LUKAS 2

Puyan kenai Yesus pempet

(Un te neng Matius 1.18-25)

1Un dalau ina, kun Laja Kaisar Agustus pekatu tiraʹ me ketoʹ dulu dalem lepoʹ diaʹ ia ngkang. Seʹ e ubaʹ ke pecap ida, ina ukoʹ o cuk ida nyurat ngadan nte. 2Ini tading nte pecap toʹ kadoʹ de. Dalau ina, Kirinius ngkang tanaʹ Siria, tahaʹ ntaʹ neng Agustus. 3Ina ukoʹ mung dulu, kempi ban lepoʹ de, kina re ke sihoʹ cap.

4Ina ukoʹ Yusup ngan Mariam tai mecin lepoʹ Nasarit, tanaʹ Galilia ne. Penco tai re kaʹ tanaʹ Yudia, kaʹ lepoʹ iaʹ ngadan ne Bitlahim, kukoʹ Lajaʹ Daut ban nai musang are. Yusup tai kina, moʹ o cen mela Daut. 5Tai kun ne badaʹ ngadan ne peging ngan Mariam, leto iaʹ ia matep idai are. Dalau ina un Mariam lemaleʹ e. 6Jinan nte dua kaʹ Bitlahim, tai sukung ne bulan Mariam ke muga. 7Sulo ho muga ca anak laki, anak ading nge. Kun ne lemino ia man apeʹ keluma, ngan peken ia kedalem tahan sapi, moʹ abeʹ un ukoʹ de dalem amin sakai ne.

Laki diaʹ manan dumba taʹan melikat

8Kaʹ dale ina un palai laki diaʹ ngelineʹ kaʹ lasan tahaʹ usun lepoʹ, manan pakan nte ngahu. 9Belekaʹ kenai ca melikat Tuhan luhaʹ kata ida, peging serema Tuhan iaʹ ngedema pipa ida. Ina ukoʹ de tai bisau laleʹ tekaʹ de. 10Di lareʹ dau melikat ina neng ida: “Ayen ncem bisau, kenai heʹ ngkin denga tiga mikem ini, iaʹ ke ngkin bangen bioʹ me mung kelunan ʹo. 11Alem ini ne, kenai Laki iaʹ Keniga Udip kem. Lepa un ia nai pempet kaʹ dalem lepoʹ Daut. Ia lete Keristus, Tuhan. 12Un tedanaʹ a iaʹ ikem tisen: ikem ke taʹan anak ina un bino keluma, meken dalem tahan sapi.”

13Dalau ina beliʹau kadoʹ le kenai melikat Tuhan cen surga nai pit melikat iaʹ ading nai idai, mentung nte ngentau pempau Allah:

14“Serema peniga me Allah kedalem surga iaʹ atek mpau, ngan udip tadan kusun tanaʹ ini

me kelunan diaʹ alaʹ peniga cen Tuhan Allah.”

15Uʹo ketai melikat dina uleʹ kaʹ surga, un dau diaʹ manan dumba dina neng ida selepeʹ: “Tai ne ilu kaʹ Bitlahim, naʹat iaʹ lepa dau nuyan ina, iaʹ Tuhan badaʹ milu ini.”

16Pera pera ketai re, pa re taʹan Mariam de dua Yusup. Un anak bala ina meken dalem tahan sapi. 17Kenai diaʹ manan dumba dina taʹan anak ina. Dalau ina re badaʹ me Mariam de dua Yusup dau tiraʹ melikat neng anak ini. 18Mung dulu diaʹ tisen dau tiraʹ diaʹ manan dumba dina, muʹo tekaʹ tawai re kenahan dau re. 19Kun Mariam pedemun ketoʹ dau tiraʹ ina, mentung nge pekimet tekaʹ sen ne. 20Tai diaʹ manan dumba dina uleʹ, mentung nte ngentau pempau Allah neng ketoʹ iaʹ ida ban kenahan ngan taʹan ina are, moʹ atek lan koʹ baʹan dau iaʹ melikat ban badaʹ mida are.

