MARK 11

Jerusalem Te Okpu Nge Ongpu

(Mt 21.1-11; Lk 19.28-40; Jn 12.12-19)

1 # Mt 21.1-9; Lk 19.29-38. Aope iman Olive Kahtangke Bethphage hei Bethani yeme Jerusalem te owe pei; Jesuwe yoi pin ni shaoyete 2hatüo ngao phei shon: “Numan shaome janhüowe ngohpu chingte ongtüoh. Numan ngoipu phei jamshe ao-o manshotpu gado üha numan-e shinyange ngelak. Hatüo lantüoh hüyange tüome peikei. 3Hatüo numan-e hangne lingpu?” she ütamme tongma-a, imante itüoh, “Konnyüopawe hatüo wongpong yang hüyange hatüo mamshe shonne yephalak.” 4#Mk 14.16.Hüyange iman tai, hüyange lam ang mepu nok ja tafün shong me gado üha shinyange ngoh. Hüyange iman-e tüopa lan; 5ütam yonge ngohpuwe imante tong, “Gado üha lanne numan-e hang lingpu?” 6Hüwante Jesuwe imante hangke i, iman-e hüke jan. Tüophei me kahtawe iman taine tam. 7#Jn 12.12-15.Iman-e Jesu tangte gado üha woi pei, tüopa tangme iman nye nyiam, hüyange Jesu tüote ong. 8Kahta maapuwe iman nye lamme nyiam, hüwante ütamme peequi lang hüyange lamme nyiamme tam. 9#Tüo 118.26; Mt 21.15; 23.39.Aoyin kahta sheshao yeme kem hüyange tokphei yeme woi üngwünne i, “Hosanna! Kahwang min me ao pei, Ite Kahwange moimantüoh! 10Teman üpa David ahngching peipute Kahwange moimantüoh! Ütahpa me Kahwangte minyong tüoh!”

11 # Mt 21.10-11,17. Jesu Jerusalem te ngoiye khümjing te ong, hüyange lamphe lite neiye leiye pong. Hüyangpoi shonne yüopu nanjingne I pinlan penme ni phei Bethani te tai.

Phukpeete Jesuwe Phoipu

(Mt 21.18,19)

12 # Mt 21.18-19; Lk 13.6-9. Üne nyih, aope Bethani mepu iman ye, Jesu seanyao. 13Üjai me Iye phukpee ja yeonge üyak ngütte nge. Tüokhei hatüo me ülick ngohya shi she leine I wen; hüpoi aope I peejüng ngoiye wen, üyak kaiye hango yenang; hangjingne ülick (shatha) ngailak ju ne yejepe ngoh. 14Hüwante Jesuwe phükpee te i; “Nang mepu ülick aowe-o shaaji tah hah!” Hüyange I pinlan-e Iye ngaopu jai.

Jesuwe Khümjing Jao

(Mt 21.12-27; Lk 19.45-48; Jn 2.13-22)

15 # Mt 21.12-16; Lk 19.45-48; Jn 2.13-16. Aope iman Jerusalem ngoi, khümjing te Jesu ong hüyange khümjing me yüopalan hei shakpalan üshei jange tei. Iye ngin leihpalan khao hei awshu yaopalan shotjing shokke win; 16hüyange khümjing kaiye aote-o toinan ki taine Iye yetam. 17Tüophei Iye kahtalan te nyüo, “Laingao me hatüo nyanne ngohnang. ‘Ü-noka jatlan üshei jingne yoppunok she nyiklak.’ Hüpoi hatüo numan-e kuhpalan lojing longnok ne menge tam!”

18Ngengpa üjenglan hei ngaokeng nyüopalan-e hatüo jai, tüophei me Jesu toilak lam iman-e yam. Ite iman nyam, hangjingne kahta liliye Iye nyüopu konte yashan. 19#Lk 21.37.Aope ün ngoi, Jesu hüyange I pinlan chingnyu tüohyange tai.

Phukpee Mepu Shinglak

(Mt 21.20-22)

20 # Mt 21.20-22; Mt 17.20; Lk 17.6. Üne nap shomme iman lamme linwante, üya ngoiye liteiye phukpee nge. 21Hanghe ngaiyangki Peterwe teih tüo hüyange Jesute i, “Konnyüopa, leihu, nange phoitampu phukpee liteki!” 22Jesuwe imante janne i, “Hatüo teih tüoyah! Kahwangte numan-e ütinglakma-a, 23numan-e hatüo kahkengte ipu oklak, ‘Potüoh hüyange nang nying nyingke yengching te yeitüoh’; numan mongjang me nüngneipu yenang hüyangpoi nange ipu ngaikülak she üting lakma-a, hatüo numante ling phalak. 24#Jn 14.13-14; 16.23; Mt 7.7-11.Tüokhei Taowe numante inang: Aope numan-e yop; hüyange ülam ja jingne tong, hatüo numan-e tüolak she ütinglak yah, hüyange tüo lili numante yahphalak. 25#Mt 6.14-15; 18.35.Hüyange numan-e aope yonge yoplakei, ütam phei tüi-e ümeng lingyange ngohma-a ümeng wintüoh, hümme nakshih wangdang me ngohpu numan üpawe numan ünu winphalak 26Hüpoi numan-e eiha ümeng yewinma-a, wangdang me ngohpu numan üpawe-o numan ünu yewinlak.”

Jesu Wong Jeng Tongpu

(Mt 21.23-27; Lk 20.1-8)

27 # Mt 21.23-27; Lk 20.1-8; Jn 2.18. Tüophei me iman Jerusalem te ngoiye pei. Hüyange Jesu khümjing me kemme ngohwante, ngengpa üjenglan, ngaokeng nyüopalan, hüyange jeiyonglan I tangte pei, 28hüyange Ite tong: “Tüoyin linglak jingne nang me hanghe wong ngohnangki? Yejema-a tüoyin linglak jingne nangte aowe wong pha ei?” 29Jesuwe imante jan, “Taowe numante ülam ja tong phaning, hüyange numan-e hatüo khakshuwe janma-a hanghe wonge taowe toi ling ipha ning. 30Üte ipha, baptipa John wangdang mepu heiya yejema-a kahtalan yo mepu shi?” 31Iman yo me iman nying nyingke hüke tei ngao: “Teman-e hang ihah? ‘Kahwang mepu’ she teman-e ima-a, hangne numan-e John te üting yelak she iphalak? 32Hüpoi teman-e ‘Kahta mepu she ima-a…’ ” (kahtalan shaote iman nyam, hangjingne John-a hipa ja she üsheiye shing.) 33Tüokhei iman-e Jesute jan, “Toman-e yeshing.” Hüyange Jesuwe imante i, “Hümma-a Taowe hanghepa wonge toi ling, numante ye i lak.”

Currently Selected:

MARK 11: KONYBSI

Highlight

Copy