1 WANNU 19
19
Elii yuu mɔ zu kaya Sinai
1Akab tɔ̧ɔ̧ mɔ nɛ̀ Elii dee lɛŋ ha̧ Jezabɛl in gbɛɛ o wi-tɔ̧-wen oi nú sɔ̧ Bal n'aa gbɛɛ nɛ̀ gba-paa lɛŋ. 2Jezabɛl toma ŋma betom ha̧ Elii mɛ tɔ̧ ha̧ a̧ ndé: «O sɔ̧ a̧ dé ŋgamɔ in am mɛ sa̧a̧mɔ tɛ kale ŋgimbi’ɛ, kà‘m nɛ́ dee mɔ in mɛɛ hee mɔ'ɔ nɛ̀ mɛ dee nɛnɛ in o wi-tɔ̧-wen oi nú sɔ̧ nɔ‘i ga na.» 3Kíì dee Elii, ɓɛɛ a̧ yu mɔ yak in wi-de-tom kɔ̧-a̧ mɛ kpasi. A̧ hɔɔ sɛn Bɛrseba nɛ̀ duk nù Juda, ɓɛɛ a̧ e wi-de-tom kɔ̧-a̧ hi̧i̧. 4A̧ nɛ̀ tɛ-a yaka si ŋga-gbárà; a̧ nɛɛ nɔ̀ zɛ kpɔk. N'aa hɔɔ ŋga-gbárà, a̧ duka nù ɗɔɔ gi̧ɔ̧ ŋma te. A̧ kɔfa sɔ̧, ɓɛɛ a̧ tɔ̧: «Gana'm kaɗi! Kinii, GASA WAN, ɛ̀nɛ̀ bá‘m, wen mi gan o dáà kɔ‘m na.»#Jɔn 4.3 5A̧ ɔɔ nù, ɓɛɛ a̧ ɔ ya ɗɔɔ gi̧ɔ̧ te'i. Ŋma betom ko Sɔ̧ tama a̧, ɓɛɛ tɔ̧ ha̧ a̧: «Mɛ̀ kúr, mɛ̀ nyɔ́ŋ mɔ!» 6A̧ zɔka mɔ, ɓɛɛ a̧ zɔk ŋma makala nɛ‘i dɔɔ zu wee-ta in dak yì katɛ a̧. A̧ nyɔŋa makala'i, nɔ yì, ɓɛɛ a̧ ɔ nù woyo. 7Betom ko GASA WAN pia ɗoŋ woyo, tam a̧ ɓɛɛ tɔ̧: «Mɛ̀ kúr, mɛ̀ nyɔ́ŋ mɔ, kà bo hegɔ na, nyɛi̧a nɔ̀ tɛ gan mɛ.» 8Elii kura ŋgɔn, nyɔŋ mɔ, ɓɛɛ nɔ yì. Ɗoŋ n'aa kpaa ŋgai tɛ nyɔŋmɔ‘i kaɗi, a̧ nɛ̀ɛ́ nɔ̀ zɛ ɓu-naar hegɔ hɔ zu kaya ko Sɔ̧#19.8,9 kaya ko Sɔ̧: mɛ̀ nɛ́ ŋma nin Sinai; ɓɛɛ ŋmafara mɛ̀ nɛ́ di̧i̧‘i mbɛt a̧ Moisɛ duka só kɔ̧ a̧ (zɔk Gboa-a 33.21-23). sɛn Hɔrɛb mɛ. 9A̧ hɔɔ nú di̧i̧, ye kɔ̧ a̧ ɓɛɛ ɔ nù.
GASA WAN tɔ̧ɔ̧ ha̧ a̧: «Elii, wen ge mɛ a̧a̧ hɛ̧ɛ̧ ge?»
10A̧ kifa nú: «Nɛ́ wɔ GASA WAN Sɔ̧ nɛ̀ a̧a̧ nɛ̀ ŋgayamɔ lɛŋ a̧ gbɛ‘m. O be Israɛl ee nɔɔ-tɔk k’ɛ́nɛ́ duk. Wa gbina o fara-ɗafi'nɛ, ɓɛɛ wa gbɛ o wi-tɔ̧-wen oi nú‘nɛ́ nɛ̀ gba-paa. Oi wi nɛ̀ ɓɔna kànà nɛ‘m ɓɛɛ, ɓɛɛ wa kii nɛ‘m mɛ gbɛ.»#Rɔm 11.3
11GASA WAN tɔ̧a̧: «Mɛ̀ gbó a̧ mɛ̀ yór zu kaya ti GASA WAN; zɔ́k, GASA WAN tɛ ɓir yak.» Ŋma ŋga búk duka ti GASA WAN sakari nɛ̀ o kaya, mbaŋ nɛ o ta. GASA WAN bo so kɔ‘i zaŋ buk'i na. 12Ɗoŋ naka nù, nɛ́ wee. GASA WAN bo so yí wee'i na. Ɗoŋ wee, nɛ́ giti ga̧a̧ búk a̧ yua.
