MATTHIEU 4

Wan-ɗaŋmɔ wee Jesu

(Zɔk Mk 1.12-13; Lk 4.1-13)

1Hɔ-ɗoŋ-aa, Sa̧a̧ Ɔmi mgbɔɔ Jesu si ŋga-gbárà mɛ̀ ha̧ Wan-ɗaŋmɔ mɛ we a̧.#Heb 2.18; 4.15 2Jesu zima yì zɛ ɓu-naar, wese nɛ̀ zɛ, ɓɛɛ wɔ ba tɛ-a. 3Nɛ́ mɔ'ɔ nɛ̀ Wan-ɔr-wi tɛ̀ɛ̀ pii katɛ a̧, ɓɛɛ tɔ̧ ha̧ a̧: «Kà mɛ̀ nɛ́ bòò nɛ́ Bem ko Sɔ̧, mɛ̀ tɔ̧́ ha̧ o ta nɔ'ɔ mɛ kifi brɛt.» 4Ɓɛɛ Jesu kífí nú ha̧ a̧: «Yɔramɔ tɔ̧ɔ̧‘e ndé: ‹Bó nɛ́ brɛt ɓɛɛ a̧ tɛ de ha̧ bíí mɛ duk kpasa na, ɓɛɛ mɛ̀ nɛ́ wen lɛŋ nɛ̀ gbo nɛ̀ nú Sɔ̧ a̧ de ha̧ bíí mɛ duk kpasa.› »#Wee-ɗoŋ-he 8.3

5Wan-ɗaŋmɔ mgbɔɔ a̧ nɛnɛ sitɛ Sá̧á̧ Yé,#4.5 Sá̧á̧ Yé: mɛ̀ nɛ́ Jerusalɛm ba a̧ e zu Tua ko Sɔ̧, 6ɓɛɛ tɔ̧ ha̧ a̧: «Kà mɛ̀ nɛ́ bòò nɛ́ Bem ko Sɔ̧, mɛ̀ kpíɗí tik nù wen Yɔramɔ tɔ̧a̧‘e:

‹A̧ tɛ ha̧ nú ha̧ o betom kɔ̧-a̧ wen zu mɛ́,

ɓɛɛ wa tɔia mɛ́ nɛ̀ er

wen ká naŋ-mɛ tɛ̀ɛ́ tò ta.› »#Gima 91.11-12

7Ɓɛɛ Jesu tɔ̧ ha̧ a̧: «Yɔramɔ tɔ̧ɔ̧ mbɛt'e: ‹Ká mɛ́ wé Gasa Wan Sɔ̧ kɔ-mɛ na.› »#Wee-ɗoŋ-he 6.16

8Nɛ́ mɔ'ɔ nɛ̀ Wan-ɗaŋmɔ mgbɔɔ Jesu nɛnɛ woyo si zu ŋma kusa kaya, ɓɛɛ usi wan zu nù'ɛ lɛŋ in gasamɔ kɔ-wa ha̧ a̧, 9ɓɛɛ tɔ̧ ha̧ a̧: «Kà mɛ̀ gbɛ zugur-mɛ nù ti'm mɛ gas'am, mi tɛ ha̧ mɔɔ nɔ'ɔ lɛŋ ha̧ mɛ.»

10Ɓɛɛ Jesu tɔ̧ ha̧ a̧: «Satan, mɛ̀ yú síɓí! Wen Yɔramɔ‘e: ‹Nɛ́ Gasa Wan Sɔ̧ kɔ-mɛ́ à̧ mɛ̀ tɛ́ zɔn; ɓɛɛ mɛ gasa nɛ́ a̧ kpɔk ɓɛɛ.› »#Wee-ɗoŋ-he 6.13

11Nɛ́ mɔ'ɔ nɛ̀ Wan-ɗaŋmɔ ee Jesu duk, ɓɛɛ o betom mɛ yiwese tɛ mɛ de tom ha̧ a̧.

