1 WANNU 20
20
Biro in Aram
1Duka so ŋma ŋgimbi, ɓɛɛ Bɛn-Hadad, wannu Aram mɔi̧ o gíí wi-biro kɔ‘i lɛŋ. A̧ a̧a̧ so nɛ̀ o wannu ɓu-taar-zua-yiitoo, ba nɛ̀ o nyaŋa in o keekee-nyaŋa. A̧ daŋa, kɛr Samarii e nù, ɓɛɛ tik a̧ nɛ̀ biro. 2A̧ toma o betom si saaye ha̧ Akab wannu Israɛl 3mɛ tɔ̧ ha̧ a̧ ndé: «Bɛn-Hadad hee ndé, bu-mbɔi kɔ-mɛ in lɔr kɔ-mɛ duk nɛ́ kɔ‘i. O de kóò kɔ-mɛ in o de bem kɔ-mɛ duk nɛ́ kɔ‘i mbɛt.»
4Wannu Israɛl kifa nú: «Kànà hee mɔ'ɔ n’ɛnɛ tɔ̧a̧‘i ga, nyaa wannu; mi in mɔ kɔ‘m lɛŋ duk nɛ́ k’ɛ́nɛ́.»
5O betom pia ɗoŋ tɛ Akab woyo, ɓɛɛ tɔ̧: «Bɛn-Hadad hee ndé, wi toma ha̧ wa mɛ tɔ̧ ha̧ mɛ‘e, bu-mbɔi kɔ-mɛ, lɔr kɔ-mɛ, okoo kɔ-mɛ in o bem kɔ-mɛ, mɛ tɛ e wa ha'i. 6Hegɔ sa̧a̧mɔ, tɛ kpɔk ŋgimbi’ɛ, wi tɛ tom o wi-de-tom kɔ‘i sitɛ mɛ, ha̧ wa mɛ yaŋgi tua kɔ-mɛ in o tua ko o wi-de-tom kɔ-mɛ, ɓɛɛ wa tɛ kai o mɔ lɛŋ nɛ̀ mɛ tɛ zɔk nɛ̀ wɔ-a.»
7Wannu Israɛl saa o gasawi tɛ nù kɔ‘i lɛŋ, ɓɛɛ tɔ̧: «Ɛnɛ zɔka ɗaŋmɔ nɛ̀ dáa-wan’ɛ kii pii zu'm na nde! A̧ aka'm a̧‘m há̧ o kóò kɔ‘m, o bem kɔ‘m, bu-mbɔi kɔ‘m in lɔr kɔ‘m ha'i; ɓɛɛ bo nɛ mi bɛ̧a̧ na.»
8O gasawi in o bíí lɛŋ tɔ̧ɔ̧ ha̧ a̧: «K’ɛ́nɛ́ zii na, k’ɛ́nɛ́ kpɛk na mbɛt.»
9A̧ tɔ̧ɔ̧ ha̧ o betom ko Bɛn-Hadad: «Ɛ̀nɛ̀ tɔ̧́ ha̧ nyaa wannu ndé, mɔ lɛŋ n'aa aka er wi-de-tom kɔ̧-a̧‘i, kuti-a mi tɛ de; ɓɛɛ yiitoo-aa, mi nyɛm mɛ de na.»
O wi-de-tom sii ɓɛɛ wa ba kifa-nú nɛnɛ ha̧ a̧. 10Bɛn-Hadad toma tɔ̧ ha̧ Akab: «Kà oi fuunu Samarii ɓɔn nyɛm ha̧ o bíí kɔ‘m lɛŋ mɛ ɗu dun er, ɓɛɛ nɛ̀ o sɔ̧ a̧ dé ŋgamɔ in am.»
11Wannu Israɛl kifa nú: «Ɛ̀nɛ̀ tɔ̧́ kana! Nɛ́ bura kanda yinɛ guntir ŋmaa a'i iŋ nɛ̀ wiwii ɛ̧, ɓó nɛ́ ko hɛra-a ŋmaŋ nɛ̀ tɛ na!»
12Tɛ zia wen'i, Bɛn-Hadad nɛ̀ duka nɔ nɛ̀ mɔ in o wannu kɔ̧ tua-laa tɔ̧ɔ̧ ha̧ o wi-de-tom kɔ‘i: «Ɛ̀nɛ̀ kúr, ɛ̀nɛ̀ tík biro!» Ɓɛɛ wa nɛk mɛ tik ye nɛ̀ biro.
