Awˬ hkuiˉ puiˍ ve li‸ 44

Beˍyaˍmenˍ ve htuˉ pui hkʼaw Yoˇseh‸ ve kawˆ keu piˇ ve

1Yoˇsehˆ yawˇ ve yehˬ ha‸ shaˉ shehˍ hpaˇ hta‸ kʼoˆ piˇ ve, Chaw chi teˇ hpaˍ pfuhˇ gʼaˇ ve hkʼe yawˇ hui ve htuˉ pui hkʼaw caˬ shiˍ doˆ piˇ-oˆ. Peuˬ ve kʼo, yawˇ hui ve htuˉ pui hkʼaw yawˇ hui ve hpu hta‸ kʼaw‸ keu taˍ piˇ-oˆ. 2Awˬ nyi paˍ leh teˇ gʼaˇ ve htuˉ pui hkʼaw, yawˇ ve hpu leh ngaˬ ve hpu kawˆ hta‸ keu piˇ-oˆ, teh‸ kʼoˆ piˇ ve yoˬ. Awˬ ceˬ paˍ oˇ ve lehˬ Yoˇseh‸ kʼoˆ ve hkʼe te ve yoˬ. 3Mvuhˇ htiˇ la ve teˇ yanˇ, chaw oˇ ve teˇ hpaˍ lehˬ a shu yawˇ ve piˉlaˬ gʼa‸ leh kʼo‸-e ve yoˬ. 4Ya‸ hkʼaˇ, yawˇ hui tawˆ-e leh venˇ baˬ lo gaˬ ve teˇ yanˇ, Yoˇseh‸ yawˇ ve yehˬ ha‸ shaˉ shehˍ hpaˇ hta‸ kuˬ leh, Chaw oˇ ve teˇ hpaˍ hkʼaˇ suh haˆ gʼa‸ kʼai-o. Yawˇ hui hta‸ gʼa‸ mi ve teˇ yanˇ, chi hkʼe kʼoˆ piˇ-oˆ. Aˬ hto‸ ma pa taw nawˬ hui lehˬ, da‸ ve awˬ tan maˇ da‸ ve hta‸ kʼaw‸ te hkʼaw‸ laˇ ve le. 5Aˬ hto‸ ma pa taw, nawˬ hui ngaˬ jawˇmawˇ ve hpu kawˆ hta‸ hkʼawˇ kʼai ve le. Kawˆ chi lehˬ, ngaˬ jawˇmawˇ ve kawˆ hpeh‸ leh yawˇ mawˉ nyi tuˬ cawˬ la htaˇ, kawˆ chi hta‸ yehˇ chehˇ ve yoˬ. Nawˬ hui te ya‸ jaˇ peuˬ, teh‸ kʼoˆ piˇ-oˆ, teh‸ tawˇ shanˍ piˇ ve yoˬ.

6Chaw oˇ ve yawˇ hui hta‸ gʼa‸ mi ve teˇ yanˇ, tawˇ oˇ ve hkʼa peu-eˬ yawˇ hui hta‸ hto piˇ ve yoˬ. 7Yawˇ hui kʼaw‸ kʼoˆ ve, Ngaˬ ve jawˇmawˇ-oˬ, hkʼaˬ hkʼe te leh nawˬ chi hkʼe kʼoˆ hpeh‸ ve le. Ngaˬ hui chi hkʼe te tuˬ teˇ pawˆ ka‸ maˇ dawˇ nyi jaw. 8Ngaˬ hui ve htuˉ pui hkʼaw keu taˍ laˇ ve hpu nawˬ hta‸ kʼaw‸ hkʼaw‸ piˇ ve hta‸ nawˬ shiˍ taˍ ve yoˬ. Hkʼaˬ hkʼe te leh, nawˬ ve awˬ shehˍ hpaˇ ve yehˬ hkʼaw cawˬ ve hpu shi hta‸ ngaˬ hui hkʼawˇ yuˬ tuˬ ve le. 9Ngaˬ hui awˬ hkʼaw ve chaw teˇ gʼaˇ gʼaˇ geh lo kawˆ oˇ ve hta‸ gʼa mawˬ ve kʼo, chaw oˇ ve gʼa suh tuˬ yoˬ. Oˇ ve awˬ hkʼoˆ ka‸, ngaˬ hui hkʼa peu-eˬ htawˇ nawˬ ve awˬ ceˬ te tuˬ yoˬ, teh‸ yawˇ hta‸ kʼaw‸ kʼoˆ piˇ ve yoˬ.

