MARK 12

Wulick Kahhampalan Me Ngaolep

(Mt 21.33-46; Lk 20.9-18)

1 # Mt 21.33-46; Lk 20.9-19; Isa 5.1-7. Hüyange Jesuwe imante ngaoleppu me ine ükong wang. “Hipak ja me wulick kah hampu kahta ja ngoh, neikonne pelak kha, ngütjingne kahsa shao, hüyange yomtep ja we. Tüophei me kahhampalan yakme wulick kah angne tam hüyange üjai te yintai. 2Aope ülick yolak hipak ngoi, I jing meitam yahlak jingne kah hampalan tangte shaoshanpa ja shon. 3Hüpoi kah hampalan-e shaoshanpa pho, Ite shet hüyange ükeng me ye ne tam. 4Tüophei me nokpupawe iman tangte ülao shaoshanpa ja shon; kah hampalan-e Ite shang me üko ngaine tam, hüyange wüotüone tam. 5Nokpuwe ülao shaoshanpa ja shon, hüyange iman-e I toi, hüyange ülaolan maawe ütamte shet, ütam toi wenyangki. 6Shaaji ja shingha to, hüyange hatüowa I mongken ha. Iye hüke i, ‘Taowe shingnang iman-e Ite yihlulak;’ tüophei me üküm ne Iye kahhampalan tangte yoi ha shon. 7Hüyangpoi, kahhampalan-e hüke teingaowe i, ‘Hatüowa nokpu Ha. Kei, teman-e I toihah, hüyange mothlei-a teman jingne menglak!’ 8Tüokhei iman-e I yah hüyange I toi, hüyange I mang wulick kah kaiye win.

9“Jesuwe tong, ‘Hüma-a wulick kah nokpuwe hanghe linglak? I peilak hüyange tüolan kahta toilak hüyange wulick kah ülaolante phalak. 10#Tüo 118.22-23; Lam 4.11; 1 Pet 2.7.Üting me numan-e laingao iya shi?

“ ‘Nokwepalan-e hanghepa long yeyah hatüopa nokjing shongnyu longne meng;

11hatüowa Youngwanpawe lingpu,

hüyange hatüowa toman mükshao me yashanlakpa!’ ”

12 # Mk 11.18. Jewish woipalan-e Jesu pho ne ngang, hangjingne hatüo ngaolep iman phei tüi-e ngao she iman-e shing. Hüyangpoi ükhong te iman nyam hüyange I angyange iman yantai.

Kahngin Phapu Jengme Tongpu

(Mt 22.15-22; Lk 20.20-26)

13 # Mt 22.15-22; Lk 20.20-26. #Mk 3.6; Lk 11.54.Tüophei me iman-e Phariseelan ütam hüyange Herod pinlan Jesu tangte ngao me ümeng pholak jingne shon. 14Iman I tangte pei hüyange i: “Konnyüopa, toman-e shingnang, nang ütingpa kahta. Kahtalan-e hanghe teih, tüojingne nang mong yeshang, hangjingne ütok meipu kahtalan jingne nange hangko yeteih, hüyangpoi nange ütingpa Kahwang lam nyüonang. Tomante itehu, Roman ahngpa te kahngin phalak-a toman ngaokeng mengpu jeyashi? Rome ahngpa te phalak heiya yephalak shi?” 15Hüyangpoi Jesuwe iman kon shing hüyange jan! “Hangne numan-e üte tokpu shi? Üte nginmei ja yahkhu, hüyange Taowe tüote leining.” 16Iman-e yahpei, hüyange Iye imante i, “Tüome ao sheta hüyange min ngoh nangki?” Iman-e jan, “Ahngpa.” 17#Rom 13.7.Tüokhei Jesuwe i, “Hümma-a, hanghe ahngpa jing hatüo ahngpate phatüoh, hüyange hanghe Kahwang jing hatüo Kahwangte phatüoh.” Hüyange iman Ite meiyange yashan.

Lipu Mepu Yange Yepu Jeng Tongpu

(Mt 22.23-33; Lk 20.27-40)

18 # Mt 22.23-33; Lk 20.27-38. Sadduceelan ütam Jesu tangte pei. Lipu mepu kahta yange minye ja she ipu ükhong iman ngohnang. 19#Hin 25.5.Iman-e i, “Konnyüopa, toman jingne Mosawe tüopa ngaokeng nyan: ‘I sheko angyange kahta ja li, hüpoi hayim yetüoh, Inaowe tüopa sheko yahlak hüyange lipupa jingne hayim puhlak.’ 20Hipak ja me Ijei inaolan nyit ngoh; jeiyongpa nokne meng, hüyange hayim yetüohpe li. 21Tüophei me nishe pupawe tüopa sheko yah, hüyange hayim yetüohpe I li. Lüm shepupa naoshe hüke muh yah, hüke nang; 22hüyange ülaolane-o hüke muh lamme nyüo: naoshe nyit üsheiye sheko ja shaha yah, moilanne hayim yetüohpe liküm. Üküm ne sheko nyu li. 23Sha-a yange yepunyih litepulan üshei aope yange yelakei, yha-a ao jing sheko ne menglak shi? Hangjingne iman moilan nyitte I yahyangki!”

