MATTHEU 6

Kentoi Jeng

1 # Mt 23.5. “Kahtawe ngelak jingne iman sheshaome üjaopa toi yelinglak numan-e kentingyah; hüke lingma-a wangdang me ngohpu numan üpa mepu hünghao numan jingne hango yenanglak.

2“Tüokhei aope nange jajang jawe meipu toimei lingyalakei, jutok meipalanne synagogue me hüyange chingkeng lamnyu me kahtalan-e yihlupu phatamlak jingne üngwünpuke, nange kahtalan sheshao me nyawong tahwüng. Ütingha me Taowe nangte inang, iman-e imanjing khintak tüoteki. 3Hüyangpoi aope nange jajang jawe meipu toi lingyalakei, nang yakjah yewe hanghe lingnang nang yaknya yete shingne tah tam, 4#Kol 3.23-24.tüokaiye nange jajang jawe mei ling yangpu yeshinglak; hüyange nangpa aowe lowe leinang Iye nang te khintak yahpha lak.”

Yoplak Jeng

(Lk 11.2-4)

5 # Mk 11.25; Lk 18.10-14. “Aope numan-e yoplakei, jutok meipalan kih numan tah nang, hangjingne iman-e kahtalan-e ngelak jingne synagogue me hüyange lampong me yongyange yoplakte iman-e lengnang. Ütingpa me Taowe numante inang iman-e iman khintak tüoteki. 6Hüyangpoi aope nange yoplakei, ümongpa nang tüp te ongtüoh, nange taküp yah, hüyange nangpa ao lowe ngoh Ite yoptüoh; hüyange nangpa aowe lowe ngenang Iye nangte khintak yahphalak.

7 # 1 Ahng 18.25-29. “Aope yoplakei yinhulan-e ngaopukih wongpong yenangpu ngao tahyop, hangjingne iman-e ngao maawe ngaoküme Kahwange jailak she iman-e teih. 8#Mt 6.32; Lk 12.30.Iman kih tahnang hangjingne numan-e hanghe wongpong numan-e tongshao me muh numan üpawe shingnang. 9#Lk 11.2-4.Numan-e hatüokih yopyah:

“ ‘Wangdang me ngohpu toman Üpa,

Nang üjaopa min yongning#Nang üjaopa min hünpha ning, hüke-o ilak.

10Nang ahngching peikei,

wangdang me hangke ngoh,

kahtoknyu me nange mongpu kih lingpha.

11Tenyih tomante nyihjeih hahlak yahkei.#Ngainyihpu jingne-o toman hahying yahkei

12Hüyange toman-e mih ümeng winpu kih-e

tüo kih-e toman ümengo winpha.

13 # 2 Thes 3.3; Jn 17.15; Jas 1.13. Hüyange toklak jingne toman tahwoi,

hüpoi ümengpa mepu toman tükyah.’#Lai ütamme hüke paowe nyan-ngohnang-Hangjingne Nang ahngching hei ünganwong hei müktishiwa jinte ngohnang. Amen.

14 # Mt 18.35; Mk 11.25; Eph 4.32; Kol 3.13. “Hangjingne numan-e mih ümeng winma-a, numan wangdang üpawe-o numan ümeng winlak; 15hüyangpoi numan-e mih me ngohpu iman ümeng yewinküma-a, numan üpawe-o numan ümeng yewintamlak.”

Nyaowelepu Jeng

16 # Isa 58.5. “Aope numan nyaowelelakei, jutok meipalan kih sheta menge tah hüo, hangjingne kahtalan-e iman nyaowelepu min shingyah she iman sheta kuiye menge hüonang. Ütingpa me Taowe numante inang, iman-e iman khintak tüoteki. 17Hüyangpoi aope nang nyaowelelakei, nang shang me minnga phoyah hüyange nang sheta layah, 18#Mt 6.4,6.hümme kahtalan-e numan nyaowele nangki she shinglak ne yeje, lowe ngohpu nangpa hei shinglak; hüyange nangpa aowe lowe nge Iye khintak phalak.”

