Awˬ hkuiˉ puiˍ ve li‸ 45

Yawˇ Yoˇseh‸ hpeh‸ ve awˬ lawn awˬ viˉ hui hta‸ hpeu‸ maˍ piˇ ve

1Chi teˇ pawˆ Yoˇseh‸ lehˬ, yawˇ ve nyi ma hta‸ yuˬ tiˍ taˍ maˇ gʼa ve pa taw, yawˇ ve awˬ ceˬ teˇ hpaˍ hta‸ tawˆ kʼai tcuh ve yoˬ. Yawˇ Yoˇseh‸ hpeh‸ ve awˬ lawn yawˇ ve awˬ viˉ awˬ nyi teˇ hpaˍ hta‸ hto piˇ chehˇ htaˇ, yawˇ geh awˬ nu ve chaw teˇ gʼaˇ ka‸ maˇ chehˇ taˍ. 2Yawˇ awˬ hkawˇ bvuhˬ chaweh kuˬ hawˬ ve pa taw, Eˇjiˇtu‸ chaw teˇ hpaˍ gʼa kaˇ leh jawˇmawˇ hta‸ ca hto piˇ ve yoˬ. 3Oˇ htaˇ, Yoˇseh‸ yawˇ ve awˬ viˉ paˍ teˇ hpaˍ hta‸ kʼoˆ piˇ ve, Ngaˬ lehˬ Yoˇseh‸ hpeh‸ ve yoˬ. Ngaˬ pa te‸ chehˇ sheˬ laˇ, teh‸ na nyi ve yoˬ. Yoˇseh‸ ve awˬ viˉ paˍ teˇ hpaˍ tawˇ oˇ ve hta‸ gʼa kaˇ ve teˇ yanˇ, kawˆ jaˇ leh te‸ chiˉ kʼaw‸ kʼoˆ maˇ haˆ ve yoˬ. 4Oˇ htaˇ, Yoˇseh‸ yawˇ ve awˬ viˉ paˍ teˇ hpaˍ hta‸, Ngaˬ awˬ paˇ neˇ lo jiˆ laˬ-o‸, teh‸ kʼoˆ piˇ ve teˇ yanˇ, yawˇ hui hkʼa peu-eˬ yawˇ awˬ paˇ lo jiˆ kʼai ve yoˬ. Yawˇ kʼoˆ ve, Ngaˬ lehˬ nawˬ hui Eˇjiˇtu‸ mvuhˇmiˬ lo hawˇ baˬ laˇ ve nawˬ hui ve awˬ nyi paˍ Yoˇseh‸ hpeh‸ ve yoˬ. 5Nawˬ hui ngaˬ hta‸ choˬ kaˬ lo hawˇ baˬ laˇ taˍ peuˬ ve pa taw, dawˇ haˍ hpeh‸ bawˬ ve nyi ma taˇ cawˬ piˇ. Gʼuiˬsha lehˬ, chaw yaˇ teˇ hpaˍ a sha‸ gʼa ponˬ tuˬ, nawˬ hui gʼuˇ suhˍ ngaˬ hta‸ choˬ kaˬ lo peu laˇ taˍ ve yoˬ. 6Mvuhˇmiˬ chi ve hkʼaw meu‸ lonˉ kaˆ lonˉ gaˬ la ve nyiˇ hkʼaw‸ ceh tiˉ gaˬ sheˬ ve yoˬ. Chaw teˇ gʼaˇ ka‸ muiˬ caˇ maˇ gʼa ve awˬ yanˇ ngaˇ hkʼaw‸ cawˬ sheˬ. 7Nawˬ hui ve awˬ ceuˬ awˬ hkʼaˇ teˇ hpaˍ, kʼaw‸ caˉ leh a sha‸ te‸ chehˇ hpeh‸ tuˬ, Gʼuiˬsha lehˬ nawˬ hui gʼuˇ suhˍ ngaˬ hta‸ choˬ kaˬ lo peu laˇ taˍ ve yoˬ. 8Chi hta‸ pa taw, ngaˬ hta‸ choˬ kaˬ lo peu laˇ ve lehˬ nawˬ hui maˇ heˆ. Gʼuiˬsha hpeh‸ ve yoˬ. Yawˇ lehˬ ngaˬ hta‸ uiˍ jaˇ ve a ma‸ lonˉ hpeh‸ la piˇ leh, Eˇjiˇtu‸ mvuhˇmiˬ hkʼa peu-eˬ awˬ hkʼoˆ ngaˬ hta‸ uˉ peunˍ tcuh laˇ ve yoˬ.

