MATTHEU 4
4
Jesute Tokpu
(Mk 1.12-13; Lk 4.1-13)
1 #
Mk 1.12-13; Lk 4.1-13; Heb 2.18; 4.15. Tüophei me kahshih-e toklak jingne, Yahawe wanwüng jengte Jesu woitei. 2#Woi 34.28; 1 Ahng 19.8.I nyih deli hüyange pha deli nyaole yangphei me I seanyao; 3tüophei me tokpupa pei hüyange Ite i, “Nang Kahwang üha ne mengma-a tüolan longte an ne mengne itüoh.” 4#Hin 8.3.Hüyangpoi Iye janne i, “Hatüo nyan ngohnang. An shaha phei kahta ngohne ye-ok, hüyangpoi Kahwang ju mepu ngaipu ngao phei ngoh ok.”
5 #
Mt 27.53; Neh 11.1; Dan 9.24; Ütah 21.10. Tüophei me kahshih-e I üjao chingnyu te woitei. Iye yopnok shedaopupa tangme I shotne tam 6#Tüo 91.11-12.hüyange Ite i, “Nang Kahwang üha ne mengma-a, nang nying nyingke yeitüoh, hangjingne hatüo nyanne ngohnang:
“ ‘Iye yoi shongmokpalante nang jingne ngaophalak,’
hüyange
‘Iman yakme nanga pailak,
tüokhei nanga nang ya long me yashah hüone yetamlak.’ ”
7 #
Hin 6.16. Jesuwe Ite janne i, “Laingao me hatüo nyanne ngohnang, nange nang Youngwanpa Kahwang tokne tahtam.” 8Üne-o kahshih-e yeonge daopu kahtangte I woi in, hüyange kahtoknyu ahngchinglan hüyange iman müktishiwapu khongküm Ite hüo; 9hüyange Iye Ite i, “Nang ümme tayange üte khümma-a taowe tüolan khongkümpu nang te phalakei.” 10#Hin 6.13; Mk 8.33.Tüophei me Jesuwe Ite i, “Taitüoh, Satan! Hangjingne laingao me hatüo nyanne ngohnang,
‘Nange nang Youngwanpa Kahwang te khümlak,
hüyange I shaha shaoshantüoh.’ ”
11 #
Mt 26.53; Lk 22.43. Tüophei me kahshih-e I ang, hüyange mokhshe wangdang shongmokpalan pei hüyange Ite pao.
Galilee me Jesuwe I Toikong Wangpu
(Mk 1.14-15; Lk 4.14-15)
12 #
Mk 1.14; Lk 4.14; Mt 14.3; Jn 1.43. Aope Jesuwe John phoyange küpnok me angteki she jai, I Galilee te leihye. 13#Jn 2.12; Mk 1.21; Lk 4.23.Nazareth tüohyange I pei hüyange Zebulun hei Naphtali yikeng ye me, yengching phin Kapernaum me nyoi. 14Hatüowa Isaia hipawe ngaoyangpu ngao ütah te ngailak jingne:
15 #
Isa 9.1-2. “Zebulun kahtok hüyange Naphtali kahtok;
yengchingye lamme, Jordan kaiye,
Galilee, yinhulan kahmük,
16aoyin kahta wangnyak me shotte ngoh wangngai üyong ngelak,
hüyange aoyin yimlam yashüm kahtok me shotte ngoh wangngai teelak.”
17 #
Mk 1.15; Mt 3.2; 10.7. Tüohipak me wange Jesuwe konnyüo hüyange i, “Monglüp tüoh, hangjingne wangdang ahngching owe peiteki.”
Jesuwe Üwangpa Pinlan Nyik
(Mk 1.16-20; Lk 5.1-11)
18 #
Mk 1.16-20; Lk 5.1-11; Jn 1.35-42. Jesu Galilee yengching phinme kemwante Iye Ijei Inao ni, Simon ao te Peter she nyik, hüyange Inao Andrew yengching me shaan shaiye nge, hangjingne iman nyah ompalan ne ngoh. 19Jesuwe imante i, “Wenyah, ü-phei te woikei, hüyange Taowe numan kahtalan ompa ne mengtam pha ning.” 20Mamshe iman-e yoi shaan tüohyange Ipheite woi.
21Aope I yelakpe tüomepu kemme tai Iye ülao Ijei Inao ni, Zebedee üha Jeams, hüyange Inao John, lisheng ja me iman üpa Zebedee phei iman shaan tümme nge; hüyange Iye imante nyik. 22Hüwante muh iman-e lisheng hei iman üpa tüohyange, hüyange I pheite woi.
Jesuwe Konnyüopu Ükongwang
(Lk 6.17-19)
23 #
Mk 1.39; Lk 4.15,44; Mt 9.35; Mk 3.7-8; Lk 6.17. Jesu Galilee kahtok üshei yete, iman Synagoguelan me nyüowe, Ahngching pungao ümei nyüowe, hüyange kahta yo mepu daktin ülam lili hüyange dakpalan meiye tai. 24I jeng ngaolan Syria kahtok üshei yete yan, hüyange iman I tangte ülam maawe dakpu dakpalan üshei, hüyange lat dakpu, laa omme dakpu, mahudak dakpu, hüyange yimtin dakpu üshei pei hüyange Iye iman meitam. 25Hüyange Galilee mepu, Dekapolis mepu, Jerusalem mepu, Judea mepu, hüyange Jordan jayekao mepu ükhong üyong I pheite woi.
Currently Selected:
MATTHEU 4: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
