Awˬ hkuiˉ puiˍ ve li‸ 46

Yaˍkoˆ Yoˇseh‸ geh kʼai ve

1Oˇ ve hkʼaw‸ nawˉ Yaˍkoˆ lehˬ, yawˇ geh hkʼa cawˬ taˍ ve mawˇ jeˬ hkʼa peu-eˬ hta‸ yuˬ leh tawˆ kʼai ve yoˬ. Beˍraˍsheˍbaˆ lo gaˬ ve teˇ yanˇ, yawˇ tuˉ tanˇ kuiˬ teˇ maˬ te leh, yawˇ awˬ pa Iˉcaˆ ve Gʼuiˬsha hta‸ tuˉ tanˇ piˇ ve yoˬ. 2Mvuhˇ hpeu‸ htaˇ Gʼuiˬsha yawˇ geh laˬ leh, Yaˍkoˆ-oˬ, Yaˍkoˆ-oˬ, teh‸ kuˬ ve yoˬ.

Yawˇ lehˬ, Ngaˬ choˬ kaˬ chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.

3Oˇ htaˇ Gʼuiˬsha kʼoˆ ve, Ngaˬ lehˬ nawˬ pa ve Gʼuiˬsha hpeh‸ ve yoˬ. Eˇjiˇtu‸ mvuhˇmiˬ lo gʼa kʼai tuˬ ve hta‸ nawˬ taˇ kawˆ. Awˬ lawn kʼo, oˇ kaˬ lo ngaˬ nawˬ hta‸ chaw ceuˬ lonˉ teˇ ceuˬ hpeh‸ la piˇ tuˬ yoˬ. 4Ngaˬ lehˬ nawˬ geh teˇ geh Eˇjiˇtu‸ mvuhˇmiˬ lo kʼai leh, mvuhˇmiˬ chi ve hkʼaw ngaˬ nawˬ hta‸ teˇ pawˆ kʼaw‸ shiˍ hkʼaw‸ veu laˇ tuˬ yoˬ. Nawˬ suh-e htaˇ, Yoˇseh‸ nawˬ paˇ lo chehˇ taˍ tuˬ yoˬ, teh‸ yawˇ hta‸ kʼoˆ piˇ ve yoˬ.

5Oˇ ve hkʼaw‸ nawˉ, Yaˍkoˆ Beˍraˍsheˍbaˆ hkʼaw tawˆ kʼai ve yoˬ. Yawˇ ve yaˇ teˇ hpaˍ lehˬ, yawˇ hui ve awˬ pa leh yawˇ hui ve miˇ yaˇ teˇ hpaˍ hta‸ Eˇjiˇtu‸ jawˇmawˇ feu laˇ ve iˉ mvuhˇ lawˬ teˇ hpaˍ hkʼoˆ ciˇ tcuh ve yoˬ. 6Yawˇ hui Hkaˍnanˍ mvuhˇmiˬ hkʼaw ca gʼa taˍ ve ceˇ teˇ hpaˍ leh hpu shi mawˇ jeˬ teˇ hpaˍ hta‸ yuˬ leh Eˇjiˇtu‸ mvuhˇmiˬ lo ya‸ la ve yoˬ. 7Yaˍkoˆ lehˬ, yawˇ ve awˬ ceuˬ awˬ hkʼaˇ hkʼa peu-eˬ ve hta‸ shiˍ leh Eˇjiˇtu‸ mvuhˇmiˬ lo ya‸ la ve yoˬ.

8Eˇjiˇtu‸ mvuhˇmiˬ lo gaˬ la ve Yaˍkoˆ ve yaˇ teˇ hpaˍ lehˬ, yawˇ ve yaˇ paˍ uiˍ Ruˉbenˍ leh, 9Ruˉbenˍ ve yaˇ, Haˍmoˆ, Hpeˍluˆ, Heˍzaˍronˍ leh Kaˍmiˆ, 10Suˉmonˍ ve yaˇ Yeˍmoeˍlaˆ, Yaˍmenˍ, Awˇhaˆ, Yaˍhkenˍ, Zawˇhaˍ lehˬ Hkaˍnaˍniˆ yaˇ miˇ geh paw la ve yaˇ Sawˇluˆ, 11Leˍviˆ ve yaˇ Geˍraˍsonˍ, Kawˇhaˆ, leh Meˍraˍriˆ, 12Yuˇda‸ ve yaˇ Eˇraˆ, Awˇnanˍ, Sheˍlaˆ, Hpaˍrehˆ, Zeˍraˆ, (Yuˇda‸ ve yaˇ Eˇraˆ leh Awˇnanˍ hui lehˬ Hkaˍnanˍ mvuhˇmiˬ hkʼaw suh taˉ ve yoˬ) Hpaˍrehˆ ve yaˇ lehˬ Heˍzaˍronˍ leh Haˍmuˇlaˆ hui hpeh‸ ve yoˬ. 13Iˉsaˍhkaˍ ve yaˇ lehˬ Tawˇlaˆ, Hpuˇ-aˍ, Yawˇbaˆ, Shiˉmaˍronˍ, 14Zaˍbuˆlonˍ ve yaˇ Saˍrehˇ, Eˇlonˍ leh Yaˍleˍ, 15Chaw chi teˇ hpaˍ lehˬ, Meˍsoˇpoˇtaˍmiˆ mvuhˇmiˬ hkʼaw Leˉaˍ Yaˍkoˆ awˬ pon paw la piˇ taˍ ve yaˇ teˇ hpaˍ hpeh‸ ve yoˬ. Chi awˬ hkʼoˆ, yawˇ geh lo Diˉnaˆ teh‸ kʼoˆ ve yaˇ miˇ teˇ gʼaˇ htawˇ cawˬ sheˬ ve yoˬ. Leˉ-aˍ ve awˬ ceuˬ awˬ hkʼaˇ hkʼa peu-eˬ 33 gʼaˇ cawˬ ve yoˬ.

