MATTHEU 5

Moimanjong Ngao

(Lk 6.20-23)

1 # Lk 6.17,20-23; Mk 3.13; Jn 6.3. Aope Jesuwe ükhong nge, I kahtangte ong; hüyange aope I shot, yoi pinlan I tangte pei. 2Hüyange Iye imante yoi ju ep hüyange hüke nyüowe i:

3 # Mk 10.14; Lk 22.29. “Aoyinne iman yaha me toinanpu shing iman mongmei lak;

hangjingne wangdang ahngching iman jing.

4 # Isa 61.2; Jn 16.20; Ütah 7.17. Aoyin mangshap nang iman mongmeilak,

hangjingne iman toloi meitamlak.

5 # Tüo 37.11. Innenyaipalan mongmeilak;

hangjingne iman-e kahtok mothleilak.

6 # Isa 55.1-2; Jn 4.14; 6.48-51. Hanghe khakshupupa jingne aoyin seanyao hüyange yengle iman mongmeilak;

hangjingne iman mohtamlak.

7Aoyinne eihate shüpshe hüo iman mongmeilak;

hangjingne iman-e shüpshe tüolak.

8 # Tüo 24.4; Heb 12.14; 1 Jn 3.2; Ütah 22.4. Mongjang jaoshih ngohpalan mongmeilak;

hangjingne iman-e Kahwang ngelak.

9Chingmei lingpalan mongmeilak,

hangjingne imante Kahwang hayim she nyiklak.

10 # 1 Pet 3.14; 4.14. Khakshupupa jingne shangne tampalan mongmeilak,

hangjingne wangdang ahngching iman jing.

11“Aope kahtawe ü-jingne numante phoiye teetamlakei, hüyange numan shangshih ne tamlakei, hüyange numan phei tüi-e ngaoleih-e ümeng üshei ngaolakei, hüwante numan mongmei tüoh. 12#2 Put 36.16; Mt 23.37; Lam 7.52; 1 Thes 2.15; Jas 5.10.Hangjingne hatüokih iman-e aoyin hipalan numan shaome pei imante shaoshine tamyangki. Monghahyah hüyange mongmei yah, hangjingne wangdang me numan jingne khintak üyong angnang.

Hüm Hüyange Wangngai

(Mk 9.50; Lk 14.34-35)

13 # Mk 9.49-50; Lk 14.34-35. “Numan kahtoknyu hüm. Hüyangpoi hüm me Ime wüngpu mahküma-a, hangheye tüopa nishe hümne mengtamlak? Hatüo shaaji hanghe ne-o yemei; shaaji winlak hüyange kahta yawe loklak.

14 # Eph 5.8; Phi 2.15; Jn 8.12. “Numan kahtoknyu wangngai. Kahtang me ngohpu chingnyu ja jüopu ye-ok. 15#Lk 11.33; Mk 4.21; 1 Pet 2.12.Muhto mongme anglak jingne kahtawe vüntük yepah hüyangpoi vüntük yongjing me, hüyange nokme ngohpu kahta lilite teelak jingne angnang. 16Hatüo kih kahta sheshao me numan wangngai teelak yang, hümme nakshih iman-e numan toimei ngelak hüyange wangdang me ngohpu numan üpa müktishiwalak.

Ngaokhüm Hüyange Hipalan

17“Ngaokhüm yejema-a hipalan ne nyüopu menge winlak jingne Tao peipu she tahteih, iman menge winlak jingne yeje hüyangpoi iman wangngoilak jingne Tao pei. 18#Lk 16.17; Mk 13.31.Ütingpa me Taowe numante inang, wang hei kahtok linne mantai mantai, hüyange üshei manngai manngai, nyanpu aikek üjoi ja yejema-a nyanpu lai ngaokhüm lai mepu aope-o lin yetailak. 19#Jas 2.10.Tüokhei aowe tüolan ngaokeng yo me üjoiha ja nehoi menglakei, hüyange hüke linglak jingne kahta te nyüolakei, wangdang Ahngching me Ite üjoipa she nyiklak; hüyangpoi aoyinne tüolan jonlakei hüyange nyüolakei imante wangdang ahngching me üyong she nyiklak. 20Hangjingne Taowe numante inang numan üjaopa ne mengpu ngaokeng nyüopalan hei phariseelan phei ünyei jaowe meiye yenangma-a wangdang ahngching te ye-ong oklak.

Mongshih Ngaipu Jeng

21 # Woi 20.13; Hin 5.17; 16.18. “Lintepu hipak me kahtalante ipu numan-e jaiyangki, ‘Nange tahtoi; aowe toilakei I ngaophünpu ngohlak.’ 22Hüyangpoi Taowe numante inang aowe yoi jeiheinao phei mongshih ngailakei I ngaophünpu ngohlak; aowe yoi jeiheinaote teelakei, I Pangshanlan#Pangshan yejema-a Ngengtüp sheshaome ngaophünpu ngohlak; aowe ngapa she ilakei, I vünjhom me ngohlak. 23Tüokhei nange nang hünghao wümjong me do ne iwante, hüyange nang jeiheinaowe yejema-a nyanao nang phei yemeipe ngohma-a, 24nang hünghao lengjong shaome angtüoh; üwangne yetüo hüyange nang jeiheinao phei mongken hahjieng ling yah, hüyange tüophei me yetüoh hüyange nang hünghao doyah. 25#Lk 12.57-59.Nang phei yemeipa phei lamme ngohwante muh shümpa ne menge lanyah, yejema-a Iye nang ngaophünpalante phünne phakülak, hüyange ngaophünpalan-e phopalante, hüyange nanga küpnok me angtamphalak. 26Ütingme Taowe numante inang, nange ükümpa ngin panne manpha manpha tüomepu nang ngaipu ye-oklak.

