LUKAS 3

Katuk Yaya Guru Batis

(Un te neng Matius 3.1-12; Markus 1.1-8; Yaya 1.19-28)

1Neng iaʹ kepuloʹ lema uman laki Kaisar Tiberius ban nuyan paren bioʹ, dalau ina Puntius Pilatus gebenur kaʹ tanaʹ Yudia. Un Herudis iaʹ paren ngkang dale Galilia, ngan Pilipus iaʹ cenganak Herudis, ia iaʹ paren ngkang dale Ituria, ngan dale Tera-kunitis. Un Lisanias paren iaʹ ngkang tanaʹ Abiline. 2Dalau ina Hanas ngan Kayapas ban ngkang gayeng pengebioʹ detaʹu. Dalau ina kenai tiraʹ Allah palaʹ Yaya anak Sakaria ne kaʹ tanaʹ lenga. 3Ketai Yaya masat pa tipo lepoʹ kaʹ dale sungai Yardin, pedenga tiraʹ Allah, kun dau ue: “Nesen ne ngan nyepuleʹ kimet cem cen penyalaʹ kem. Uʹo ina alaʹ batis, ina le penyalaʹ kem ke pesau kuʹun Allah.” 4Koʹ baʹan dau dalem Kitap Pegawa Yesaya:

“Un dau kelunan ngelengap kaʹ tanaʹ lenga:

‘Petenup ne janan Tuhan kena kenai ie,

ngan petelit ne janan ukoʹ kenai ie.

5Ketoʹ bek bek, nampun ne.

Ketoʹ mudung bioʹ ngan mudung iʹut, ngelibaʹ ne.

Janan iaʹ kileng, petelit ne, ngan janan iaʹ belatu, pekuaʹ ne ata ha.

6Buk pekina, mung kelunan ke taʹan ban puyan Allah keniga udip kelunan.’ ”

7Kadoʹ kenai dulu palaʹ Yaya ubaʹ ke cuk ia ngebatis ida. Un dau ue neng ida: “Ikem diaʹ mela ncung ulai, aheʹ iaʹ badaʹ mikem un janan ukoʹ kem ke kelap kenca Allah iaʹ laho kenai ʹo? 8Ikem peluhaʹ ne diseʹ puyan ncem iaʹ tiga, iaʹ badaʹ ban lan diseʹ kem nesen ngan nyepuleʹ kimet cem cen penyalaʹ kem. Ayen ncem kuma ha neng ikem selepeʹ: “Ilu dini mela Ibrahim le.” Dau heʹ mikem, senteng pe Allah ke uyan mela Ibrahim cen batu dini pe. 9Naʹkini tenup ne asai man ke nepeng puʹun kayu pesen pakat te. Moʹ mung inan buaʹ iaʹ abeʹ un tiga buʹan ke sihoʹ tepeng ʹo, penco mihit pet te kaʹ luten.”

10Un dau re diaʹ kadoʹ dina neng Yaya: “Buk pekina, ke kumpin iaʹ tekep pemuyan meʹ, apan luhaʹ ban meʹ nesen cen penyalaʹ meʹ?”

11Un dau ue mipa: “Aheʹ iaʹ un dua re sapai, naʹ ca me diaʹ are un anun. Ngan aheʹ iaʹ un penguman, tiga pe ia petulat te me aheʹ iaʹ abeʹ un anun.”

12Nai pe palai diaʹ nemo pupu, diaʹ jaʹat baʹan dau dulu, ubaʹ ke batis. Un dau re neng Yaya: “Ahaʹ Guru, ke kumpin iaʹ tekep pemuyan meʹ?”

13Dau ue neng ida: “Ayen ncem nyat suheʹ neng iaʹ ban perinta petuket mikem.”

14Un pe palai sedadu nai lemutu neng ia: “Kumpin meʹ tupe? Ke kumpin iaʹ tekep pemuyan meʹ?”

Dau Yaya neng ida: “Ayen ncem lemejen nyat ligit neng dulu, ngan mekem salaʹ me dulu. Teto le tekaʹ kem neng ligit ban tau hem.”