16Gaˆ ve yaˇ teˇ hpaˍ lehˬ, Ziˆhpiˍonˍ, Haˍgiˆ, Shuˇniˆ, Eˇzaˍbonˍ, Eˇriˆ, Aˍroˇdiˆ leh Aˍreˍliˆ hui hpeh‸ ve yoˬ. 17Aˍshaˍ ve yaˇ teˇ hpaˍ lehˬ, Yiˆmaˍnaˆ, Eˇsaˍvaˍ, Iˉsiˍviˍ, Beˍriˆyaˆ leh yawˇ hui ve awˬ nyi ma Seˍraˆ hui hpeh‸ ve yoˬ. Beˍriˆyaˇ ve yaˇ teˇ hpaˍ lehˬ, Heˍbaˍ leh Maˍlaˍhkeˍlaˆ hpeh‸ ve yoˬ. 18Chaw chi teˇ hpaˍ lehˬ, Laˍbanˍ yawˇ ve yaˇ miˇ Leˍaˍ hta‸ piˇ ve awˬ ceˬ ma Ziˆla paˆ ve awˬ ceuˬ awˬ hkʼaˇ teˇ hpaˍ hpeh‸ leh, yawˇ hui hkʼa peu-eˬ teˇ chi hkaw‸ gʼaˇ cawˬ ve yoˬ.

19Yaˍkoˆ miˇ ma Raˍhkeˍlaˆ ve yaˇ teˇ hpaˍ lehˬ, Yoˇseh‸ leh Beˍyaˍmenˍ hpeh‸ ve yoˬ. 20Eˇjiˇtu‸ mvuhˇmiˬ Heˍliˍpawˇliˆ venˇ yaˇ paw hkuˇ Pawˇtiˆhpeˍraˆ ve yaˇ miˇ Aˍtaˍnaˆ lehˬ, Yoˇseh‸ awˬ pon Maˍnaˍseˍ leh Eˇhpaˍrenˍ teh‸ kʼoˆ ve yaˇ paˍ nyiˇ gʼaˇ paw la piˇ taˍ ve yoˬ. 21Beˍyaˍmenˍ ve yaˇ teˇ hpaˍ lehˬ, Beˍlaˆ, Beˍhkaˍ, Aˍsaˍheˍlaˆ, Geˍraˆ, Neˍmanˍ, Eˇhiˆ, Roˇshaˆ, Muˆpenˍ, Huˆpenˍ leh Aˍraˍdaˆ hui hpeh‸ ve yoˬ. 22Chaw chi teˇ chi awˇ gʼaˇ lehˬ, Raˍhkeˍlaˆ ve awˬ ceuˬ awˬ hkʼaˇ teˇ hpaˍ hpeh‸ ve yoˬ.

23-24Danˍ ve yaˇ lehˬ, Huˆshenˍ hpeh‸ ve yoˬ. Naˍtaˍliˆ ve yaˇ lehˬ, Yaˍzeˍlaˆ, Guˇ niˆ, Yeˍzaˍ leh Shiˆlenˍ hui hpeh‸ ve yoˬ. 25Chaw chi suhˍ gʼaˇ lehˬ, Laˍbanˍ yawˇ ve yaˇ miˇ Raˍhkeˍlaˆ hta‸ piˇ taˍ ve awˬ ceˬ ma Biˇlaˍhaˍ ve awˬ ceuˬ awˬ hkʼaˇ teˇ hpaˍ hpeh‸ ve yoˬ.