Ku̧u̧naŋ tom ko Jesu

(Zɔk Mk 1.14-15; Lk 4.14-15)

12Ŋgimbi nɛ̀ Jesu zia'e wa pi̧i̧ Jean zɔɓɔ wó, a̧ sìí ɗoŋ si Galilee.#Mt 14.3; Mk 6.17; Lk 3.19-20 13A̧ kura Nazarɛt nɛ́ɛ̀ dúk Kafarnaum, sɛn ká̧ tɔp Galilee tɛ̀ nú Zabulɔŋ in Nɛftalii.#Jn 2.12 14A̧ dee hegɔ ha̧ wen nɛ̀ wi-tɔ̧-wen oi nú Sɔ̧ Esaii tɔ̧ɔ̧ so mɛ hɔ gba̧a̧:

15«Nú Zabulɔŋ, nú Nɛftalii,

yuwar si nú gba-tɔp,

nù nɛ̀ a̧a̧ kur Jurdɛn,

Galilee fara ko o gɔni-dùk!#Es 8.23—9.1

16Dukbíí nɛ̀ yaa so ti tum zɔka gasa sa̧a̧mɔ;

sa̧a̧mɔ nyɛka zu o bíí

nɛ̀ duka so ti tum ye ko o fio!»

17Tɛ́ ŋgimbi'i, Jesu ku̧u̧ naŋ tɔ̧ɔ̧ wen ko Sɔ̧ ɓɛɛ tɔ̧: «Ɛ̀nɛ̀ kpáí duka-a k’ɛ́nɛ́, wen Wan mɛ yiwese hɛɗa kaɗi.»#Mt 3.2

O kuti ŋgaiwi ko Jesu naar

(Zɔk Mk 1.16-20; Lk 5.1-11)

18Hee mɔ'ɔ nɛ̀ Jesu yara nɛ̀ ká̧ tɔp Galilee ga, a̧ zɔka o nya-wi yiitoo, Simɔŋ (nɛ̀ wa sa'e Pierre), in Andre. Wa pi̧ nɛ́ yɔk ɗɔɔ tɔp, wen wa nɛ́ o wi-gbɛ-zoro. 19Ɓɛɛ Jesu tɔ̧ ha̧ wa: «Ɛ̀nɛ̀ tɛ́ ɗoŋ am, ɓɛɛ mi tɛ de h’ɛ́nɛ́ mɛ ya nɛ́ o wi-mɔi̧-bíí.» 20Soɓee, wa ee o yɔk kɔ-wa dúk, ɓɛɛ wa nɛ́ ɗoŋ-aa.

21Jesu yaka siti ɓɛɛ nɛ́ɛ̀ kpa o ŋma nya-wi yiitoo woyo, Jak bem kó Zebedee in Jean. Wa ya kɔ̧ kombon kɔ-wa ɗafi nɛ̀ yɔk in dáà kɔ-wa, ɓɛɛ Jesu sa wa. 22Soɓee, wa ee kombon in dáà kɔ-wa dúk ɓɛɛ wa nɛ́ ɗoŋ Jesu.

23Jesu yara dam nú Galilee lɛŋ usi nɛ̀ mɔ nɛ̀ kɔ̧ tua-mɔi̧a-a nɛnɛ, tɔ̧ nɛ̀ De Mbe Wen Wan ko Sɔ̧, kpasi nɛ̀ o wi-zɛɛ lɛŋ in wi-nyimmɔ nɛtɛ nɛtɛ mgbara o bíí nù‘i.#Mt 9.35; Mk 1.39 24Nyɛrɛmɔ kɔ̧-a̧ pɛsa dam nú Sirii, ɓɛɛ wa kai o wi-zɛɛ lɛŋ nɛnɛ ha̧ a̧, in o wi nɛ̀ a̧a̧ nɛ̀ nyimmɔ nɛtɛ nɛtɛ, o wi nɛ̀ ɗaŋ-sɔ̧ a̧a̧ tɛ-wa, o wi-doe ká bá nɛ̀ o kara-wi, ɓɛɛ a̧ kpasi wa. 25Gba giiwi mɔi̧a tɛnɛ nɛ̀ Galilee, nɛ̀ Dekapol, nɛ̀ Jerusalɛm, nɛ̀ Judee in nɛ̀ kur Jurdɛn mɛ mbɛt ha̧ wa mɛ́ nɛ̀ ɗoŋ-aa.

Currently Selected:

MATTHIEU 4: GB11DC

Highlight

Copy