10Yawˇ kʼoˆ ve, Nawˬ hui kʼoˆ ve hta‸ ngaˬ nyi hkʼaˇ suh ve yoˬ. Kawˆ chi hta‸ nawˬ hui teˇ gʼaˇ gʼaˇ geh ca mawˬ ve kʼo, chaw oˇ ve lehˬ ngaˬ ve awˬ ceˬ gʼa te tuˬ yoˬ. Ya‸ hkʼaˇ, awˬ nu ve chaw hkʼa peu-eˬ lehˬ kʼo‸-e hpeh‸ ve yoˬ, teh‸ kʼoˆ piˇ ve yoˬ. 11Chaw teˇ gʼaˇ le le, a shu yawˇ ve htuˉ pui hta‸ chiˇ ya‸ leh hpeu‸ nyi ve yoˬ. 12Yoˇseh‸ ve awˬ ceˬ paˍ oˇ ve lehˬ, awˬ viˉ paˍ lonˉ hta‸ te leh awˬ nyi paˍ leh teˇ gʼaˇ hkʼa gaˬ ve htuˉ pui hkʼaw ca hpfuhˆ nyi leh, Beˍyaˍmenˍ ve htuˉ pui hkʼaw hpu kawˆ oˇ ve hta‸ gʼa mawˬ ve yoˬ. 13Oˇ htaˇ, yawˇ hui hkʼa peu-eˬ a shu yawˇ ve aˉ po‸ hta‸ tzuh‸ suhˍ ve yoˬ. Hkʼe te leh, yawˇ hui teˇ gʼaˇ le le a shu yawˇ ve piˉlaˬ hta‸ awˬ lanˉ kʼaw‸ tcuhˉ leh, venˇ hkʼaw lo kʼaw‸ hpfuhˆ kʼaw‸ la ve yoˬ.

14Yuˇda‸ leh yawˇ ve awˬ viˉ awˬ nyi teˇ hpaˍ, Yoˇseh‸ ve yehˬ lo kʼaw‸ gaˬ la ve teˇ yanˇ, Yoˇseh‸ lehˬ oˇ kaˬ lo chehˇ taˍ sheˬ ve yoˬ. 15Yawˇ hui hkʼa peu-eˬ yawˇ mehˆ gʼuˇ suhˍ lo boˆ taˍ ve yoˬ. Oˇ htaˇ Yoˇseh‸ lehˬ, Nawˬ hui hkʼaˬ hkʼe te ve le. Ngaˬ hkʼe ve chaw teˇ gʼaˇ lehˬ, nawˬ hui hkʼaˬ hkʼe te taˍ peuˬ ve hta‸ mawˉ nyi leh shiˍ hpeh‸ ve hta‸ nawˬ hui maˇ shiˍ leh laˇ, teh‸ yawˇ hui hta‸ kʼoˆ piˇ ve yoˬ.

16Oˇ htaˇ Yuˇda‸ kʼoˆ ve, Jawˇmawˇ-o, ngaˬ hui hkʼaˬ hkʼe gʼa kʼoˆ tuˬ le. Ngaˬ hui te‸ chiˉ venˇbaˆ maˇ cawˬ ve chaw hpeh‸ ve awˬ lawn ngaˬ hui hkʼaˬ hkʼe te hpeu‸ maˍ laˇ gʼa tuˬ ve le. Gʼuiˬsha lehˬ ngaˬ hui ve venˇbaˆ hta‸ hpeu‸ tawˆ la peuˬ. Nawˬ ve kawˆ cawˬ taˍ ve chaw ceh tiˉ maˇ heˆ. Ngaˬ hui hkʼa peu-eˬ ka‸ nawˬ ve awˬ ceˬ te tuˬ choˬ kaˬ lo chehˇ taˍ ve yoˬ, teh‸ kʼoˆ piˇ ve yoˬ.