26Yaˍkoˆ ve awˬ hkuiˇ ma teˇ hpaˍ hta‸ maˇ shawˍ leh, yawˇ geh teˇ geh Eˇjiˇtu‸ mvuhˇmiˬ lo ya‸ la taˍ ve chaw hkʼa peu-eˬ hkaw‸ chi hkaw‸ gʼaˇ cawˬ ve yoˬ. 27Eˇjiˇtu‸ mvuhˇmiˬ hkʼaw, Yoˇseh‸ ve yaˇ nyiˇ gʼaˇ cawˬ ve yoˬ. Hkʼe te leh, Eˇjiˇtu‸ mvuhˇmiˬ lo kʼai taˍ ve Yaˍkoˆ ve awˬ ceuˬ awˬ hkʼaˇ hkʼa peu-eˬ suhˍ chi gʼaˇ cawˬ ve yoˬ.

Yaˍkoˆ leh miˇ yaˇ hui Eˇjiˇtu‸ mvuhˇmiˬ kʼai ve

28Gawˍshenˍ mvuhˇmiˬ lo yawˇ hui hta‸ ca hpuˇ da‸ la tuˬ, Yuˇda‸ hta‸ yawˇ hui awˬ gʼuˇ suhˍ Yoˇseh‸ geh kʼai peu ve yoˬ. Hkʼe te peuˬ hkʼaw‸ nawˉ, yawˇ hui Gawˍshenˍ mvuhˇmiˬ hkʼaw lo‸-e ve yoˬ. 29Yoˇseh‸ lehˬ, yawˇ ve awˬ pa hta‸ ca hpuˇ da‸ tuˬ, iˉ mvuhˇ lawˬ ciˇ leh Gawˍ shenˍ mvuhˇmiˬ lo kʼai ve yoˬ. Yawˇ hui hpuˇ da‸ ve teˇ yanˇ, Yoˇseh‸ lehˬ yawˇ ve awˬ pa hta‸ maw chaweh behˇ kʼuˉ taˍ leh hawˬ ve yoˬ. 30Oˇ htaˇ Yaˍkoˆ kʼoˆ ve, Chi beu‸ ngaˬ nawˬ hta‸ gʼa mawˬ peuˬ. Nawˬ lehˬ ya‸ nyi hkʼa gaˬ te‸ chehˇ sheˬ ve pa taw, chi beu‸ ngaˬ suh tuˬ gu taˍ peuˬ, teh‸ Yoˇ seh‸ hta‸ kʼoˆ piˇ ve yoˬ.

31Oˇ ve hkʼaw‸ nawˉ, Yoˇseh‸ yawˇ ve awˬ viˉ paˍ teˇ hpaˍ leh yawˇ awˬ pa ve yehˬ yaˇ kʼa yaˇ teˇ hpaˍ hta‸ kʼoˆ piˇ ve, Ngaˬ jawˇmawˇ geh kʼai leh, Hkaˍnanˍ mvuhˇmiˬ hkʼaw chehˇ ve ngaˬ pa ve yehˬ yaˇ kʼa yaˇ teˇ hpaˍ gaˬ la taˍ peuˬ ve awˬ lawn maˇ kʼoˆ, 32nawˬ hui lehˬ yawˬ hawˉ shehˍ hpaˇ teˇ hpaˍ hpeh‸ ve hkʼe, nawˬ hui ve ceˇ leh nawˬ hui ve mawˇ jeˬ hkʼa peu-eˬ hta‸ yuˬ veu laˇ leh gaˬ la peuˬ ve awˬ lawn ca kʼoˆ piˇ shaˍ. 33Jawˇmawˇ nawˬ hui hta‸ kuˬ leh, nawˬ hui aˬ hto‸ ma kanˉ te caˇ ve awˬ lawn na nyi laˇ ve kʼo, 34Ngaˬ hui lehˬ, ngaˬ hui ve awˬ puˍ awˬ pi teˇ hpaˍ hkʼa shuˍ ceˇ hu caˇ ve chaw hpeh‸ ve yoˬ, teh‸ kʼoˆ piˇ-oˆ. Oˇ hkʼe te ve kʼo, yawˇ nawˬ hui hta‸ Gawˍshenˍ mvuhˇmiˬ hkʼaw chehˇ tcuh laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ. Yoˇ seh‸ chi hkʼe kʼoˆ ve leh, Eˇjiˇtu‸ chaw teˇ hpaˍ yawˬ hawˉ caˇ ve kanˉ hta‸ awˬ me‸ awˬ hponˇ maˇ cawˬ ve kanˉ teh‸ shawˍ taˍ ve pa taw yoˬ.

Currently Selected:

Awˬ hkuiˉ puiˍ ve li‸ 46: LHBE

Highlight

Copy