Mga Talinhaga 12
12
1An namomoot sa disiplina namomoot sa pakaaram, alagad mangmang an naoongis sa pagsagwe.
2Nawiwilihan nin Kagurangnan an marahay na tawo, alagad pinapadusahan niya an nag-iisip nin karatan.
3Mayo nin tawo na pinapapusog kan karatan, alagad an marahay na tawo dai nanggad matatanyog.
4An marahay na babae orgulyo asin kaogmahan kan saiyang agom, alagad an babaeng minadara nin kasosopgan sa saiyang agom garo helang na kanser sa saiyang mga tolang.
5Marahay an mga kaisipan kan matanos; an mga plano kan maraot pano nin pandadaya.
6An mga tataramon kan maraot nakakagadan, alagad an mga tataramon kan matanos minaligtas nin mga tawo.
7An mga maraot nagagadan asin mayong iwinawalat na kapagarakian, alagad an mga pamilya kan mga matanos magdadanay sagkod lamang.
8Inoomaw an sarong tawo huli sa saiyang kadonongan, alagad isinisikwal an tawong may bikong kaisipan.
9Mas marahay an magin ordinaryong tawo na nagtatrabaho para sa saiyang ikabubuhay ki sa magsagin-sagin na dakulang tawo alagad mayo nin kinakakan.
10Inaataman kan marahay na tawo an saiyang mga hayop, alagad dai naheherak sa sainda an maraot.
11An mahigos na paraoma igwa nin dakul na kakanon, alagad kalolongan an magsayang nin panahon sa mayo nin halagang mga proyekto.
12Marurumpag an makosog na tore kan maraot, alagad an matanos dai nanggad matatanyog.#12:12 Sa Hebreyo, an bersikulo 12 bakong malinaw.
13An maraot na tawo nasisiod kan sadiring tataramon, alagad nakakalikay sa anoman na pag-alaman an matanos.
14Babalosan ka sosog sa saimong mga tataramon saka mga gibo; makakamtan mo an maninigo sa saimo.
15An lolong danay na naghohona na siya an tama, alagad an madonong naghihinanyog sa hatol.
16Nahihiling tolos sa lolong an pagkauyam, alagad an madonong dai nagtatao nin halaga sa insulto.
17An nagtataram kan katotoohan nagsasaksi sa katanosan, alagad an bakong totoong saksi nagtataram nin kaputikan.
18An makulog na mga tataramon arog sa espada, nakakalugad nin hararom, alagad an mga tataramon kan madonong nakakabolong.
19Halipot an buhay kan kaputikan, alagad nabubuhay sagkod lamang an katotoohan.
20An kadayaan iyo an nasa puso kan mga nag-iisip nin karatan, alagad igwa nin kaogmahan an nagpaplano nin karahayan.
21Mayo nin maraot na maabot sa matanos, alagad an tampalasan pano nin kasakitan.
22Nauuyam an Kagurangnan sa mga putikon, alagad nawiwili siya sa mga tawong nag-ootob kan saindang panuga.
23Dai ipinaghahambog kan madonong na tawo an saiyang naaaraman, alagad ipinapahayag kan lolong an saiyang kalolongan.
24An kahigosan iyo an matao saimo nin kapangyarihan; an pagigin hugakon iyo an madara saimo sa kaoripnan.
25An kahaditan minapagabat kan puso nin tawo, alagad minapaogma saiya an marahay na tataramon.
26An matanos na tawo iyo an giya kan saiyang katood, alagad an dalan kan maraot minapasiring sa pagkalagalag.
27Kun hugakon ka, dai mo makakamtan an mawot mo, alagad kun mahigos ka, magkakaigwa ka nin mahalagang kayamanan.#12:27 Sa Hebreyo, an bersikulo 27 bakong malinaw.
28An katanosan iyo an dalan pasiring sa buhay; an karatan iyo an dalan pasiring sa kagadanan.
Currently Selected:
Mga Talinhaga 12: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
