LUKAS 4

Sitan ten Yesus

(Un te neng Matius 4.1-11; Markus 1.12-13)

1Nai Yesus uleʹ cen sungai Yardin. Sangan ne kuʹun Berua Buheʹ. Penco Berua ina tai ngkin ia kaʹ tanaʹ lenga. 2Pat puloʹ tau majan ne Bali ten Yesus kaʹ ina. Toʹ majan ina abeʹ un ca inu ia uman. Laʹu ne ia.

3Un dau Bali ina neng ia: “Buk lan ncoʹ Anak Allah, cuk batu ini ngaliu penguman.”

4Kun Yesus mipa ia: “Un dau dalem Kitap iaʹ kuma ha: ‘Abeʹ e bang kuʹun penguman tuaʹ le kelunan ke senteng mudip.’ ”

5Tai kun Bali ina ngkin Yesus neng ukoʹ iaʹ tumau. Kidi ie peluhaʹ mia mung puyan pengaren kaʹ usun tanaʹ ne nuat le. 6Un dau Bali neng ia: “Me ikoʹ keʹ ubaʹ kenaʹ mung penyukat ini peging peniga ha. Moʹ mung dini pelek palaʹ akeʹ are. Sukat ceʹ ke naʹ a me aheʹ iaʹ ukoʹ keʹ ubaʹ ke naʹ a. 7Ketoʹ dini, ikoʹ ke un ne, buk koʹ ke sutlep palaʹ akeʹ.”

8Un Yesus mipa ia: “Dau dalem Kitap: ‘Nyelama palaʹ Tuhan iaʹ Tuhan Allah hem. Bang palaʹ ia le ikem ke tunuk.’ ”

9Tai kun Bali ngkin Yesus kaʹ Yerusalim, ngkin ia kaʹ belubung Umaʹ Palan Allah. Un dau ue neng ia: “Buk lan ncoʹ Anak Allah, pelaboʹ ne usa hoʹ cen mpau ne. 10Moʹ un dau dalem Kitap: ‘Allah ke cuk melikat te kenai petubo ikoʹ tiga le.’ 11Ngan laʹa dau dalem Kitap: ‘Melikat dina ke nahak ikoʹ man ujoʹ de, malap taket coʹ ketai pegoʹ neng batu.’ ”

12Un dau Yesus mipa ia: “Un dau dalem Kitap: ‘Ayen ncem ten Tuhan iaʹ Tuhan Allah hem.’ ”

13Lepa Bali ina pesukung ketoʹ naʹan pengeten ne neng Yesus, tai ie ngerada Yesus pawang kediʹut de.

Yesus nading gayeng nge kaʹ tanaʹ Galilia

(Un te neng Matius 4.12-17; Markus 1.14-15)

14Uʹo ina tai Yesus ngeliwet kaʹ tanaʹ Galilia. Un ban penyukat Berua Buheʹ tugung ia. Tai libut ne denga ha pa tipo dale ina. 15Kun ne pekatuk singket amin sebayang Yahudi kaʹ dale ina, ngan mung dulu pempau Yesus ne.

Lepo Nasarit nyekang Yesus

(Un te neng Matius 13.53-58; Markus 6.1-6)

16Uʹo ina tai kun Yesus abeʹ kaʹ lepoʹ Nasarit, kukoʹ o ban mudip cen dalau ue iʹut te. Tegoʹ Tau Kelineʹ, tai ie kedalem amin sebayang Yahudi, koʹ baʹan kelayan ne. Kun ne nekejeng ke baca surat. 17Kun ca laki mencai Kitap Pegawaʹ Yesaya mia. Kun Yesus mesik Kitap ina, mita isiu surat iaʹ pekini dau ue:

18“Un Berua Tuhan neng akeʹ.

Lepa ne ia nedanaʹ akeʹ, cuk akeʹ badaʹ Denga Tiga palaʹ dulu diaʹ taru mudip.

Ngan pekina pe cuk akeʹ nai badaʹ denga nakau dulu diaʹ salut,

ngan mesik mata diaʹ butaʹ,

ngan sau dulu diaʹ ban pencit,

19ngan badaʹ ca awang iaʹ tiga, ukoʹ dulu nai alaʹ udip dalem Tuhan.”

20Kun Yesus lemelen Kitap ina, naʹ a uleʹ palaʹ laki iaʹ nubo surat ina, kun ne madung pelaʹa. Mung dulu dalem amin sebayang Yahudi ina menu naʹat ia. 21Un dau Yesus laʹa: “Tau ini palup ne dau isiu Kitap ini, dalau hem ngeringa ha ʹo re.”

22Ketoʹ dulu kina alaʹ dau ue, ngan muʹo tawai ne ida kenahan dau peniga isiu ue. Kedau re: “Moʹ abeʹ ini anak Yusup tupe?”