15Dalau ina, mengaʹ tekaʹ dulu diaʹ kadoʹ dina. Un tekaʹ kihoʹ de neng Yaya, masaʹ ini Keristus iaʹ man pungu keniga udip. 16Ina ukoʹ Yaya badaʹ pekini dau mida mung: “Akeʹ ne ngebatis ikem man sungai, di lareʹ un ca laʹa iaʹ lapa bioʹ neng akeʹ, iaʹ kenai ʹo ini. Di pe ke mubai tali sepatu ue, abeʹ keʹ tekep. Ia ke ngebatis ikem man Berua Buheʹ ngan luten ʹo. 17Un koʹ baʹan tapan are dalem ujoʹ o. Iake lemalit mung padai dalem tekawan ne. Padai ie diaʹ tiga luang, ia ke pempun kedalem lepubung nge. Un tang nge, ia ke nutung pa muʹo dalem luten iaʹ abeʹ un tisen ketai pataʹ ina.”

18Kadoʹ naʹan janan katuk man Yaya payo kimet dulu dalau ue badaʹ Denga Tiga mida. 19Un sepuʹo Yaya ngenca Gebenur Herudis, suaʹ ban ne tai pepeto ngan Herudias, leto sadin laki ie. Ngan kadoʹ pelaʹa puyan iaʹ jaʹat ban Herudis uyan. 20Ia mepit pelaʹa ngan ca puyan ne iaʹ pelapa jaʹat, moʹ o nyepin Yaya dalem amin sepin.

Yaya ngebatis Yesus

(Un te neng Matius 3.13-17; Markus 1.9-11)

21Uʹo Yaya ngebatis mung dulu dina, kun ne ngebatis Yesus puʹo. Dalau ina mentung Yesus lemameʹ, pesik ne langit. 22Sulo kenai Berua Buheʹ cen mpau te, nepatung koʹ baʹan ca usa sui garaʹ are, mempep neng Yesus. Dalau ina un dau ca isiu cen langit kuma ha: “Ikoʹ anak keʹ, iaʹ penyelum keʹ. Ikoʹ iaʹ sihoʹ neng pengubaʹ keʹ.”

Tepuʹun tepun Yesus

(Un te neng Matius 1.1-17)

23Ketai Yesus nading ngkang gayeng nge dalau ue kihoʹ kihoʹ telu puloʹ uman udip pe. Un tekaʹ kimet dulu, ida kenaʹ ia anak Yusup, anak Hili, 24anak Matat, anak Liwi, anak Maleki, anak Yana, anak Yusup, 25anak Matatia, anak Amus, anak Nahum, anak Hasli, anak Nagai, 26anak Maʹat, anak Matatia, anak Simai, anak Yusik, anak Yuda, 27anak Yuana, anak Risa, anak Seru-babil, anak Saltil, anak Neri, 28anak Maleki, anak Adi, anak Kusam, anak Amudam, anak Ir, 29anak Yusa, anak Iliasar, anak Yurim, anak Mata, anak Liwi, 30anak Simiun, anak Yahuda, anak Yusup, anan Yunan, anak Iliakim, 31anak Malia, anak Mina, anak Matata, anak Natan, anak Daut, 32anak Isai, anak Ubit, anak Buʹas, anak Salmun, anak Nasun, 33anak Aminadap, anak Admin, anak Arni, anak Hasrun, anak Paris, anak Yahuda, 34anak Yakup, anak Isak, anak Ibrahim, anak Terah, anak Nahur, 35anak Saruk, anak Rahu, anak Palik, anak Abir, anak Salah, 36anak Kenan, anak Apaksat, anak Sem, anak Nuh, anak Lamek, 37anak Metusalah, anak Inuk, anak Yarit, anak Malalil, anak Kenan, 38anak Inus, anak Set, anak Adem, anak Allah.

Currently Selected:

LUKAS 3: KNT

Highlight

Copy