MATTHIEU 6

Usamɔ zu ha̧a̧mɔ

1«K’ɛ́nɛ́ de tom ko Sɔ̧ wen yí bíí ha̧ wa mɛ zɔn'nɛ́ na; wen k’ɛ̀nɛ̀ nɛ́ dee hegɔ, ɛ́nɛ́ beka kpa mɔɔ-oi-aa er Dáà k’ɛ́nɛ́ nɛ̀ a̧a̧ yiwese na.#Mt 23.5

2«Kà mɛ nɛ́ ha̧a̧ mɔ ha̧ wi-kɔsa, ɓɛɛ ká mɛ tɔ̧ wen-aa dam nù hee mɔ'ɔ nɛ̀ o wi nɛ̀ a̧a̧ nɛ̀ see yiitoo de sɛn kɔ̧ tua-mɔi̧a-a in nɛ̀ o yuwar nɛnɛ'ɛ ga na. Wa de hegɔ wen ha̧ bíí mɛ zɔn wa. Nɛ́ kpasawen a̧‘m tɔ̧́ h’ɛ́nɛ́, wa kpaa mɔɔ-oi kɔ-wa kaɗi. 3Ɓɛɛ kɔ-mɛ, kà mɛ há̧ mɔ ha̧ wi-kɔsa, ká er-mɛ mɛ gale íŋ mɔ nɛ̀ wíí-er-mɛ ha̧‘i na. 4Ha̧a̧mɔ kɔ-mɛ a̧ dúk nɛ̀ hu̧sa-a, ɓɛɛ Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa-a tɛ ha̧ mɔɔ-oi-aa ha̧ mɛ.»

Usamɔ zu kɔfa-sɔ̧

(Zɔk Lk 11.2-4)

5«K’ɛ̀nɛ̀ kɔ́fí Sɔ̧, ɓɛɛ k’ɛ́nɛ́ zɔk ɗoŋ mɔ ko o wi nɛ̀ a̧a̧ nɛ̀ see yiitoo na, wen wa kɔ̧ɔ̧ yora ŋgɔn kɔ̧́ tua-mɔi̧a-a in sasa-war kɔfi nɛ̀ Sɔ̧ wen ha̧ o bíí mɛ zɔk wa. Nɛ́ kpasawen a̧‘m tɔ̧ h’ɛ́nɛ́, wa kpaa mɔɔ-oi kɔ-wa kaɗi.#Lk 18.10-14 6Ɓɛɛ kɔ-mɛ, kà mɛ kɔ̧́ mɛ́ kɔfi Sɔ̧, mɛ̀ yé kɔ̧ gɔna-bɛr-tua kɔ-mɛ si ndaa-a mɛ, mɛ̀ kpé nú tua, ɓɛɛ mɛ̀ kɔ́fí Dáà kɔ-mɛ nɛ̀ duk nɛ̀ hu̧sa̧-a̧, ɓɛɛ Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa-a tɛ ha̧ mɔɔ-oi-aa ha̧ mɛ.»

7«K’ɛ̀nɛ̀ kɔfi Sɔ̧ ɓɛɛ k’ɛ́nɛ́ tɔ̧ dɔka wen hee mɔ'ɔ nɛ̀ o bíí nɛ̀ iŋ kpasa Sɔ̧ na de’ɛ ga na, wen wa ta kɔ-wa'e, nɛ́ tɛ̀ tɔ̧ɔ̧ dɔka wen a̧ Sɔ̧ tɛ zii nɛ̀ kɔfa-sɔ̧ kɔ-wa. 8K’ɛ́nɛ́ zɔk ɗoŋ mɔ kɔ-wa na, wen Dáà k’ɛ́nɛ́ iŋa mɔ n’ɛ̀nɛ̀ kɔ̧a̧ nɛti sɛk’ɛnɛ ak er a̧. 9Ɛ́nɛ́ nɛ́ tɛ̀ɛ́ kɔ̀fì Sɔ̧, ɛ̀nɛ̀ tɔ̧́ hee mɔ'ɔ ga:

‹Dáà k’ɛ́ɛ́ nɛ̀ a̧a̧ yiwese,

nin'nɛ a̧ húr.

10Ɛ̀nɛ̀ ɔ́ wan zu yɛ,

mɔ n’ɛ̀nɛ́ kɔ̧ɔ̧ a̧ dé sɛn zaŋnu

hee mɔ'ɔ nɛ̀ de yiwese mɛ ga.

11Ɛ̀nɛ̀ há̧ mɔɔ-nyɔŋ nɛ̀ tɛ nyɛm ɛ́ɛ́ sɔsɔɔ h’ɛ́ɛ́.

