MATTHIEU 5
5
Usamɔ sɛn zu kaya
1Jesu zɔka o giiwi nɔ‘i, ɓɛɛ daŋ si zu kaya, nɛ́ɛ̀ dúk nù. O ŋgaiwi kɔ̧-a̧ nɛ̀ɛ̀ si katɛ a̧, 2ɓɛɛ a̧ usi mɔ ha̧ wa tɔ̧ nɛnɛ hee mɔ'ɔ ga:
Kpasa bɔtɛ
(Zɔk Lk 6.20-23)
3«O wi nɛ̀ iŋa'e wi nɛ́ wisan ti Sɔ̧ à̧ yá nɛ̀ desee,
wen Wan mɛ yiwese nɛ́ kɔ-wa!
4O wi-hi̧i̧-kɔ̧a̧ à̧ yá nɛ̀ desee,
wen Sɔ̧ tɛ ga̧ see-wa!#Es 61.2
5O ga̧a̧-wi à̧ yá nɛ̀ desee,
wen Sɔ̧ tɛ ha̧ nù ha̧ wa nɛ̀ mɔɔ-oi!#Gima 37.11
6O wi nɛ̀ wɔ-deemɔ nɛ̀ yuwar-a gbɛ wa à̧ yá nɛ̀ desee,
wen Sɔ̧ tɛ ha̧ ha̧ wa!#Es 55.1-2
7O wi-de-ko à̧ yá nɛ̀ desee,
wen Sɔ̧ tɛ de ko ha̧ wa!
8O wi-sa̧a̧-see à̧ yá nɛ̀ desee,
wen wa tɛ zɔk Sɔ̧!#Gima 24.3-4
9O wi-am-mɔ à̧ yá nɛ̀ desee,
wen Sɔ̧ tɛ sa wa nɛ́ o bem kɔ‘i!
10O wi nɛ̀ zɔk bɔnɛ
wen zu deemɔ nɛ̀ yuwar-a à̧ yá nɛ̀ desee,
wen Wan mɛ yiwese nɛ́ kɔ-wa!#1 Pi 3.14
11«Kà o bíí nɛ́ da̧a̧‘nɛ́, kà wa nɛ́ usa bɔnɛ h’ɛ́nɛ́, in kà wa nɛ́ ɓira wen e nú‘nɛ́ wen zu'm, ɛ̀nɛ̀ yá nɛ̀ desee.#1 Pi 4.14 12Ɛ̀nɛ̀ yá nɛ̀ desee, ɛ̀nɛ̀ dé nyɛŋɛ wen mɔɔ-oi-tom k’ɛ́nɛ́ nɛ̀ pɛm'nɛ́ yiwese mɛ ɔ gasa. Nɛ́ hegɔ a̧ wa usa so nɛ̀ bɔnɛ ha̧ o wi-tɔ̧-wen oi nú Sɔ̧ nɛ̀ duka so zaŋnu nɛti h’ɛ́nɛ́.»#2 Kal Ny 36.16; Tom 7.52
Lizaŋ ko tɔŋ in sa̧a̧mɔ
(Zɔk Mk 9.50; Lk 14.34-35)
13«Ɛ́nɛ́ nɛ́ tɔŋ zu nù'ɛ. Kà kpɔra-tɔŋ nɛ́ gboo kaɗi, wi tɛ de héé ge ha̧ a̧ mɛ kpɔr nɛnɛ woyo ge nde? I̧i̧ tɔŋ‘i beka de tom ɓɔna. Kànà nɛ́ gbaia-a a taŋ ha̧ bíí mɛ i̧si̧ ɓɛɛ.#Mk 9.50; Lk 14.34-35
14«Ɛ́nɛ́ nɛ́ sa̧a̧mɔ zaŋnu’ɛ. Gasa ye nɛ̀ duk zu kaya hu̧si tɛ na.#Jn 8.12; 9.5 15Wi e wee tɛ lamba mɛ ba e ɗɔɔ mɔ na; wi e wee tɛ lamba mɛ ba e zu paku, ha̧ a̧ mɛ duk hi̧i̧ nyɛk nɛnɛ ti o bíí lɛŋ nɛ̀ a̧a̧ kɔ̧ tua ɛ̧.#Mk 4.21; Lk 8.16; 11.33 16Nɛ́ hegɔ ɛ̀nɛ̀ tɛ e ha̧ sa̧a̧mɔ k’ɛ́nɛ́ mɛ nyɛk ti o bíí ha̧ wa mɛ zɔk de deemɔ k’ɛ́nɛ́, ɓɛɛ ha̧ wa mɛ gasi Dáà k’ɛ́nɛ́ nɛ̀ a̧a̧ yiwese.»#1 Pi 2.12
Usamɔ zu heembea
