimas she minpu mükmüopa ja lamnah me shotyange hahyuwe ngoh. 47#Mt 9.27.Aope Iye hatüowa Nazareth mepu Jesu shejai, I üngwünne ükong wang. “David üha! Jesu! Üte shüpshe pha.” 48Yelangmanpe ngohlak jingne kahta üsheiye Ite tee. Hüpoi Iye “David üha Jesu! Üte shüpshe pha” she sheyong sheyong she üngwün. 49Jesu jünge yong hüyange i, “Ite nyiktüoh.” Tüokhei iman-e mükmüopa te nyik-e i, “Mongmeitüoh!” “Yongtüoh, Iye nangte nyiknangki.” 50Iye yoi inkhek shüppe ang, hüyange Jesu tangte phaowe phet. 51Jesuwe Ite tong, “Taowe nang jingne hanghe linge tamhu nangki?” Mükmüopawe jan, “Konnyüopa,” “Taowe (nishe) ngehu nangki.” 52#Mt 9.22; Mk 5.34; Lk 7.50; 8.48; 17.19.Jesuwe Ite i, “Taitüoh,” “Nang ütinglakpuwe nang meiteki.” Hüwante muh Iye ngepu ok, hüyange Jesu phei te lamme woi.

Currently Selected:

MARK 10: KONYBSI

Highlight

Copy