12Ɛ̀nɛ̀ é ɗaŋmɔ k’ɛ́ɛ́ h’ɛ́ɛ́

hee mɔ'ɔ n’ɛ̀ɛ̀ e nɛnɛ ha̧ o bíí nɛ̀ de ɗaŋmɔ in yɛɛ ga.

13K’ɛ́nɛ́ e ha̧ weamɔ mɛ gan yɛ na,#6.13a texte tɔ̧a̧‘e: K’ɛ́nɛ́ mgbɔ́ ɛ́ɛ́ yé nɛ̀nɛ́ tɛ̀ wea-mɔ ná.

ɓɛɛ ɛ̀nɛ̀ kpásí yɛ er Wan-ɗaŋmɔ.›

[Wen wan, in ŋgayamɔ in gasamɔ

nɛ́ k’ɛ́nɛ́ hegɔ ɓɔnsɛnɛ. Aamɛn.]

14«Wen k’ɛ̀nɛ̀ nɛ́ èè ɗaŋmɔ ko bíí ha̧ wa, Dáà k’ɛ́nɛ́ nɛ̀ a̧a̧ yiwese tɛ e ɗaŋmɔ k’ɛ́nɛ́ h’ɛ́nɛ́ mbɛt.#Mk 11.25-26 15Ɓɛɛ k’ɛ̀nɛ̀ nɛ́ èè ɗaŋmɔ ko bíí ha̧ wa na, Dáà k’ɛ́nɛ́ nɛ̀ a̧a̧ yiwese beka e ɗaŋmɔ k’ɛ́nɛ́ h’ɛ́nɛ́ na mbɛt.»

Usamɔ zu zima-yì

16«K’ɛ̀nɛ̀ zím yì, ɓɛɛ k’ɛ́nɛ́ kai sɔnti'nɛ hee mɔ'ɔ nɛ̀ o wi nɛ̀ a̧a̧ nɛ̀ see yiitoo de ga na, wen kɔ-wa wa kai nɛ́ sɔnti-wa ha̧ o bíí mɛ iŋ‘e wa zim nɛ́ yì. Nɛ́ kpasawen a̧‘m tɔ̧ h’ɛ́nɛ́, wa kpaa mɔɔ-oi kɔ-wa kaɗi. 17Ɓɛɛ kɔ-mɛ, kà mɛ zím yì, mɛ̀ táí yí-mɛ́ ɓɛɛ mɛ̀ sár zu-mɛ, 18wen ká o bíí tɛ́ɛ̀ iŋ‘e mɛ zim nɛ́ yì, ɓɛɛ nɛ́ Dáà kɔ-mɛ nɛ̀ duk nɛ̀ hu̧sa̧-a̧ a̧ tɛ́ iŋ ɓɛɛ; hegɔ, Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa̧-a̧ tɛ ha̧ mɔɔ-oi-aa ha̧ mɛ.»

Usamɔ zu kpaamɔ

(Zɔk Lk 12.33-34)

19«K’ɛ́nɛ́ kusi mbɔi k’ɛ́nɛ́ zaŋnu na, wen mɛ̀ nɛ́ fara nɛ̀ zɛmɛ in gbɛɛ-dua-mɔ ɗaŋ mɔ sɛnɛ; nɛ́ fara nɛ̀ o wi-zuzu kom tua zu̧ nɛ̀ mɔ sɛnɛ.#Jk 5.2-3 20Ɓɛɛ ɛ̀nɛ̀ kúsí mbɔi k’ɛ́nɛ́ a yiwese mɛ, wen fara'i zɛmɛ in gbɛɛ-dua-mɔ ɗaŋ mɔ sɛnɛ na, ɓɛɛ o wi-zuzu bó hi̧i̧ mɛ kom tua zu̧ nɛ̀ mɔ na mbɛt. 21Wen nɛ́ fara nɛ̀ mbɔi kɔ‘i a̧a̧ sɛnɛ a̧ see-wi duk sɛnɛ.»

Yí-wí nɛ́ sa̧a̧mɔ-tɛ-wi

(Zɔk Lk 11.34-36)

22«Yí-wí duk tɛ-wi hee lamba ga. Kà yí-mɛ́ zɔk mɔ nɛ̀ sa̧a̧-a̧, ɓɛɛ tɛ-mɛ duk tɛ sa̧a̧mɔ. 23Ɓɛɛ kà yí-mɛ́ de na, tɛ-mɛ lɛŋ duk tɛ tum. Kà sa̧a̧mɔ nɛ̀ duk tɛ-mɛ nɛ́ bòò nɛ́ tum, ɓɛɛ tum'i nɛ́ ɗuka tum.»

