MATTHIEU 3
3
Usamɔ ko Jean Zui-bíí
(Zɔk Mk 1.1-8; Lk 3.1-18; Jn 1.19-28)
1Tɛ́ ŋgimbi'i Jean Zui-bíí hɔa, ɓɛɛ duk tɔ̧ nɛ̀ wen ko Sɔ̧ sɛn ŋga-gbárà Judee mɛ. 2A̧ tɔ̧a̧: «Ɛ̀nɛ̀ kpáí duka-a k’ɛ́nɛ́ wen Wan mɛ yiwese hɛɗa kaɗi.»#Mt 4.17; Mk 1.15
3Jean nɛ́ bíí nɛ̀ wi-tɔ̧-wen oi nú Sɔ̧ Esaii baa tɔ̧ so nɛnɛ‘e:
«Ŋma bíí hiɗi nɛ́ mɔ ŋga-gbárà mɛ‘e:
‹Ɛ̀nɛ̀ ɗáfí yuwar ko Gasa Wan,
ɛ̀nɛ̀ ɗáfí yuwar kɔ̧-a̧ nɛ̀ tana-a.› »#Es 40.3
4Jean duka pí̧ nɛ́ laa-buma-ŋgeloba, ɓɛɛ hɛr kanda guntir-wi. Mɔɔ-nyɔŋ kɔ̧-a̧ nɛ́ gba-dɔya in gɔrɔ.#2 Wan 1.8 5Ɓɛɛ o bíí Jerusalɛm in o bíí Judee ká bá nɛ̀ o bíí ká̧ Jurdɛn lɛŋ nɛ́ tɛ́ a̧. 6Wa gbara ɗaŋmɔ kɔ-wa, ɓɛɛ Jean zui wa sɛn ɗɔɔ Jurdɛn.
7Hee mɔ'ɔ n'aa zɔka o Fariziɛn in o Saduseɛn nɛ̀ nɛ́ tɛ́ a̧ nɛ̀ dɔka-a ha̧ a̧ mɛ zui wa ga, a̧ tɔ̧ɔ̧ ha̧ wa: «Ɛ́nɛ́ o kpar be-kóró nɔ'ɔ, o'o usa h’ɛ́nɛ́ mɛ yu nyimsea ko Sɔ̧ nɛ̀ tɛ‘i o?#Mt 12.34; 23.33 8Ɛ̀nɛ̀ dé mɔ nɛ̀ tɛ́ usi'e, ɛ́nɛ́ kpaia duka-a k’ɛ́nɛ́, 9ɓɛɛ k’ɛ́nɛ́ ta mɛ tɔ̧‘e: ‹Dáà k’ɛ́ɛ́ nɛ́ Abraham,› na, wen mi tɔ̧ h’ɛ́nɛ́, Sɔ̧ nyɛma mɛ de o ta nɔ'ɔ nɛ̀ bem ha̧ Abraham.#Jn 8.33 10Kpi̧i̧ hɛɗa kànà dɔ̧́ɔ̧́ mɛ gɔm te nɛ̀ oi kunin-a pi̧ nù kaɗi; hegɔ o te lɛŋ nɛ̀ wai de waya-a na, wi tɛ gɔm pi̧ tɛ wee.#Mt 7.19 11Mi zui kɔ‘m'nɛ́ nɛ̀ yì mɛ usi'e ɛ́nɛ́ kpaia duka-a k’ɛ́nɛ́ kaɗi, ɓɛɛ wi nɛ̀ tɛ́ ɗoŋ am'i tɛ zui kɔ‘i'nɛ́ nɛ̀ Sa̧a̧ Ɔmi in nɛ̀ wee, wen ŋgai kɔ̧-a̧ gana kɔ‘m. Kóó géé ndárà mɛ naŋ-a, mi nyɛm mɛ kpɔ̧i̧ na. 12Mɔɔ-pɛfi-mɔ a̧a̧ er-a mɛ pɛfi nɛ̀ alkamaari. A̧ tɛ kai gba̧a̧ alkamaari a kɔ̧́ dam, ɓɛɛ a̧ dɔɔ pumyulu-a tɛ́ wee nɛ̀ bi na kpoo nɛ kpoo.»
Zuia Jesu
(Zɔk Mk 1.9-11; Lk 3.21-22)
13Nɛ́ mɔ'ɔ nɛ̀ Jesu kura Galilee ɓɛɛ tɛ pii nú Jurdɛn ha̧ Jean Zui-bíí mɛ zui a̧. 14Jean kɔ̧ɔ̧ so mɛ bɛ̧ zuia a̧, ɓɛɛ tɔ̧ ha̧ a̧: «Nɛ́ ɛ́nɛ́ a̧ tɛ̀ɛ́ zui só‘m, ɓɛɛ s’ɛ́nɛ́ tɛ́ bɔ̀ɔ́ tɛ‘m ha̧‘m mɛ zui'nɛ́'ɛ héé ge?» 15Ɓɛɛ Jesu kifi nú ha̧ a̧: «Mɛ̀ é ha̧ mɔ hegɔ mɛ de kinii, wen h’ɛ́ɛ́ mɛ de mɔ nyɛm nɛ̀ ɗoŋ mɔ nɛ̀ Sɔ̧ kɔ̧a̧,» ɓɛɛ Jean de hee mɔ‘i ga. 16Ɗoŋ n'aa zuia a̧ kaɗi, Jesu daŋa ɗɔɔ yì, ɓɛɛ kà wa zɔk wó, yiwese hu̧i̧a̧, ɓɛɛ Jesu zɔk Ɔmi ko Sɔ̧ fara zira-a hee gbaku̧i̧ ga pii zu-wi, 17ɓɛɛ wa zii ŋma tiger nɛ̀ tɔ̧ wen tɛnɛ nɛ̀ yiwese mɛ‘e: «Wi’ɛ nɛ́ Bem kɔ‘m, n'am kɔ̧ɔ̧ nyɛmna; see-am lɛŋ a̧a̧ zu a̧.»#Ku̧u̧ 22.2; Gima 2.7; Es 42.1; Mt 12.18; 17.5; Mk 1.11; Lk 9.35
Currently Selected:
MATTHIEU 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