Uyan ngadan Yesus

21Neng ke aya tau ue, dulu uyan adet sunat me anak ina. Yesus, ngadan ne kuʹun nte. Ina ngadan iaʹ melikat ban naʹ mia kena ha kenai ngeluʹung kedalem batek ueʹ e are.

Yusup ngan Mariam ngkin Yesus kaʹ Umaʹ Palan Allah

22Tai sukung ne tau Yusup ngan Mariam ke ti puyan adet buheʹ bayaʹ Katuk Adet Musa ina. Ketai re dua ngkin anak ina abeʹ kaʹ lepoʹ Yerusalim, ubaʹ ke badaʹ ia me Tuhan. 23Moʹ pekini dau surat Katuk Adet Tuhan: “Ketoʹ diaʹ ban un anak laki anak ading nte, tekep de mencai ida me Tuhan.” 24Un pelaʹa seʹ de dua ubaʹ ke naʹ pengencai bayaʹ ban Katuk Adet Tuhan iaʹ pekini dau: “Ngkin dua re sui lepoʹ – tau pepeto. Buk ke are un, ngkin dua re sui garaʹ pepeto.”

25Dalem lepoʹ Yerusalim ne, un ca laki ngadan ne Simiun. Ca laki iaʹ teneng ngan temek bayaʹ Adet Allah, mentung nge mengaʹ kenai iaʹ Keniga Udip lepoʹ Israil. Un Berua Buheʹ neng ia. 26Berua Buheʹ ina iaʹ nugen badaʹ me Simiun, abeʹ dau ue ke tai matai buk ke abeʹ un awai ke taʹan Keristus, iaʹ man pungu keniga udip, iaʹ Tuhan Allah ban patek ke naʹ idai. 27Tai kun Simiun kedalem Umaʹ Palan Allah, moʹ Berua Tuhan ban pekaseng ia. Dalau ina kenai amai ngan ueʹ Yesus ne ngkin anak iʹut ina kaʹ Umaʹ Palan, moʹ de pekimet ke ngadet bayaʹ Katuk Adet. 28Kun Simiun alaʹ anak ina, penco ho nyekapu ia, mentung nge nyuaʹ tiga saheʹ palaʹ Allah, un dau ue:

29“Ahaʹ Tuhan Allah, naʹkini palup ne tiraʹ,

iaʹ ikoʹ ban petuket makeʹ idai.

Tiga hoʹ cuk ulaʹ koʹ ini tai uleʹ palaʹ udip tadan.

30Moʹ mata heʹ tengen lepa taʹan Laki iaʹ

Keniga Udip Kelunan, ban cen ikoʹ.

31Ikoʹ iaʹ ban petenup ia me dulu mung,

32ca dema iaʹ ke ngedema janan udip koʹ,

palaʹ dulu diaʹ tahaʹ awang lepoʹ Israil.

Ngan ia ke naʹ serema peniga hoʹ,

palaʹ ida diaʹ anun ncoʹ, lepoʹ Israil.” Pekina ne dau Simiun.

33Salam ne tekaʹ amai ngan ueʹ anak ina kenahan dau Simiun neng ia. 34Penco Simiun naʹ peniga mida dua. Un dau ue neng Mariam ueʹ anak ina: “Allah iaʹ ban nengangan naʹ anak ini, apan ne ke nasaʹ palai lepoʹ Israil, ngan kadoʹ pe diaʹ ia ke pudip puʹo. Ngan ia ca tedanaʹ cen Allah. Kadoʹ dulu ke nyakat dau ue ʹo, 35idi ie nai luhaʹ iaʹ suhuk dalem kimet de. Ngan ca penaru ke nai palaʹ ikoʹ ʹo Mariam, koʹ baʹan ca bahing lerip iaʹ ke nyuhat penawai hoʹ ʹo.” Pekina ne dau Simiun.