13Ŋma wi-tɔ̧-wen oi nú Sɔ̧ ɗɔŋa pii katɛ Akab wannu Israɛl, ɓɛɛ tɔ̧. «Wen nɛ GASA WAN tɔ̧ nɛ mɔ'ɔ: ‹Mɛ zɔka zɔm giiwi nɔ'ɔ nde? Sɔsɔɔ, mi tɛ a wa kɔ̧ er mɛ, ɓɛɛ mɛ tɛ iŋ‘e ndé, mi nɛ́ GASA WAN.› » 14Akab aka mɔ: «Ɛnɛ tɛ a wa kɔ̧ er o ha̧‘m o?» Ɓɛɛ wi’ɛi kifi nú: «GASA WAN'e, wi tɛ a wa kɔ̧ er o be-ŋgaiwi ko o wan zu o zika-nù.» Akab aka mɔ woyo: «Mɛ̀ nɛ́ o'o tɛ ku̧ biro o?»
A̧ kifa nú: «Mɛ̀ nɛ́ mɛ́!»
15Akab nɛ̀ɛ̀ mɛ zɔk o be-ŋgaiwi ko o wan zu o zika-nù lɛŋ; wa lɛŋ nɛ gɔmŋmaa-yiitoo-nɛ-ɓu-taar-zua-yiitoo. Hɔ-ɗoŋ-aa, a̧ nɛ̀ɛ̀ zɔk o gíí wi-biro Israɛl lɛŋ; wa lɛŋ nɛ booro-mɔɔrɔ-ɗoŋ-yiitoo.
16Wa ku̧u̧ naŋ biro ká wese a̧a̧ see-zu, ɓɛɛ Bɛn-Hadad gbɛ so kɔ‘i nɛ́ dɔ̧ɔ̧ kɔ̧ o tua-laa in o wannu ɓu-taar-zua-yiitoo nɛ̀ nɛ́ so in a̧. 17O be-ŋgaiwi ko o wan zu o zika-nù Israɛl gboo biro tɛnɛ, ɓɛɛ Bɛn-Hadad ak mɔ. Wa tɔ̧ɔ̧ ha̧ a̧ ndé: «O bíí gboo nɛ̀ Samarii.» 18Hegɔ a̧ tɔ̧a̧: «Wa nɛ́ gboo wen ga̧a̧mɔ, ɛ̀nɛ̀ káí wa nɛ̀ kpasa; kà wa nɛ́ gboo wen biro, ɛ̀nɛ̀ káí wa nɛ̀ kpasa mbɛt.»
19O wan nɛ̀ gboo so nɛ̀ saaye, nɛ́ o be-ŋgaiwi ko o wan zu o zika-nù, ɓɛɛ oi dɔka wi-biro ndak so nɛ́ pata wa. 20Kóó o ndé gɔm so nɛ wisɛn kɔ‘i. O be Aram yuu mɔ, ɓɛɛ o be Israɛl ndak ɗoŋ wa. Bɛn-Hadad wannu Aram yuu mɔ yak nɛ̀ nyaŋa, in o ŋma wi-daŋ-nyaŋa. 21Wannu Israɛl gboo gbɛ nɛ̀ o nyaŋa, ɗaŋ nɛ̀ o keekee-nyaŋa. A̧ kuma o be Aram nyɛmna.
22 Wi-tɔ̧-wen oi nú Sɔ̧ ɗɔla pii katɛ wannu Israɛl, ɓɛɛ tɔ̧ ha̧ a̧: «Mɛ̀ nɛ́ kànà siti nɛ̀ nɔɔ-ŋgiɗi, ɓɛɛ mɛ̀ tá mɔ zu mɔ nɛ̀ mɛ tɛ de, wen bin-mgba-pɛ, wannu Aram tɛ ba zu dúk nɛ̀ mɛ woyo.»
War yiitoo baa biro dúk nɛ̀ Aram
23O wi-de-tom ko wannu Aram tɔ̧ɔ̧ ha̧ a̧: «Sɔ̧ kɔ-wa nɛ́ sɔ̧ kaya. Nɛ́ mɔ‘i a̧ dee ha̧ wa mɛ ŋgai gan yɛ. Ɛ̀ɛ̀ bí wa bɔkɔ-nù; nɛ̀ mbetɛ, ɛɛ tɛ ŋgai gan wa. 24Ɛ̀nɛ̀ dé hee mɔ'ɔ ga. Ɛ̀nɛ̀ fó o wannu yinɛ fara kɔ-wa, ɛ̀nɛ̀ kpáí wa nɛ̀ o wi-duk-zu zika-nù. 25Ɛ́nɛ́ nɛ̀ tɛ‘nɛ́, ɛ̀nɛ̀ hók o wi-biro nɛ̀ ŋgaia nyɛm ŋmaa in o kuti-a nɛ̀ wa kuma so er'nɛ́ in o nyaŋa gú nɛ̀ o keekee-nyaŋa mbɛt, ɓɛɛ ɛ̀ɛ̀ bí wa bɔkɔ-nù; nɛ̀ mbetɛ ɛ́ɛ́ tɛ ŋgai gan wa.»
