1 WANNU 18
18
Elii in o wi-tɔ̧-wen oi nú sɔ̧ Bal
1Zɛ nɛ̀ dɔka-a ɗoŋ mɔ‘i, ɓɛɛ GASA WAN tɔ̧ wen ha̧ Elii tɛ taar pɛ, hee mɔ'ɔ ga: «Mɛ̀ nɛ́ sɛn tɛ Akab; mi tɛ de ha̧ kórò mɛ hɔ zu nù.» 2Hegɔ, Elii yaka tɛ Akab.
Ŋgimbi'i, kaɓa tika so nù sɛn Samarii. 3Akab saa Obadia nɛ̀ duka so nɛ́ gasa wi-duk-zu tua-wan. Obadia yu so kɔ‘i GASA WAN nyɛmna. 4Hegɔ ŋgimbi nɛ Jezabɛl kuma so nɛ̀ wi-tɔ̧-wen oi nú Sɔ̧ ko GASA WAN, Obadia kaia so o wi-tɔ̧-wen oi nú Sɔ̧ gɔmŋmaa, ɓɛɛ a̧ hu̧si wa dùk-aa ɓu-mɔɔrɔ ɓu-mɔɔrɔ, sɛn kɔ̧ di̧i̧ yiitoo, ɓɛɛ duk ha̧ nɛ̀ brɛt in yì ha̧ wa. 5Akab tɔ̧ɔ̧ ha̧ Obadia: «Ɛ̀ɛ̀ yár dam fara lɛŋ si o zu-zer lɛŋ, nɛ̀ kɔ̧ o gboŋgo lɛŋ; ŋmafara ɛɛ tɛ kpa zɔ̧ wen ha̧a̧-a̧ ha̧ o nyaŋa in o sunda, ɓɛɛ ɛɛ beka gɔn o ŋma mɔ-dai k’ɛɛ na.» 6Wa kɛ̧ɛ̧ nù ha̧ wa mɛ yar dam sɛnɛ. Akab baa yuwar kɔ‘i ɛ̀nɛ̀, Obadia ba yuwar kɔ‘i ɛ̀nɛ̀ mbɛt.
7Ŋgimbi nɛ Obadia a̧a̧ yuwar, Elii tɛɛ kpa a̧. Obadia iŋa ti a̧; a̧ guu yí-a nù, ɓɛɛ a̧ ak mɔ: «Nɛ̀ mbetɛ, mɛ̀ nɛ́ ɛnɛ nyaa Elii nde?»
8A̧ kifa nú ha̧ a̧: «Mɛ nɛ́ mi! Mɛ̀ nɛ́ɛ̀ tɔ̧́ ha̧ wan kɔ-mɛ‘e, mi a̧ nɛ‘i!»
9Obadia tɔ̧a̧: «Mi dee ɗaŋmɔ tɛ ge s’ɛnɛ e'm wi-de-tom k’ɛ́nɛ́ er Akab, ha̧ a̧ mɛ gbɛ‘m ge? 10Hee GASA WAN Sɔ̧ k’ɛ́nɛ́ duk kpasa ga, ŋma dukbíí, kóó ŋma nù nɛ̀ wan kɔ‘m Akab toma so'm mɛ kii'nɛ́ sɛnɛ na, bo na. Ŋgimbi nɛ‘i tɔ̧ so ha̧ a̧: ‹Elii bo hi̧i̧ na wo,› ɓɛɛ a̧ dee kànà ha̧ dukbíí nù‘i mɛ kan mɔ ndé, wa kpa'nɛ́ na. 11Kinii, ɛnɛ tɔ̧ɔ̧ ha̧‘m'e, a̧‘m nɛ́ɛ̀ tɔ̧ ha̧ wan kɔ‘m ndé, wi Elii, wi a̧ nɛ‘i! 12Ɓɛɛ ŋgimbi n'am be tɛ̀ɛ́ e'nɛ́ duk, ɔmi ko GASA WAN tɛ ba'nɛ́ si ŋma fara n'am beka iŋ na, ɓɛɛ kɔ‘m mi tɛ nɛ̀ɛ́ mbaŋ tɛ Akab; ŋgimbi n'aa beka kpa'nɛ́ na, a̧ tɛ gbɛ‘m. Ɛnɛ iŋa kànà‘e wi-de-tom k’ɛ́nɛ́ yu nɛ GASA WAN ku̧u̧naŋ-a nɛ̀ bem mɛ. 13Bó nɛ́ ɛnɛ iŋa so mɔ n'am dea ŋgimbi nɛ̀ Jezabɛl gbɛɛ so nɛ̀ o wi-tɔ̧-wen oi nú Sɔ̧ ko GASA WAN’ɛ na nde? Mi hu̧sa̧ o wi-tɔ̧-wen oi nú Sɔ̧ ko GASA WAN gɔmŋmaa, dùk-aa ɓu-mɔɔrɔ ɓu-mɔɔrɔ sɛn kɔ̧ di̧i̧ yiitoo, ɓɛɛ mi ha̧ brɛt in yì ha̧ wa. 14Ɓɛɛ kinii, ɛnɛ‘e a̧‘m nɛ́ɛ̀ tɔ̧ ha̧ wan kɔ‘m'e, Elii a̧ nɛ‘i! Bo nɛ a̧ tɛ gbɛ‘m na?»
