Mga Talinhaga 16
16
1Nasa tawo an pagplano, alagad nasa Dios an huring tataramon.
2Naghohona an tawo na tama an gabos niyang ginigibo, alagad tinitimbang nin Kagurangnan an tunay niyang katuyohan.
3Idusay mo sa Kagurangnan an gabos mong gibo, asin maootob an saimong mga plano.
4An gabos na ginibo nin Kagurangnan igwa nin katuyohan; asin an kataposan kan maraot iyo an kapahamakan.
5Ikinakaongis nin Kagurangnan an gabos na mapaabaw-abaw; laomon mo na dai sinda makakadulag sa saiyang padusa.
6Pinapatawad an kasalan huli sa kaimbodan, asin malilikayan nin tawo an karatan huli sa pagkatakot sa Kagurangnan.
7Kun an pamumuhay nin sarong tawo nawiwilihan nin Kagurangnan, pinapangyari niya na magin mga katood kan tawong iyan maski an saiyang mga kaiwal.
8Mas marahay an kadikit na kwarta na pinagpagalan ki sa kadakul na nakua sa pandadaya.
9Minaplano an tawo, alagad an Kagurangnan iyo an minagiya kan saiyang mga lakad.
10Igwa nin banal na awtoridad an hade kun siya minataram; an saiyang mga hatol gabos tama.
11Boot nin Kagurangnan an tamang timbang saka sukol, asin an matanos na pagpabakal.
12Ikinakaongis kan mga hade an paggibo nin karatan, huli ta hustisya an nagpapakosog nin sarong gobyerno.
13Boot kan hade na madangog an katotoohan, asin an nagtataram kaiyan saiyang nawiwilihan.
14Hinihingowa kan madonong na mapaogma an hade huli ta kun maanggot an hade, igwa nin tawong magagadan.
15An marahay na boot kan hade garo mga panganoron na nagdadara nin uran kun tig-init; buhay an makukua diyan.
16Orog karahay an pakakua nin kadonongan saka pakaaram ki sa bulawan saka plata.
17An dalan kan matanos paharayo sa karatan; an nag-iingat sa paglakaw, nag-iingat man kan saiyang buhay.
18An kapaabaw-abawan minabunga nin kapahamakan, asin an kapalangkawan nin pagkahulog.
19Orog karahay an magin mapakumbaba saka magdanay na dukha, ki sa magin saro kan mga mapaabaw-abaw saka makihiras kan saindang sinamsaman.
20An naghihinanyog sa katukdoan magigin mauswag; paladan an tawong nagsasarig sa Kagurangnan.
21An madonong namimidbid huli kan saiyang pakasabot. An mahamis niyang tataramon orog na nakakadagka.
22Para sa tawong madonong, an kadonongan burabod nin buhay; alagad an pagtukdo sa lolong pagsasayang nin panahon.
23An madonong minaisip ngona bago magtaram, kaya orog na nakakadagka an saiyang mga tataramon.
24An marahay na mga tataramon nakakaagid sa dugos—mahamis sa pagnamit asin marahay sa hawak.
25Igwa nin dalan na garo matanos sa paghiling nin tawo, alagad kagadanan an nasa poro kaiyan.
26An gana sa pagkakan an orog na nakakapahigos sa sarong trabahador, huli ta boot niyang mabolong an saiyang gutom.
27An tawong tampalasan nagpaplano nin karatan, asin an saiyang tataramon garo kalayong mainit nin marahay.
28An tawong biko an kaisipan nagpapalakop nin iriwal, asin an matabil nagpapasuhay nin magkatood.
29Dinadaya kan madahas an saiyang katood, dangan dinadara niya ini sa dalan na maraot.
30Mag-ingat sa tawong pangisingisi saka pakorokimlat saimo; igwa siyang iniisip na maraot.
31An halawig na buhay iyo an balos sa matanos; an mga puting buhok korona nin kamurawayan.
32Mas marahay an magin pasensyoso ki sa magin mapangyari. Mas marahay an pagpugol kan sadiri ki sa pagdaog kan bilog na syudad.
33Nagsasapalaran an mga tawo sa pagsabot kan kabotan nin Dios, alagad an Dios mismo an nagtatao kan kasimbagan.
Currently Selected:
Mga Talinhaga 16: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
