Mga Talinhaga 17
17
1Mas marahay an pagkakan nin matagas na tinapay na igwang katoninongan, ki sa magbangkete sa harong na pano nin kariribokan.
2An tusong sorogoon pwedeng masakop an mayong pakinabang na aki kan saiyang amo asin mahirasan kan pamana bilang saro sa magturugang.
3Binabalo sa kalayo an bulawan saka an plata, alagad an minabalo kan puso nin tawo iyo an Kagurangnan.
4An tawong maraot naghihinanyog sa mga kaisipan na maraot, asin an putikon nagdadangog sa kaputikan.
5An nagtutuyatuya sa dukha nag-iinsulto sa Dios na naglalang saiya. Papadusahan an nag-oogma sa maraot na palad nin iba.
6Ipinag-oorgulyo kan mga lolo an saindang mga makoapo, siring na ipinag-oorgulyo kan mga aking lalaki an saindang mga ama.
7An marahay na pagtaram dai makukua sa sarong lolong, ni an kaputikan sa sarong prinsipe.
8May mga tawo na naghohona na an pagsuhol garo pagsalamangka; nagtutubod sinda na magigibo kaini an gabos na bagay.
9Patawada an tawong nagkasala saimo kun boot mong magustohan ka nin tawo. An paggiromdom sa kasalan iyo an minatapos nin pagkakatood.
10An sarong pagsagwe orog na minatadom sa sarong madonong ki sa sanggatos na hampak sa sarong lolong.
11An tawong maraot mayo nin hinahanap kundi an pagrebelde, kaya sarong makuring sugo an ipapadara laban saiya.
12Marahay pang magsabat sa babaeng oso na inagawan kan saiyang mga ogbon, ki sa sarong lolong sa saiyang kalolongan.
13Kun karatan an ibabalos nin sarong tawo sa karahayan, an karatan dai mahahale sa saiyang harong.
14An pagpoon nin ribok garo pagpabulos nin tubig; kaya ontokon iyan bago magdakula.
15An minaoyon sa tampalasan asin an minapadusa sa matanos parehong ikinakaongis nin Kagurangnan.
16Mayong karahayan na makukua an lolong maski maggasto man siya sa pag-aadal, huli ta mayo siya nin isip.
17An katood namomoot sa gabos na panahon, asin tugang siyang minadamay sa oras nin kasakitan.
18Lolong sana an minagarantiya sa pagkakautang nin iba.
19An namomoot sa kasalan namomoot sa pakiiwal, asin an tawong mahambog naghahanap nin kapahamakan.
20An may bikong kaisipan dai minauswag, asin an putikon nahuhulog sa karatan.
21An aking mangmang kamondoan nin sarong ama; asin an ama nin sarong lolong mayo nin kaogmahan.
22An magayagayang puso sarong marahay na bolong, alagad an mamondong espiritu minaubos kan kosog nin tawo.
23An maraot na hukom hilom na minaako nin suhol, dangan binibiko niya an hustisya.
24An kadonongan iyo an kamawotan kan tawong may pakasabot, alagad dakul an kamawotan kan sarong lolong.
25An aking lolong kamondoan kan saiyang ama, asin kapaitan nin boot kan saiyang ina.
26Bakong marahay an pagpadusa sa matanos, asin bakong tama na paghampakon an mga nobleng tawo.
27Bakong matinaram an tawong may pakaaram. An tawong haloy maanggot igwa nin pakasabot.
28Maski an lolong na nag-aalo ibinibilang na madonong; kun serado an saiyang ngoso hinohona na saro siyang may inadalan.
Currently Selected:
Mga Talinhaga 17: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
