MATTHEU 8

Jesuwe Ngonpa Ja Meitam

(Mk 1.40-45; Lk 5.12-16)

1Aope Jesu kahtang mepu yu, ükhong üyong Iphei te woi. 2#Mk 1.40-44; Lk 5.12-14. #Mt 9.18; 15.25; 18.26; 20.20; Jn 9.38.Hüyange hüowü, ngonpa ja pei hüyange I sheshao me ümme khümme Iye hüke i, “Youngwanpa, nange mongma-a, nange tao jaowe tamne ok.” 3Jesuwe I yak no hüyange Ite jonne i, “Taowe mongnang; nang jaotüoh.” Hüwante muh I ngondak mepu I jao. 4#Mk 3.12; 5.43; 7.36; 8.30; 9.9; Lev 14.2.Hüyange Jesuwe Ite i, “Leiyah, nange aote-o tah i, hüyangpoi taitüoh hüyange ngengpa te nang hüotüoh, hüyange kahtalante nang jaopu saki hüowe, Mosa phapu ngaokih dopu hünghao phatüoh.”

Jesuwe Roman Woipa Shaoshanpa Meitam

(Lk 7.1-10)

5 # Lk 7.1-10; Jn 4.46-53. Aope Jesu Kapernaum te ong Roman woipa ja I tangte pei hüyange Ite khümme hüke i, 6“Üyongpa, ü shaoshanpa yimtin ne jamloi dakteiye nokme lamme ngohnang.” 7Jesuwe Ite i, “Tao peikülak hüyange I meilak.” 8Roman woipa janne i, “Üyongpa, tenok yaoshüm phang te nang peitamlak taowe yewang, hüyangpoi ngao shahame ipha, hüyange ü shaoshanpa meilak. 9Hangjingne tao wong pheipu kahta ja, hüyange ü-phang me kengphetlan ngoh nang. Taowe hatüote inang, ‘Taitüoh,’ hüyange I tainang, hüyange japa te, ‘Wenkei,’ hüyange I wen nang; hüyange ü rhapate, ‘Tüo lingtüoh,’ hüyange Iye hatüo lingnang.” 10Tüopa ngaojaiyange Jesu yashan hüyange I phei woipalante i, “Ütingme Taowe numante inang, Israellan aome-o hükihpu ütinglakpu üyong Taowe mannge. 11#Lk 13.28-29; Isa 49.12; 59.19; Mal 1.11; Tüo 107.3.Taowe numante inang, ‘wanghe ongjing hüyange nyüpjing’ mepu maawe peikülak, hüyange wangdang ahngching me Abraham hüyange Isaac hüyange Jacoblan phei khao me shotlak; 12#Mt 13.42,50; 22.13; 24.51; 25.30; Lk 13.28.hüyangpoi ahngching halan nokshao ünyak me shüppe winlak; tüoken me shappu hei fa ngaopu ngohlak.” 13Jesuwe Roman woipate i, “Taitüoh, nange ütinglakpu kih nang jingne lingtamlak;” hüyange hatüo hipak khakshuwe shaoshanpa mei.

Jesuwe Kahta Üngang Meitam

(Mk 1.29-34; Lk 4.38-41)

14 # Mk 1.29-34; Lk 4.38-41; Mt 4.23-24. Aope Jesu Peter nokte ong hüyange Peter ü-nyei tinye dak-e lengme lamyange ngohpu nge. 15Iye yha yak nowe jon hüyange tinye yha mepu yan, hüyange yha laowe Ite namnowe pha.

16Aope ün ngoiye pei iman-e I tangte laawe tükpu dakpalan üngang woipei. Jesuwe ngaopha ja phei yahalan jangtei, hüyange dakpalan üshei meitam. 17#Isa 53.4.Hatüowa Isaia hipa kaiye ngaoyangpu ütahte ngailak jingne: “Teman daklakpu Iye yah hüyange teman daktin Iye ki.”

Jesu Pheite Woipu

(Lk 9.57-62)

18 # Lk 9.57-60; Mk 4.35; Lk 8.22. Sha-a aope I neikonne ükhong üyong nge ülao janyete tailak jingne Jesuwe ngaopha. 19Hüwante ngaokeng nyüopa ja pei hüyange Ite i, “Konnyüopa, nang ümeken me tailakei tao nang pheite woiküning.” 20Hüwante Jesuwe Ite i, “Hiyanlan üsha ngohnang hüyange wang awhalan ülüp ngohnang; hüyangpoi kahta üha shangje jing yenang.” 21Pin yo me ülao jawe Ite i, “Üyongpa, üwangne taowe üpa mang muyang küning üte yelak o-ngao yahkei.” 22#Mt 9.9; Jn 1.43; 21.19.Hüyangpoi Jesuwe Ite i, “Ü-pheite woikei, hüyange lipalan-e iman lipu mu ne tüotüoh.”

Jesuwe Waishihwangkhah Ümok-hümtam

(Mk 4.35-41; Lk 8.22-25)

23 # Mk 4.36-41; Lk 8.22-25. Aope Jesu lishengja te ong I pinlan I pheite woi. 24Mokhshe yengching me waishihwangkhah üyong ngai, tüokaiye lisheng yengmokh me hümme ngoh; hüyangpoi Jesu shiye ngoh. 25Hüwante iman I tangte pei hüyange Ite loiye i. “Youngwanpa toman yinpha toman mahpuweih!” 26#Mt 6.30; 14.31; 16.8.Iye imante i, “Ütinglakpu üjingha ngohpalan, numan hangne nyampu?” Tüophei me I laowe yong hüyange wangyang hei yengching te teeye ngao, hüyange yeonge yonge wüngmah. 27Kahtalan-e yashanne hüke i, “Hatüowa hangkihpu kahta, hangjingne wangyang hei yengchinge-o Ite jai nangki!”

Jesuwe Laaphei Ngohpu Kahta Ni Meitam

(Mk 5.1-20; Lk 8.26-39)

28 # Mk 5.1-17; Lk 8.26-37. Aope I Gadarenes kahtok ülao janyete pei, hüwante mangjong mepu ngaipu, laa ompu kahta ni, I phei hüo. Iman yeonge nyamlak ne ngoh tüokhei tüopa lam kaiye ao-o yekem pe ngoh. 29#Kahp 11.12; 2 Sam 16.10; Mk 1.24; Jn 2.4.Iman-e üngwün, “Kahwang üha, nange toman phei hanghi linglak ngoh nangki? Hipak manngoipe toman ponghahne nang tüome peipu a?” 30Sha-a iman mepu meiyange yejaipe ak ükhong ja heei hah ngoh. 31Laalan-e Ite tonge hüke i, “Nange toman jange teine ima-a, ak ükhong tangte toman teipha.” 32Jesuwe imante i, “Taitüoh.” Iman ngai hüyange taiye aklante ong hüyange ak ükhong khongkümpu yengnah wak ülute phet hüyange yengme hünge li. 33Ak yompalan phettai hüyange chingte pei. Chingme iman-e laalan jeng hüyange ngaipu lampheli ngaiye i. 34Chingshao kahta khongkümpu Jesu phei hüone pei, hüyange aope iman-e I nge, iman kahtok mepu yanne tailak jingne Ite tonge i.

Currently Selected:

MATTHEU 8: KONYBSI

Highlight

Copy