1 Pita 1

1Ndimi Pita, ntumwa wa Jesu Kirisiti.

Ku bashalugwa be Ndzimu banonga bataya bakaandama ntuthu wose we Ponto ne mu Galatiya ne mu Kapadokiya ne mu Ezhiya ne mu Bhitiniya, 2bakashalugwa ngozibila mbeli kwe Ndzimu Tate, bakayengemadziwa nge Meya yakayengemala, kuhwa Jesu Kirisiti kuti munyasiwe nge malopa awe:

Ngoni ne kunyalala ngakuwande pakati kwenyu.

Galabgwe kunotjila

3Ngakukudziwe Ndzimu kakale bali Tate ba She wedu Jesu Kirisiti! Nge ngoni dzabo hwulu, takazwagwa butshwa mu kugalabgwe kunotjila, nge kumusiwa kwa Jesu Kirisiti mu bafi, 4ngekugala thaka tjisingalobe, tjisina shambgwa, kakale tjisingafubale, tjamakabigigwa kudzimu, 5imwi bavikiligwa nge masimba e Ndzimu, nge bugalimoyo kuyitila jidzo lakalindila zumbunugwa mu nsi we bupelo.

6Shathani muna ikoku, nenguba mu nsi uno mungadziyila kushomanana nge ndiko dzakasiyana siyana, 7kuti ndizo malebeswa e bugalimoyo gwenyu guna themba inopinda ye golide inoti nenguba iloba, koga inolikiwa nge moto, sa ikokobo bugalimoyo gwenyu gungabe mbhayilo mu kukudza ne kumilidzila pezhugwi ne kutetiwa mu kuzumbunugwa kwa Jesu Kirisiti. 8Nenguba musakambona, muna ludo munli, nenguba musingambone sangwenu mogalamoyo munli, mushatha kunotjenamisa, kukulu kwazo. 9Moshatha ngobe muamutjila mbuzilo ye bugalimoyo gwenyu, ilo jidzo lenyu.

10Balebesambeli bakaleba ngekwe ngoni dzakabe dzowobe dzenyu, bakashakisisa kakale bakabhuzwisisa ngekwe jidzo ileli. 11Bakabhuzwisisa kuti kowobe kwakatini kene nsi upi unotjenesiwa nge meya ya Kirisiti imubali, ha ilebesambeli ngekwe kudziyidziwa kwa Kirisiti nenge kukudziwa kunowotobela. 12Bakazumbunuligwa kuti bakabe basingazwithamile, koga bakabe bethamila imwi, mu zwithu izwezwi zwamunobudziwa misi ino ndi ibabo bakasumikila ndebo mbuya kumuli nge Meya yakayengemala yakatumwa idwa kudzimu, ili izo zwithu batumwa be kudzimu zwabagala beshaka kubona.

Jenjedzo ngekwe butjilo gwe buyengemali

13Ndizo, lulwamisani njalakang'wa dzenyu kushinga, muzwibhate. Kugalabgwe kwenyu ngakube mu ngoni dzinozha kumuli mu kuzumbunugwa kwa Jesu Kirisiti. 14Se bana banohwa, musitjayendidzane ne njemulo dzinodwa mu kushaya luzibo kwenyu kwa ntolo. 15Koga, sa iye wakamudana ali n'yengemali, ibeni bayengemali namwibo, mu tjimwe ne tjimwe tjamunothama; 16#Zwipo 11:44, 45; 19:2sekwa kwakakwagwa, kuyi “Yengemalani, nge kuti imi ndakayengemala.”

17Ha mudana muti Tate bedu, ibo banosumikilisa mmwe ne mmwe nge mishingo iye kuzhe kwe shalaulo, mutjilile mu kutja Ndzimu mu misi yose ye butaya gwenyu mu shango. 18Moziba kuti makadzutunugwa mu mipanga isina nshingo yamakadiyiwa ndi botate benyu. Amuzodzutunugwa nge zwithu zwinoloba se siliva ne golide, 19koga makadzutunugwa nge malopa anodika kwazo a Kirisiti, sa iyawaje e pkhwizana isina bulema kene tjifo. 20Wakagala abigigwa nshingo iwoyu shango isathu ikabambiwa, koga kazumbunugwa mu bupelo gwe misi nge kwenyu. 21Makagalamoyo mu Ndzimu ndiye, iwo wakammusa mu bafi ukampa gudzo, ndizo bugalimoyo ne kugalabgwe kwenyu zwimu Ndzimu.

22Sekwa makatjenapadza meya dzenyu nge kuhwa malebeswa, kuti ndizo mube nge ludo gwakalulwama mu zwikamu, danani nge malebeswa nge moyo yenyu yose. 23Makazwagwa butshwa, kusi nge mbewu ye nyama inobola, koga nge mbewu isingabole, ilo dama linotjila kakale ligelile tjose le Ndzimu.

24 # Isaya 40:6-8 Ngoti kwakakwagwa kuyi, “Bathu bose banonga bushwa,

nenge bubuya gwabo gonga luba le shango.

Bushwa goswabiswa nge zhuba, ngono luba likawa,

25koga dama la She ligele nge kusingapele tjose.” Dama ilelo i ndebo mbuya yamakasumikiligwa.

Currently Selected:

1 Pita 1: KBTP

Highlight

Copy