17«K’ɛ́nɛ́ ta'e mi tɛ̀ɛ̀ mɛ yai nɛ́ heembea ko Moisɛ, kóó usamɔ ko o wi-tɔ̧-wen oi nú Sɔ̧ yinɛ na. Bó nɛ́ mi tɛ̀ɛ̀ mɛ yai wa yinɛ na. Mi tɛ̀ɛ̀ mɛ de ha̧ wa mɛ hɔ gba̧a̧. 18Nɛ́ kpasawen a̧‘m tɔ̧ h’ɛ́nɛ́; ŋgimbi nɛ̀ yiwese in nù biti duka-a, ŋma be geɗek yɔramɔ tɛ heembea, kóó tikiɗi, beka tik nù na hɔ wese nɛ̀ mɔ lɛŋ tɛ hɔ gba̧a̧.#Lk 16.17 19Wen hegɔ, wi nɛ̀ tɛ gbin ŋma be geɗek heembea kpɔk in nɛ̀ tɛ usi ɗoŋ gbina heembea ha̧ o ŋma bíí, tɛ duk nɛ́ sɔŋkur geɗek-wi tɛ Wan mɛ yiwese. Ɓɛɛ wi nɛ̀ tɛ mbo zu tɛ heembea, ɓɛɛ usa ha̧ o ŋma-a mɛ de hegɔ mbɛt, tɛ duk nɛ́ gasawi tɛ Wan mɛ yiwese. 20Mi tɔ̧ h’ɛ́nɛ́: kà mboozu k’ɛ́nɛ́ ha̧ Sɔ̧ nɛ́ gana ko o wi-usi-heembea in ko o Fariziɛn na, ɛ́nɛ́ beka ye tɛ Wan mɛ yiwese na.»
Usamɔ zu nyimsea
21«Ɛ́nɛ́ iŋa wa bàá tɔ̧ so ha̧ o zɔmdáa'e ndé: ‹Ká mɛ gbɛ zu na, ɓɛɛ kà ŋma bíí nɛ́ gbɛ̀ɛ́ zu, wi’ɛi tɛ nɛ̀ɛ́ ɓa wen-gbɛɛ-zu kɔ‘i ti gasa-gɔna-kita.›#Gboa-a 20.13; Wee-ɗoŋ-he 5.17 22Ɓɛɛ kɔ‘m, mi tɔ̧ h’ɛ́nɛ́, kóó o ndé nɛ̀ de nyimsea in nya-a̧ tɛ nɛ̀ɛ́ ɓa wen-aa ti kita. Wi nɛ̀ tɔ̧ ha̧ nya-a̧‘e ndé: ‹Mɛ́ nɛ́ mgbelewi!› tɛ nɛ̀ɛ́ ɓa kita dara kɔ̧-a̧‘i ti gasa-gɔna-kita.#5.22 tí gásá-gɔ́ná-kìtà: gásá-gɔ́ná-kìtà kó ó Juif nɛ́ Sanhédrin. Wi nɛ̀ da̧ nya-wi'e ndé: ‹Mɛ́ nɛ́ wi-dawa,› tɛ ye kɔ̧ wee Gehɛn. 23Kà mɛ̀ nɛ́ baa ha̧a̧mɔ kɔ-mɛ nɛnɛ si fara-ɗafi-sɔ̧, ɓɛɛ kà tɛ-mɛ nɛ́ mbaŋa ɗoŋ ŋma mɔ nɛ̀ a̧a̧ mgbara mɛ in nya-mɛ, 24mɛ̀ é ha̧a̧mɔ kɔ̧-mɛ ha̧ duk hi̧i̧ kaŋ; mɛ̀ sí ɗoŋ, mɛ̀ ɗáfí mgbara mɛ in nya-mɛ sɛka mɛ pia ɗoŋ mɛ ha̧ ha̧a̧mɔ kɔ-mɛ‘i ha̧ Sɔ̧. 25Kà ŋma bíí nɛ́ wula mɛ, mɛ̀ ɗáfí mɔ mgbara mɛ in a̧ nɛ̀ yuwar nɛ̀ haya-a wen ká à̧ nɛ́ɛ̀ e mɛ er wan-gɔn-kita, ɓɛɛ ká wan-gɔn-kita tɛ́ɛ̀ e kɔ‘i mɛ er wi-biro, ɓɛɛ wa pi̧i̧ mɛ zɔɓɔ. 26Nɛ́ kpasawen a̧‘m tɔ̧ ha̧ mɛ, mɛ beka gbo zɔɓɔ‘i na hɔ ŋgimbi nɛ̀ mɛ́ tɛ yoɓi nyamandoi'i hɔ tɛ dálà kpɔk sɛ́.»