Phwngpu Jeng

27 # Woi 20.14; Hin 5.18. “Numan-e tüo ipu jaiyangki, ‘Numan-e phwngngampu toi tah ling.’ 28Hüyangpoi Taowe numante inang aoyinne sheko te I phei mong ngaiye leilakei I mongjang me yha phei phwngpu toi lingteki. 29#Mk 9.43-48; Mt 18.8-9.Nang yakjah ye mükke nang ünu omne tamma-a, tüopa yoktüoh hüyange wintüoh, hangjingne nang püm khongkümpu vünjhom me mah leima ümük ja yenangpu shemei. 30Hüyange nang yakjah ye yakke nang ünu omne tamküma-a, langtüoh hüyange wintüoh, hangjingne nang püm khongkümpu vünjhom me mah leima, yakja mahpu shemei.”

Noksa Yanpu Jeng

(Mt 19.9; Mk 10.11-12; Lk 16.18)

31 # Lk 16.18; Mk 10.11-12; Mt 19.9; 1 Kor 7.10-11; Hin 24.1-4. “Hatüo ipu jaiyangki, ‘Aowe yoi sheko yantamlakei yha te sakilai phalak wongpong.’ 32Hüyangpoi Taowe numante inang aowe yoi sheko yantamlakei, hüyange yha yemeipe yengoh, yha phwngngam ne tamnang; hüyange aowe yanne ngohpu sheko yahlakei phwngngampu toi lingnang.”

Jiengpu Jeng

33 # Mt 23.16-22; Jas 5.12; Lev 19.12; Lung 30.2; Hin 23.21. “Üne-o, lintepu hipak me kahtalante ipu numan-e jaiyangki, ‘Nange tahleih iye jiengpu tahyah; hüyangpoi nang Youngwanpa sheshao me jiengyangpu lingtüoh.’ 34Hüpoi Taowe numante inang, lanshe tahjieng, wangdang min me-o tah, hangjingne hatüo Kahwang shotjing, 35#Isa 66.1; Lam 7.49; Tüo 48.2.yejema-a kahtok min me-o tah, hangjingne hatüowa I yashop jing, yejema-a Jerusalem min me-o tah, hangjingne hatüowa ahngyong chingnyu; 36yejema-a numan shange tahjieng, hangjingne nange shangmin ja nehoi ühengne yejema-a ünyak ne lingpu ye-oklak. 37Numan ngao jenang she ima-a jenang she hüyange yeje she ima-a yeje she iyah. Hatüo phei nyeiye hangyin ngailakei ünu mepu ngainang.

Phuh Hahpu Jeng

(Lk 6.29-30)

38 # Woi 21.24; Lev 24.20; Hin 19.21. “Numan-e hüke ipu jaiyangki, ‘Mük nanleiye mük, hüyange fa nanleiye fa’. 39#Lk 6.29-30; 1 Kor 6.7; Rom 12.17; 1 Pet 2.19; 3.9; Det 24.29.Hüyangpoi Taowe numante inang, ümengpa phei tahtee hüyangpoi ütam-e nang te nang yakjahye mengya me leima-a Ite jayekao-o hüotüoh. 40Kahta ütam-e nang phei ngaophün jing te taihuma-a hüyange nangjing (ümongpa) phakshaoh yah huma-a nang inkhek-o yah ne tamtüoh. 41Kahta ütam-e nang te mile ja tailak kangma-a, I phei mile ni taitüoh. 42Aowe nang te tongnang Ite phatüoh, hüyange nang mepu ü-sea yah-hupu kahta mepu nang tahlüp.”

Wepalante Kentüoh

(Lk 6.27,28,32-36)

43 # Lk 6.27-28,32-36; Lev 19.18; Det 25.21-22. “Numan-e hüke ipu jaiyangki, ‘Nange nang yupite kenlak, hüyange nang wepate nuyah.’ 44Hüyangpoi Taowe numante inang, numan wepa lante kenyah hüyange numante shangne tampalan jingne yoptüoh, 45tüo kaiye numan wangdang mepu numan üpa hayim ne mengpu oklak, hangjingne Iye yoi wanghe ünu hüyange ümeilan tangme ongne tamnang hüyange ümei lingpalan hei ümeng lingpalan tangte Iye wai shonnang. 46Hangjingne numante kenpalan te hei numan-e kenma-a, numan hanghe hünghao ngohnangki? Kahngin shaipalanne-o hüke yeling a? 47Hüyange numan-e numan jeihei naolan shahate salam phaküma-a, eihalan phei nyeiye numan-e hang ling nangki? Yinhulane-o hatüo kih yeling a? 48#Lev 19.2.Tüokhei, wangdang me ngohpu numan üpa hangke wangngoi, hatüokih numan-o wangngoilak wongpong.

Currently Selected:

MATTHEU 5: KONYBSI

Highlight

Copy