Popular Bible Verses from MATTHIEU 6

Share

Ɛ̀nɛ̀ kíí nɛ́ Wan ko Sɔ̧ in deemɔ nɛ̀ yuwar-a nɛti, ɓɛɛ o mɔɔ nɔ‘i lɛŋ a̧ tɛ ha̧ e zu-a h’ɛ́nɛ́.

K’ɛ́nɛ́ ai nú wen mɔ mɛ sa̧a̧mɔ na, wen sa̧a̧mɔ a̧a̧ nɛ̀ aia-nú kɔ́‘i, wese kpɔk kpɔk a̧a̧ nɛ̀ bɔnɛ kɔ‘i mbɛt.»

«Nɛ́ hegɔ s'am tɔ̧ h’ɛ́nɛ́‘e: tɛ̀ duka-a k’ɛ́nɛ́, k’ɛ́nɛ́ ai nú wen mɔ n’ɛ̀nɛ̀ tɛ nyɔŋ in mɔ n’ɛ̀nɛ̀ tɛ nɔ ká bá nɛ̀ laa-pi̧-tɛ na. Bó nɛ́ duka-kpasa gana nyɔŋmɔ na nde? Bó nɛ́ kiitɛ-wi gana laa na nde?

Ɓɛɛ kɔ-mɛ, kà mɛ kɔ̧́ mɛ́ kɔfi Sɔ̧, mɛ̀ yé kɔ̧ gɔna-bɛr-tua kɔ-mɛ si ndaa-a mɛ, mɛ̀ kpé nú tua, ɓɛɛ mɛ̀ kɔ́fí Dáà kɔ-mɛ nɛ̀ duk nɛ̀ hu̧sa̧-a̧, ɓɛɛ Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa-a tɛ ha̧ mɔɔ-oi-aa ha̧ mɛ.»

Ɛ́nɛ́ nɛ́ tɛ̀ɛ́ kɔ̀fì Sɔ̧, ɛ̀nɛ̀ tɔ̧́ hee mɔ'ɔ ga: ‹Dáà k’ɛ́ɛ́ nɛ̀ a̧a̧ yiwese, nin'nɛ a̧ húr. Ɛ̀nɛ̀ ɔ́ wan zu yɛ, mɔ n’ɛ̀nɛ́ kɔ̧ɔ̧ a̧ dé sɛn zaŋnu hee mɔ'ɔ nɛ̀ de yiwese mɛ ga.

Ɛ̀nɛ̀ há̧ mɔɔ-nyɔŋ nɛ̀ tɛ nyɛm ɛ́ɛ́ sɔsɔɔ h’ɛ́ɛ́.

Ɛ̀nɛ̀ é ɗaŋmɔ k’ɛ́ɛ́ h’ɛ́ɛ́ hee mɔ'ɔ n’ɛ̀ɛ̀ e nɛnɛ ha̧ o bíí nɛ̀ de ɗaŋmɔ in yɛɛ ga.

K’ɛ́nɛ́ e ha̧ weamɔ mɛ gan yɛ na, ɓɛɛ ɛ̀nɛ̀ kpásí yɛ er Wan-ɗaŋmɔ.› [Wen wan, in ŋgayamɔ in gasamɔ nɛ́ k’ɛ́nɛ́ hegɔ ɓɔnsɛnɛ. Aamɛn.]

«Wen k’ɛ̀nɛ̀ nɛ́ èè ɗaŋmɔ ko bíí ha̧ wa, Dáà k’ɛ́nɛ́ nɛ̀ a̧a̧ yiwese tɛ e ɗaŋmɔ k’ɛ́nɛ́ h’ɛ́nɛ́ mbɛt.

Ɛ̀nɛ̀ zɔ́k o nɔ̧́í̧ nɛ̀ bu̧i̧ nɛ̀ yiwese’ɛ. Wa gun nyɔnɔ na, wa mɔi̧ nyɔnɔ a kɔ̧ dam na mbɛt, ɓɛɛ Dáà k’ɛ́nɛ́ nɛ̀ a̧a̧ yiwese dai nɛ́ wa. Bó nɛ́ ɛ́nɛ́ gana wa na nde?

