MATTHEU 7

Mih Ngao Phünpu

(Lk 6.37,38,41,42)

1 # Lk 6.37-38; Mk 4.24; Rom 2.1; 14.10. “Numan te ngao yephün tamlak jingne numane-o ngao tahphün: 2Hangjingne numan-e mih ngao phün pu kih numan te ngaophün lak, hüyange mih jingne hanghe toklak numan-e jon tüopa toklak numan jingne-o jonlak. 3#Lk 6.41-42.Hangne nange yoi mükme ngohpu mak (pesho) yeteih tüope nang jeihei nao mük me ngohpu müksa te lei nangki? 4Yejema-a nang mükme müksa ngohyange, ‘taowe nang mük mepu mak winpha ning’ she nange nang jeihei naote hangke ilak? 5Jutok meipa, üwangne nang mük mepu müksa hüng wintüoh, hüyange hüwante nange nang jeihei nao mük mepu mak winlak meiye ngelak.

6“Hanghepa üjaopa ngohnang hatüo kuihalan te tahpha, hüyange aklan sheshao me yüknyu tah win; numan-e lingma-a, iman-e tüolan iman yaphang me loklak hüyange leih ye-e numan phünkhoih phalak.”

Yutüoh, Yamtüoh, Kongtüoh

(Lk 11.9-13)

7 # Lk 11.9-13; Mk 11.24; Jn 15.7; 16.23-24; Jas 4.3; 1 Jn 3.22; 5.14. “Yutüoh, hüyange hatüo numante yahphalak: yamtüoh hüyange numan-e tüolak, kongtüoh hüyange hatüo numan jingne epphalak; 8Hangjingne aoyinne tongnang iman liliye tüonang, aoyinne yamnang tüonang; hüyange aowe kongnang I jingne eptamlak. 9Iye an jingne yuwante yoi ha te long ja phalak numan ütam ngohnang kü a? 10Yejema-a Iye nyah ja yuwante pu ja Ite phalak? 11Hüma-a numan, aoyin yemei, numan hayimlan te hünghao ümei phalak shingma-a, wangdang me ngohpu numan üpawe Ite yupalan te hünghao ümei phalak hangshin shinglak!

12 # Lk 6.31. “Kahtalan-e numan-e yah hupu hangyin numante lingne tamhu nang, imante-o ling tamtüoh, hangjingne Ngaokeng hüyange hipalan ngao hatüo ngoh nang.”

Pejong Shehitpupa

(Lk 13.24)

13 # Lk 13.23-24; Jer 21.8; Hin 30.19; Jn 14.6; 10.7. “Pejong shehitpu te yutüoh, hangjingne pejong yongpu hüyange lamnyu khaopu kaiye mahlak lam, hüyange aoyin tüopa lamte tainang iman maawe ngohnang. 14Hangjingne üyin lamnyuwa pejong shehitpu kaiye hüyange tüophei yeonge wanpu lam tüokhei tüopa ngepulan-a üjingha hei ngoh nang.”

Peeja Hüyange Imepu Ülick

(Lk 6.43,44)

15 # Mt 24.11,24; Eze 22.27; 1 Jn 4.1; Jn 10.12. “Tahleih hipalan jingne numan kenting yah, aoyin nyee o oyange numan tangte peinang hüyangpoi ümongme phuh hahlak sholan kih ngohnang. 16#Lk 6.43-44; Mt 12.33-35; Mt 3.10; Jas 3.12; Lk 13.7.Iman ülicklan me numan-e iman-a shinglak. Kahtalan-e wuwünglick huhwu mepu, yejema-a phuklick shongshanwu mepu khai nang kü a? 17Tüokih-e, pee ümei liliye ülick ümei licknang, hüyange pee ümenglan-e ülick ümeng lick nang. 18Pee ümei ja me ülick ümeng lickne ye-ok, yejema-a pee ümeng me ülick ümei lickne ye-ok. 19Pee lili hanghepawe ülick ümei yelick hatüowa aknang hüyange vün me shüpnang. 20Tüokhei, iman ülick kaiye numan-e iman shinglak.”

Taowe Numan Aope-o Yeshing

(Lk 13.25-27)

21 # Lk 6.46. “Üte ‘Youngwanpa, Youngwanpa,’ she ngaopu lili wangdang ahngching te ye-ong oklak: hüyangpoi aoyinne wangdang me ngohpu Üpawe mongpu ling I onglak. 22#Lk 13.26-27; Mt 25.12; Tüo 6.8.Tüonyih maapuwe üte ilak, ‘Youngwanpa, Youngwanpa, toman-e nang min me hi-ngao ye-i a? Hüyange nang min me laa yejang a? Hüyange nang min me üngan toi maawe yeling a?’ 23Hüwante Taowe imante shingne tamlak, ‘Taowe numan aope-o yeshing; numan ngaokeng menge ngohpalan, ü-mepu yantüoh.’

Nok Ni Wepu

(Lk 6.47-49)

24 # Lk 6.47-49; Jas 1.22-25. “Aoyinne ü-ngao hatüoyin jai hüyange ling kentamongtingpu kahta aowe longnyu tangme nok we, I leye ngohlak; 25hüyange waikei, hüyange yengyong muleam pei, hüyange wangyang lei hüyange nok te shung, hüyangpoi hatüo yetoi; hangjingne hatüo nokjing longnyu tangme ling. 26Hüyange aoyinne ü-ngao hatüoyin jai hüyange tüolan yeling, pheih tangme nokwepa üngapa kahta kih nanglak. 27Waikei, yengyong muleam pei, wangyang lei, tüolan wonge nokte shung; tüopa toita hüyange hatüo toitapu üyong ngoh.”

28 # Mk 1.22; Lk 4.32; Mt 11.1; 13.53; 19.1; 26.1. Sha-a aope Jesuwe tüolan ngaowe sho, Iye nyüopu konte ükhong yashan, 29hangjingne Iye iman ngaokeng nyüopalan kih yeje, hüyangpoi üngan wong ngohpu kahta ja ne Iye imante nyüo.

Currently Selected:

MATTHEU 7: KONYBSI

Highlight

Copy