9Chi beu‸ ngaˬ pa geh haˆ haˆ kʼo‸-e leh, yawˇ ve yaˇ paˍ Yoˇseh‸ shanˍ feu laˇ ve tawˇ chi teˇ hpaˍ yawˇ hta‸ ca kʼaw‸ hto piˇ-oˆ. Gʼuiˬsha lehˬ, Eˇjiˇtu‸ mvuhˇmiˬ hkʼa peu-eˬ awˬ hkʼoˆ ngaˬ hta‸ uˉ peunˍ tcuh laˇ peuˬ. Awˬ yanˇ maˇ jiˆ leh ngaˬ geh haˆ ya‸ la-o. 10Nawˬ lehˬ Gawˍshenˍ teh‸ kʼoˆ ve chehˇ kuiˬ lo gʼa chehˇ tuˬ yoˬ. Nawˬ awˬ to, nawˬ ve yaˇ, nawˬ ve awˬ hawehˍ, nawˬ ve nuˇ, yawˬ leh nawˬ geh hkʼa cawˬ taˍ ve hkʼa peu-eˬ hta‸ yuˬ veu laˇ leh laˬ-o‸. 11Nawˬ oˇ kaˬ lo ca chehˇ la ve kʼo, ngaˬ nawˬ hta‸ nyi ha‸ shaˉ laˇ tuˬ yoˬ. Nawˬ hui meu‸ chehˇ kaˆ chehˇ ve hta‸ ngaˬ maˇ mawˬ gaˇ. Awˬ lawn kʼo, meu‸ jaˇ kaˆ jaˇ tuˬ ve awˬ yanˇ ngaˇ hkʼaw‸ cawˬ sheˬ, teh‸ kʼoˆ piˇ ve yoˬ.

12Ngaˬ awˬ to Yoˇseh‸ hpeh‸ leh nawˬ hui hta‸ tawˇ yaw laˇ chehˇ ve hta‸ nawˬ hui hkʼa peu-eˬ leh Beˍyaˍmenˍ htawˇ hkʼa tawˍ lehˆ gʼa mawˬ taˍ peuˬ ve yoˬ. 13Ngaˬ Eˇjiˇtu‸ mvuhˇmiˬ hkʼaw gʼa taˍ ve awˬ me‸ awˬ hponˇ hkʼaˬ ma uiˍ jaˇ ve leh, choˬ kaˬ lo nawˬ hui hkʼa gʼa mawˬ ve awˬ ceuˬ hkʼa peu-eˬ ngaˬ pa hta‸ kʼoˆ maˍ piˇ leh, yawˇ hta‸ choˬ kaˬ lo haˆ haˆ shiˍ veu laˇ-oˆ, teh‸ yawˇ hui hta‸ kʼoˆ piˇ ve yoˬ.

14Oˇ hkʼe kʼoˆ peuˬ hkʼaw‸ nawˉ, yawˇ ve awˬ nyi paˍ Beˍyaˍmenˍ hta‸ behˇ kʼuˉ taˍ leh hawˬ ve yoˬ. Beˍyaˍmenˍ htawˇ yawˇ hta‸ kʼaw‸ kʼuˉ taˍ leh hawˬ ve yoˬ. 15Yawˇ ve awˬ viˉ paˍ hkʼa peu-eˬ hta‸ htawˇ, yawˇ boˆ nu leh hawˬ ve yoˬ. Oˇ ve hkʼaw‸ nawˉ, yawˇ ve awˬ viˉ paˍ teˇ hpaˍ yawˇ geh na‸ uˉ te da‸ ve yoˬ.

16Yoˇseh‸ ve awˬ viˉ paˍ teˇ hpaˍ gaˬ la ve awˬ hkawˇ hta‸ jawˇmawˇ lonˉ gʼa kaˇ htaˇ, yawˇ leh yawˇ ve a ma‸ lonˉ hkʼa peu-eˬ ha lehˬ jaˇ ve yoˬ. 17Oˇ htaˇ jawˇmawˇ lonˉ awˬ to Yoˇseh‸ hta‸ kʼoˆ piˇ ve, Nawˬ viˉ paˍ teˇ hpaˍ hta‸ caˬ shiˍ doˆ pfuhˍ piˇ leh Hkaˍnanˍ mvuhˇmiˬ lo kʼaw‸ kʼo‸-e peu-o. 18Yawˇ hui ve awˬ pa leh yawˇ hui ve miˇ yaˇ hkʼa peu-eˬ ve hta‸ choˬ kaˬ lo shiˍ veu laˇ tcuh-o. Eˇjiˇtu‸ mvuhˇmiˬ hkʼaw cawˬ ve da‸ jaˇ ve chehˇ kuiˬ ngaˬ yawˇ hui hta‸ piˇ leh, yawˇ hui caˇ leuˉ dawˬ leuˉ hkʼa biˇ cawˬ tuˬ yoˬ. 19Yawˇ hui ve awˬ pa leh, yawˇ hui ve miˇ yaˇ teˇ hpaˍ ciˇ laˬ tuˬ ve Eˇjiˇtu‸ mvuhˇmiˬ hkʼaw cawˬ ve iˉ mvuhˇ lawˬ teˇ hpaˍ hta‸ htawˇ yuˬ kʼai tcuh-o. 20Yawˇ hui ve mawˇ jeˬ teˇ hpaˍ hta‸ gʼa baˬ taˉ ve htawˇ, nyi ma maˇ gʼa luˬ tuˬ kʼoˆ piˇ-oˆ. Awˬ lawn kʼo, Eˇjiˇtu‸ mvuhˇmiˬ hkʼaw cawˬ ve da‸ jaˇ ve chehˇ kuiˬ oˇ ve ngaˬ yawˇ hui hta‸ piˇ tuˬ yoˬ, teh‸ Yoˇseh‸ hta‸ kʼoˆ piˇ ve yoˬ.