A̧ zia wen kɔ-wa, ɓɛɛ a̧ nɛ́ ɗoŋ taamɔ kɔ-wa. 26Tɛ mbe pɛ, Bɛn-Hadad nɛ̀ɛ̀ zɔk o wi-biro Aram, ɓɛɛ a̧ daŋ si Afɛk mɛ nɛ̀ɛ́ bi Israɛl. 27Wannu Akab mbɛt nɛ̀ɛ̀ zɔk o wi-biro Israɛl, wa kaia o mɔɔ-biro kɔ-wa ɓɛɛ wa we ti o be Aram. O be Israɛl tɛɛ ba gbagari sɛn ti wa, hee o duk gbadua yiitoo ga, ɓɛɛ ká o be Aram gbisi sinɛ delele.
28Bíí ko Sɔ̧ ɗɔla piiti, ɓɛɛ tɔ̧ ha̧ wannu Israɛl: «Mɔ nɛ̀ GASA WAN tɔ̧ nɛ mɔ'ɔ: ‹Hee mɔ'ɔ nɛ̀ o be Aram tɔ̧a̧‘e, GASA WAN nɛ́ Sɔ̧ kaya, nɛ̀ bó nɛ́ Sɔ̧ bɔkɔ-nù na ga, mi tɛ e wa lɛŋ kɔ̧ er'nɛ́, ɓɛɛ ɛnɛ tɛ iŋ ndé, mi nɛ́ GASA WAN.› »
29Wa baa gbagari ti ŋmaa tɛ zɛ mɔɔrɔ-ɗoŋ-yiitoo. Tɛ mɔɔrɔ-ɗoŋ-yiitoo ɔɔ-zɛ, biro ku̧u̧ naŋ, ɓɛɛ o be Israɛl gbɛ o wi-biro Aram tɛ bíí booro-gɔmŋmaa, kpɔk wese. 30O wi nɛ̀ ɓɔna kpasa yuu mɔ yak si saaye Afɛk, ɓɛɛ garo gbin si zu o wi nɛ̀ ɓɔna so kpasa booro-ɓu-yiitoo-zua-mɔɔrɔ-ɗoŋ-yiitoo'i.
Bɛn-Hadad yuu so kɔ‘i mɔ, ɓɛɛ nɛ́ɛ̀ ye saaye hu̧si nɛnɛ nɛ̀ kɔ̧ tua nɛnɛ. 31O wi-de-tom kɔ̧-a̧ tɔ̧ɔ̧ ha̧ a̧: «Ɛɛ zia nɛ̀ wa tɔ̧a̧ so ndé, o wannu nutua Israɛl so nɛ́ o wannu nɛ̀ de ko nyɛmna. Ɛ̀ɛ̀ már bufu, ɛ̀ɛ̀ á er yɛ gba̧a̧ zu yɛ, ɓɛɛ ɛ̀ɛ̀ wé ti wannu Israɛl; ŋma ɓɛɛ a̧ beka gbɛ‘nɛ́ na.» 32Wa mara bufu, a er gba̧a̧ zu-wa hɔ tɛ wannu Israɛl, ɓɛɛ wa tɔ̧: «Wi-de-tom k’ɛ́nɛ́ Bɛn-Hadad tɔ̧ɔ̧ ndé, wi ák nɛ́ duka-kpasa!»
Akab aka mɔ: «A̧ biti kpasa? A̧ wan nɛ́ nya'm gɔ!»
33Tɛ wen'i, o wi nɔ‘i kpaa ŋma be de kifa nú wen; ɓɛɛ wa ŋmaŋ zaŋ-aa tɔ̧ nɛnɛ: «Nɛ́ mɔ‘i, Bɛn-Hadad nɛ nya'nɛ́.»
Akab tɔ̧a̧: «Ɛ̀nɛ̀ nɛ́ɛ̀ sá a̧.» Bɛn-Hadad gboo pii tɛ a̧, ɓɛɛ Akab ba a̧ e zu keekee-nyaŋa kɔ‘i. 34Bɛn-Hadad tɔ̧ɔ̧ ha̧ a̧: «Mi ha̧a̧ o ye nɛ̀ dáà kɔ‘m baa so er dáà kɔ-mɛ siɗoŋ; mɛ tɛ de o fara-ɗɔr-mɔ kɔ-mɛ sɛn Damas hee mɔ'ɔ nɛ dáà kɔ‘m dee so sɛn Samarii ga.»
