LUKAS 1

Penena isiu

1Surat katu me Tiupilus, paren meʹ:

Kadoʹ dulu ban nyurat pa mpi penisen nte, neng puyan iaʹ ban nuyan lan neng ahang ilu. 2Lepa ne ida nyurat te koʹ baʹan dau iaʹ dulu nai badaʹ milu are. Moʹ diaʹ badaʹ a dina, lepa ne ida taʹan puyan Yesus man mata re tengen, dina, lepa ne ida taʹan puyan Yesus man mata re tengen, cen penading nge. Ida lete diaʹ ban penco katuk ina. 3Ahaʹ Tiupilus, lepa ne akeʹ nyituk ngetisen mung puyan dina, pa tai heʹ tisen ne cen penading nte. Ina ukoʹ keʹ ubaʹ nyurat te mikoʹ ngan tepuʹun le dau tai ie. 4Idi hoʹ tai tisen sen ne iaʹ lan dalem mung katuk diaʹ ban dulu badaʹ mikoʹ idai are.

Neng puyan kenai Yaya Guru Batis pempet

5Dalau udip Laja Herudis, paren tanaʹ Yudia, un ca laki diaʹ detaʹu, ngadan ne Sakaria, iaʹ ban cen mpun Abia. Un ngadan leto ho Ilisabet. Ia ne ban cen mela diaʹ detaʹu lete. 6Un nte dua dina kuaʹ teneng puyan pengudip de kata Allah. Tudep lan seʹ de dua bayaʹ mung katuk ukum ngan adet Tuhan. 7Un ʹo abeʹ de dua un anak, moʹ Ilisabet ne lua, un pelaʹa kaya laleʹ ne ida dua.

8Un ca tau ue Sakaria ngkang gayeng detaʹu, iaʹ ida ngelayan uyan singket tau ne. 9Un adet diaʹ detaʹu dina, ida pegan ti tenung lemileʹ kelunan. Bayaʹ adet ina Sakaria iaʹ ban sihoʹ tenung tau ina. Ina ukoʹ Sakaria tai nutung lisan kemanyan kaʹ padung pengencai dalem Umaʹ Palan Allah. 10Kadoʹ dulu pempun sebayang tahaʹ awang, dalau Sakaria nutung lisan kemanyan ina. 11Belekaʹ kenai ca usa melikat Tuhan kata Sakaria, nekejeng tahaʹ taʹu neng padung pengencai, iaʹ ukoʹ o nutung kemanyan ina. 12Kecet ngan bisau tekaʹ Sakaria taʹan ia. 13Di lareʹ un dau melikat ina neng ia: “Ayen bisau Sakaria, moʹ lepa ne Allah kenahan dau temameʹ koʹ. Un leto hoʹ Ilisabet ne, ke nganak ke ca anak laki mikoʹ ʹo. Tiga hoʹ uyan ngadan ne Yaya ʹo. 14Ia iaʹ ke pebangan tawai hem, ngan ngkin tiga saheʹ mikem dua. Pekina pe kadoʹ dulu diaʹ ke bangen neng kenai ie luhaʹ ʹo. 15Ia ke nuyan ca kelunan iaʹ bioʹ dalem penaʹat Tuhan ʹo. Ngan nyahut te ke nisep telang anggur ngan jakan nuʹo. Ia ʹo sangan kuʹun Berua Buheʹ cen tading iʹut te. 16Ngan kadoʹ lepoʹ Israil ia ke ngkin uleʹ palaʹ Tuhan, ina Tuhan Allah re. 17Ia ke tai nekena badaʹ tiraʹ Allah ngan sanget ngan tempa dau ue, koʹ baʹan puyan pegawa Ilia cen naʹaʹ are. Ia ke payo kimet diaʹ amai ngan diaʹ anak neng ca le kimet laʹa. Ia ke pupa diaʹ muau, cuk ida ngeliwet alaʹ kimet de mayo diaʹ teneng. Ia ke cuk diaʹ anun Tuhan ke petenup mengaʹ ke nai Tuhan ʹo.”