36Un ca pegawa leto, ngadan ne Ana anak Panuil cen lepoʹ Asir. Ia ca leto iaʹ kaya laleʹ, iaʹ ban pepeto pengajan tujoʹ uman. 37Uʹo ina leto balu ne ia, pa aya puloʹ pat uman. Nyahut balu Ana ina un mecin Umaʹ Palan Allah ne. Ngahu ngan naʹ tau pe ia nyelama palaʹ Allah mentung lemalan abeʹ un uman ngan lemameʹ. 38Lepa Simiun pisiu ngan Yusup de dua, dalau ina kenai Ana badaʹ tiga saheʹ e palaʹ Allah. Penco ho badaʹ anak ina palaʹ mung dulu diaʹ mengaʹ kenai Allah ke nakau lepoʹ Yerusalim cen keta re.

Tai re uleʹ kaʹ lepoʹ Nasarit

39Lepa Yusup de dua Mariam pesukung puyan iaʹ tekep bayaʹ katuk Adet Tuhan, tai re uleʹ ne kaʹ tanaʹ Galilia kaʹ lepoʹ de, kaʹ Nasarit te. 40Nai bioʹ ne anak ina, mentung tai pali ne usa ha. Tai un penisen ne ia ngan tudi pekimet. Luhaʹ seʹ sio Allah neng ia.

Dalau demanai dumit Yesus, tai ie dalem Umaʹ Palan Allah

41Singket uman te ueʹ Yesus ngan amai ie tai kaʹ lepoʹ Yerusalim tegoʹ un adet bioʹ Paska, ina adet Menting Patai. 42Dalau udip Yesus puloʹ dua uman udip pe, tai re telu bayaʹ kelayan adet de neng adet Paska ina. 43Lepa adet bioʹ ina, tai kun ueʹ e ida dua amai ie uleʹ nuʹo. Abeʹ de dua tisen ban Yesus, anak ina, ngelineʹ kaʹ Yerusalim. 44Moʹ de kuma Yesus ke un neng ahang dulu diaʹ tai uleʹ serengan ida dina. Tai re masat utung tau ina. Uʹo ina le tai re mita ia neng ahang ida panak de ngan tuyang nte ngalang janan. 45Moʹ de are petegoʹ ngan ne, ina ukoʹ de dua tai mita ia ngeliwet kaʹ lepoʹ Yerusalim te laʹa.

46Neng iaʹ ketelu tau ue, ina le ida petegoʹ ngan ne dalem Umaʹ Palan Allah. Idi diseʹ e madung neng ahang diaʹ guru lepoʹ Yahudi, ngeringa dau re pipa tiraʹ, ngan mentung nge lemutu ida. 47Ketoʹ dulu diaʹ ngeringa dau ue kina, tai meba ne ida kuʹun dau penisen ne, ngan dau ue mipa. 48Salam tekaʹ ueʹ e ngan amai ie taʹan ia kina. Penco dau ueʹ e pisiu ia: “Anak keʹ, inu tuman pekini puyan ncoʹ neng ameʹ dua tupe? Miat kaʹ tai meʹ dua amai hoʹ mita ikoʹ.”

49Un dau Yesus neng ida dua: “Moʹ inu hem nai mita akeʹ tupe? Abeʹ kem ban tisen tekep keʹ un dalem amin Amai heʹ?” 50Abeʹ de dua tisen dau sen isiu ue ne.

51Kenai Yesus uleʹ ne tugung ida dua, nai kaʹ lepoʹ Nasarit. Kina ha temek diseʹ mudip bayaʹ dau isiu ueʹ e ngan amai ie. Ketoʹ ban puyan ina are, ueʹ e pedemun dalem penawai ie. 52Kenai Yesus bioʹ, tai tudi kuʹo ke ia pekimet. Keno kenai luhaʹ diseʹ Allah ubaʹ neng ia, pekina pe diseʹ dulu neng ia.

Currently Selected:

LUKAS 2: KNT

Highlight

Copy