Mga Talinhaga 18
18
1An tawong mayo nin iniisip kundi an saiyang sadiri, dai tataong makiiba sa kapwa; asin sasalungaton niya an lambang marahay na kaisipan nin iba.
2Dai nawiwili an lolong sa paghanap nin pakasabot; mas boot niyang mahiling kan ibang tawo na dakul an saiyang naaaraman.
3Kun minaabot an karatan, minaabot man an kasosopgan. Kun nawawara an onra, minasalihid an pag-olog-olog.
4An tataramon nin tawo pwedeng paggikanan nin kadonongan, hararom arog kan dagat, malipot arog kan nagbubulos na sapa.
5An pagkampi sa tampalasan bakong marahay, siring man an dai pagtao nin hustisya sa tawong matanos.
6An mga ngabil kan lolong nagdadara nin iriwal, asin an saiyang ngoso naghahanap nin kulog sa hawak.
7An ngimot kan lolong iyo an magdadara saiya sa kapahamakan, siring na an saiyang mga ngabil iyo an mabugtak saiya sa pag-alaman.
8An libak garo masiram na kakanon—boot ta nanggad iyan na halonon.
9An tawong hugakon tugang kan tawong pararaot.
10An Kagurangnan arog sa sarong pusog na tore, na pwedeng dumanan kan matanos asin magin ligtas. 11Alagad naghohona an tawong mayaman na an kayamanan niya an mag-iingat saiya, arog kan halangkaw asin makosog na mga kudal sa palibot nin syudad.
12Mapalangkaw an tawo kun dai pa naabot an kapahamakan, alagad an dalan pasiring sa kaomawan iyo an kapakumbabaan.
13An pagsimbag bago maghinanyog, sarong kamangmangan asin kasosopgan.
14An pagmawot na mabuhay iyo an magpapakosog sa sarong naghehelang; alagad kun mawara iyan, mawawara man an saiyang huring paglaom.
15An tawong madonong danay na nagmamawot asin andam na makanood.
16Boot mong magdolok sa sarong halangkaw na tawo? Magdara ka nin regalo asin magigin pasil an pagdolok saiya.
17An enot na magtaram sa atubang kan korte hinohona na tama sagkod na dai pa siya hinahapot kan saiyang kalaban.
18An pagsapalaran iyo an minatapos kan karibokan asin minahusay sa duwang makosog na magkaiwal.
19Tabangan mo an saimong tugang asin iingatan ka niya arog kan pusog na kudal nin syudad, alagad kun iwalon mo siya, seserahan ka niya nin pintoan.
20Ika an maani kan bunga kan saimong itinataram. 21An itinaram mo pwedeng magligtas o magraot nin buhay; kaya dapat mong kakanon an mga bunga kan saimong mga tataramon.
22An pakaagom nin marahay na babae sarong kaogmahan; nagpapahiling iyan na nawiwilihan ka nin Kagurangnan.
23An dukha magalang kun makiolay, alagad mayong galang kun magsimbag an mayaman.
24May pagkakatood na dai naghahaloy, alagad may katood na labi pa sa tugang.
Currently Selected:
Mga Talinhaga 18: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