18Un dau Sakaria neng melikat ina: “Kumpin nceʹ ke ngetisen puyan ini lan ʹo? Kaya ne akeʹ, ngan leto heʹ kaya pe ia.”

19Un dau melikat ina mipa ia: “Akeʹ ini Gibrail. Akeʹ iaʹ nekejeng nyeripa Allah, ngan akeʹ iaʹ Allah cuk nai pisiu ikoʹ, ngan nai badaʹ denga puyan tiga ini. 20Un sepuʹo abeʹ koʹ ngelan dau tiraʹ keʹ. Cen naʹkini, ameng ne ikoʹ ʹo, pa ketai ie palup dau tiraʹ iaʹ akeʹ ban badaʹ mikoʹ ʹo re. Mung tiraʹ keʹ ne tai palup lete, tegoʹ o ketai abeʹ neng tuket te ʹo.”

21Un dalau ina, dulu diaʹ kadoʹ dina pekena kenai Sakaria kawang. Salam tekaʹ de pekimet, moʹ majan laleʹ ne ia dalem Umaʹ Palan ina. 22Nai ie kawang, abeʹ e mencam ke pisiu ngan nte ne laʹa. Cen ina ne tekaʹ de tisen ban un ca penaʹat Sakaria kedalem Umaʹ Palan ina. Kun ne pekata pekata man ujoʹ o, moʹ ban ameng ne ia.

23Uʹo ho pesukung toʹ majan ne neng gayeng nge dalem Umaʹ Palan ina, tai kun Sakaria uleʹ ne kaʹ amin nte nuʹo. 24Abeʹ e majan uʹo ina, lemaleʹ ne leto ho Ilisabet ne. Dalem lema bulan majan ne are tai puke cen amin nte. 25Un dau Ilisabet: “Pekini ne ban puyan Tuhan lesau akeʹ, moʹ o ke sau penyaʹe heʹ neng dulu.”

Gibrail nekena badaʹ kenai Yesus pempet

26Tai ie sihoʹ nem bulan majan temaleʹ Ilisabet ne, kun Tuhan Allah cuk melikat Gibrail tai neng ca lepoʹ kaʹ tanaʹ Galilia, ngadan lepoʹ ina Nasarit. 27Tai kun ne badaʹ tiraʹ palaʹ ca dikiʹit leto, ngadan ne Mariam. Un ca laki, ngadan ne Yusup, iaʹ ban mela cen Laja Daut, ia iaʹ ban matep dekiʹit leto ina. 28Tai kun melikat ina pisiu ia, kun dau ue: “Tadan ne tekaʹ koʹ, moʹ Tuhan un ngan ncoʹ, ngan bioʹ ban peniga ha mikoʹ.”

29Bisau tekaʹ Mariam kenahan dau melikat ina, mentung nge miat tekaʹ pekimet dau sen tiraʹ ina. 30Un dau melikat ina neng Mariam: “Ayen ncoʹ bisau diseʹ Mariam, moʹ Allah iaʹ ban malaʹ ikoʹ. 31Ke lemaleʹ koʹ ʹo, ngan un ne ʹo ca anak laki. Yesus ngadan ne kuʹun ncoʹ ʹo. 32Ia atek ke bioʹ ʹo, ngan dulu ke naʹ ia Anak Allah iaʹ Atek Mpau. Moʹ Tuhan Allah le ke uyan ia ca laja koʹ baʹan tepun ne Daut cen naʹaʹ are. 33Ia ketai nuyan laja neng diaʹ ban mela Yakup, pa abeʹ bayaʹ ʹo. Nyahut pengaren ne ketai kuʹo.”

34Un dau Mariam neng melikat ina: “Kumpin puyan ini ketai nuyan ʹo tupe, moʹ abeʹ keʹ un laki lepe?”

