Mga Talinhaga 15
15
1An mahuyong pagsimbag nakakahale nin kaanggotan, alagad an matarom na tataramon minapaorog kaiyan.
2An dila kan madonong nagwawaras nin pakaaram, alagad an ngoso kan mga mangmang nagbubuga nin kamangmangan.
3An Kagurangnan naghihiling maski saen; minamasdan niya an maraot saka an marahay.
4An marahay na mga tataramon minataong buhay, alagad an matarom na dila nakakakulog nin boot.
5An tawong minasikwal kan katukdoan kan saiyang ama sarong lolong, alagad an minaako nin pagsagwe sarong madonong.
6Sinasaray kan matanos an saindang kayamanan, alagad an kayamanan kan tampalasan nauubos sa panahon nin kasakitan.
7An pakaaram pinapalakop kan mga tawong madonong, bako kan mga lolong.
8Ikinakaongis nin Kagurangnan an sakripisyo kan maraot, alagad nawiwilihan niya an pamibi kan matanos.
9Ikinakauyam nin Kagurangnan an pamumuhay kan maraot, alagad namomotan niya an naggigibo nin matanos.
10Igwa nin makuring padusa sa naggigibo nin maraot; an naoongis sa pagsagwe magagadan.
11An kinaban kan mga gadan bukas sa atubang nin Kagurangnan; gurano pa daw an puso kan mga tawo?
12An mahambog na tawo habong pagsawayon; dai nanggad siya naghahagad nin hatol sa sarong madonong.
13An pusong magayagaya minapaogma nin lalawogon, alagad an pusong mamondo minapaluya nin boot.
14An tawong may pakasabot naghahanap nin pakaaram, alagad an mangmang kontento na sa saiyang kamangmangan.
15Mapagal an lambang aldaw para sa nasasakitan, alagad an tawong maogma igwa nin nagdadanay na bangkete.
16Mas marahay pa an magin dukha na may pagkatakot sa Kagurangnan ki sa magin mayaman na pano nin kahandalan.
17Mas marahay pang magkakan nin gulay kaiba an saimong mga namomotan ki sa magkakan nin masiram na karne na igwa nin kaanggotan.
18An mainit na payo minapoon nin diskutiran, alagad an pagpugol sa sadiri minadara nin katoninongan.
19An dalan kan hugakon pano nin mga tonok, alagad an tinampo kan matanos mahiwas asin patag.
20An madonong na aki nakakapaogma sa sarong ama. Lolong sana an minasikwal sa saiyang ina.
21An mangmang naoogma sa saiyang kalolongan, alagad ginigibo kan madonong an matanos.
22Masasayang an mga plano kun mayo nin maigot na pag-aadal, alagad kun kadakul kan parahatol marahay an magigin bunga kaiyan.
23Nakakaogma an pakakua kan tamang tataramon para sa tamang okasyon!
24An dalan kan madonong patukad sa buhay, tanganing malikayan niya an kagadanan na nasa ibaba.
25Rinaraot nin Kagurangnan an mga harong kan mapaabaw-abaw, alagad iniingatan niya an mga pagsadiri kan babaeng balo.
26Naoongis an Kagurangnan sa mga kaisipan na maraot, alagad nawiwili siya sa mga tataramon na mahuyo.
27An tawong gutom sa kwarta nagdadara nin problema sa saiyang pamilya, alagad an naoongis sa suhol mabubuhay sa halawig na panahon.
28An matanos minaisip ngona bago magsimbag. An maraot minasimbag tolos, alagad nagigin dahelan kan ribok.
29Dinadangog nin Kagurangnan an pamibi kan matanos, alagad dai niya dinadangog an maraot.
30An nakahuyom na lalawogon minapaogma nin puso, asin an marahay na bareta minapakosog nin boot.
31An tawong naghihinanyog sa tamang hatol magdadanay na kaibahan kan mga madonong.
32An tawong minasikwal nin katukdoan naoongis sa sadiri man sana niya, alagad an naghihinanyog sa hatol magigin madonong.
33An pagkatakot sa Kagurangnan nagtutukdo nin kadonongan, asin an kapakumbabaan nagbubunga nin kaomawan.
Currently Selected:
Mga Talinhaga 15: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