Sɔ̧ in mbɔi

(Zɔk Lk 16.13)

24«Bíí kpɔk nyɛ́m mɛ de tom ha̧ wan yiitoo na. A̧ tɛ sɛn ɛ̧ɛ̧ kpɔk’ɛ, ɓɛɛ a̧ tɛ kɔ̧ ɓii-aa; a̧ tɛ ndaɗi in ɛ̧ɛ̧ kpɔk’ɛ, ɓɛɛ a̧ ee ɓii-aa hee geemɔ ga. Ɛ́nɛ́ nyɛm mɛ de tom ha̧ Sɔ̧ in ha̧ mbɔi mbɛt na.»

Ee-ta nɛ̀ Sɔ̧

(Zɔk Lk 12.22-31)

25«Nɛ́ hegɔ s'am tɔ̧ h’ɛ́nɛ́‘e: tɛ̀ duka-a k’ɛ́nɛ́, k’ɛ́nɛ́ ai nú wen mɔ n’ɛ̀nɛ̀ tɛ nyɔŋ in mɔ n’ɛ̀nɛ̀ tɛ nɔ ká bá nɛ̀ laa-pi̧-tɛ na. Bó nɛ́ duka-kpasa gana nyɔŋmɔ na nde? Bó nɛ́ kiitɛ-wi gana laa na nde? 26Ɛ̀nɛ̀ zɔ́k o nɔ̧́í̧ nɛ̀ bu̧i̧ nɛ̀ yiwese’ɛ. Wa gun nyɔnɔ na, wa mɔi̧ nyɔnɔ a kɔ̧ dam na mbɛt, ɓɛɛ Dáà k’ɛ́nɛ́ nɛ̀ a̧a̧ yiwese dai nɛ́ wa. Bó nɛ́ ɛ́nɛ́ gana wa na nde? 27Nɛ́ o mgbara'nɛ́ tɛ̀ aia-nú kɔ‘i á̧ nyɛma mɛ e ŋma zɛ kpɔk zu zɛ nɛ̀ Sɔ̧ gɔna ha̧ a̧ kaɗi o?

28«Wen ge s’ɛ́nɛ́ ai nú‘nɛ́ wen laa-pi̧-tɛ ge? Ɛ̀nɛ̀ zɔ́k hee mɔ'ɔ nɛ̀ o gba-dɛŋ hɔ nɛnɛ kpɛɛfɔ'ɛ ga. Wa de tom na, wa pir laa na, 29ɓɛɛ mi tɔ̧ h’ɛ́nɛ́, kóó nɛ́ Salomɔŋ nɛ̀ oi gba zɔm mbɔi kɔ‘i lɛŋ pí̧ de laa nɛ̀ hɔɔ ŋmaa in o gba-dɛŋ na.#6.29 gba-dɛŋ: ó Juif zɔ̀ká ó gba-dɛŋ héé gba démɔ̀ gá.#1 Wan 10.4-7; 2 Kal Ny 9.3-6 30Kà Sɔ̧ nɛ́ ɗafa zɔ̧-zaŋbɛɛ nɛ̀ duk sɔsɔɔ, ɓɛɛ mɔɔsa̧ wi pi̧i̧ wee sɛnɛ dɔ́ á nù'ɛ, bó nɛ́ a̧ tɛ zɔk'nɛ́ gan zu i̧i̧ na nde? Ɛ́nɛ́ nɛ̀ kɔ̧ɔ̧ɗɔɔwen k’ɛ́nɛ́ dɔk na’ɛ!

31«K’ɛ́nɛ́ ai nú tɔ̧ nɛnɛ‘e, nɛ́ ge ɛ̀ɛ̀ tɛ nyɔŋ ge, nɛ́ ge ɛ̀ɛ̀ tɛ nɔ ge, nɛ́ ge ɛ̀ɛ̀ tɛ pi̧ tɛ yɛ ge nde na; 32wen nɛ́ o wi nɛ̀ iŋ kpasa Sɔ̧ na à̧ kíí o mɔɔ nɔ‘i. Ɓɛɛ Dáà k’ɛ́nɛ́ nɛ̀ a̧a̧ yiwese iŋa'e mɔɔ nɔ‘i nɛ́ o mɔ nɛ̀ tɛ gbak'nɛ mbɛt. 33Ɛ̀nɛ̀ kíí nɛ́ Wan ko Sɔ̧ in deemɔ nɛ̀ yuwar-a nɛti, ɓɛɛ o mɔɔ nɔ‘i lɛŋ a̧ tɛ ha̧ e zu-a h’ɛ́nɛ́. 34K’ɛ́nɛ́ ai nú wen mɔ mɛ sa̧a̧mɔ na, wen sa̧a̧mɔ a̧a̧ nɛ̀ aia-nú kɔ́‘i, wese kpɔk kpɔk a̧a̧ nɛ̀ bɔnɛ kɔ‘i mbɛt.»

Currently Selected:

MATTHIEU 6: GB11DC

Highlight

Copy