13Ɓɛɛ tɛ zia giti ga̧a̧ búk'i, Elii kpee yí nɛ̀ gba-laa kɔ‘i. A̧ gboo yor nú di̧i̧, ɓɛɛ ŋma tiger bíí tɔ̧ ha̧ a̧: «Elii, wen ge mɛ a̧a̧ hɛ̧ɛ̧ ge?»
14A̧ kifa nú: «Nɛ́ wɔ GASA WAN Sɔ̧ nɛ̀ a̧a̧ nɛ̀ ŋgayamɔ lɛŋ a̧ gbɛ‘m. O be Israɛl ee nɔɔ-tɔk k’ɛ́nɛ́ duk. Wa gbina o fara-ɗafi'nɛ, ɓɛɛ wa gbɛ o wi-tɔ̧-wen oi nú‘nɛ́ nɛ̀ gba-paa. Oi wi nɛ ɓɔna kànà nɛ‘m ɓɛɛ, ɓɛɛ wa kii nɛ‘m mɛ gbɛ.»
15GASA WAN tɔ̧ɔ̧ ha̧ a̧: «Mɛ̀ nɛ̀, mɛ̀ bá yuwar kɔ-mɛ si war ŋga-gbárà Damas. Ŋgimbi nɛ mɛ tɛ hɔ, mɛ tɛ tɛn nɔ̧́ a zu Hazaɛl, de nɛ̀ wan Aram ha̧ a̧.#2 Wan 8.7-13 16Mɛ tɛ tɛn nɔ̧́ a zu Jɛhu bem ko Nimsi de nɛ̀ wan Israɛl ha̧ a̧, in mɛ̀ tɛ́n nɔ̧́ a zu Elisee bem ko Safat be Abɛl-Mɛhola, e nɛ̀ a̧ nɛ̀ wi-tɔ̧-wen oi nú Sɔ̧ oi mɛ.#2 Wan 9.2-6 17Jɛhu tɛ gbɛ o wi nɛ̀ tɛ yu ɗɔɔ gba-paa ko Hazaɛl, ɓɛɛ Elisee tɛ gbɛ o wi nɛ̀ tɛ yu ɗɔɔ gba-paa ko Jɛhu; 18ɓɛɛ mi tɛ e oi bíí booro-mɔɔrɔ-ɗoŋ-yiitoo sɛn Israɛl: mɛ̀ nɛ́ o wi nɛ gbɛ zugur nù ti Bal in nɛ dui nú-a na.»#Rɔm 11.4
Sɔ̧ saa Elisee
19Elii yaka hi̧i̧, ɓɛɛ nɛ́ɛ̀ kpa Elisee bem ko Safat fara waa fɔ. O ndai ɓu-yiitoo-zua-yiitoo wa nɛ mɔ ti a̧, ɓɛɛ a̧ wa nɛ mɔ nɛ̀ ŋma yiitoo. Elii ɓira nɛ̀ katɛ a̧, ɓɛɛ pi̧ gba-laa kɔ‘i tɛ-a. 20Elisee ee o ndai duk, ma yì si ɗoŋ Elii, ɓɛɛ tɔ̧: «Ɛ̀nɛ̀ é war ha̧‘m nɛ́ɛ̀ war nàà kɔ‘m in dáà kɔ‘m sɛka'm ndaka pata'nɛ́.» Elii tɔ̧ɔ̧ ha̧ a̧: «Mɛ̀ sí ɗoŋ! Nɛ́ ge a̧‘m dee in mɛɛ ge?»
21Elisee ee nɛ́ɛ́ ɗoŋ-aa duk, ɓɛɛ si ɗoŋ kai ndai yiitoo ɗafi nɛ̀ sɔ̧. A̧ kaia o te-hɛr-ndai gi nɛ̀ kpoo-aa, ɓɛɛ a̧ ha̧ ha̧ o nam kɔ̧-a̧ mɛ nyɔŋ. A̧ kura nɛ̀ ɗoŋ Elii, ɓɛɛ a̧ de tom ha̧ a̧.
Currently Selected:
1 WANNU 19: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.