17Oˇ htaˇ Yoˇseh‸ kʼoˆ ve, Ngaˬ oˇ hkʼe maˇ te. Kawˆ yuˬ taˍ ve chaw teˇ gʼaˇ ceh tiˉ ngaˬ ve awˬ ceˬ gʼa te tuˬ yoˬ. Awˬ nu ve chaw hkʼa peu-eˬ nawˬ hui ve awˬ pa geh‸ kʼaw‸ kʼo‸-e hpeh‸ ve yoˬ, teh‸ kʼoˆ piˇ ve yoˬ.

Yuˇda‸ Beˍyaˍmenˍ awˬ pon lawˬ hkawˉ ve

18Oˇ htaˇ, Yuˇda‸ yawˇ geh jiˆ kʼai leh kʼoˆ ve, Jawˇmawˇ-oˬ, ngaˬ hta‸ tawˇ yaw tuˬ a hkaw-anˬ a ciˉ pe‸ laˇ sheˬ. Ngaˬ hta‸ nyi ma a ciˉ taˇ zuhˆ laˇ-oˆ. Nawˬ lehˬ jawˇmawˇ lonˉ hkʼe taw uiˍ ve chaw hpeh‸ ve yoˬ. 19Jawˇmawˇ-oˬ, nawˬ lehˬ ngaˬ hui hta‸, Awˬ pa cawˬ laˇ. Awˬ nyi paˍ cawˬ laˇ, teh‸ na nyi laˇ ve yoˬ. 20Ngaˬ hui lehˬ a sha‸ mawˇ peuˬ ve awˬ pa teˇ gʼaˇ cawˬ ve yoˬ. Yawˇ a sha‸ mawˇ la ve teˇ yanˇ, yaˇ paˍ leh teˇ gʼaˇ cawˬ ve yoˬ. Yaˇ paˍ leh chi ve awˬ viˉ paˍ lehˬ, suh peuˬ. Hkʼe te leh, yawˇ awˬ e ve yaˇ teˇ hpaˍ awˬ hkʼaw lo yawˇ teˇ gʼaˇ tiˉ cawˬ taˉ ve yoˬ. Chi hta‸ pa taw, awˬ pa yawˇ hta‸ ha‸ jaˇ ve yoˬ. 21Yawˇ hta‸ nawˬ geh lo shiˍ veu laˇ tuˬ jawˇmawˇ nawˬ ngaˬ hui hta‸ kʼoˆ laˇ taˍ ve yoˬ. 22Ya‸ hkʼaˇ, yawˇ awˬ pa geh tawˆ kʼai maˇ hpeh‸ ve awˬ lawn maˇ kʼoˆ, yawˇ oˇ hkʼe tawˆ kʼai kʼo awˬ pa gʼa suh-e tuˬ ve awˬ lawn maˇ kʼoˆ, ngaˬ hui nawˬ hta‸ kʼoˆ piˇ taˍ peuˬ ve yoˬ. 23Ya‸ hkʼaˇ nawˬ lehˬ, ngaˬ hui ve awˬ nyi paˍ leh hta‸ maˇ shiˍ veu laˇ ve kʼo, ngaˬ hui nawˬ mehˆ gʼuˇ suhˍmaˇ gʼa laˬ, teh‸ kʼoˆ laˇ taˍ ve yoˬ.

