Mga Talinhaga 14
14
1An madonong na babae nagpapatindog kan saiyang harong, alagad nararaot iyan huli sa kalolongan.
2An naglalakaw sa katanosan natatakot sa Kagurangnan, alagad an may bikong pamumuhay minasikwal saiya.
3An kapaabaw-abawan nin lolong iyo an nakakapataram saiya nin sobra; an tataramon nin madonong iyo an minaingat saiya.
4Kun mayo nin baka, mayo nin anihon; huli ta sa kosog kan baka nagkakaigwa nin dakul na ani.
5An maimbod na saksi dai nagpuputik, alagad nagsasabi nin kaputikan an bakong totoong saksi.
6An mahambog na tawo dai nanggad magigin madonong, alagad an madonong madaling makanood.
7Likayan mo an lolong; mayo siya nin ikakatukdo saimo.
8Tano ta madonong an may isip na tawo? Huli ta aram niya kun ano an saiyang gigibohon. Tano ta lolong an mangmang na tawo? Huli ta naghohona siya na igwa siya nin naaaraman.
9An lolong dai nahahadit kun siya nagkakasala, alagad boot kan marahay na tawo na siya mapatawad.#14:9 Sa Hebreyo, an bersikulo 9 bakong malinaw.
10Sadiri mo an saimong kaogmahan; an saimong kapaitan nin boot sadiri mo man. Mayo nin pwedeng makihiras saimo kaiyan.
11Magdadanay na nakatindog an harong kan matanos, alagad magagaba an harong kan tampalasan.
12An dalan na sa paghona kan tawo matanos, pwedeng magtapos sa kagadanan.
13Pwedeng tahoban nin maogmang lalawogon an kamondoan. Alagad kun tapos na an kaogmahan yaon man giraray iyan.
14An tawong maraot mag-aani kan maninigo saiya, alagad an marahay na tawo babalosan huli sa saiyang mga gibo.
15Naniniwala an mangmang sa gabos niyang nadadangog, alagad minamaanan kan madonong an saiyang linalakawan.
16An Tawong madonong maingat asin minalikay sa karatan, alagad an lolong mayo nin pag-ingat asin mayo nin pagpupugol sa sadiri.
17An tawong mainit an payo nakakaginibo nin kalolongan; an tawong madonong nagdadanay na toninong.
18Nakukua kan mangmang an maninigo sa saiyang kalolongan, alagad babalosan nin pakaaram an tawong may toltol na kaisipan.
19An tawong maraot nagluluhod sa atubangan kan marahay, asin an tampalasan nakikimaherak sa mga trangkahan kan matanos.
20An dukha dai nagugustohan maski kan saiyang kanatad, alagad an mayaman dakul an katood.
21Kun boot mong magin maogma, kaherakan mo an dukha; kasalan an pagsikwal sa kiisay man.
22Bako daw kasalan an pag-isip nin maraot? An nag-iisip nin marahay sinasarigan saka ginagalangan.
23An gabos na pagpagal igwa nin pakinabang, alagad kadukhaan an aaboton kun gabos sana tataramon.
24An korona kan madonong iyo an saindang kadonongan, alagad an kulintas kan lolong iyo an saindang kalolongan.
25An totoong saksi nagliligtas nin buhay, alagad an parapasaluib nagtataram nin mga kaputikan.
26An pagkatakot sa Kagurangnan minatao nin pagsarig asin katiwasayan sa sarong tawo saka sa saiyang pamilya.
27An pagkatakot sa Kagurangnan sarong burabod nin buhay para sa tawong boot makalikay sa mga siod nin kagadanan.
28An kabantogan kan sarong hade nasa kadakulan kan saiyang nasasakopan; mayo nin halaga an sarong hade kun mayo siyang tawohan.
29An tawong dai tolos naaanggot igwa nin dakulang pakasabot, alagad an madaling maanggot nagpapahiling kan saiyang kalolongan.
30An isip na matoninong minatao nin marahay na hawak, alagad an pag-imon nakakaagid sa helang na kanser.
31An nag-aapi sa sarong dukha nagtutuyatuya sa saiyang Kaglalang, alagad an nagtatabang sa dukha nag-oomaw saiya.
32An tampalasan ibinabagsak kan sadiring karatan, alagad an matanos iniingatan kan sadiring karahayan.
33An kadonongan nag-eerok sa isip kan tawong may pakasabot, alagad an mga lolong mayo nin naaaraman manongod sa kadonongan.
34An katanosan nagpapadakula sa sarong nasyon, alagad an kasalan nagtatao nin kasosopgan sa arin man na banwaan.
35Nawiwili an sarong hade sa madonong na oripon, alagad minahugpa an saiyang kaanggotan sa sorogoon na minagibong kasosopgan.
Currently Selected:
Mga Talinhaga 14: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