23Un dau Yesus neng ida: “Masaʹ kem ke kuma ha neng akeʹ, alaʹ kata pekini dau: ‘Duktun, paget ne usa hoʹ.’ Masaʹ kem pekini dau neng akeʹ pelaʹa: ‘Inu iaʹ ameʹ kenahan ikoʹ ban uyan kaʹ Kapernaum ina, ikoʹ uyan pelaʹa kedalem lepoʹ koʹ ne.’ ” 24Un pelaʹa dau Yesus: “Lan dau heʹ badaʹ mikem, cen kena ne dulu are nyelama pegawa diaʹ dalem lepoʹ o tengen. 25Lan te, kadoʹ leto balu neng ahang diaʹ lepoʹ Israil dalau udip Ilia, jinan tagaʹ dalem telu uman nem bulan are, pa kenai ca lien bioʹ pa tipo tanaʹ ini. 26Naʹ pia pekina, abeʹ Tuhan cuk Ilia tai palaʹ leto balu lepoʹ Israil, bang palaʹ ca leto balu kaʹ lepoʹ Saripat kaʹ tanaʹ Sidun tai ie. 27Dalau udip pegawa Ilisa pelaʹa, kadoʹ dulu diaʹ sakit bekayen kaʹ lepoʹ Israil, ngan abeʹ un ca usa iaʹ tai maget, bang Naaman lepoʹ Siria ina le.”

28Ketoʹ diaʹ dalem amin sebayang Yahudi ina are, miʹa laleʹ ne ida kenahan dau tiraʹ Yesus ne. 29Sulo re beteʹ pampo Yesus menat ia, ngkin ia kaʹ awang lepoʹ neng ca ulu bila, kukoʹ lepoʹ ina. Un ban kimet de ubaʹ ke pelaboʹ ia cen idi. 30Belekaʹ sulo Yesus nyiʹa pelapa ida, penco ho mecin ida.

Laki iaʹ un bali

(Un te neng Markus 1.21-28)

31Uʹo ina tai kun Yesus kaʹ lepoʹ Kapernaum, ca lepoʹ kaʹ dale Galilia. Kina ha pekatuk dulu tegoʹ Tau Kelineʹ ne. 32Pasak salam ne ida dina mung kenahan dau katuk ke, moʹ tiraʹ a un penyukat.

33Un dalem amin sebayang Yahudi ina, idi ca laki iaʹ bali nelasek. Lemikaʹ tuaʹ ne ia ngan bioʹ dau ue: 34“Inu pengeloʹ koʹ neng ameʹ, Yesus lepoʹ Nasarit. Ikoʹ nai ubaʹ ke ngejaʹat ameʹ tupe? Tisen te akeʹ ikoʹ ini: ikoʹ iaʹ Buheʹ, iaʹ nai cen Allah.”

35Penco Yesus penceng bali ina, kun dau ue: “Ayen pisiu. Nai ne kawang cen laki ini.” Kun bali nubang laki ina kata dulu diaʹ kadoʹ dina. Penco nai bali ina kawang cen dalem ia, abeʹ e ngejaʹat laki ina.

36Tai salam ne ida dina mung. Un dau re neng ida selepeʹ: “Isiu kumpin ini tupe? Moʹ man penyukat ngan nyingan ne ia cuk bali dina tai kelap. Kelap pe ida puʹo.” 37Tai libut ne denga puyan Yesus neng dale ina.

Kadoʹ diaʹ sakit Yesus paget

(Un te neng Matius 8.14-17; Markus 1.29-34)

38Uʹo tai Yesus mecin amin sebayang Yahudi ina, penco tai ie kaʹ amin Simun. Dalau ina, un ueʹ leto Simun ne kenyarem me mayung. Kun nte badaʹ ia me Yesus. 39Tai Yesus nekejeng nusau kukoʹ o ken, penco ho mulen kayung ina. Beliʹau maget le ia. Penco kenai leto ina beteʹ tai pubo ida.

40Dalau ketai lenca tau, mung dulu dalem lepoʹ ina diaʹ ban sakit neng pemanak de, kadoʹ naʹan penyakit de, diaʹ dulu nai ngkin kata Yesus. Kun ne napoʹ ujoʹ o neng ida, singket usa re, paget ida mung. 41Kadoʹ kenai bali kelap cen culu dalau ina, mentung bioʹ dau re ngelengap: “Ikoʹ ini atek Anak Allah.”

Kun Yesus mulen ida pisiu, moʹ bali dina tisen ia Keristus iaʹ man pungu keniga udip.

Yesus badaʹ katuk kaʹ dalem amin sebayang

(Un te neng Markus 1.35-39)

42Tading kenai dema, tai Yesus mecin lepoʹ ina, tai neng ca ukoʹ diaʹ lenga. Nai re dina mita ia pelaʹa. Uʹo re tegoʹ ia, ubaʹ de ke mapo ia ngelineʹ ngan nte kaʹ lepoʹ Kapernaum ina. 43Di lareʹ un dau Yesus neng ida: “Abeʹ keʹ senteng abeʹ un ketai badaʹ Denga Injil neng puyan pengaren Allah kaʹ lepoʹ diaʹ ca, uban ne ina ne iaʹ tuman ukoʹ Allah ban cuk akeʹ nai are.”

44Pekina tai ie penco katuk dalem singket amin sebayang Yahudi pa tipo tanaʹ Yudia.

Currently Selected:

LUKAS 4: KNT

Highlight

Copy