Usamɔ zu dàlà
27«Ɛ́nɛ́ iŋa wa bàá tɔ̧ so'e: ‹Ká mɛ́ de dàlà na.›#Gboa-a 20.14; Wee-ɗoŋ-he 5.18 28Ɓɛɛ kɔ‘m mi tɔ̧ h’ɛnɛ, kóó o ndé nɛ̀ zɔka ŋma okoo ɓɛɛ de wɔ a̧, dèé dàlà in kóò‘i nɛ̀ kɔ̧́ see-aa mɛ kaɗi. 29Kà yí-mɛ́ mɛ wiiko nɛ́ ɔra mɛ mɛ de ɗaŋmɔ, nɛ̀ mɛ sɔ́tí a̧ yinɛ pí̧ taŋ nyɛi̧ nɛ̀ mɛ, wen gana so ha̧ ŋma mɔɔ-tɛ-mɛ kpɔk mɛ ɗaŋ gan pi̧i̧ mɛ kɔ̧ wee Gehɛn nɛ̀ oi kiitɛ-mɛ lɛŋ.#Mt 18.9; Mk 9.47 30Kà er-mɛ mɛ wiiko nɛ́ ɔra mɛ mɛ de ɗaŋmɔ, ɓɛɛ mɛ̀ ɓír a̧ yinɛ pí̧ taŋ nyɛi̧ nɛ̀ mɛ, wen gana so ha̧ ŋma dokoɗo-tɛ-mɛ kpɔk mɛ tik nù gan yea-a kɔ̧́ wee Gehɛn nɛ̀ oi kiitɛ-mɛ lɛŋ.»#Mt 18.8; Mk 9.43
Usamɔ zu ndaka-kóò
(Zɔk Mt 19.9; Mk 10.11-12; Lk 16.18)
31«Ɛ́nɛ́ iŋa wa bàá tɔ̧ mbɛt'e: ‹Kà ŋma bíí nɛ́ ndaka kóò kɔ‘i, a̧ tɛ ha̧ kànà kalata gbia-a ha̧ a̧.›#Wee-ɗoŋ-he 24.1-4; Mt 19.7; Mk 10.4 32Ɓɛɛ kɔ‘m, mi tɔ̧ h’ɛ́nɛ́, kà ŋma bíí ndak kóò kɔ‘i, kà bó‘e kóò‘i dèè nɛ́ dàlà na,#5.32 kà bó‘e kóò‘i dèé nɛ́ dàlà ná: ó ŋma texte tɔ̧a: kà bó nɛ́ kpàsá baa-ŋmaa á̧ wa bàá.#Mt 19.9; Mk 10.11-12; Lk 16.18; 1 Kɔr 7.10-11 a̧ ir nɛ́ kóò‘i mɛ de dàlà; ɓɛɛ kà ŋma bíí nɛ́ bàà kóò nɛ̀ wa ndaka'i, wi’ɛi de nɛ́ dàlà in kóò‘i.»
Usamɔ zu ha̧a̧nú
33«Ɛ́nɛ́ iŋa wa bàá tɔ̧̀ so ha̧ o zɔmdáa k’ɛ́ɛ́ mbɛt'e: ‹Ká mɛ́ kan mɔ nɛ̀ ndela na; á̧ kà mɛ̀ nɛ́ kàná mɔ nɛ̀ nin Sɔ̧, ɓɛɛ nɛ̀ mɛ̀ ɗáfí war-tɛ-mɛ ŋgaɓo.›#Lev 19.12; Tɔra-bíí 30.2; Wee-ɗoŋ-he 23.21 34Ɓɛɛ kɔ‘m, mi tɔ̧ h’ɛ́nɛ́, k’ɛ́nɛ́ kan géé káná mɔ na! K’ɛ́nɛ́ e er'nɛ si yiwese kan nɛ̀ mɔ na, wen yiwese nɛ́ damti ko Sɔ̧.#Jk 5.12; Es 66.1; Mt 23.22 35K’ɛ́nɛ́ ndal nù kan nɛ̀ mɔ na wen nù nɛ́ mɔɔ-e-ɗɔɔ-naŋ Sɔ̧. K’ɛ́nɛ́ kan mɔ nɛ̀ nin Jerusalɛm na, wen Jerusalɛm nɛ́ ye ko Gasa Wannu.#Es 66.1; Gima 48.2 36K’ɛ́nɛ́ kan bɛɗɛ-zu'nɛ na, wen ɛ́nɛ́ nyɛm mɛ de ha̧ mu̧i̧-zu'nɛ kpɔk mɛ kifi nɛ̀ bu-a kóó nɛ̀ tu̧-a̧ na mbɛt. 37‹Íì› k’ɛ́nɛ́ a̧ ɓɔ́n kànà nɛ́ ‹íí› ɓɛɛ ‹weyaa› k’ɛ́nɛ́ a̧ ɓɔ́n kànà nɛ́ ‹weyaa›, wen mɔ nɛ̀‘i tɔ̧ gan zu ‹íì› in ‹weyaa› tɛ́ nɛ̀ tɛ́ Wan-ɗaŋmɔ.»