Wangdang Me Shengngin

(Lk 12.33-34)

19 # Lk 12.33-34; Mk 10.21; 1 Tim 6.17-19; Jas 5.1-3. “Numan-e yoi jingne kahtok me shengngin tah yo, ümeken me shiak hei müt hah mengnang, hüyange ümeken me kuhpawe menge ongnang hüyange kuhnang; 20hüyangpoi numan jingne shengngin wangdang me yoyah, ümeken me shiak yejema-a mütte iman yemeng ok, hüyange ümeken me kuhpalan-e menge ye-ong hüyange yekuh. 21Hangjingne ümeken me numan shengngin ngoh, tüoken me numan mongjang-o ngoh nang.”

Püm Wangngai

(Lk 11.34-36)

22 # Lk 11.34-36; Mt 20.15; Mk 7.22. “Mük-a püm jingne vüntük ngohnang. Nang mük meiye ngohma-a nang püm khongkümpu wangngaiye maawe ngohlak; 23hüyangpoi nang mük yemeipe ngohma-a püm khongkümpu wangnyake maawe ngohlak. Hüyange nangme ngohpu wangngai nyakke ngohma-a, tüopa nyakpuwa hangshin yonglak!”

Kahwang Hüyange Toinyunanha

(Lk 16.13; 12.22-31)

24 # Lk 16.13. “Aowe-o nokpu ni shao yeshan ok; hangjingne Iye ja te nulak hüyange ja te kenlak; yejema-a ja te mongphün phalak hüyange ja te ye-i-yeshelak. Numan-e Kahwang hei moth#Kahwanglan moini shao yeshan ok.”

Mongtahshang

25 # Lk 12.22-31; 10.41; 12.11; Phi 4.6; 1 Pet 5.7. “Tüokhei Taowe numante inang, numan üyin jingne hang hahlak yejema-a numan-e hang yinglak, yejema-a numan püm jingne hanghe inlak mong tahshang. Hahying phei üyin yongpu, hüyange nyemo phei püm yongpu yeje a? 26#Mt 10.29.Wang awhalante leiyah: iman-e yedei yejema-a yewet, ye-i-ma-a bung me yejem; hüyangpoi numan wangdang üpawe iman tamnang. Hüma-a iman phei numan ünyei yongpu ne yejepu a? 27#Tüo 39.5.Numan ütam-e meiyange lengpu jingne yakkong#Shonda ja ja nehoi I üyin jinte paopu oklak a? 28Hüyange hangne numan nyemo jingne mongshang pu? Phao shengshap jupeng hangke jong teih tüoyah. Iman-e yeling, iman-e ve yephek, 29#1 Ahng 10.4-7.hüyangpoi Taowe numante inang, Solomon I müktishiwapu üsheiye hatüo yo me ja leye ye-o-ok. 30#Mt 8.26; 14.31; 16.8.Hatüo kih Kahwange phao hünglante inne tamküma-a, hanghepa tenyih tüome ngoh hüyange ngainyih vün me jakwenlaklan! Üjingha ütinglakpu kahtalan. Iye numante ünyei inne yetamlak a? 31Tüokhei, ‘toman-e hang hahlak?’ Yejema-a ‘toman-e hang yinglak?’ Yejema-a toman-e hang inlak? she iye mong tahshang. 32Hangjingne yinhulan-e tüolan khongkümpu yamnang, hüyange numan-e tüolan khongkümpu yahhu nang she numan wangdang üpawe shingnang. 33#Mt 19.28; Mk 10.29-30; Lk 18.29-30.Hüyangpoi üwangne numan-e Kahwang ahngching hüyange I üjaopa yamtüoh, hüyange tüolan üshei numante paowe yahphalak. 34Tüokhei ngainyihpu jingne mong tahshang, hangjingne ngainyih-e yoi nying nyingke mong shanglak. Nyih jeih she yoi shange shaoshi wange ngohnang.

Currently Selected:

MATTHEU 6: KONYBSI

Highlight

Copy