Ɓɛɛ Akab tɔ̧: «War kɔ‘m, mi tɛ e ha̧ mɛ mɛ yak wen nɔɔ-tɔk'ɛ.» Akab nɔɔ tɔk in a̧, ɓɛɛ e a̧ yak.
Ŋma wi-tɔ̧-wen oi nú Sɔ̧ tɔ̧ɔ̧ wen ha̧ Akab
35Ŋma bíí mgbara o wi-tɔ̧-wen oi nú Sɔ̧ tɔ̧ɔ̧ ha̧ sɛm kɔ‘i nɛ̀ ɗoŋ tɔ̧ɔ̧-wen ko GASA WAN hee mɔ'ɔ ga: «Mi aia nú ha̧ mɛ, mɛ̀ gɔ́m am.» Ɓɛɛ wi’ɛi bɛ̧ gɔma a̧. 36Wi-tɔ̧-wen oi nú Sɔ̧ tɔ̧ɔ̧ ha̧ wi’ɛi: «Hee mɔ'ɔ nɛ̀ mɛ zii wen ko GASA WAN na ga, ŋgimbi nɛ mɛ tɛ e'm duk, dila tɛ gbɛ mɛ.» Wi’ɛi yaka ɗoŋ-aa tɛ nyɛi̧ na, dila kpaa a̧ ɓɛɛ gbɛ a̧.#1 Wan 13.24 37Wi-tɔ̧-wen oi nú Sɔ̧ kpaa ŋma mbe bíí woyo, ɓɛɛ tɔ̧ ha̧ a̧: «Mi aia nú ha̧ mɛ, mɛ̀ gɔ́m am.» Wi’ɛi gɔma a̧, ɓɛɛ e da̧i̧ tɛ-a.
38Nɛ́ mɔ'ɔ nɛ̀ wi-tɔ̧-wen oi nú Sɔ̧‘i yaka nɛ́ɛ̀ pɛm wannu Akab sɛn yuwar. A̧ dee so ha̧ wa mɛ yɔ yí-a, pi̧ nɛ̀ ŋma laa, kpe nɛ̀ yí-a. 39Ŋgimbi nɛ wannu yaka, wi-tɔ̧-wen oi nú Sɔ̧ hiɗa mɔ sitɛ a̧ hee mɔ'ɔ ga: «Wi-de-tom k’ɛ́nɛ́ gboo so mɛ bi biro mbɛt; ɓɛɛ ŋma wi-yu-biro mgbɔ ŋma bíí tɛnɛ ha̧‘m tɔ̧ nɛnɛ‘e: ‹Mɛ̀ zɔ́k wi’ɛ! Kà a̧ yu mɔ yak er-mɛ, wa tɛ gbɛ mɛ oi nú-a, kóó mɛ tɛ yoɓi kɔya bu-mbɔi booro-taar.› 40Ŋgimbi nɛ wi-de-tom k’ɛ́nɛ́ de so nɛ́ mɔ siɓi-siɓi’ɛ, wi’ɛi yuu mɔ yak.»
Wannu Israɛl tɔ̧ɔ̧ ha̧ a̧: «Kà gɔna kita kɔ-mɛ nɛ́ bòò nɛ́ mɔ‘i, mɛ tɔ̧ɔ̧ mɔ kɔ-mɛ kaɗi!»
41 Wi-tɔ̧-wen oi nú Sɔ̧ baa laa nɛ̀ hu̧si yí-a'i yinɛ nɛ̀ haya-a, ɓɛɛ wannu Israɛl iŋ ndé, nɛ́ ŋma mgbara o wi-tɔ̧-wen oi nú Sɔ̧. 42Ɓɛɛ wi’ɛi tɔ̧ ha̧ a̧: «Wen nɛ̀ GASA WAN tɔ̧ nɛ́ mɔ'ɔ: ‹Hee mɔ'ɔ nɛ̀ mɛ ee ha̧ wi n'am ee so ɗɔɔ fom mɛ yu mɔ yak nɛ̀ ɗoŋ er-mɛ ga, mɛ tɛ duk oi nú-a, ɓɛɛ o bíí kɔ-mɛ duka oi nú o bíí kɔ̧-a̧.› »
43Wannu Israɛl sii ɗoŋ sitɛ kɔ‘i sɛn Samarii nɛ̀ ga̧a̧-tɛ in tu̧u̧-see.
Currently Selected:
1 WANNU 20: GB11DC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.