Usamɔ zu kifa-er
(Zɔk Lk 6.29-30)
38«Ɛ́nɛ́ iŋa wa bàá tɔ̧̀ so'e: ‹Kà ŋma bíí nɛ́ oo yí-mɛ́, ɓɛɛ mɛ̀ ó yí-wi’ɛi mbɛt; kà ŋma bíí nɛ́ gbina gba̧a̧-nin-mɛ, ɓɛɛ mɛ̀ gbín gba̧a̧-nin-a̧ mbɛt.›#Gboa-a 21.24; Lev 24.20; Wee-ɗoŋ-he 19.21 39Ɓɛɛ kɔ‘m, mi tɔ̧ h’ɛ́nɛ́, k’ɛ́nɛ́ kifi er ha̧ o wi nɛ̀ de ɗaŋmɔ in'nɛ̀ɛ́ na. Kà ŋma bíí nɛ́ mbɛra ká̧ yí-mɛ́ mɛ wiiko, mɛ̀ zík ɓii-aa ha̧ a̧ mbɛt. 40Kà ŋma bíí nɛ́ kɔ̧ɔ̧ mɛ wuli mɛ wen báá geɗek laa kɔ-mɛ, mɛ̀ é ha̧ a̧ bá gasa-a mbɛt. 41Kà ŋma bíí nɛ́ baa mɛ nɛ̀ ŋgai mɛ tui tui kɔ̧-a̧ tɛ kilomɛtrɛ kpɔk, mɛ̀ túí tui'i nɛnɛ tɛ kilomɛtrɛ yiitoo. 42Kà bíí nɛ́ kɔfa ŋma mɔ er-mɛ, ɓɛɛ mɛ̀ há̧ mɔ‘i ha̧ a̧; ká mɛ́ zík ɗoŋ-mɛ e ha̧ wi nɛ̀ kɔ̧ɔ̧ mɛ gbak ŋma mɔ er-mɛ na.»
Kɔ̧ɔ̧ o wisɛn
(Zɔk Lk 6.27-28,32-36)
43«Ɛ́nɛ́ iŋa wa bàá tɔ̧̀‘e: ‹Mɛ̀ kɔ̧́ ŋma-mɛ, ɓɛɛ mɛ̀ sɛ́n wi nɛ̀ sɛn mɛ.›#Lev 19.18 44Ɓɛɛ kɔ‘m, mi tɔ̧ h’ɛ́nɛ́, ɛ̀nɛ̀ kɔ̧́ o wí nɛ̀ sɛn'nɛ́, ɛ̀nɛ̀ kɔ́fí Sɔ̧ wen o bíí nɛ̀ usi bɔnɛ h’ɛ́nɛ́, 45h’ɛ́nɛ́ mɛ ya nɛ́ o mgbák bem ko Dáà k’ɛ́nɛ́ nɛ̀ a̧a̧ yiwese, wen nɛ́ a̧ a̧ dé ha̧ wese mɛ nyɛk zu o wi-de-demɔ in o wi-ɗaŋ, in ha̧ kórò mɛ hɔ a zu o wi-de-mɔ nɛ̀ yuwar-a in o wi nɛ̀ de mɔ nɛ̀ yuwar-a na mbɛt. 46K’ɛ̀nɛ̀ nɛ́ kɔ̧ɔ̧ nɛ́ o wi nɛ̀ kɔ̧ɔ̧‘nɛ́ ɓɛɛ, nɛ́ ge yí-mɔ ge ɛ̀nɛ̀ tɛ kpa oi-aa ge? Bó nɛ́ o wi-ba-garama de hegɔ mbɛ́t na nde? 47K’ɛ̀nɛ̀ nɛ́ fana nɛ́ o nya'nɛ ɓɛɛ, nɛ́ ge demo ge ɛnɛ dea tɛ mɔ‘i gan o ŋma bíí ge? Bó nɛ́ o gɔni-dùk de hegɔ mbɛt na nde? 48Ɓɛɛ war k’ɛ́nɛ́, ɛ̀nɛ̀ dé nɛ́ demɔ ɓɔnsɛnɛ hee Dáà k’ɛ́nɛ́ nɛ̀ a̧a̧ yiwese ga.»#Lev 19.2; Wee-ɗoŋ-he 18.13
Currently Selected:
MATTHIEU 5: GB11DC
Highlight
Share
Copy

Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.