15Elii tɔ̧a̧: «Hee GASA WAN nɛ̀ a̧a̧ nɛ ŋgayamɔ lɛŋ, n'am de tom ha̧ a̧ duk kpasa ga, mi tɛ hɔ ti Akab sɔsɔɔ.»
16Obadia nɛɛ mbaŋ tɛ Akab, ɓɛɛ a̧ we ti Elii tɛnɛ. 17Ŋgimbi nɛ Akab zɔka Elii, a̧ tɔ̧ɔ̧ ha̧ a̧: «Mɛ̀ nɛ́ mɛ nɛ̀ mbetɛ nde, mɛ wi-tui-ɗaŋmɔ pi̧ zu Israɛl'ɛ?»
18Elii tɔ̧ɔ̧ ha̧ a̧: «Mi bó nɛ́ wi-tui-ɗaŋmɔ pi̧ zu Israɛl na. Mɛ̀ nɛ́ mɛ́ in o bíí nutua ko dáà kɔ-mɛ; wen ɛnɛ ee so heembea ko GASA WAN duk, mɛ́ nɛ̀ ɗoŋ géé-sɔ̧ Bal. 19Kinii, mɛ̀ mɔ́í̧ o be Israɛl lɛŋ pii katɛ‘m sɛn zu kaya Karmɛl in o wi-tɔ̧-wen oi nú sɔ̧ Bal gɔmŋmaa-naar-nɛ-ɓu-mɔɔrɔ ba nɛ̀ o wi-tɔ̧-wen oi nú sɔ̧ Asɛra gɔmŋmaa-naar nɛ̀ nyɔŋ mɔ zu taŋe-nyɔŋ-mɔ ko Jezabɛl.»
20Akab toma sa o be Israɛl lɛŋ, ɓɛɛ a̧ mɔi̧ o wi-tɔ̧-wen oi nú sɔ̧ nɔ‘i pii zu kaya Karmɛl. 21Elii ɗɔla pii katɛ dukbíí, ɓɛɛ tɔ̧: «Ɛnɛ tɛ duk bɔɔ mgbitiŋ mɛ gese ge? GASA WAN a̧ boo nɛ́ Sɔ̧, ɓɛɛ n’ɛnɛ nɛ́ ɗoŋ-aa. Kà nɛ́ bòò nɛ́ Bal, ɓɛɛ ɛ́nɛ́ nɛ̀ɛ́ ɗoŋ-aa.» Ɓɛɛ dukbíí kifi nú ha̧ a̧ kóó kpɔk na. 22Elii tɔ̧ɔ̧ ha̧ dukbíí: «Mi nɛ́ kpɔk wi-tɔ̧-wen oi nú GASA WAN; ɓɛɛ o wi-tɔ̧-wen oi nú sɔ̧ Bal nɛ́ gɔmŋmaa-naar-nɛ-ɓu-mɔɔrɔ. 23Wa a̧ há̧ wiwii ndai yiitoo h’ɛ́ɛ́. Wa a̧ hók kɔ-wa kpɔk, wa a̧ a̧k a zu fara-ɗafi-sɔ̧ ɓɛɛ ká wa ye wee ɗɔɔ-aa na; ɓɛɛ kɔ‘m, mi tɛ de kpɔk mɔ‘i nɛ ɓii ndai; mi tɛ a̧k a zu fara-ɗafi-sɔ̧, ɓɛɛ mi beka ye wee ɗɔɔ-aa na mbɛt. 24Wa a̧ sá nin sɔ̧ kɔ-wa, ɓɛɛ kɔ‘m, mi tɛ sa nɛ́ nin GASA WAN. Wan nɛ tɛ kifi nú nɛ̀ wee, ɓɛɛ a̧ nɛ́ Sɔ̧.» Dukbíí nɛ̀ oi-aa lɛŋ kifa nú: «Wen'i ɔ dee!»
