Mga Talinhaga 13
13
1An madonong na aki naghihinanyog kun sinasagwe siya kan saiyang ama, alagad an mapaabaw-abaw dai minaako na siya nasasala.
2An marahay na tawo babalosan huli sa itinataram niya, alagad an madaya nagmamawot nin kadahasan.
3An maingat magtaram nag-iingat man kan saiyang buhay, alagad an bakong maingat nagraraot kan sadiri niyang buhay.
4Maski ano an mawoton kan hugakon, dai niya iyan makakamtan. Nakakamtan kan mahigos an saiyang kamawotan.
5Ikinakaongis kan matanos na tawo an kaputikan, alagad makasosopog saka maraot an mga tataramon kan tampalasan.
6An matanos na tawo iniingatan kan katanosan, alagad an kasalan iyo an minapabagsak kan tampalasan.
7May tawong nagsasagin-sagin na mayaman, alagad mayo nin anoman; dangan may nagsasagin-sagin na dukha, alagad igwa nin dakulang kayamanan.
8An kayamanan nin sarong tawo iyo an pantubos kan saiyang buhay, alagad an sarong dukha mayo nin pambayad sa saiyang katalingkasan.
9An matanos na tawo garo sarong maliwanag na ilaw, alagad an maraot nakakaarog sa napapalsok na ilawan.
10An kapaabaw-abawan mayo nin ibubunga kundi iriwal. Sarong kadonongan an paghagad nin hatol.
11Madaling maubos an kayamanan na madali sanang nakamtan, alagad orog na madakul an kayamanan na haloy na pinagpagalan.
12Kun nawawara an paglaom naroronot an puso, alagad an kamawotan na naotob nagtatao nin kaogmahan.
13An nagsisikwal kan marahay na hatol naghahanap nin karibokan, alagad an nagkukuyog kaiyan nakakalikay sa pag-alaman.
14An mga katukdoan kan madonong burabod nin buhay para sa tawong boot makalikay sa mga siod nin kagadanan.
15An kadonongan nakakakua nin paggalang, alagad an tawong dai masasarigan nasa dalan na pasiring sa kapahamakan.#13:15 Sa sarong daan na traduksyon dalan na pasiring sa kapahamakan; sa Hebreyo permanenteng dalan.
16Minaisip ngona an madonong bago maghiro, alagad an lolong nagpapahiling kan saiyang kamangmangan.
17An maraot na sugo iyo an nagigin dahelan nin ribok, alagad an masasarigan na sugo minadara nin katoninongan.
18An tawo na habong makanood magigin dukha asin mapapasopog, alagad an siisay man na naghihinanyog sa pagsagwe gagalangan.
19Nakakapagayagaya sa buhay an sarong kamawotan na naootob; alagad an mga lolong naoongis na magtalikod sa karatan.
20Mag-iba ka sa madonong nganing ika magin madonong; kun makipagkatood ka sa lolong mapapahamak ka.
21An parakasala linalamag kan kasakitan, alagad an matanos binabalosan nin kauswagan.
22An marahay na tawo magwawalat nin pamana sa saiyang mga makoapo, alagad an kayamanan kan parakasala mapapasakamot kan matanos.
23An dagang dai naooma pwedeng magtao nin dakul na kakanon sa dukha, alagad an mga maraot dai minatugot na tanoman iyan.#13:23 Sa Hebreyo, an bersikulo 23 bakong malinaw.
24Kun dai mo pagpadusahan an saimong aki, dai mo siya namomotan. Kun namomotan mo siya, didisiplinahon mo siya.
25An matanos dai nahahalean nin pagkakan, alagad danay na gutom an tampalasan.
Currently Selected:
Mga Talinhaga 13: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