21Yaˍkoˆ ve yaˇ teˇ hpaˍ lehˬ, yawˇ hui hta‸ kʼoˆ piˇ ve hkʼe na yuˬ leh te ve yoˬ. Jawˇmawˇ lonˉ kʼoˆ piˇ taˍ ve hkʼe, Yoˇseh‸ lehˬ yawˇ hui hta‸ iˉ mvuhˇ lawˬ teˇ hpaˍ piˇ leh, ya‸ kʼaw kʼaˉ lo caˇ kʼo‸-e tuˬ ve caˇ tuˬ teˇ hpaˍ hta‸ htawˇ piˇ kʼai ve yoˬ. 22Yawˇ hui teˇ gʼaˇ le le hta‸ veu‸ kʼaˇ awˬ suhˉ teˇ gʼaˇ teˇ hkʼoˆ piˇ ve yoˬ. Ya‸ hkʼaˇ, yawˇ lehˬ Beˍyaˍmenˍ hta‸ hpu 300 hteh‸ leh veu‸ kʼaˇ awˬ suhˉ ngaˇ hkʼoˆ piˇ ve yoˬ. 23Chi hkʼoˆ ka‸, yawˇ ve awˬ pa awˬ pon Eˇjiˇtu‸ mvuhˇmiˬ hkʼaw tawˆ ve da‸ jaˇ ve mawˇ teˇ hpaˍ, piˉ laˬ teˇ chi hkeh taˆ kʼo‸-e tcuh ve yoˬ. Yawˇ ya‸ la htaˇ ya‸ kʼaw kʼaˉ lo caˇ tuˬ awˬ pon caˬ shiˍ, hkaoˍmonˇ leh awˬ nu ve caˇ tuˬ teˇ hpaˍ piˉ laˬ teˇ chi hkeh taˆ kʼo‸-e tcuh ve yoˬ. 24Oˇ ve hkʼaw‸ nawˉ, ya‸ kʼaw kʼaˉ lo yawˇ hui maˇ gʼa ya‸ da‸ tuˬ hkʼa deh‸ maˍ piˇ leh kʼo‸-e tcuh ve yoˬ.

25Yawˇ hui Eˇjiˇtu‸ mvuhˇmiˬ hkʼaw tawˆ kʼai leh, yawˇ hui ve awˬ pa chehˇ kuiˬ Hkaˍnanˍ mvuhˇmiˬ lo kʼaw‸ gaˬ la ve yoˬ. 26Yoˇseh‸ lehˬ chi beuˬ hkʼa gaˬ te‸ chehˇ sheˬ leh, Eˇjiˇtu‸ mvuhˇmiˬ hkʼa peu-eˬ hta‸ uˉ peunˍ chehˇ ve awˬ lawn yawˇ hui ve awˬ pa hta‸ hto piˇ ve yoˬ. Yaˍkoˆ anˇ jaˇ leh yawˇ hui kʼoˆ piˇ ve tawˇ hta‸ maˇ yonˍ.

27Yawˇ hui lehˬ Yoˇseh‸ hkʼa kʼoˆ piˇ ve tawˇ hkʼa peu-eˬ yawˇ hta‸ kʼaw‸ hto piˇ ve yoˬ. Yawˇ hta‸ shiˍ laˬ tuˬ Yoˇseh‸ feu laˇ ve iˉ mvuhˇ lawˬ teˇ hpaˍ hta‸ yawˇ gʼa mawˬ ve teˇ yanˇ, yawˇ ve nyi ma kʼaw‸ dawˇ sha la ve yoˬ. 28Oˇ htaˇ Yaˍkoˆ kʼoˆ ve, Ngaˬ yaˇ paˍ Yoˇseh‸ a sha‸ te‸ chehˇ sheˬ ve yoˬ. Ngaˬ maˇ suh sheˬ htaˇ, yawˇ hta‸ ca mawˬ da‸ taˉ shaˍ, teh‸ kʼoˆ ve yoˬ.

Currently Selected:

Awˬ hkuiˉ puiˍ ve li‸ 45: LHBE

Highlight

Copy