25Elii tɔ̧ɔ̧ ha̧ o wi-tɔ̧-wen oi nú Bal: «Ɛ̀nɛ̀ hók wiwii ndai, ɓɛɛ ɛ̀nɛ̀ kú̧ naŋ tom k’ɛ́nɛ́, wen nɛ́ ɛ́nɛ́ a̧ dɔka gan am. Ɛ̀nɛ̀ sá nin sɔ̧ k’ɛ́nɛ́, ɓɛɛ k’ɛ́nɛ́ ye wee na.»
26Wa baa wiwii ndai nɛ̀ wa ha̧a̧ ha̧ wa; wa ku̧u̧ naŋ tom, sa nɛ̀ nin Bal, ku̧u̧naŋ-a nɛ̀ tutuyɛ hegɔɔ wese hɔ see zu tɔ̧ nɛnɛ: «Bal, ɛ̀nɛ̀ kífí nú h’ɛ́ɛ́!» Wa zii kóó ŋma tiger, kóó ŋma bíí nɛ̀ kifa nú na, ɓɛɛ wa tik yɔyɛ ká̧ fara-dɔ-kpoo-sɔ̧ nɛ̀ wa mboo so.
27Ŋgimbi nɛ wese hɔɔ see zu, Elii mama wa, ɓɛɛ tɔ̧: «Ɛ̀nɛ̀ híɗí mɔ nɛ̀ ŋgaya-a, a̧ nɛ́ Sɔ̧; a̧ a̧a̧ nɛ̀ o ŋma tom, mana a̧ bo hi̧i̧ na. A̧ hɛɗa nɛ̀ ŋma nɔ̀; kóó ŋmafara a̧ ɔ nɛ ya, ha̧ a̧ tún sɛ.» 28Wa hiɗa mɔ nɛ̀ ŋgaya-a, ɓɛɛ hee yuwar deemɔ kɔ-wa usi ga, o ndé ee da̧i̧ tɛ-wi nɛ̀ tɛ-wi nɛ̀ gba-paa in sɛ́ɛ̀, hɔ fara nɛ̀ tɛ-wa lɛŋ fok fok nɛ̀ tɔk. 29Nɛ̀ wese gira, wa aia nú ha̧ Bal siti hɔ ŋgimbi ha̧a̧mɔ-ɗafi-sɔ̧, ɓɛɛ wa zii ŋma tiger, kóó ŋma bíí nɛ̀ kifa nú, kóó ŋma mɔ na.
30Elii tɔ̧ɔ̧ ha̧ dukbíí nɛ̀ oi-aa lɛŋ: «Ɛ̀nɛ̀ ɗɔ́lí pii katɛ‘m!» Ɓɛɛ dukbíí nɛ̀ oi-aa lɛŋ ɗɔli pii katɛ a̧. A̧ ɗafa fara-ɗafi-sɔ̧ ko GASA WAN nɛ̀ wa ɗaŋa so; 31a̧ kaia o ta ɓu-zua-yiitoo nyɛm nɛ̀ ɗoŋ dɔka o bem ko Jakob nɛ̀ GASA WAN tɔ̧ɔ̧ so wen ha̧ a̧ hee mɔ'ɔ ga: «Nin-mɛ tɛ duk nɛ́ Israɛl.»#Ku̧u̧ 32.29; 35.10 32Elii mboo fara-ɗafi-sɔ̧ ko GASA WAN woyo nɛ̀ o ta nɔ‘i, ɓɛɛ za̧ kɔ̧ nɛ̀ nyɛma mɛ ba kpáná-yí ɓu-zua-yiitoo zik kpa. 33A̧ aa gua, a̧k ndai'i, ɓɛɛ kai kpoo-aa a zu gua'i. 34A̧ tɔ̧a̧: «Ɛ̀nɛ̀ á yì dun kpánà naar, ɓɛɛ ɛ̀nɛ̀ gbáí a zu kpoo-sɔ̧ in gua.» A̧ tɔ̧ɔ̧ woyo: «Ɛ̀nɛ̀ gbáí mbe-a.» Ɓɛɛ wa gbai war yiitoo. A̧ tɔ̧a̧ war taar woyo; ɓɛɛ wa gbai war taar. 35Yì foka dam fara-ɗafi-sɔ̧, ɓɛɛ dun kɔ̧‘i mbɛt.