24Ngaˬ hui lehˬ, ngaˬ hui ve awˬ pa geh kʼaw‸ kʼo‸-e leh, nawˬ kʼoˆ laˇ ve tawˇ teˇ hpaˍ yawˇ hta‸ hto maˍ piˇ ve yoˬ. 25Yawˇ ngaˬ hui hta‸ caˬ shiˍ teˇ pawˆ ca kʼaw‸ vuiˬ tcuh laˇ ve teˇ yanˇ, 26ngaˬ hui kʼaw‸ kʼoˆ piˇ ve, Ngaˬ hui ve awˬ nyi paˍ leh hta‸ maˇ shiˍ kʼai ve kʼo, chaw oˇ ve mehˆ gʼuˇ suhˍ lo‸-e maˇ hpeh‸. Ya‸ hkʼaˇ, ngaˬ hui ve awˬ nyi paˍ ngaˬ hui geh kʼai ve kʼo, ngaˬ hui kʼai tuˬ yoˬ, teh‸ kʼoˆ piˇ ve yoˬ. 27Oˇ htaˇ ngaˬ hui ve awˬ pa kʼaw‸ kʼoˆ ve, Ngaˬ miˇ ma Raˍhkeˍlaˆ ngaˬ awˬ pon yaˇ paˍ nyiˇ gʼaˇ paw la piˇ taˍ ve hta‸ nawˬ hui shiˍ taˍ ve yoˬ. 28Teˇ gʼaˇ lehˬ ngaˬ geh lo tawˆ kʼai peuˬ. Hkʼe te leh, ya‸ nyi hkʼa gaˬ ngaˬ yawˇ hta‸ maˇ gʼa kʼaw‸ mawˬ ve pa taw, yawˇ lehˬ haiˬ ve to nuˇ to shaˆ che‸ caˇ peuˬ hehˉ. 29Chi teˇ gʼaˇ hta‸ ka‸ nawˬ hui shiˍ kʼai leh, yawˇ teˇ ceuˬ ceuˬ hpeh‸ ve kʼo, nawˬ hui ngaˬ hta‸ dawˇ haˍ suh-e piˇ lawˬ tuˬ yoˬ, teh‸ kʼoˆ laˇ ve yoˬ.

30Hkʼe te leh jawˇmawˇ-oˬ, yawˇ ve a sha‸ lehˬ yaˇ paˍ chi ve a sha‸ hta‸ hpeh ka taˍ ve pa taw, yaˇ paˍ chi ve hta‸ ngaˬ hui yawˇ geh lo maˇ shiˍ hkʼaw‸ veu piˇ leh, 31yaˇ paˍ chi hta‸ yawˇ maˇ gʼa mawˬ ve kʼo, yawˇ suh-e tuˬ ve yoˬ. Oˇ hkʼe hpeh‸ ve kʼo, ngaˬ hui teˇ hpaˍ lehˬ, ngaˬ hui ve awˬ pa hta‸ dawˇ haˍ suh-e piˇ lawˬ ve hkʼe hpeh‸ tuˬ yoˬ. 32Ngaˬ lehˬ yaˇ paˍ chi ve awˬ pon hkanˍ taˍ ve yoˬ. Yawˇ hta‸ nawˬ geh lo maˇ shiˍ hkʼaw‸ veu laˇ kʼo, ngaˬ a sha‸ te‸ chehˇ ve teˇ co-e, nawˬ ngaˬ hta‸ venˇbaˆ taˍ hpeh‸ ve yoˬ, teh‸ ngaˬ pa hta‸ ka ti‸ te piˇ taˍ ve yoˬ. 33Chi hta‸ pa taw jawˇmawˇ-oˬ, yaˇ paˍ chi ve awˬ tan nawˬ ve awˬ ceˬ te tuˬ, ngaˬ hta‸ chehˇ tcuh taˉ laˇ-oˆ. Yawˇ hta‸ lehˬ yawˇ ve awˬ viˉ paˍ teˇ hpaˍ geh a ciˉ kʼo‸-e peu-o. 34Yaˇ paˍ chi hta‸ maˇ shiˍ hkʼaw‸ veu leh ngaˬ pa geh ngaˬ hkʼaˬ hkʼe te kʼo‸-e hpeh‸ tuˬ le. Ngaˬ pa gʼa hkanˍ tuˬ ve tu‸ hkanˍ ve hta‸ ngaˬ hkʼaˬ hkʼe te nyi hpeh‸ tuˬ le, teh‸ Yoˇseh‸ hta‸ kʼoˆ piˇ ve yoˬ.

Currently Selected:

Awˬ hkuiˉ puiˍ ve li‸ 44: LHBE

Highlight

Copy