35Un dau melikat mipa ia: “Berua Buheʹ iaʹ kenai mesun neng ikoʹ, ngan penyukat Allah ke nyaʹung ngelidung ikoʹ ʹo. Ina ukoʹ anak iaʹ buheʹ ina, dulu ke naʹ Anak Allah ha ʹo. 36Ikoʹ pekimet cenganak sak koʹ Ilisabet, iaʹ dulu naʹ lua idai. Naʹ pe ia kaya laleʹ lene, naʹkini nem bulan pengajan ne lemaleʹ. 37Uban neng Allah ketoʹ isiu abeʹ un iaʹ are palup.”

38Un dau Mariam: “Ahaʹ lan ne, ban ca kelunan ulaʹ Tuhan pe akeʹ ne. Tiga pe ia nuyan pekina koʹ baʹan dau hoʹ makeʹ ne.” Uʹo ina tai melikat ina mecin ia.

Tai Mariam menoʹ Ilisabet

39Abeʹ e majan uʹo ina, kun Mariam pedepa inu ue, ngan pera ketai ie masat bayaʹ janan ngalang mudung, pa abeʹ ca lepoʹ kaʹ tanaʹ Yudia. 40Penco tai ie kaʹ amin Sakaria, ngan badaʹ tiga saheʹ e me Ilisabet. 41Dalau Ilisabet kenahan dau isiu Mariam nyelama ia, belekaʹ anak ina nepejuk dalem batek ke. Dalau ina sangan ne Ilisabet kuʹun Berua Buheʹ. 42Bioʹ dau ue kuma neng Mariam: “Ikoʹ ne iaʹ ban sihoʹ peniga iaʹ bioʹ neng ahang ilu leto, ngan anak iaʹ ikoʹ ke nganak ina ʹo, ia iaʹ un peniga iaʹ bioʹ ina lete. 43Ca puyan iaʹ bioʹ tegoʹ akeʹ ne ini, moʹ ueʹ Tuhan nceʹ iaʹ nai naʹat akeʹ. 44Tegoʹ keʹ kenahan dau selama hoʹ are, lan lan ne anak ini nepejuk dalem batek keʹ moʹ o bangen. 45Bioʹ saheʹ koʹ Mariam, moʹ koʹ ban ngelan tiraʹ Tuhan iaʹ nai palaʹ ikoʹ, iaʹ ban palup ini.”

Dau kentau Mariam

46Kun dau Mariam:

“Bangen tekaʹ kimet ceʹ pempau Tuhan,

47bangen tekaʹ tawai heʹ kuʹun Allah iaʹ Keniga Udip keʹ,

48moʹ Allah petawai ulaʹ a iaʹ libaʹ ini.

Cen naʹkini nuʹo mung dulu ke kuma akeʹ bangen,

49moʹ Allah iaʹ bioʹ kuasa ban uyan puyan iaʹ bioʹ neng akeʹ.

Atek buheʹ ne ngadan ne.

50Luhaʹ ban lesau ue neng mung kelunan diaʹ takut ia, singket sun udip ne.

51Man pengali ie, ia nekeli lengen ne,

ia iaʹ ban lepa lemasi kelunan diaʹ mpau kimet, ngan ngasing puyan peseket de.

52Ia pelaboʹ kelunan paren bioʹ cen adan pengaren nte, ia mejung diaʹ libaʹ kimet.

53Ia pebeso kelunan diaʹ laʹu man peniga ha,

ngan ia cuk dulu diaʹ kayaʹ tai uleʹ kelangan.

54Ia kanan dau tuket te ngan tepun le,

ngan nai mepo ida diaʹ panyen ne, Israil dina.

55Lemuto ho nawai ke lesau Ibrahim,

ngan diaʹ mela ha pabeʹ bayaʹ ʹo.” Pekina dau Mariam.

56Masaʹ pe telu bulan pengajan Mariam mukoʹ ngan Ilisabet kaʹ amin nte. Uʹo ina le ketai ie uleʹ.

Puyan kenai Yaya Guru Batis pempet

57Tai sukung ne bulan ukoʹ Ilisabet ke mempet anak ke, sulo ho muga ca anak laki. 58Mung dulu dalem lepoʹ ina, ngan diaʹ cenganak ke, kenahan dau denga ban bioʹ pengelesau Tuhan neng ia. Tai kun nte naʹat Ilisabet, penco re mung bangen ngan ne.