36Nɛ̀ ŋgimbi ha̧a̧mɔ hɔa, wi-tɔ̧-wen oi nú Sɔ̧ Elii ɗɔŋa pii ti, ɓɛɛ tɔ̧: «GASA WAN Sɔ̧ ko Abraham, Sɔ̧ ko Izak in Sɔ̧ ko Israɛl, ɛ̀nɛ̀ dé ha̧ wa mɛ iŋ sɔsɔɔ‘e, ɛ́nɛ́ nɛ́ Sɔ̧ sɛn Israɛl, in ha̧ wa mɛ iŋ‘e, mi nɛ wi-de-tom k’ɛ́nɛ́, mi dee o mɔɔ nɔ'ɔ lɛŋ nɛ̀ wen k’ɛ́nɛ́. 37Ɛ̀nɛ̀ kífí nú ha̧‘m, GASA WAN; ɛ̀nɛ̀ kífí nú ha̧ o wi nɔ'ɔ mɛ iŋ ndé, Sɔ̧ nɛ́ ɛ́nɛ́ GASA WAN, nɛ́ ɛ́nɛ́ a̧ zik see dukbíí k’ɛ́nɛ́ pii ɗoŋ pii tɛ‘nɛ́.»
38Wee ko GASA WAN tika nù, ɓɛɛ dɔ kpoo-sɔ̧, gua, o ta in fuunu, ɓɛɛ yì ɔ̧si kɔ kɔ̧ lɛŋ. 39Tɛ zɔka mɔ‘i, dukbíí nɛ̀ oi-aa guu yí nù, ɓɛɛ tɔ̧: «GASA WAN nɛ́ Sɔ̧! GASA WAN nɛ́ Sɔ̧!»
40Elii tɔ̧ɔ̧ ha̧ wa: «Ɛ̀nɛ̀ káí o wi-tɔ̧-wen oi nú Sɔ̧ Bal! Ká ŋma kpɔk yu mɔ yak na!» Ɓɛɛ wa kai wa. Elii kaia wa zir si kɔ̧ gboŋgo Kisɔŋ, ɓɛɛ a̧ gɔn ger-wa hi̧i̧.
Pia-ɗoŋ kó kórò
41Elii tɔ̧ɔ̧ ha̧ Akab: «Mɛ̀ dáŋ, mɛ̀ nyɔ́ŋ mɔ, a̧ mɛ̀ nɔ́ mɔ, wen kórò a̧ dik'i.» 42Akab daŋa mɛ nyɔŋ mɔ in mɛ nɔ mɔ, ɓɛɛ Elii daŋ kɔ‘i si zu kaya Karmɛl, gbɛ zugur nù ba zu pi̧ sara-ku.#Jk 5.18 43A̧ tɔ̧ɔ̧ ha̧ wi-de-tom kɔ̧-a̧: «Mɛ̀ dáŋ, mɛ̀ zɔ́k mɔ si zu gba-tɔp!»
A̧ daŋa zɔk mɔ, ɓɛɛ a̧ tɔ̧: «Ŋma mɔ bo na.» Nɛ́ war mɔɔrɔ-ɗoŋ-yiitoo a̧ Elii tɔ̧ɔ̧ nɛnɛ ha̧ a̧ mɛ si ɗoŋ wen zɔka mɔ. 44Ɓɛɛ tɛ war mɔɔrɔ-ɗoŋ-yiitoo-aa, wi-de-tom tɔ̧a̧: «Ŋma be geɗek tura-zan, gasa-a hee er-wi ga a̧ kur nɛ̀ zu gba-tɔp'i.» Elii kifa nú: «Mɛ̀ dáŋ, mɛ̀ tɔ̧́ ha̧ Akab ndé, a̧ a̧ hɛ́r nyaŋa, a̧ a̧ zír wen ká kórò tɛɛ gɔn nú a̧.»
45Zan tu̧ tu̧u̧ siti siti wen o tura-zan in búk, ɓɛɛ gasa kórò zuɗi. Akab daŋa zu keekee-nyaŋa kɔ‘i, ɓɛɛ yak si Yizreɛl. 46Er GASA WAN duka zu Elii, ɓɛɛ Elii hɛr zaŋ, ma nɛ̀ yì ti Akab hɔ nɛnɛ Yizreɛl.
Currently Selected:
1 WANNU 18: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.