«K’ɛ́nɛ́ kusi mbɔi k’ɛ́nɛ́ zaŋnu na, wen mɛ̀ nɛ́ fara nɛ̀ zɛmɛ in gbɛɛ-dua-mɔ ɗaŋ mɔ sɛnɛ; nɛ́ fara nɛ̀ o wi-zuzu kom tua zu̧ nɛ̀ mɔ sɛnɛ. Ɓɛɛ ɛ̀nɛ̀ kúsí mbɔi k’ɛ́nɛ́ a yiwese mɛ, wen fara'i zɛmɛ in gbɛɛ-dua-mɔ ɗaŋ mɔ sɛnɛ na, ɓɛɛ o wi-zuzu bó hi̧i̧ mɛ kom tua zu̧ nɛ̀ mɔ na mbɛt. Wen nɛ́ fara nɛ̀ mbɔi kɔ‘i a̧a̧ sɛnɛ a̧ see-wi duk sɛnɛ.»

«Bíí kpɔk nyɛ́m mɛ de tom ha̧ wan yiitoo na. A̧ tɛ sɛn ɛ̧ɛ̧ kpɔk’ɛ, ɓɛɛ a̧ tɛ kɔ̧ ɓii-aa; a̧ tɛ ndaɗi in ɛ̧ɛ̧ kpɔk’ɛ, ɓɛɛ a̧ ee ɓii-aa hee geemɔ ga. Ɛ́nɛ́ nyɛm mɛ de tom ha̧ Sɔ̧ in ha̧ mbɔi mbɛt na.»

Kà Sɔ̧ nɛ́ ɗafa zɔ̧-zaŋbɛɛ nɛ̀ duk sɔsɔɔ, ɓɛɛ mɔɔsa̧ wi pi̧i̧ wee sɛnɛ dɔ́ á nù'ɛ, bó nɛ́ a̧ tɛ zɔk'nɛ́ gan zu i̧i̧ na nde? Ɛ́nɛ́ nɛ̀ kɔ̧ɔ̧ɗɔɔwen k’ɛ́nɛ́ dɔk na’ɛ!

Ɓɛɛ kɔ-mɛ, kà mɛ há̧ mɔ ha̧ wi-kɔsa, ká er-mɛ mɛ gale íŋ mɔ nɛ̀ wíí-er-mɛ ha̧‘i na. Ha̧a̧mɔ kɔ-mɛ a̧ dúk nɛ̀ hu̧sa-a, ɓɛɛ Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa-a tɛ ha̧ mɔɔ-oi-aa ha̧ mɛ.»

«K’ɛ́nɛ́ de tom ko Sɔ̧ wen yí bíí ha̧ wa mɛ zɔn'nɛ́ na; wen k’ɛ̀nɛ̀ nɛ́ dee hegɔ, ɛ́nɛ́ beka kpa mɔɔ-oi-aa er Dáà k’ɛ́nɛ́ nɛ̀ a̧a̧ yiwese na.

«K’ɛ̀nɛ̀ zím yì, ɓɛɛ k’ɛ́nɛ́ kai sɔnti'nɛ hee mɔ'ɔ nɛ̀ o wi nɛ̀ a̧a̧ nɛ̀ see yiitoo de ga na, wen kɔ-wa wa kai nɛ́ sɔnti-wa ha̧ o bíí mɛ iŋ‘e wa zim nɛ́ yì. Nɛ́ kpasawen a̧‘m tɔ̧ h’ɛ́nɛ́, wa kpaa mɔɔ-oi kɔ-wa kaɗi. Ɓɛɛ kɔ-mɛ, kà mɛ zím yì, mɛ̀ táí yí-mɛ́ ɓɛɛ mɛ̀ sár zu-mɛ, wen ká o bíí tɛ́ɛ̀ iŋ‘e mɛ zim nɛ́ yì, ɓɛɛ nɛ́ Dáà kɔ-mɛ nɛ̀ duk nɛ̀ hu̧sa̧-a̧ a̧ tɛ́ iŋ ɓɛɛ; hegɔ, Dáà kɔ-mɛ nɛ̀ zɔk mɔ nɛ̀‘i de nɛ̀ hu̧sa̧-a̧ tɛ ha̧ mɔɔ-oi-aa ha̧ mɛ.»