24Jesuwe imante i, “Numan hangshin pinpu shi! Hüyange hangne ngaipu numan-e shingya? Hatüo hangjingne ima-a, numan-e laingao yejema-a Kahwang wong yeshing. 25Hangjingne aope litepulan yange yelakei, iman wangdang shongmokpalan kih-e ngohlak, hüyange sheko hei netan tei yeyahlak. 26#Woi 3.6.Hüyangpoi lipulan yange yelak jeng: Mosa laime vün phümtüm jeng numan-e ye-i a? Hangjingne hatüome hüke nyan Kahwange Mosate i, ‘Tao Abraham Kahwang, Isaac Kahwang, hüyange Jacob Kahwang.’ 27Tüote leppu, I lipu Kahwang yeje, üyin Kahwang. Numan yeonge püohnang!”

Sheyongpupa Ngaokeng

(Mt 22.34-40; Lk 10.15-28)

28 # Mt 22.34-40; Lk 20.39-40; 10.25-28. Ngaokeng nyüopaja pei hüyange iman teingaopu jai. Sadduceelan te Jesuwe meiye janpu Iye nge, tüokhei I peiye hüke tong: “Üshei yo me hanghepa ngaokeng wongpong shi?”

29 # Hin 6.4. Jesuwe Ite jan, “Hatüopa meiyangpu wongpong: ‘Israel, jaiyah! Youngwanpa teman Kahwang jashingha Kahwang. 30Hüyange Youngwanpa nang Kahwang te nang mongjang üsheiye, hüyange nang yaha üsheiye, hüyange nang mong üsheiye, hüyange nang wong üsheiye kenyah.’ 31#Lev 19.18; Rom 13.9; Gal 5.14; Jas 2.8.Nishepupa ngaokeng hatüo: ‘Nange nang yupipate yoi kih kenyah.’ Tüo ni phei sheyongpu ngaokeng ülao hango yenang.” 32Ngaokeng nyüopawe Jesute i: “Shunangki, Konnyüopa! Nange ipu kih Youngwanpa shaha Kahwang, hüyange I kaiye ülao Kahwang yenang, hatüowa üting. 33#1 Sam 15.22; Hos 6.6; Mik 6.6-8; Mt 9.13.Tüokhei kahtawe I mongjang üsheiye; I shingeyahpu üsheiye, hüyange I wong üsheiye Kahwang te kenlak, hüyange Iye yoi yupite I kih kenlak. Ülao yinmok yahpeiye Kahwang khümjing me dopu phei-a, hatüo ngaokeng ni jonpupa shemei.”

34Iye shinge janpu Jesuwe shinge ok, hüyange Ite i: “Kahwang Ahngching mepu nang meiyange jaiye yenang.” Tüophei me aowe-o Jesute ngao tonglak jingne mong yeyong.

Messiah Jeng Tongpu

(Mt 22.41-46; Lk 20.41-44)

35 # Mt 22.41-46; Lk 20.41-44. Hüyange aope khümjing me Jesuwe konnyüo Iye hüke tong: “Ngaokeng nyüopalan-e Messiah David üha üja she hangke ipu shi?” 36#Tüo 110.1; Lam 2.34-35; Heb 1.13.Yaha Üjaowe David woiye hüke i:

“Youngwanpawe ü-Youngwanpa te i,

Taowe nang wepalan nang yaphang me man ang man ang,

ü yakjahye tüome shot tüoh.”

37David-e Ite, “Youngwanpa she nyik: Hümma-a, hangke Messiah David üha ne mengpu?” Ükhong üyongpuwe Jesu ngao yeonge meiye jai.

Ngaokeng Nyüopalante Jesuwe Deingao Pha

(Mt 23.1-36; Lk 20.45-47)

38 # Mt 23.5-7; Lk 20.46-47; Lk 11.43. Iye nyüowante hüke i: “Ngaokeng nyüopalan aoyinne inkhek ülao inyange kem hüyange chingyang me imante wangshüm hüopu leng; 39Synagogue me hüyange mo pu nok me shotjing tünne angpu leng, iman jingne kentingyah. 40Iman-e wamnyulante meiyange lahnyik hüyange iman nokte pei, tüophei me ütah hüolak jingne laowe yop! Iman jingne shaoshi tampu ümengpa ne ngohlak!”

Wamnyuwe Dopu

(Lk 21.1-4)

41 # Lk 21.1-4; Jn 8.20. Jesu ngin angjing nyoi phei janhüowe shot, hüyange kahtalan-e ngin hangke pha, tüote leiye ngoh. Hakpalan-e ngin maawe ange nge; 42tüophei me wamnyu ja pei hüyange Iye poisa ja wangpu paikhüo ni ang. 43Iye yoi pinlan jamshe nyik hüyange imante i: “Taowe numante hatüo inang, ngin dopu nyoi me hatüopa wamnyuwe üshei phei sheyong she angyangki. 44Hangjingne ülaolan-e iman me nangpu mepu yah yange hanghe toyapeih tüopa pha; hüpoi hatüo toinannyu wamnyuwe yha me hanghe ngoh hüyange hatüolan me I üyin ngohpu phayangki.”

Currently Selected:

MARK 12: KONYBSI

Highlight

Copy