59Neng iaʹ ke aya tau anak ina, kenai dulu ke uyan adet sunat mia. Kun nte ke naʹ ngadan Sakaria mia, bayaʹ ban ngadan amai ie. 60Un dau ueʹ e neng ida: “Abeʹ e pekina, moʹ Yaya iaʹ ke ngadan ne ʹo.”

61Un dau re neng ia pelaʹa: “Abeʹ un ngadan ca cenganak kem ne iaʹ pekina dau.” 62Uʹo ina, sulo re pekata me Sakaria, lemutu inu ngadan ia ubaʹ ke naʹ anak ke ne.

63Kun Sakaria nyat ca utun uʹu, penco ho nyurat kidi. Un dau ue: “Ngadan ne Yaya.” Salam ne dulu neng ia. 64Dalau ina lete Sakaria mencam pisiu ne laʹa ʹo, sulo ketai ie pempau Allah. 65Tai takut ne lepoʹ ina. Ngan puyan ina tai denga nipo lepoʹ ngalang dale mudung tanaʹ Yudia ne. 66Mung dulu diaʹ kenahan dau denga ina, ida pekimet dalem tawai re, ngan lemutu neng ida selepeʹ: “Kumpin ketai ubo anak ini ʹo taʹin?” Moʹ luhaʹ lan seʹ ban puyan nyingan Tuhan neng ia.

Dau Sakaria badaʹ dau Allah

67Un Sakaria, amai Yaya ne, sangan ne kuʹun Berua Buheʹ, penco ho badaʹ dau Allah, kun dau ue:

68“Tiga le pempau Tuhan iaʹ Allah lepoʹ Israil,

moʹ o ban nai mepo diaʹ anun ne, ngan nakau ida cen keta re.

69Allah ban naʹ milu ca laki iaʹ pali, iaʹ Keniga udip le.

Ia ban mela cen Daut iaʹ panyen ne are.

70Moʹ pekini dau diaʹ pegawa Allah diaʹ buheʹ,

penco dau ue cen naʹaʹ are.

71Kun dau re: Allah patek ke pudip ilu cen ketoʹ puyan ayau le,

pekina pe cen penyukat mung diaʹ miʹi neng ilu.

72Cen kena ne ia badaʹ a me tepun le, dau ue ke peluhaʹ pengelesau ue mida,

ngan kanan tiraʹ tuket te iaʹ buheʹ.

73Ia patek tiraʹ ngan lan dau ue me tepun le

74Ibrahim are, ngan mudoʹ dau ue badaʹ ia ke nakau ilu cen ujoʹ ayau le,

ngan pedayo ilu pegayeng mia, abeʹ un mentam tekaʹ laʹa,

75apan le tai buheʹ ngan teneng nyeripa ia utung udip le.

76Ahaʹ anak keʹ Yaya, dulu ke pisiu ikoʹ ca pegawa Allah. Allah iaʹ Atek Mpau.

Ikoʹ iaʹ ke tai nekena Tuhan, ke petenup janan

77mia, ngan badaʹ me dulu diaʹ anun Allah,

dau ue ke pudip ida kuʹun puyan ne iaʹ ke sau penyalaʹ de.

78Moʹ bioʹ lesau, ngan denaʹ saheʹ Tuhan Allah le.

Iaʹ ke peluhaʹ milu udip iaʹ ke pudip ilu, koʹ baʹan kenai dema tau nyelat are.

79Cen surga ha ngedema mung dulu diaʹ mudip dalau ntem, diaʹ pencit kuʹun patai.

Ia ke peteneng jeng taket le bayaʹ janan udip tadan.” Pekina ne dau Sakaria.

80Kenai anak ina bioʹ, ngan pali ne seʹ usa ha, pekina pe diseʹ kimet te. Tai ie mudip kaʹ tanaʹ apau iaʹ lenga, pa ketai ie sihoʹ tau ue kenai luhaʹ palaʹ lepoʹ Israil.

Currently Selected:

LUKAS 1: KNT

Highlight

Copy